Read Akha Uˬ duˬ 2 Bible Online

Uˬ duˬ 2 - Akha bible

Uˬ duˬ 2

¹Tsawˇ haˬ tiˬ gʼaˬ na Sahˬpaˬ Miˬyehˇ-ahˇ dzaˬ la gʼo cehˇ lawˇ mawꞈ naˇ, cehˇ pyuˇ jeˬ hu ya lehˬ meuˇ-awˇ, saˬ loˬ tsiˇ hawˇ-eu yaw saw jeˬ ya keuˬ meh.

²Kʼoeˇ naˇ, Aˬloˬ-euˬ aˬ li piˇ ma deuˬ jawˇ gaˇ, cehˇ meu kʼoeˇ ya yuˇ laꞈ meh. Aˬ yuiꞈ geuꞈ-awˇ gaˇ mˇ luꞈ-eu piˇ ma gʼaˬ, cehˇ meu kʼoeˇ dawˬ tawˆ luꞈ-euˬ dah zaˇ, cehˇ meu ti tsuˆ tsuˆ doˆ-awˇ, saˬ loˬ tsiˇ hawˇ-eu yaw saw jeˬ nehˬ-ehˇ, lawˇ duˬ kʼoeˇ taˆ puiˆ-awˇ, ya lawˇ meh. Heu loꞈ-ehˇ lawˇ-euˬ dzaˬ dzaˬ dawˇ dawˇ lawˇ-eu yaw saꞈ-ahˇ, Sahˬpaˬ Miˬyehˇ nui ma tsaˬ-eu meh.

³Dzehˬ laˇ-euˬ cehˇ meu deuˬ-ahˇ, piˇ ma deuˬ ya geuꞈ meh. Cehˇ meu kʼoeˇ-aˬ, Sahˬpaˬ Miˬyehˇ-ahˇ lawˇ nehˬ gʼaˬ-euˬ baˬ da neh, muiˬ dui shawˇ dui dui-eu meh.

⁴Miˬ dzaˬ tsawˬ bu-ahˇ ba jaꞈ-euˬ kaˬ muˇ lawˇ ngeh, cehˇ meu-ahˇ saˬ loˬ tsiˇ keuˬ-awˇ jahˇ taˬ-euˬ, tuˇ jawˬ ni gʼeh-eu dehˬ tseˬ maˬ ahˇ-eu kaˬ muˇ maˬ ehˇ, saˬ loˬ tsiˇ lehꞈ-euˬ dehˬ tseˬ maˬ ahˇ-eu kaˬ muˇ aˇ yaˆ yaˆ zaˬ maˬ ehˇ, geuꞈ nya meh.

⁵Mui za kʼoeˇ taˆ laˆ jaꞈ-euˬ kaˬ muˇ lawˇ ngeh, kaˬ muˇ kʼoeˇ-ahˇ, cehˇ meu hawˇ-eu saˬ loˬ tsiˇ keuˬ-awˇ, dehˬ tseˬ maˬ dawˆ ni ya jahˇ meh.

⁶Kaˬ muˇ kʼoeˇ lawˇ ngeh, laˆ meuˇ laˆ loeˇ-awˇ, tsiˇ ya shehˆ daˆ meh.

⁷Mui za oeˬ lahˬ laꞈ kʼoeˇ jahˇ jaꞈ-euˬ kaˬ muˇ lawˇ ngeh, kaˬ muˇ kʼoeˇ-ahˇ, cehˇ meu hawˇ-eu saˬ loˬ tsiˇ neh ya jahˇ meh.

⁸Kaˬ muˇ kʼoeˇ lawˇ-eu gʼaˇ duˬ, Sahˬpaˬ Miˬyehˇ jawˇ gaˇ yuˇ laꞈ ngeh, piˇ ma-ahˇ ya biꞈ-awˇ, piˇ ma gʼaˬ, kaˬ muˇ kʼoeˇ lawˇ duˬ jaˆ gaˇ ya yuˇ gʼeh meh.

⁹Kaˬ muˇ kʼoeˇ dawˬ tawˆ luꞈ-euˬ dah zaˇ, kaˬ muˇ ui cuiˆ aˬ yawꞈ yuˇ doˆ-awˇ, lawˇ duˬ kʼoeˇ taˆ dzah puiˆ-eu laꞈ kʼoeˇ, kaˬ muˇ kʼoeˇ dawˬ tawˆ luꞈ, Sahˬpaˬ Miˬyehˇ-ahˇ ya lawˇ nehˬ meh. Kʼoeˇ loꞈ-ehˇ lawˇ-euˬ dzaˬ dzaˬ dawˇ dawˇ lawˇ-eu yaw saꞈ-ahˇ, Sahˬpaˬ Miˬyehˇ nui ma tsaˬ-eu meh.

¹⁰Dzehˬ laˇ-euˬ kaˬ muˇ deuˬ-ahˇ piˇ ma deuˬ ya geuꞈ meh. Kaˬ muˇ kʼoeˇ-aˬ, Sahˬpaˬ Miˬyehˇ-ahˇ lawˇ gʼaˬ-euˬ dzaˇ pyeuꞈ-eu miˇ neh, muiˬ dui shawˇ dui dui-eu meh.

¹¹Dzaˬ la gʼo cehˇ lawˇ gaˇ taꞈ leˇ-eu lawˇ-eu jeˬ Sahˬpaˬ Miˬyehˇ-ahˇ naw maꞈ aˬ geu jeˬ lawˇ nehˬ-eu maˬ kaˬ, dehˬ tseˬ maˬ ya bi keuˬ-a. Aˬ jeˬ miˇ neh ehˇ naˇ, dehˬ tseˬ maˬ ehˇ, byaˬ byaˬ uiˇ maˬ ehˇ, miˬ dzaˬ-ahˇ puiˆ-awˇ Sahˬpaˬ Miˬyehˇ-ahˇ maˬ lawˇ nehˬ kʼmˬ-a.

¹²Aˬ yawꞈ kʼoꞈ yawꞈ, keuˆ beh beh le-euˬ aˇ siˬ aˇ lu deuˬ, Sahˬpaˬ Miˬyehˇ-ahˇ naw maꞈ ya lawˇ nehˬ meh. Ehˇ kʼawꞈ, lawˇ duˬ kʼoeˇ taˆ dzah puiˆ-awˇ maˬ ya lawˇ-a.

¹³Dzaˬ la gʼo cehˇ lawˇ-eu aˬ geu poˆ maˬ kaˬ, saˬ deuꞈ ya dawˆ meh. Aˬ jeˬ miˇ neh ehˇ naˇ, saˬ deuꞈ-aˬ, naw maꞈ hawˇ-eu Miˬyehˇ-euˬ yaw kaˬ-ahˇ jaˆ-eu dawˬ ma saˇ jaˇ-euˬ dah zaˇ pyeuꞈ-eu meh. Naw maꞈ kʼaˇ lawˇ kʼaˇ shehˇ-eu jeˬ dawˬ tawˆ luꞈ laꞈ kʼoeˇ, saˬ deuꞈ ya bi keuˬ meh.

¹⁴Keuˆ beh beh le-euˬ aˇ siˬ aˇ lu deuˬ naw maꞈ yuˇ laꞈ-awˇ, Sahˬpaˬ Miˬyehˇ-ahˇ lawˇ ngeh, cehꞈ nyawˬ lawˇ-awˬ.

¹⁵Cehꞈ nyawˬ kʼoeˇ-ahˇ saˬ loˬ tsiˇ keuˬ-awˇ, dzaˇ muiˇ dzaˇ sawˇ dawˆ-awˬ.

¹⁶Saˬ loˬ tsiˇ keuˬ taˬ-euˬ cehꞈ nyawˬ kʼoeˇ deuˬ dawˬ tawˆ luꞈ-euˬ dah zaˇ, piˇ ma gʼaˬ cehꞈ nyawˬ ui cuiˆ yuˇ doˆ-awˇ, dzaˇ muiˇ dzaˇ sawˇ kʼoeˇ deuˬ dawˬ tawˆ luꞈ nehˬ-ehˇ ya keuˬ puiˆ meh. Heu-aˬ, Sahˬpaˬ Miˬyehˇ-ahˇ lawˇ nehˬ-eu dzaˬ dzaˬ dawˇ dawˇ lawˇ-eu jeˬ pyeuꞈ-eu meh.