Read Akha Uˬ duˬ 21 Bible Online

Uˬ duˬ 21 - Akha bible

Uˬ duˬ 21

¹Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh. “Aˬloˬ-euˬ aˬ li piˇ ma deuˬ-ahˇ heu loꞈ-ehˇ ehˇ nehˬ-awˬ. Piˇ ma geuꞈ-eu gʼaˬ-aˬ, yawˬ ha-euˬ aˇ jeuˬ aˇ ca shiˇ ngeh, tsawˇ shiˇ-ahˇ taꞈ leˇ-eu gaˇ mˇ-eu laꞈ kʼoeˇ, yawˬ ha-euˬ gʼawˇ mawˇ maˬ muiˬ maˬ shawˇ-ehˇ pyeuꞈ-iˇ ni maˬ ya jahˇ-a.

²Ehˇ kʼawꞈ, yawꞈ ha-euˬ aˬ ma aˬ da, aˬ buˇ aˬ li hawˇ-eu, mehˇ nmˇ deuˬ shiˇ ngeh maˬ ehˇ,

³yawˬ ha-euˬ nymˇ-ahˇ jawˇ-eu smˇ miˇ maˬ iˇ-euˬ yawˬ ha-euˬ dmˇ ma shiˇ ngeh maˬ ehˇ, tsawˇ shiˇ-ahˇ taꞈ leˇ-eu gaˇ mˇ nehˬ nya meh.

⁴Yawˬ ha-euˬ miˬ zaˬ paw-euˬ aˬ yuiꞈ aˬ nyiˇ deuˬ shiˇ ngeh, tsawˇ shiˇ-ahˇ taꞈ leˇ-eu gaˇ mˇ-awˇ, yawˬ ha-euˬ gʼawˇ mawˇ maˬ muiˬ maˬ shawˇ-ehˇ pyeuꞈ-iˇ ni maˬ ya jahˇ-a.

⁵“Yawˬ ha tsawˇ ngoeˇ ngoeˇ luꞈ-eu aˬ cawˬ bi siˬ-eu gʼaˇ duˬ, uˬ jehˆ jehˆ-eu maˬ ehˇ, mehˬ mahˬ tehˬ dzeh-eu maˬ ehˇ, yawˬ ha-euˬ gʼawˇ mawˇ-ahˇ laˆ tahˬ laˆ naˇ-eu jeˬ maˬ ehˇ, piˇ ma deuˬ maˬ ya jahˇ-a.

⁶Aˬ yawꞈ-aˬ, yaw muiˬ yaw shawˇ shawˇ-ehˇ ya dehꞈ-awˇ, ngaˬ-euˬ tsawˇ myahˇ-ahˇ yehˬ bawˬ sehˇ lu-ehˇ maˬ ya gʼeh-a. Aˬ yawꞈ-aˬ, ngaˬ-ahˇ dzaˬ dzaˬ dawˇ dawˇ lawˇ nehˬ-eu tsawˇ haˬ pyeuꞈ-eu baˬ da neh, ya bi muiˬ ya bi shawˇ meh.

⁷Meh maˬ laˇ geuꞈ haw-euˬ zaˬ miˬ zaˬ-ahˇ maˬ ehˇ, kʼaˬ dzeˇ zaˬ neh bi toeˬ ciˆ gʼaˬ-euˬ miˬ daꞈ-ahˇ maˬ ehˇ, miˬ kʼoꞈ-ahˇ maˬ ehˇ, piˇ ma geuꞈ-eu gʼaˬ maˬ ya sheuˬ-a. Aˬ jeˬ miˇ neh ehˇ naˇ, piˇ ma-aˬ, muiˬ-eu shawˇ-eu tsawˇ haˬ meh.

⁸Piˇ ma-aˬ, yaw muiˬ yaw shawˇ meh lehˇ tsawˇ haˬ dawˬ tawˆ luꞈ ya siˬ nya meh. Aˬ jeˬ miˇ neh ehˇ naˇ, aˬ yawꞈ-aˬ, ngaˬ-ahˇ dzaˬ dzaˬ dawˇ dawˇ lawˇ-eu tsawˇ haˬ pyeuꞈ-eu meh. Ngaˇ-aˬ, Sahˬpaˬ Miˬyehˇ ma. Ngaˇ-aˬ, muiˬ-eu shawˇ-eu gʼaˬ pyeuꞈ-awˇ, ngaˬ-euˬ tsawˇ haˬ deuˬ-ahˇ bi muiˬ bi shawˇ-eu ma.

⁹Piˇ ma-euˬ aˬ buˇ tiˬ gʼaˬ na meh maˬ laˇ pyeuꞈ-iˇ naˇ, aˬ yawꞈ-euˬ aˬ da-ahˇ aˬ yawꞈ yehˬ bawˬ sehˇ lu-ehˇ gʼeh-eu meh. Miˬ dzaˬ-ahˇ dzah puiˆ-awˇ sehꞈ nehˬ gaˇ aˬ yawꞈ ya daˬ tehꞈ-a.

¹⁰“Tseˇ doˆ-euˬ deuˬ-ahˇ lehꞈ-eu tsiˇ uˬ duˬ-ahˇ shehˆ daˆ-awˇ lehꞈ nehˬ taˬ-euˬ uˬ taꞈ, piˇ ma-euˬ dm gʼaˬ dm lmˇ deuˬ bi dm-eu gʼaˇ duˬ, gʼawˇ mawˇ a nehˬ taˬ-euˬ Piˇ ma Yaw huiˬ gʼaˬ-aˬ, aˬ myah luꞈ uˬ duˬ tsehˇ kahˇ ya kaˆ juˇ taˬ meh. Yawˬ ha tsawˇ ngoeˇ ngoeˇ luꞈ-eu gaˇ kawˆ aˬ cawˬ bi siˬ-eu gʼaˇ duˬ, yawˬ ha-euˬ mehˬ tsoeˬ cehˬ pyaˬ-eu jeˬ maˬ ya jahˇ-a.

¹¹Tsawˇ shiˇ baꞈ taˬ-euˬ jawˇ duˬ-ahˇ aˬ yawꞈ maˬ ya uˇ-iˇ-a. Yawˬ ha-euˬ aˬ ma aˬ da shiˇ taˬ-euˬ gaˇ kʼawꞈ, maˬ ya iˇ-a. Aˬ jeˬ miˇ neh ehˇ naˇ, kʼoeˇ loꞈ-ehˇ iˇ naˇ, yawˬ ha-euˬ gʼawˇ mawˇ maˬ muiˬ maˬ shawˇ-ehˇ bi pyeuꞈ-iˇ ni jahˇ gaˇ duˇ-eu meh.

¹²Muiˬ-eu shawˇ-eu ngaˬ-euˬ Sehˬ gʼawˆ-ahˇ neh doˆ-iˇ-awˇ, tsawˇ shiˇ baꞈ taˬ-euˬ nymˇ-ahˇ iˇ-eu laꞈ kʼoeˇ, ngaˬ-euˬ muiˬ-eu shawˇ-eu Sehˬ gʼawˆ-ahˇ maˬ ya laˆ jawꞈ-a. Aˬ jeˬ miˇ neh ehˇ naˇ, ngaˬ-euˬ gaˇ bi mˇ-eu gʼaˇ duˬ, aˬ yawꞈ-ahˇ tsiˇ lehꞈ-awˇ tseˇ doˆ taˬ-euˬ meh.

¹³Kʼaˬ dzeˇ zaˬ neh maˬ bi toeˬ ciˆ haw-euˬ miˬ daꞈ-ahˇ aˬ yawꞈ ya sheuˬ dahˬ dzaˬ meh.

¹⁴Miˬ coeˬ miˬ ma-ahˇ maˬ ehˇ, miˬ kʼoꞈ-ahˇ maˬ ehˇ, meh maˬ laˇ geuꞈ haw-euˬ zaˬ miˬ zaˬ-ahˇ maˬ ehˇ, aˬ yawꞈ maˬ ya sheuˬ-a. Kʼaˬ dzeˇ zaˬ neh maˬ bi toeˬ ciˆ haw-euˬ aˬ yawꞈ-euˬ aˇ jeuˬ aˇ ca pyeuꞈ-eu miˬ daꞈ-ahˇ tehꞈ-ehˇ aˬ yawꞈ ya sheuˬ dahˬ dzaˬ meh.

¹⁵Kʼoeˇ loꞈ-ehˇ maˬ ngeuˇ naˇ, yaw muiˬ yaw shawˇ tsawˇ haˬ ya bi pyeuꞈ-eu aˬ yawꞈ-euˬ zaˬ deuˬ-aˬ, maˬ muiˬ maˬ shawˇ ni pyeuꞈ-iˇ tehꞈ-a. Ngaˇ-aˬ, Sahˬpaˬ Miˬyehˇ pyeuꞈ-awˇ, Piˇ ma Yaw huiˬ gʼaˬ bi geuꞈ-eu lehˇ, tsawˇ haˬ heu myaˆ ni gʼeh-eu laꞈ kʼoeˇ, aˬ yawꞈ-ahˇ tseˇ doˆ-euˬ ma.”

¹⁶Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

¹⁷“Aˬloˬ-ahˇ heu loꞈ-ehˇ ehˇ nehˬ-awˬ. Nawˬ-euˬ zaˬ nawˬ-euˬ uˆ deuˬ laꞈ kʼoeˇ, gʼawˇ mawˇ aˇ sehˇ-ahˇ taꞈ leˇ-awˇ iˬ baˇ taˬ kʼaˇ za-eu deuˬ, ngaˬ-ahˇ dzaˬ dzaˬ dawˇ dawˇ lawˇ-eu piˇ ma maˬ ya bi geuꞈ-a. Heu-aˬ, mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, aˬ myah luꞈ ya caw teh-eu zahˇ sahˇ kʼoꞈ pyeuꞈ-eu meh.

¹⁸Gʼawˇ mawˇ aˇ sehˇ-ahˇ taꞈ leˇ-awˇ, iˬ baˇ taˬ kʼaˇ za-eu tsawˇ haˬ-aˬ, lawˇ-eu shehˇ-eu jeˬ maˬ ya mˇ-a. Myaˆ behꞈ deuˬ maˬ ehˇ, kuiˇ shiˇ deuˬ maˬ ehˇ, aˇ sehˇ maˬ byah-eu deuˬ maˬ ehˇ, aˇ sehˇ cawˆ-iˇ-euˬ tsawˇ haˬ deuˬ maˬ ehˇ,

¹⁹kuiˇ kuˆ laꞈ kuˆ kuˆ-eu tsawˇ haˬ deuˬ maˬ ehˇ,

²⁰pu lu lu-eu deuˬ maˬ ehˇ, maˬ huiˬ maˬ goˇ loꞈ-eu deuˬ maˬ ehˇ, myaˆ nuiˆ naˇ-eu deuˬ maˬ ehˇ, nyawˬ naˇ-eu deuˬ maˬ ehˇ, uˬ kʼawˇ aˇ nuiˆ maˬ byah-eu deuˬ maˬ ehˇ, lawˇ-eu shehˇ-eu jeˬ maˬ ya mˇ-a.

²¹Aˬloˬ-euˬ zaˬ deuˬ uˆ deuˬ laꞈ kʼoeˇ, gʼawˇ mawˇ aˇ sehˇ-ahˇ taꞈ leˇ-awˇ iˬ baˇ taˬ kʼaˇ za-eu deuˬ, ngaˬ-ahˇ dzaˬ dzaˬ dawˇ dawˇ lawˇ-eu jeˬ maˬ ya mˇ-a.

²²Kʼoeˇ loꞈ-ehˇ gʼeh-eu tsawˇ haˬ deuˬ-aˬ, ngaˬ-ahˇ lawˇ nehˬ-euˬ muiˬ-eu shawˇ-eu dzaˇ maˬ ehˇ, muiˬ dui shawˇ dui dui-eu dzaˇ maˬ ehˇ, dzaˬ nya meh.

²³Ehˇ kʼawꞈ, aˬ yawꞈ maꞈ-euˬ gʼawˇ mawˇ aˇ sehˇ iˬ baˇ taˬ kʼaˇ za-eu miˇ neh, muiˬ-eu shawˇ-eu saˬ paˇ lawˆ kaˬ dawˬ peh maˬ ehˇ, lawˇ duˬ dawˬ peh maˬ ehˇ, maˬ ya le-a. Kʼoeˇ loꞈ-ehˇ jahˇ-awˇ, muiˬ-eu shawˇ-eu jeˬ-ahˇ aˬ yawꞈ maꞈ maˬ ya laˆ jawꞈ-a. Aˬ jeˬ miˇ neh ehˇ naˇ, ngaˇ-aˬ, aˬ yawꞈ maꞈ-ahˇ bi muiˬ bi shawˇ laˇ-eu Sahˬpaˬ Miˬyehˇ pyeuꞈ-eu ma.”

²⁴Aˬloˬ-ahˇ maˬ ehˇ, Aˬloˬ-euˬ aˬ li deuˬ-ahˇ maˬ ehˇ, Iˇsaˬleˬlaˆ tsawˇ haˬ dawˬ tawˆ luꞈ-ahˇ maˬ ehˇ, Moˇseˬ kʼoeˇ loꞈ-ehˇ ehˇ nehˬ-euˬ meh.