Read Akha Uˬ duˬ 23 Bible Online

Uˬ duˬ 23 - Akha bible

Uˬ duˬ 23

¹Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh.

²Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Heu-aˬ, Sahˬpaˬ Miˬyehˇ neh tseˇ doˆ taˬ-euˬ uˬ duˬ tahˬ-eu zahˇ-ahˇ taꞈ leˇ-eu bawˬ-iˬ gʼeh-eu zahˇ sahˇ kʼoꞈ deuˬ meh. Heu deuˬ-ahˇ naw maꞈ ya caw teh meh.

³Naw maꞈ gʼaˇ duˬ, yawˬ ha-euˬ gaˇ mˇ-eu aˇ nah koꞈ nah jaˆ-eu meh. Ehˇ kʼawꞈ, jawˇ nah pyeuꞈ-eu shiꞈ nah tiˬ nah-aˬ, gʼaˬ naˬ naˬ-eu aˇ nah pyeuꞈ-eu meh lehˇ, naw maꞈ ya noeˬ taˬ meh.

⁴Aˇ nah kʼoeˇ nah-ahˇ, naw maꞈ gaˇ maˬ mˇ ni, tiˬ gaˇ uiˬ leˇ-awˇ uˬ duˬ ya tahˬ meh. Naw maꞈ aˬ geu gaˇ jawˇ-eu maˬ kaˬ, jawˇ nah ngeh nah-aˬ, Sahˬpaˬ Miˬyehˇ-euˬ aˇ nah pyeuꞈ-eu meh. Aˇ yamˬ tsaˬ laˇ ngeh, bawˬ-iˬ heu deuˬ gaˇ kawˆ naw maꞈ guˇ-awˇ bi siˬ bi gaˬ-awˬ.

⁵Ba la yaw beh siˬ tseˇ oeˬ nah tiˬ nah uˬ ciꞈ paw nahˇ ma ga ahˇ-eu yamˬ-ahˇ, Sahˬpaˬ Miˬyehˇ-ahˇ taˬ huiˬ taˬ mahˇ-eu Baˬsaˬkaˬ Bawˬ-iˬ aˇ dahˬ beh-eu meh.

⁶Tseˇ ngaˬ nah tiˬ nah-ahˇ dehˬ tseˬ maˬ ahˇ-eu Kaˬmuˇ dzaˬ-eu Bawˬ-iˬ aˇ dahˬ beh-awˇ, shiꞈ nah keuˆ ni, dehˬ tseˬ keuˬ-euˬ kaˬ muˇ naw maꞈ maˬ ya dzaˬ-a.

⁷Yaw beh nah-ahˇ, naw maꞈ yawˬ ha-euˬ gaˇ maˬ mˇ ni, tiˬ gaˇ uiˬ leˇ-awˇ, uˬ duˬ ya tahˬ meh.

⁸Shiꞈ nah keuˆ ni, Sahˬpaˬ Miˬyehˇ-ahˇ dzaˬ dzaˬ dawˇ dawˇ naw maꞈ ya lawˇ meh. Shiꞈ nah tiˬ nah-ahˇ, naw maꞈ tiˬ poˆ paˇ uiˬ leˇ-awˇ, uˬ duˬ ya tahˬ meh. Ehˇ kʼawꞈ, tsawˇ haˬ tiˬ gʼaˬ-iˬ, yawˬ ha-euˬ gaˇ maˬ ya mˇ-a.

⁹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁰Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ngaˇ naw maꞈ-ahˇ biꞈ-euˬ miˇ kʼahˬ-ahˇ naw maꞈ jawˇ keuˆ leˇ-awˇ, cehˇ yehˬ ngeh, yehˬ beh beh-euˬ cehˇ dzahˬ piˇ ma jawˇ gaˇ yuˇ gʼeh-awˇ.

¹¹Naw maꞈ-ahˇ Sahˬpaˬ Miˬyehˇ bi ha geuꞈ-eu gʼaˇ duˬ, cehˇ dzahˬ kʼoeˇ-ahˇ piˇ ma yuˇ-awˇ, muiˬ-eu laꞈ sawˬ loꞈ-ehˇ, jawˇ nah dzeuˇ ngeh nah Sahˬpaˬ Miˬyehˇ-ahˇ ya damˬ nehˬ meh.

¹²Dzaˬ la gʼo cehˇ lawˇ ngeh nah, maˇ byawꞈ maˬ baw-eu tiˬ myaˇ byah laˇ-euˬ yawˇ zaˬ aˬ buˬ tiˬ mawˇ yuˇ-awˇ, miˬ dzaˬ dzah puiˆ-awˇ lawˇ-eu jeˬ naw maꞈ ya lawˇ meh.

¹³Saˬ loˬ tsiˇ keuˬ taˬ-euˬ cehˇ meu nyiˬ pehˬ yuˇ-awˇ, yawˇ kʼoeˇ mawˇ nehˬ-ehˇ tiˬ kawˆ loꞈ-ehˇ, dzaˬ dzaˬ dawˇ dawˇ lawˇ-eu jeˬ naw maꞈ ya lawˇ meh. Kʼoeˇ loꞈ-ehˇ lawˇ-euˬ yaw saꞈ-ahˇ Sahˬpaˬ Miˬyehˇ nui ma tsaˬ-eu meh. Aˬ gaꞈ dzaˇ uiˇ maˇ tsaꞈ tiˬ tsaꞈ dzehˬ ni naw maꞈ ya lawˇ ahˇ meh.

¹⁴Miˬyehˇ-ahˇ lawˇ nehˬ-eu jeˬ kʼoeˇ maˬ mˇ gʼaˬ kʼoeˇ keuˆ ni, keuˆ le-euˬ cehˇ shuiꞈ kʼoeˇ-ahˇ, yaw jmˬ-ehˇ maˬ ehˇ, laˆ jaꞈ-awˇ maˬ ehˇ, kaˬ muˇ jahˇ-awˇ neh maˬ ehˇ, naw maꞈ maˬ ya dzaˬ-a. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, naw maꞈ-euˬ zaˬ deuˬ uˆ deuˬ zahˇ sahˇ kʼoꞈ heu hmˬ-ahˇ aˬ myah luꞈ ya caw teh meh.

¹⁵Sahˬpaˬ Miˬyehˇ-ahˇ damˬ nehˬ-eu gʼaˇ duˬ, naw maꞈ cehˇ cehˇ dzahˬ yuˇ laꞈ-eu jawˇ nah dzeuˇ ngeh nah-ahˇ neh aˇ dahˬ beh-awˇ, jawˇ nah shiꞈ jaw byah ni aˇ nah gui daˆ leꞈ-awˬ.

¹⁶Ngaˬ tseˇ nah byah ngeh nah, jawˇ nah shiꞈ jaw dzeuˇ-awˇ jawˇ nah dzeuˇ ngeh nah-ahˇ, Sahˬpaˬ Miˬyehˇ-ahˇ dzaˬ la gʼo cehˇ yaw shuiꞈ tiˬ poˆ paˇ lawˇ nehˬ-awˬ.

¹⁷Yawˬ nymˇ na luꞈ, kaˬ muˇ nyiˬ siˬ yuˇ laꞈ-awˇ, muiˬ-eu laꞈ sawˬ loꞈ-ehˇ Sahˬpaˬ Miˬyehˇ-ahˇ ya damˬ nehˬ meh. Kaˬ muˇ aˬ yawꞈ siˬ yawꞈ jahˇ ngeh, cehˇ meu nyiˬ pehˬ ya jahˇ jiˇ-awˇ, dehˬ tseˬ ya keuˬ meh. Kaˬ muˇ kʼoeˇ neh, keuˆ beh beh le-euˬ dzaˬ la gʼo cehˇ lawˇ-eu jeˬ Sahˬpaˬ Miˬyehˇ-ahˇ naw maꞈ ya lawˇ nehˬ meh.

¹⁸Kaˬ muˇ kʼoeˇ nehˬ-ehˇ, tiˬ myaˇ byah-eu maˇ byawꞈ maˬ baw-eu yawˇ zaˬ shiꞈ mawˇ, maˇ byawꞈ maˬ baw-eu mawˇ neˇ mawˇ gaw tiˬ mawˇ hawˇ-eu, maˇ byawꞈ maˬ baw-eu ciꞈ myehꞈ nyiˬ mawˇ naw maꞈ ya lawˇ meh. Jeˬ zaˬ kʼoeˇ deuˬ-ahˇ miˬ dzaˬ dzah puiˆ-awˇ, dzaˬ la gʼo cehˇ lawˇ-eu jeˬ hawˇ-eu, aˬ gaꞈ dzaˇ uiˇ lawˇ-eu jeˬ nehˬ-ehˇ, Sahˬpaˬ Miˬyehˇ-ahˇ ya lawˇ nehˬ meh. Kʼoeˇ loꞈ-ehˇ lawˇ-euˬ yaw saꞈ-ahˇ Sahˬpaˬ Miˬyehˇ nui ma tsaˬ-eu meh.

¹⁹Iˬ baˇ shawˇ-eu lawˇ-eu jeˬ gʼaˇ duˬ, ciꞈ myehꞈ ciꞈ buˬ tiˬ mawˇ maˬ ehˇ, cawˬ cawˬ taꞈ-eu lawˇ-eu jeˬ gʼaˇ duˬ, tiˬ myaˇ byah laˇ-euˬ yawˇ zaˬ aˬ buˬ nyiˬ mawˇ maˬ ehˇ, ya lawˇ meh.

²⁰Piˇ ma gʼaˬ, kaˬ muˇ hawˇ-eu yawˇ zaˬ kʼoeˇ nyiˬ mawˇ yuˇ-awˇ, piˇ ma deuˬ gʼaˇ duˬ, muiˬ-eu laꞈ sawˬ loꞈ-ehˇ Sahˬpaˬ Miˬyehˇ-ahˇ ya damˬ nehˬ meh. Lawˇ-eu heu-aˬ, muiˬ-eu shawˇ-eu meh.

²¹Aˇ nah kʼoeˇ nah-ahˇ gaˇ maˬ mˇ ni, tiˬ gaˇ uiˬ leˇ-awˇ uˬ duˬ ya tahˬ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, naw maꞈ-euˬ zaˬ deuˬ uˆ deuˬ aˬ geu gaˇ jawˇ keuˆ-euˬ maˬ kaˬ, zahˇ sahˇ kʼoꞈ heu hmˬ-ahˇ aˬ yawꞈ maꞈ aˬ myah luꞈ ya caw teh meh.

²²Naw maꞈ cehˇ yehˬ ngeh, deh yaˇ deh dzeˇ caw caw-ehˇ dehꞈ-eu cehˇ maˬ ya yehˬ-eu uˬ taꞈ, yehˬ tehˬ yaꞈ-euˬ cehˇ nmˇ deuˬ maˬ ya pyehˆ poˆ-a. Yaw shaˬ zaˬ deuˬ hawˇ-eu, boeˇ miˬ siˬ kʼaˬ deuˬ gʼaˇ duˬ, kʼoeˇ loꞈ-ehˇ ya bi jaˆ yaꞈ meh. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

²³Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

²⁴Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ba la shiꞈ siˬ tiˬ siˬ aˇ nah yaw beh nah-ahˇ nah lah lah-awˇ, daˇ heh teˇ saˇ mahˇ doˆ laˇ ngeh, uˬ duˬ tahˬ-eu gʼaˇ duˬ ya uiˬ leˇ meh.

²⁵Yawˬ ha-euˬ gaˇ maˬ mˇ ni lah-eu daw-eu laꞈ kʼoeˇ, Sahˬpaˬ Miˬyehˇ-ahˇ dzaˬ dzaˬ dawˇ dawˇ lawˇ-eu jeˬ ya lawˇ nehˬ meh.

²⁶Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh.

²⁷Ba la shiꞈ siˬ tiˬ siˬ tseˇ nah tiˬ nah-aˬ, tiˬ kʼoꞈ tiˬ poˆ Iˇsaˬleˬlaˆ tsawˇ haˬ deuˬ-euˬ iˬ baˇ sha dzeh-eu zahˇ jahˇ-eu aˇ nah pyeuꞈ-eu meh. Aˇ nah kʼoeˇ nah-ahˇ, tiˬ jeˬ-iˬ maˬ dzaˬ-ehˇ jawˇ-awˇ, Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ uiˬ leˇ-awˇ, dzaˬ dzaˬ dawˇ dawˇ lawˇ-eu jeˬ Sahˬpaˬ Miˬyehˇ-ahˇ ya lawˇ meh.

²⁸Kʼoeˇ ngeh nah gaˇ maˬ ya mˇ-a. Aˬ jeˬ miˇ neh ehˇ naˇ, aˇ nah kʼoeˇ nah-aˬ, iˬ baˇ yuˇ dzeh-eu zahˇ jahˇ-eu aˇ nah pyeuꞈ-eu meh.

²⁹Aˇ nah kʼoeˇ nah laꞈ kʼoeˇ, tiˬ jeˬ paˬ dzaˬ-eu tsawˇ haˬ aˬ geu gʼaˬ maˬ kaˬ, Sahˬpaˬ Miˬyehˇ-euˬ tsawˇ haˬ lehˇ maˬ paˇ sawˇ nya meh.

³⁰Aˇ nah kʼoeˇ nah-ahˇ gaˇ mˇ-eu tsawˇ haˬ kʼoeˇ taˆ, shiˇ-eu jeˬ Sahˬpaˬ Miˬyehˇ bi keuˆ le tehꞈ-a.

³¹Naw maꞈ-euˬ zaˬ deuˬ uˆ deuˬ aˬ geu gaˇ jawˇ keuˆ-euˬ maˬ kaˬ, zahˇ sahˇ kʼoꞈ heu hmˬ-aˬ, aˬ yawꞈ maꞈ dawˬ tawˆ luꞈ-ahˇ taꞈ leˇ-eu zahˇ sahˇ kʼoꞈ pyeuꞈ-eu meh.

³²Ba la kʼoeˇ siˬ gʼoeˬ nah tiˬ nah nahˇ ma ga ahˇ yamˬ-ahˇ neh aˇ dahˬ beh-awˇ, tseˇ nah tiˬ nah nahˇ ma ga ahˇ yamˬ-ahˇ keuˆ ni, tiˬ jeˬ-iˬ maˬ dzaˬ ni ya lah ya daw meh.

³³Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh.

³⁴Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ba la shiꞈ siˬ tiˬ siˬ tseˇ ngaˬ nah-ahˇ, Sehˬ gʼawˆ-euˬ Bawˬ-iˬ aˇ dahˬ beh-awˇ, shiꞈ nah keuˆ ni bawˬ-iˬ ya gʼeh meh.

³⁵Yaw beh nah-ahˇ gaˇ maˬ mˇ ni, tiˬ gaˇ uiˬ leˇ-awˇ uˬ duˬ ya tahˬ meh.

³⁶Shiꞈ nah keuˆ ni, dzaˬ dzaˬ dawˇ dawˇ lawˇ-eu jeˬ yawˬ nah na luꞈ ya lawˇ meh. Yehꞈ nah tiˬ nah-ahˇ, uˬ duˬ tahˬ-eu gʼaˇ duˬ, tiˬ kawˆ loꞈ-ehˇ paˇ ya uiˬ leˇ-awˇ, dzaˬ dzaˬ dawˇ dawˇ lawˇ-eu jeˬ ya lawˇ meh. Aˇ nah kʼoeˇ nah-aˬ, uˬ duˬ tahˬ-eu aˇ nah pyeuꞈ-awˇ, naw maꞈ gaˇ maˬ ya mˇ-a.

³⁷(Heu deuˬ-aˬ, zahˇ sahˇ kʼoꞈ-ahˇ taꞈ leˇ-eu bawˬ-iˬ deuˬ pyeuꞈ-eu meh. Bawˬ-iˬ heu deuˬ jahˇ ngeh, Sahˬpaˬ Miˬyehˇ-ahˇ naw maꞈ taˬ huiˬ taˬ mahˇ-eu laꞈ kʼoeˇ, tiˬ kawˆ loꞈ-ehˇ uiˬ leˇ-awˇ uˬ duˬ ya tahˬ meh. Dzaˬ dzaˬ dawˇ dawˇ lawˇ-eu, miˬ dzaˬ dzah puiˆ-awˇ lawˇ-eu, dzaˬ la gʼo cehˇ lawˇ-eu, nui jeˬ lawˇ-eu hawˇ-eu, aˬ gaꞈ dzaˇ uiˇ lawˇ-eu heu deuˬ-ahˇ, aˬ yawꞈ nah yawꞈ loˬ-eu loꞈ-ehˇ, naw maꞈ ya lawˇ meh.

³⁸Bawˬ-iˬ heu deuˬ-aˬ, aˬ myah luꞈ naw maꞈ lah luꞈ-eu jawˇ nah deuˬ uˬ taꞈ, naw maꞈ ya jahˇ-eu bawˬ-iˬ pyeuꞈ-awˇ, lawˇ-eu shehˇ-eu heu deuˬ kʼawꞈ, aˬ myah luꞈ naw maꞈ mˇ luꞈ-eu lawˇ-eu shehˇ-eu jeˬ pyeuꞈ-eu Sahˬpaˬ Miˬyehˇ-ahˇ damˬ nehˬ-eu jeˬ, saˇ jaˇ dzaˬ-awˇ lawˇ-eu jeˬ, nui ma keuˆ-eu laꞈ kʼoeˇ lawˇ-eu jeˬ, heu deuˬ lawˇ-eu uˬ taꞈ, naw maꞈ ya mˇ-eu lawˇ-eu shehˇ-eu jeˬ pyeuꞈ-eu meh.)

³⁹Naw maꞈ cehˇ laˆ luiˆ gʼaˬ ngeh, ba la shiꞈ siˬ tiˬ siˬ, tseˇ ngaˬ nah-ahˇ aˇ dahˬ beh-awˇ, shiꞈ nah keuˆ ni bawˬ-iˬ heu hmˬ naw maꞈ gʼeh-awˬ. Yaw beh nah-aˬ, naw maꞈ gʼaˬ naˬ ya naˬ-eu aˇ nah pyeuꞈ-eu meh.

⁴⁰Kʼoeˇ ngeh nah-ahˇ, naw maꞈ-euˬ aˇ siˬ aˇ bawˇ deuˬ-ahˇ siˬ-eu muiˬ dui dui-eu aˇ siˬ deuˬ maˬ ehˇ, daoˇ uˬ pyaˬ deuˬ maˬ ehˇ, aˇ paꞈ sahˇ-eu aˇ bawˇ uˬ pyaˬ deuˬ maˬ ehˇ, yuˇ-awˇ, Sahˬpaˬ Miˬyehˇ-ahˇ taˬ huiˬ taˬ mahˇ-eu gʼaˇ duˬ, uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-eu bawˬ-iˬ aˇ dahˬ beh-awˬ.

⁴¹Shiꞈ nah keuˆ ni bawˬ-iˬ gʼeh-awˬ. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, naw maꞈ-euˬ zaˬ deuˬ, mˬ maˬ maˬ byaˆ zaˇ ziˇ zahˇ sahˇ kʼoꞈ heu hmˬ ya mˇ daˆ leꞈ meh.

⁴²Iˇsaˬleˬlaˆ tsawˇ haˬ deuˬ, shiꞈ nah keuˆ ni, yawˬ ha-euˬ sehˬ gʼawˆ laꞈ kʼoeˇ tehꞈ-ehˇ ya jawˇ meh.

⁴³Kʼoeˇ loꞈ-ehˇ jawˇ-eu jeˬ-aˬ, Sahˬpaˬ Miˬyehˇ Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ ngeh, sehˬ gʼawˆ laꞈ kʼoeˇ bi jawˇ-euˬ gaˇ, naw maꞈ-euˬ zaˬ deuˬ uˆ deuˬ bi siˬ nya-eu gʼaˇ duˬ jawˇ-eu jeˬ pyeuꞈ-eu meh. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁴⁴Kʼoeˇ loꞈ-ehˇ, Sahˬpaˬ Miˬyehˇ-ahˇ taˬ huiˬ-eu bawˬ-iˬ deuˬ-ahˇ taꞈ leˇ-eu zahˇ sahˇ kʼoꞈ deuˬ, Iˇsaˬleˬlaˆ tsawˇ haˬ deuˬ-ahˇ Moˇseˬ biꞈ nehˬ-euˬ meh.