Read Akha Uˬ duˬ 18 Bible Online

Uˬ duˬ 18 - Akha bible

Uˬ duˬ 18

¹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

³Naw maꞈ jawˇ yaꞈ-euˬ Iˇjiˇtuˆ miˇ kʼahˬ-ahˇ jawˇ-eu tsawˇ haˬ deuˬ loꞈ-ehˇ taˬ gʼeh. Ngaˇ naw maꞈ-ahˇ bi jawˇ-eu lehˇ gʼeh-eu Kaˬnaˬ miˇ kʼahˬ laꞈ kʼoeˇ jawˇ-eu tsawˇ haˬ deuˬ loꞈ-ehˇ taˬ mˇ.

⁴Ngaˬ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ-awˇ, ngaˇ kʼaˇ bi mˇ-eu jeˬ naw maꞈ mˇ-awˬ. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁵Naw maꞈ-ahˇ ngaˇ biꞈ taꞈ-euˬ zahˇ dawˬ kʼoꞈ dawˬ deuˬ-ahˇ caw teh-awˇ yaw dehꞈ dehꞈ-awˬ. Kʼoeˇ loꞈ-ehˇ jahˇ naˇ, naw maꞈ yaw dehꞈ ya dehꞈ tehꞈ-a. Ngaˇ-aˬ Sahˬpaˬ Miˬyehˇ ma.”

⁶Zahˇ sahˇ kʼoꞈ heu deuˬ-aˬ, Sahˬpaˬ Miˬyehˇ neh biꞈ-euˬ zahˇ sahˇ kʼoꞈ deuˬ meh. Yawˬ ha-euˬ aˬ yuiꞈ aˬ nyiˇ tsaˬ-eu tsawˇ haˬ nehˬ-ehˇ maˬ ya yuꞈ taꞈ-a.

⁷Yawˬ ha-euˬ aˬ ma nehˬ-ehˇ yuꞈ taꞈ-eu laꞈ kʼoeˇ, yawˬ ha-euˬ aˬ da-ahˇ yehˬ bawˬ sehˇ lu-ehˇ maˬ ya gʼeh-a. Yawˬ ha-euˬ aˬ ma tsi tsi ni gʼeh-eu gʼaˬ-ahˇ maˬ ya bahˬ-a.

⁸Yawˬ ha aˬ da-euˬ ma nyiˇ deuˬ nehˬ-ehˇ yuꞈ taꞈ-eu laꞈ kʼoeˇ, yawˬ ha aˬ da-ahˇ yehˬ bawˬ sehˇ lu-ehˇ ma ya gʼeh-a.

⁹Yawˬ ha-euˬ dmˇ ma nehˬ-ehˇ maˬ ehˇ, ma caw dmˇ ma nehˬ-ehˇ maˬ ehˇ, yawˬ ha nehˬ-ehˇ tiˬ nymˇ dahˬ laꞈ kʼoeˇ jawˇ huiˬ laꞈ-euˬ maˬ kaˬ, tiˬ gʼaˬ tiˬ gaˇ jawˇ huiˬ laꞈ-euˬ maˬ kaˬ, maˬ ya yuꞈ taꞈ-a.

¹⁰Yawˬ ha-euˬ oeˬ ma nehˬ-ehˇ yuꞈ taꞈ-eu laꞈ kʼoeˇ, yawˬ haˇ yawˬ ha yehˬ bawˬ sehˇ lu-ehˇ maˬ ya gʼeh-a.

¹¹Yawˬ ha nehˬ-ehˇ tiˬ ma baw zaˬ maˬ ngeuˇ-eu yawˬ ha-euˬ dmˇ ma nehˬ-ehˇ maˬ ya yuꞈ taꞈ-a. Kʼoeˇ gʼaˬ kʼawꞈ, yawˬ ha-euˬ dmˇ ma pyeuꞈ-eu meh.

¹²Yawˬ ha-euˬ aˬ kʼoˬ nehˬ-ehˇ maˬ ya yuꞈ taꞈ-a.

¹³Yawˬ ha-euˬ aˬ mui nehˬ-ehˇ maˬ ya yuꞈ taꞈ-a.

¹⁴Yawˬ ha-euˬ aˬ uiˬ, aˬ zawˇ, aˬ gʼoe, heu deuˬ-euˬ miˬ zaˬ deuˬ nehˬ-ehˇ maˬ ya yuꞈ taꞈ-a.

¹⁵Yawˬ ha-euˬ kuiˬ ma nehˬ-ehˇ maˬ ya yuꞈ taꞈ-a.

¹⁶Yawˬ ha-euˬ aˇ doˆ-euˬ miˬ zaˬ nehˬ-ehˇ maˬ ehˇ, yawˬ ha aˬ nyiˇ-euˬ miˬ zaˬ nehˬ-ehˇ maˬ ehˇ, maˬ ya yuꞈ taꞈ-a.

¹⁷Yawˬ ha nehˬ-ehˇ yuꞈ taꞈ haw-euˬ zaˬ miˬ zaˬ tiˬ gʼaˬ-euˬ aˬ buˇ nehˬ-ehˇ maˬ ehˇ, oeˬ ma nehˬ-ehˇ maˬ ehˇ, maˬ ya yuꞈ taꞈ-a. Aˬ buˇ hawˇ-eu oeˬ ma kʼoeˇ-aˬ, zaˬ miˬ zaˬ kʼoeˇ gʼaˬ-euˬ zaˬ deuˬ pyeuꞈ-eu miˇ neh, nawˬ-ahˇ taꞈ-awˇ, kʼoeˇ loꞈ-ehˇ jahˇ naˇ, bahˬ-eu meh.

¹⁸Yawˬ ha-euˬ miˬ zaˬ yaw dehꞈ kʼaˇ dehꞈ ngeh keuˆ ni, yawˬ ha-euˬ ciˇ ma-ahˇ maˬ ya sheuˬ-a.

¹⁹Ba la mawˇ luꞈ-eu zaˬ miˬ zaˬ nehˬ-ehˇ maˬ ya yuꞈ taꞈ-a. Aˬ jeˬ miˇ neh ehˇ naˇ, zaˬ miˬ zaˬ kʼoeˇ gʼaˬ maˬ shawˇ-a.

²⁰Aˬ cawˬ-euˬ miˬ zaˬ nehˬ-ehˇ maˬ ya yuꞈ taꞈ-a. Kʼoeˇ loꞈ-ehˇ jahˇ naˇ, yawˬ ha gʼaˬ maˬ shawˇ-eu tsawˇ haˬ pyeuꞈ-iˇ-eu meh.

²¹Miˬ dzaˬ-ahˇ dzah puiˆ-awˇ, Moˇlehˆ miˬ yehˇ-ahˇ bi damˬ nehˬ-eu gʼaˇ duˬ, yaw ha-euˬ aˬ buˇ aˬ li maˬ ya biꞈ-a. Aˬ jeˬ miˇ neh ehˇ naˇ, kʼoeˇ loꞈ-ehˇ jahˇ-eu jeˬ-aˬ, Sahˬpaˬ Miˬyehˇ lehˇ kuˇ-eu Miˬyehˇ-euˬ tsawˇ myahˇ-ahˇ yehˬ bawˬ sehˇ lu-ehˇ gʼeh gaˇ duˇ-eu meh.

²²Kʼaˬ dzeˇ zaˬ cawˬ cawˬ maˬ ya yuꞈ taꞈ-a. Kʼoeˇ loꞈ-ehˇ jahˇ gaˇ Miˬyehˇ maˬ haw nahˇ-a.

²³Kʼaˬ dzeˇ zaˬ maˬ kaˬ, zaˬ miˬ zaˬ maˬ kaˬ, jeˬ zaˬ nehˬ-ehˇ maˬ ya yuꞈ taꞈ-a. Kʼoeˇ loꞈ-ehˇ yaw jawꞈ jeˬ mˇ-eu tsawˇ haˬ-aˬ, maˬ shawˇ-eu tsawˇ haˬ pyeuꞈ-eu meh.

²⁴Heu deuˬ-ahˇ mˇ-eu laꞈ kʼoeˇ, yawˬ haˇ yawˬ ha maˬ shawˇ-eu tsawˇ haˬ bi pyeuꞈ-iˇ ni naw maꞈ taˬ jahˇ. Naw maꞈ le luꞈ-eu miˇ kʼahˬ-ahˇ jawˇ-eu lawˇ ciꞈ zaˬ deuˬ kʼoeˇ loꞈ-ehˇ mˇ-awˇ, yawˬ haˇ yawˬ ha laˆ jawꞈ-eu meh. Miˇ kʼahˬ kʼoeˇ kʼahˬ laꞈ kʼoeˇ naw maꞈ uˇ leˇ nya ni, aˬ yawꞈ maꞈ-ahˇ Sahˬpaˬ Miˬyehˇ teh dzeh-eu lehˇ gʼeh luꞈ meh.

²⁵Aˬ yawꞈ maꞈ kʼoeˇ loꞈ-ehˇ mˇ-eu baˬ da neh, miˇ kʼahˬ kʼoeˇ kʼahˬ jawꞈ dui dui-eu miˇ kʼahˬ pyeuꞈ laˇ taˬ-euˬ meh. Kʼoeˇ miˇ neh, miˇ kʼahˬ kʼoeˇ kʼahˬ-ahˇ Sahˬpaˬ Miˬyehˇ kʼehˬ nehˬ kʼaˆ nehˬ-awˇ, miˇ kʼahˬ kʼoeˇ kʼahˬ tsawˇ haˬ kʼoeˇ deuˬ-ahˇ uˬ pehꞈ pehꞈ doˆ dzeh tehꞈ-a.

²⁶Naw maꞈ Iˇsaˬleˬlaˆ tsawˇ haˬ deuˬ maˬ ehˇ, naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, jawꞈ dui dui-eu gaˇ heu deuˬ maˬ mˇ ni, Sahˬpaˬ Miˬyehˇ-euˬ zahˇ dawˬ kʼoꞈ dawˬ hawˇ-eu, mehˬ nehˬ tsoˆ nehˬ-eu jeˬ-ahˇ naˇ haˬ geuꞈ-awˬ.

²⁷Naw maꞈ-euˬ mehˬ hu, miˇ kʼahˬ kʼoeˇ kʼahˬ-ahˇ jawˇ luꞈ-eu tsawˇ haˬ deuˬ, jawꞈ dui dui-eu gaˇ heu deuˬ mˇ-awˇ, miˇ kʼahˬ kʼoeˇ kʼahˬ-ahˇ laˆ jawꞈ-euˬ meh.

²⁸Miˇ kʼahˬ kʼoeˇ kʼahˬ-ahˇ naw maꞈ laˆ jawꞈ naˇ, naw maꞈ mehˬ hu jawˇ luꞈ-eu tsawˇ jeuˬ kʼoeˇ jeuˬ-ahˇ uˬ pehꞈ pehꞈ doˆ dzeh nehˬ-euˬ loꞈ-ehˇ, naw maꞈ-ahˇ kʼawꞈ, miˇ kʼahˬ kʼoeˇ kʼahˬ uˬ pehꞈ pehꞈ doˆ dzeh tehꞈ-a.

²⁹Jawꞈ dui dui-eu gaˇ heu deuˬ mˇ-eu tsawˇ haˬ a geu gʼaˬ maˬ kaˬ, Sahˬpaˬ Miˬyehˇ-euˬ tsawˇ haˬ lehˇ maˬ paˇ sawˇ nya meh lehˇ naw maꞈ siˬ nya meh.

³⁰Kʼoeˇ naˇ, Sahˬpaˬ Miˬyehˇ ehˇ-eu, “Ngaˬ neh biꞈ taˬ-euˬ dawˬ deuˬ-ahˇ naw maꞈ caw teh-awˬ. Naw maꞈ-euˬ mehˬ hu, miˇ kʼahˬ kʼoeˇ kʼahˬ laꞈ kʼoeˇ jawˇ luꞈ-eu tsawˇ haˬ kʼoeˇ deuˬ loꞈ-ehˇ taˬ gʼeh. Yawˬ haˇ yawˬ ha maˬ shawˇ-eu tsawˇ haˬ bi pyeuꞈ laˇ ni, gaˇ kʼoeˇ deuˬ naw maꞈ taˬ mˇ. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.”