Read Akha Uˬ duˬ 22 Bible Online

Uˬ duˬ 22 - Akha bible

Uˬ duˬ 22

¹Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

²“Aˬloˬ hawˇ-eu aˬ yawꞈ-euˬ aˬ li deuˬ-ahˇ heu loꞈ-ehˇ ehˇ nehˬ-awˬ. Ngaˬ-euˬ tsawˇ myahˇ kʼoeˇ taˆ yehˬ bawˬ sehˇ lu-ehˇ gʼeh-eu jeˬ keuˆ le ni, naw maꞈ maˬ ya jahˇ-a. Kʼoeˇ miˇ neh, Iˇsaˬleˬlaˆ tsawˇ haˬ deuˬ neh, ngaˬ-ahˇ lawˇ-euˬ muiˬ-eu shawˇ-eu lawˇ-eu jeˬ-ahˇ naw maꞈ yaw zeu baw-awˬ.

³Naw maꞈ-euˬ zaˬ deuˬ uˆ deuˬ laꞈ kʼoeˇ, tsawˇ haˬ tiˬ gʼaˬ na yawˬ ha-euˬ gʼawˇ mawˇ maˬ shawˇ-eu aˇ yamˬ laꞈ kʼoeˇ, Iˇsaˬleˬlaˆ tsawˇ haˬ deuˬ neh ngaˬ-ahˇ lawˇ -euˬ muiˬ-eu shawˇ-eu lawˇ-eu jeˬ dawˬ peh le naˇ, tsawˇ haˬ kʼoeˇ gʼaˬ-aˬ, lawˇ duˬ-ahˇ ngaˬ-euˬ gaˇ maˬ paˇ ya mˇ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, zahˇ sahˇ kʼoꞈ heu hmˬ-ahˇ aˬ myah luꞈ ya caw teh meh. Ngaˇ-aˬ, Sahˬpaˬ Miˬyehˇ ma.

⁴“Aˬloˬ-euˬ aˬ li deuˬ laꞈ kʼoeˇ, nyawˬ naˇ-eu tsawˇ haˬ deuˬ hawˇ-eu, maˇ uiˇ yoeˇ-eu tsawˇ haˬ deuˬ-aˬ, aˬ yawꞈ maꞈ-euˬ gʼawˇ mawˇ maˬ muiˬ maˬ shawˇ laˇ kʼoeˇ keuˆ ni, lawˇ gʼaˬ-euˬ muiˬ-eu shawˇ-eu dzaˇ maˬ ya dzaˬ-a. Piˇ ma tiˬ gʼaˬ, shiˇ taˬ-euˬ jeˬ-ahˇ taꞈ-eu maˬ shawˇ-eu mˇ myawˬ tiˬ jeˬ na-ahˇ toeˬ ciˆ-euˬ maˬ kaˬ, yawˬ ha-euˬ gʼawˇ mawˇ aˇ yoeˬ yoeˇ doˆ-eu maˬ kaˬ, maˬ shawˇ-eu piˇ ma pyeuꞈ-eu meh.

⁵Maˬ shawˇ-eu tsawˇ haˬ hawˇ-eu jeˬ zaˬ-ahˇ, aˬ yawꞈ toeˬ ciˆ naˇ, maˬ shawˇ-eu piˇ ma pyeuꞈ-iˇ-eu meh.

⁶Maˬ shawˇ ni pyeuꞈ-iˇ-euˬ piˇ ma aˬ geu gʼaˬ maˬ kaˬ, uˬ ciꞈ paw keuˆ ni, maˬ shawˇ-a. Uˬ ciꞈ keuˆ le gʼaˬ-euˬ kʼawꞈ, iˇ cuꞈ maˬ dzuiꞈ shawˇ gʼaˬ kʼoeˇ keuˆ ni, lawˇ gʼaˬ-euˬ muiˬ-eu shawˇ-eu dzaˇ maˬ ya dzaˬ-a.

⁷Nahˇ ma ga ahˇ gʼaˬ ngeh, aˬ yawꞈ shawˇ laˇ-eu meh. Kʼoeˇ naˇ, aˬ yawꞈ-euˬ dzaˇ pyeuꞈ-eu lawˇ gʼaˬ-euˬ muiˬ-eu shawˇ-eu dzaˇ deuˬ aˬ yawꞈ dzaˬ nya meh.

⁸Aˬ yawˇ yawꞈ shiˇ-euˬ jeˬ zaˬ-euˬ shaˬ jiˇ maˬ ehˇ, bawˇ tsahˬ jeˬ zaˬ neh bi kawꞈ sehꞈ-euˬ jeˬ zaˬ-euˬ shaˬ jiˇ maˬ ehˇ, aˬ yawꞈ maˬ ya dzaˬ-a. Kʼoeˇ loꞈ-ehˇ dzaˬ naˇ, yawˬ haˇ yawˬ ha maˬ shawˇ-ehˇ pyeuꞈ-iˇ ni jahˇ gaˇ duˇ-eu meh. Ngaˇ-aˬ, Sahˬpaˬ Miˬyehˇ ma.

⁹“Piˇ ma dawˬ tawˆ luꞈ, ngaˬ neh biꞈ taˬ-eu zahˇ sahˇ kʼoꞈ deuˬ-ahˇ ya caw teh meh. Kʼoeˇ loꞈ-ehˇ maˬ jahˇ naˇ, iˬ baˇ naꞈ-awˇ ya shiˇ tehꞈ-a. Aˬ jeˬ miˇ neh ehˇ naˇ, muiˬ-eu shawˇ-eu zahˇ sahˇ kʼoꞈ-ahˇ aˬ yawꞈ maꞈ maˬ caw teh-a. Ngaˇ-aˬ, aˬ yawꞈ maꞈ-ahˇ bi muiˬ bi shawˇ laˇ-eu Sahˬpaˬ Miˬyehˇ pyeuꞈ-eu ma.

¹⁰“Piˇ ma deuˬ-euˬ nymˇ kʼahˬ zaˬ deuˬ tehꞈ-ehˇ, lawˇ gʼaˬ shehˇ gʼaˬ-euˬ muiˬ-eu shawˇ-eu dzaˇ-ahˇ dzaˬ kʼmˬ-eu meh. Nui deuˬ tiˬ gʼaˬ-iˬ maˬ dzaˬ kʼmˬ-a. Piˇ ma-euˬ nymˇ-ahˇ jawˇ naˬ luꞈ-eu deuˬ hawˇ-eu, piˇ ma-ahˇ gʼaˬ mahˇ mahˇ luꞈ-eu tsawˇ haˬ deuˬ kʼawꞈ maˬ dzaˬ kʼmˬ-a.

¹¹Ehˇ kʼawꞈ, piˇ ma neh zeuˇ tsehˆ gʼaˬ-euˬ zaˬ kʼaˆ maˬ ehˇ, piˇ ma-euˬ nymˇ-ahˇ dehꞈ le-euˬ zaˬ kʼaˆ maˬ ehˇ, piˇ ma-euˬ dzaˇ deuˬ dzaˬ kʼmˬ meh.

¹²Piˇ ma maˬ ngeuˇ-eu tsawˇ haˬ-ahˇ dahˬ dzaˬ-iˇ-euˬ piˇ ma-euˬ aˬ buˇ-aˬ, lawˇ gʼaˬ-euˬ muiˬ-eu shawˇ-eu dzaˇ maˬ dzaˬ kʼmˬ-a.

¹³Yawˬ ha aˬ da-euˬ nymˇ-ahˇ gʼoꞈ tsehˆ jawˇ tsehˆ laˇ-euˬ, zaˬ maˬ jawˇ-eu miˬ coeˬ miˬ ma pyeuꞈ-eu piˇ ma-euˬ aˬ buˇ-aˬ, yawˬ ha-euˬ aˬ da piˇ ma geuꞈ-awˇ za-euˬ dzaˇ deuˬ dzaˬ nya meh. Piˇ ma-euˬ nymˇ kʼahˬ zaˬ deuˬ tehꞈ-ehˇ dzaˇ kʼoeˇ deuˬ dzaˬ kʼmˬ-eu meh.

¹⁴“Piˇ ma-euˬ nymˇ kʼahˬ zaˬ ma ngeuˇ-eu tsawˇ haˬ tiˬ gʼaˬ na, maˬ noeˬ maˬ duˇ-ehˇ lawˇ gʼaˬ-euˬ dzaˇ dzaˬ naˇ, dzaˇ kʼoeˇ-euˬ aˇ poeˬ piˇ ma-ahˇ ya tsoeˬ nehˬ-eu uˬ taꞈ, ngaˬ bymˇ tiˬ bymˇ ya biꞈ dzehˬ meh.

¹⁵Dzaˬ-eu maˬ geuˇ-eu tsawˇ haˬ-ahˇ bi dzaˬ-eu laꞈ kʼoeˇ, lawˇ gʼaˬ-euˬ muiˬ-eu shawˇ-eu dzaˇ-ahˇpiˇ ma deuˬ yehˬ bawˬ sehˇ lu-ehˇ maˬ ya gʼeh-a. Kʼoeˇ loꞈ-ehˇ jahˇ naˇ, iˬ baˇ hawˇ-eu kʼehˬ-eu kʼaˆ-eu jeˬ, tsawˇ haˬ kʼoeˇ gʼaˬ kʼoeˇ taˆ keuˆ le tehꞈ-a. Ngaˇ-aˬ, lawˇ-eu shehˇ-eu jeˬ-ahˇ bi muiˬ bi shawˇ laˇ-eu Sahˬpaˬ Miˬyehˇ ma.”

¹⁷Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh.

¹⁸Aˬloˬ-ahˇ maˬ ehˇ, Aˬloˬ-euˬ aˬ li deuˬ-ahˇ maˬ ehˇ, Iˇsaˬleˬlaˆ tsawˇ haˬ dawˬ tawˆ luꞈ-ahˇ maˬ ehˇ, zahˇ sahˇ kʼoꞈ heu deuˬ biꞈ nehˬ-awˬ. Iˇsaˬleˬlaˆ tsawˇ haˬ maˬ kaˬ, Iˇsaˬleˬlaˆ miˇ kʼahˬ-ahˇ jawˇ-eu boeˇ miˬ siˬ kʼaˬ deuˬ maˬ kaˬ, saˇ jaˇ dzaˬ-eu laꞈ kʼoeˇ lawˇ-eu maˬ ehˇ, nui ma keuˆ-eu miˇ neh lawˇ-eu maˬ ehˇ, miˬ dzaˬ dzah puiˆ-awˇ lawˇ-eu jeˬ lawˇ naˇ, maˇ byawꞈ maˬ baw-eu jeˬ zaˬ ya lawˇ meh.

¹⁹Yawˬ ha-euˬ lawˇ-eu jeˬ-ahˇ bi ha geuꞈ mawꞈ naˇ, mawˇ neˇ lawˇ ngeh, maˇ byawꞈ maˬ baw-eu mawˇ gaw maˬ ehˇ, yawˇ hawˇ-eu ciꞈ myehꞈ lawˇ ngeh, maˇ byawꞈ maˬ baw-eu aˬ buˬ deuˬ maˬ ehˇ, ya lawˇ meh.

²⁰Naw maꞈ maˇ byawꞈ baw-eu jeˬ zaˬ lawˇ naˇ, Sahˬpaˬ Miˬyehˇ maˬ ha geuꞈ-a.

²¹Tsawˇ haˬ tiˬ gʼaˬ na, saˇ jaˇ dzaˬ-eu laꞈ kʼoeˇ maˬ ehˇ, nui ma keuˆ-eu miˇ neh maˬ ehˇ, cawˬ cawˬ taꞈ-eu lawˇ-eu jeˬ lawˇ ngeh, Sahˬpaˬ Miˬyehˇ neh bi ha geuꞈ mawꞈ naˇ, maˇ byawꞈ maˬ baw-eu jeˬ zaˬ ya lawˇ meh.

²²Sahˬpaˬ Miˬyehˇ-ahˇ jeˬ zaˬ lawˇ ngeh, myaˆ behꞈ behꞈ-eu, kuiˇ kuˆ laꞈ kuˆ kuˆ-eu, aˇ sehˇ maˬ byah-eu, baˆ kʼoˆ maˇ naˇ naˇ-eu, maˇ cuˬ maˇ lu lu-eu, kʼoeˇ loꞈ-ehˇ gʼeh-eu jeˬ zaˬ deuˬ maˬ ya lawˇ-a. Lawˇ duˬ kʼoeˇ taˆ dzaˬ dzaˬ dawˇ dawˇ lawˇ-eu jeˬ lawˇ ngeh, kʼoeˇ loꞈ-ehˇ gʼeh-eu jeˬ zaˬ deuˬ maˬ geuꞈ kʼmˬ-a.

²³Nui ma keuˆ-eu miˇ neh lawˇ-eu jeˬ naw maꞈ lawˇ ngeh, maˬ loˆ-eu jeˬ zaˬ deuˬ hawˇ-eu, aˇ sehˇ maˬ byah-eu jeˬ zaˬ deuˬ geuꞈ nya meh. Ehˇ kʼawꞈ, saˇ jaˇ dzaˬ-eu laꞈ kʼoeˇ lawˇ-eu jeˬ lawˇ ngeh, kʼoeˇ loꞈ-ehˇ gʼeh-eu jeˬ zaˬ deuˬ maˬ geuꞈ nya-a.

²⁴Lehˬ uˆ deh pyehˆ-euˬ maˬ ehˇ, lehˬ uˆ-ahˇ mi cehˇ deuˆ tahˬ-euˬ maˬ ehˇ, lehˬ uˆ laˆ tahˬ laˆ naˇ taˬ-euˬ maˬ ehˇ, lehˬ uˆ laˆ tsehˆ dzeh-euˬ maˬ ehˇ, kʼoeˇ loꞈ-ehˇ gʼeh-eu jeˬ zaˬ Sahˬpaˬ Miˬyehˇ-ahˇ maˬ lawˇ kʼmˬ-a. Naw maꞈ-euˬ miˇ kʼahˬ laꞈ kʼoeˇ, kʼoeˇ loꞈ-ehˇ maˬ ya mˇ-a.

²⁵Dzaˬ dzaˬ dawˇ dawˇ lawˇ-eu jeˬ lawˇ ngeh, boeˇ miˬ siˬ kʼaˬ deuˬ-euˬ laꞈ-ahˇ neh doˆ le-euˬ jeˬ zaˬ maˬ geuꞈ kʼmˬ-a. Kʼoeˇ loꞈ-ehˇ gʼeh-eu jeˬ zaˬ-aˬ, iˬ baˇ taˬ kʼaˇ za-eu maˬ geuꞈ kʼmˬ-eu jeˬ zaˬ pyeuꞈ-eu meh.

²⁶Mawˇ neˇ mawˇ zaˬ maˬ ehˇ, yawˇ zaˬ maˬ ehˇ, ciꞈ myehꞈ ciꞈ zaˬ maˬ ehˇ dehꞈ le ngeh, shiꞈ nah keuˆ ni aˬ ma mawˇ nehˬ-ehˇ maˬ ya bi gʼawˬ-iˇ-a. Ehˇ kʼawꞈ, shiꞈ nah buˬ-iˇ naˇ, dzaˬ dzaˬ dawˇ dawˇ lawˇ-eu jeˬ lawˇ gaˇ geuꞈ nya meh.

²⁸Mawˇ neˇ mawˇ zaˬ maˬ ehˇ, yawˇ zaˬ maˬ ehˇ, ciꞈ myehꞈ ciꞈ zaˬ maˬ ehˇ, aˬ ma mawˇ nehˬ-ehˇ aˬ yawꞈ tiˬ nah laꞈ kʼoeˇ tehꞈ-ehˇ maˬ ya lawˇ-a.

²⁹Sahˬpaˬ Miˬyehˇ-euˬ guiˬ lahˬ-ahˇ noeˬ keuˆ-eu lawˇ-eu jeˬ naw maꞈ lawˇ ngeh, bi ha geuꞈ-eu gʼaˇ duˬ, zahˇ sahˇ kʼoꞈ-ahˇ tsaˬ ni mˇ-awˬ.

³⁰Lawˇ-eu jeˬ zaˬ kʼoeˇ mawˇ-euˬ shaˬ jiˇ kʼoeˇ, yawˬ nah yawˬ uˬ bya maˬ bi jaˆ bya ni, aˬ yawꞈ nah laꞈ kʼoeˇ ya dzaˬ jiˇ meh.

³¹Sahˬpaˬ Miˬyehˇ ehˇ-eu, “Ngaˬ neh biꞈ taˬ-euˬ dawˬ deuˬ-ahˇ naw maꞈ naˇ haˬ geuꞈ-awˬ.

³²Ngaˇ-aˬ, Sahˬpaˬ Miˬyehˇ ma. Ngaˬ-euˬ tsawˇ myahˇ-ahˇ yehˬ bawˬ sehˇ lu-ehˇ taˬ gʼeh. Ngaˇ-aˬ, yaw muiˬ yaw shawˇ meh lehˇ, Iˇsaˬleˬlaˆ tsawˇ haˬ dawˬ tawˆ luꞈ siˬ nya-awˬ. Ngaˇ-aˬ, naw maꞈ-ahˇ bi muiˬ bi shawˇ laˇ-eu Sahˬpaˬ Miˬyehˇ ma.

³³Ngaˬ-euˬ gʼawˇ mawˇ naw maꞈ-euˬ Miˬyehˇ pyeuꞈ laˇ ni, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ngaˇ sheuˬ doˆ laꞈ-euˬ ma. Ngaˇ-aˬ, Sahˬpaˬ Miˬyehˇ ma.”