Read Akha Uˬ duˬ 20 Bible Online

Uˬ duˬ 20 - Akha bible

Uˬ duˬ 20

¹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Naw maꞈ maˬ ehˇ, naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, Moˇlehˆ miˬ yehˇ-ahˇ yawˬ ha-euˬ zaˬ biꞈ nehˬ-eu tsawˇ haˬ a geu gʼaˬ maˬ kaˬ, sehꞈ gaˇ ya daˬ tehꞈ-a. Tsawˇ haˬ aˇ maꞈ dawˬ tawˆ luꞈ, aˬ yawꞈ-ahˇ kʼaˬ lo neh ya biˬ sehꞈ tehꞈ-a.

³Tsawˇ haˬ tiˬ gʼaˬ na, yawˬ ha-euˬ zaˬ tiˬ gʼaˬ Moˇlehˆ miˬ yehˇ-ahˇ biꞈ-eu laꞈ kʼoeˇ, muiˬ-eu shawˇ-eu ngaˬ-euˬ Sehˬ gʼawˆ-ahˇ laˆ jawꞈ-awˇ, muiˬ-eu shawˇ-eu ngaˬ-euˬ tsawˇ myahˇ-ahˇ yehˬ bawˬ sehˇ lu-ehˇ gʼeh naˇ, aˬ yawꞈ-ahˇ ngaˇ byehˇ tsehˆ tsehˆ-awˇ, ngaˬ-euˬ tsawˇ haˬ lehˇ maˬ paˇ sawˇ ma.

⁴Ehˇ kʼawꞈ, aˬ yawꞈ kʼoeˇ loꞈ-ehˇ mˇ gʼaˬ ngeh, tsawˇ haˬ aˇ maꞈ aˇ muˇ dawˬ tawˆ luꞈ aˬ yawꞈ-ahˇ maˬ sehꞈ ni, maˬ siˬ maˬ mawˇ-eu geuꞈ-awˇ jawˇ naˇ,

⁵tsawˇ haˬ kʼoeˇ gʼaˬ-ahˇ maˬ ehˇ, aˬ yawꞈ-euˬ nymˇ kʼahˬ zaˬ dawˬ tawˆ luꞈ-ahˇ maˬ ehˇ, aˬ yawꞈ ngaˬ-ahˇ saˇ jaˇ puiˬ-awˇ, Moˇlehˆ miˬ yehˇ-ahˇ uˬ duˬ tahˬ gaˇ kʼaˇ gm leˇ-euˬ tsawˇ haˬ deuˬ-ahˇ maˬ ehˇ, ngaˇ byehˇ dzeh ma. Aˬ yawꞈ maꞈ-ahˇ ngaˬ-euˬ tsawˇ haˬ lehˇ ngaˇ maˬ paˇ sawˇ ma.

⁶“Nyiˇ paˬ shaˆ ma deuˬ-ahˇ laꞈ jeuˬ kʼaˇ shaˇ-eu tsawˇ haˬ deuˬ-ahˇ ngaˇ byehˇ dzeh-awˇ, ngaˬ-euˬ tsawˇ haˬ lehˇ maˬ paˇ sawˇ nehˬ ma.

⁷Naw maꞈ yaw muiˬ yaw shawˇ shawˇ-ehˇ dehꞈ-awˬ. Aˬ jeˬ miˇ neh ehˇ naˇ, ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁸Ngaˬ-euˬ zahˇ dawˬ kʼoꞈ dawˬ deuˬ-ahˇ naw maꞈ naˇ haˬ geuꞈ-awˬ. Aˬ jeˬ miˇ neh ehˇ naˇ, ngaˇ-aˬ, Sahˬpaˬ Miˬyehˇ pyeuꞈ-awˇ, naw maꞈ-ahˇ bi muiˬ bi shawˇ laˇ-eu gʼaˬ pyeuꞈ-eu ma.”

⁹Zahˇ sahˇ kʼoꞈ heu deuˬ-aˬ, Sahˬpaˬ Miˬyehˇ neh biꞈ-euˬ zahˇ sahˇ kʼoꞈ pyeuꞈ-eu meh. Yawˬ ha-euˬ aˬ ma aˬ da-ahˇ yaˬ kʼehˇ yaˬ-eu tsawˇ haˬ-aˬ, sehꞈ nehˬ gaˇ ya daˬ tehꞈ-a. Aˬ yawꞈ-aˬ, yawˬ haˇ yawˬ ha ya shiˇ ni mˇ-eu meh.

¹⁰Iˇsaˬleˬlaˆ tsawˇ haˬ cawˬ cawˬ, kʼaˬ dzeˇ zaˬ tiˬ gʼaˬ aˬ cawˬ-euˬ miˬ zaˬ-ahˇ bahˬ naˇ, bahˬ-euˬ kʼaˬ dzeˇ zaˬ hawˇ-eu zaˬ miˬ zaˬ kʼoeˇ nyiˬ gʼaˬ luꞈ, sehꞈ nehˬ gaˇ ya daˬ tehꞈ-a.

¹¹Tsawˇ haˬ tiˬ gʼaˬ na, yawˬ ha aˬ da-euˬ miˬ zaˬ tiˬ gʼaˬ na nehˬ-ehˇ bahˬ-eu laꞈ kʼoeˇ, yawˬ ha aˬ da-ahˇ yehˬ bawˬ sehˇ lu-ehˇ gʼeh naˇ, bahˬ-euˬ kʼaˬ dzeˇ zaˬ hawˇ-eu zaˬ miˬ zaˬ kʼoeˇ nyiˬ gʼaˬ luꞈ, sehꞈ nehˬ gaˇ ya daˬ tehꞈ-a.

¹²Tsawˇ haˬ tiˬ gʼaˬ na, yawˬ ha-euˬ kuiˬ ma nehˬ-ehˇ joe naˇ, nyiˬ gʼaˬ luꞈ sehꞈ nehˬ gaˇ ya daˬ tehꞈ-a. Aˬ yawꞈ nyaꞈ-aˬ, jawꞈ dui dui-eu jeˬ mˇ-awˇ, yawˬ haˇ yawˬ ha ya shiˇ ni mˇ-euˬ meh.

¹³Kʼaˬ dzeˇ zaˬ tiˬ gʼaˬ kʼaˬ dzeˇ zaˬ yawˬ gʼaˬ yawˬ nehˬ-ehˇ joe naˇ, jawꞈ dui dui-eu jeˬ mˇ-euˬ miˇ neh, nyiˬ gʼaˬ luꞈ sehꞈ nehˬ gaˇ ya daˬ tehꞈ-a. Aˬ yawꞈ nyaꞈ-aˬ, yawˬ haˇ yawˬ ha ya shiˇ ni mˇ-euˬ meh.

¹⁴Tsawˇ haˬ tiˬ gʼaˬ na, aˬ ma hawˇ-eu aˬ buˇ tsaˬ-eu zaˬ miˬ zaˬ nyiˬ gʼaˬ luꞈ-ahˇ sheuˬ naˇ, aˬ yawꞈ maꞈ smˇ gʼaˬ luꞈ miˬ dzaˬ-ahˇ dzah puiˆ sehꞈ gaˇ ya daˬ tehꞈ-a. Aˬ jeˬ miˇ neh ehˇ naˇ, aˬ yawꞈ maꞈ yehˬ bawˬ sehˇ lu-ehˇ dehꞈ-eu meh. Kʼoeˇ loꞈ-ehˇ gʼeh-eu jeˬ naw maꞈ laꞈ kʼoeˇ maˬ ya bi doˆ laˇ-a.

¹⁵Kʼaˬ dzeˇ zaˬ tiˬ gʼaˬ jeˬ zaˬ tiˬ mawˇ nehˬ-ehˇ joe naˇ, tsawˇ haˬ kʼoeˇ gʼaˬ hawˇ-eu jeˬ zaˬ kʼoeˇ mawˇ-aˬ, sehꞈ nehˬ gaˇ ya daˬ tehꞈ-a.

¹⁶Zaˬ miˬ zaˬ tiˬ gʼaˬ na, jeˬ zaˬ tiˬ mawˇ nehˬ-ehˇ joe-eu lehˇ leh jeh naˇ, zaˬ miˬ zaˬ kʼoeˇ gʼaˬ hawˇ-eu jeˬ zaˬ kʼoeˇ mawˇ-aˬ, sehꞈ nehˬ gaˇ ya daˬ tehꞈ-a. Aˬ yawꞈ nyaꞈ-aˬ, yawˬ ha kʼoeˇ taˆ shiˇ-eu jeˬ keuˆ le ni mˇ-euˬ meh.

¹⁷Tsawˇ haˬ tiˬ gʼaˬ na, yawˬ ha-euˬ dmˇ ma tsi tsi ni gʼeh-eu gʼaˬ-ahˇ maˬ ehˇ, tiˬ ma baw zaˬ maˬ ngeuˇ-eu yawˬ ha-euˬ dmˇ ma nehˬ-ehˇ maˬ ehˇ, sheuˬ dahˬ dzaˬ naˇ, tsawˇ haˬ heu myaˆ ni gʼeh-eu mehˬ shi, aˬ yawꞈ nyaꞈ-ahˇ ya teh dzeh meh. Aˬ yawꞈ-aˬ, yawˬ ha-euˬ dmˇ ma-ahˇ bahˬ-eu miˇ neh, kʼaˇ keuˆ le-eu jeˬ ya daˬ meh.

¹⁸Tsawˇ haˬ tiˬ gʼaˬ na, ba la mawˇ luꞈ-eu zaˬ miˬ zaˬ tiˬ gʼaˬ nehˬ-ehˇ yuꞈ taꞈ naˇ, aˬ yawꞈ nyaꞈ nyiˬ gʼaˬ luꞈ-ahˇ, tsawˇ haˬ aˇ maꞈ aˇ muˇ laꞈ kʼoeˇ neh ya teh dzeh meh. Aˬ jeˬ miˇ neh ehˇ naˇ, muiˬ-eu shawˇ-eu jeˬ-ahˇ taꞈ leˇ-eu zahˇ sahˇ kʼoꞈ-ahˇ aˬ yawꞈ nyaꞈ mˇ bahˬ-euˬ meh.

¹⁹Tsawˇ haˬ tiˬ gʼaˬ na, yawˬ ha-euˬ aˬ kʼoˬ nehˬ-ehˇ maˬ ehˇ, yawˬ ha-euˬ aˬ mui nehˬ-ehˇ maˬ ehˇ, bahˬ naˇ, maˬ mˇ kʼmˬ-eu jeˬ mˇ-euˬ miˇ neh, kʼaˇ keuˆ le-eu jeˬ-ahˇ aˬ yawꞈ nyaꞈ ya daˬ tehꞈ-a.

²⁰Tsawˇ haˬ tiˬ gʼaˬ na, yawˬ ha-euˬ aˬ uiˬ, aˬ zawˇ, aˬ gʼoe, heu deuˬ-euˬ miˬ zaˬ-ahˇ bahˬ naˇ, aˬ yawꞈ maꞈ-ahˇ yehˬ bawˬ sehˇ lu-ehˇ gʼeh-euˬ miˇ neh, aˬ yawꞈ hawˇ-eu aˬ yawꞈ nehˬ-ehˇ bahˬ-euˬ zaˬ miˬ zaˬ kʼoeˇ gʼaˬ-aˬ, kʼehˬ nehˬ gaˇ ya daˬ tehꞈ-a. Aˬ yawꞈ nyaꞈ nyiˬ gʼaˬ luꞈ, zaˬ maˬ jawˇ le ni ziˇ ya jiˇ tehꞈ-a.

²¹Tsawˇ haˬ tiˬ gʼaˬ na, yawˬ ha aˇ doˆ-euˬ miˬ zaˬ-ahˇ maˬ ehˇ, aˬ nyiˇ-euˬ miˬ zaˬ-ahˇ maˬ ehˇ, sheuˬ naˇ, sheuˬ dahˬ dzaˬ-euˬ tsawˇ haˬ kʼoeˇ nyiˬ gʼaˬ-aˬ, zaˬ maˬ jawˇ le ni ziˇ ya jiˇ tehꞈ-a. Aˬ yawꞈ-aˬ, maˬ muiˬ maˬ shawˇ-eu jeˬ mˇ-awˇ, yawˬ ha-euˬ aˬ yuiꞈ aˬ nyiˇ-ahˇ yehˬ bawˬ sehˇ lu-ehˇ gʼeh-euˬ meh.

²²Sahˬpaˬ Miˬyehˇ ehˇ-eu, “Naw maꞈ-ahˇ ngaˇ sheuˬ uˇ gʼeh-eu lehˇ gʼeh-eu Kaˬnaˬ miˇ kʼahˬ kʼoeˇ, naw maꞈ-ahˇ uˬ pehꞈ maˬ ya pehꞈ doˆ dzeh-eu gʼaˇ duˬ, ngaˬ-euˬ zahˇ dawˬ kʼoꞈ dawˬ deuˬ hawˇ-eu, ngaˬ neh biꞈ taˬ-euˬ dawˬ deuˬ dawˬ tawˆ luꞈ-ahˇ naˇ haˬ geuꞈ-awˬ.

²³Kʼoeˇ gaˇ jawˇ-eu tsawˇ haˬ deuˬ-euˬ zahˇ sahˇ kʼoꞈ-ahˇ naw maꞈ taˬ caw teh. Miˇ kʼahˬ kʼoeˇ kʼahˬ-ahˇ naw maꞈ uˇ leˇ nya ni, lawˇ ciꞈ zaˬ kʼoeˇ deuˬ-ahˇ ngaˇ teh dzeh-eu lehˇ gʼeh-eu ma. Aˬ yawꞈ maꞈ maˬ muiˬ maˬ jaˬ-eu jeˬ tehꞈ-ehˇ mˇ-eu miˇ neh, aˬ yawꞈ maꞈ-ahˇ ngaˇ nui ma byuˇ laˇ taˬ-euˬ ma.

²⁴Ehˇ kʼawꞈ, naw maꞈ-ahˇ ngaˇ saˇ jaˇ dzaˬ taˬ-euˬ loꞈ-ehˇ, mawˇ neˇ aˬ coeˇ hawˇ-eu byaˬ byaˬ uiˇ yoeˇ-eu miˇ kʼahˬ kʼoeˇ kʼahˬ biꞈ ma. Ngaˇ-aˬ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-awˇ, tsawˇ jeuˬ heu myaˆ ni gʼeh-eu laꞈ kʼoeˇ, naw maꞈ-ahˇ ngaˇ tseˇ doˆ taˬ-euˬ ma.

²⁵Kʼoeˇ miˇ neh, jeˬ zaˬ aˇ jiˇ deuˬ laꞈ kʼoeˇ, shawˇ-eu jeˬ hawˇ-eu maˬ shawˇ-eu jeˬ naw maꞈ ya tseˇ paˆ geuꞈ meh. Maˬ shawˇ-eu jeˬ zaˬ aˇ jiˇ deuˬ taˬ dzaˬ. Ngaˬ neh maˬ shawˇ-a lehˇ ehˇ tsehˆ taˬ-euˬ jeˬ-ahˇ naw maꞈ dzaˬ naˇ, naw maꞈ maˬ shawˇ-a.

²⁶Naw maꞈ-aˬ, ngaˬ-ahˇ tehꞈ-ehˇ taꞈ leˇ-eu muiˬ-eu shawˇ-eu tsawˇ haˬ ya bi pyeuꞈ meh. Aˬ jeˬ miˇ neh ehˇ naˇ, ngaˇ-aˬ, Sahˬpaˬ Miˬyehˇ pyeuꞈ-awˇ, yaw muiˬ yaw shawˇ ma. Naw maꞈ ngaˬ-ahˇ tehꞈ-ehˇ taꞈ-eu tsawˇ jeuˬ pyeuꞈ laˇ ni, tsawˇ jeuˬ heu myaˆ ni gʼeh-eu laꞈ kʼoeˇ, naw maꞈ-ahˇ ngaˇ tseˇ doˆ taˬ-euˬ ma.

²⁷“Nyiˇ paˬ shaˆ ma deuˬ-ahˇ laꞈ jeuˬ shaˇ-eu tsawˇ haˬ aˬ geu gʼaˬ maˬ kaˬ, kʼaˬ lo neh biˬ sehꞈ gaˇ ya daˬ tehꞈ-a. Kʼoeˇ loꞈ-ehˇ kʼaˇ mˇ-eu tsawˇ haˬ aˬ geu gʼaˬ maˬ kaˬ, yawˬ haˇ yawˬ ha ya shiˇ ni mˇ gaˇ duˇ tehꞈ-a.”