Read Akha Uˬ duˬ 24 Bible Online

Uˬ duˬ 24 - Akha bible

Uˬ duˬ 24

¹Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh.

²Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Tsiˇ kʼmˬ maˬ miˆ-iˇ ni bi doꞈ-eu gʼaˇ duˬ, muiˬ dui dui-eu shawˇ jehˆ ni gʼeh-eu saˬ loˬ tsiˇ deuˬ yuˇ laꞈ-awˬ.

³Muiˬ dui shawˇ dui dui-eu jawˇ duˬ laꞈ kʼoeˇ jaˆ-eu Dawˬ ma saˇ jaˇ Bahˬ keuˆ mehˬ shi, lawˆ kaˬ taw taˬ-euˬ saˬ paˇ-euˬ laꞈ nyiˇ paw, Sahˬpaˬ Miˬyehˇ-euˬ mehˬ shi, yawˬ miˇ na luꞈ Aˬloˬ tsiˇ kʼmˬ ya doꞈ-awˇ, uˬ bya bya laˇ ngeh keuˆ ni maˬ miˆ-iˇ-ehˇ ya bi jaˆ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, zahˇ sahˇ kʼoꞈ heu hmˬ-ahˇ, mˬ maˬ maˬ byaˆ zaˇ ziˇ ya mˇ daˆ leꞈ meh.

⁴Maˇ jawˆ ni gʼeh-eu shuiˇ neh jahˇ taˬ-euˬ tsiˇ kʼmˬ doꞈ taˬ duˬ kʼoeˇ taˆ jaˆ-eu tsiˇ kʼmˬ deuˬ-ahˇ, Aˬloˬ ya laˆ saˆ-awˇ, Sahˬpaˬ Miˬyehˇ-euˬ mehˬ shi tsiˇ kʼmˬ kʼoeˇ deuˬ aˬ myah luꞈ maˬ miˆ tsehˆ-iˇ ni doꞈ luꞈ nga loˇ lehˇ aˬ yawꞈ ya haw meh.

⁵Cehˇ meu tseˇ nyiꞈ pehˬ yuˇ-awˇ, kaˬ muˇ tseˇ nyiꞈ siˬ jahˇ-awˬ.

⁶Sahˬpaˬ Miˬyehˇ-euˬ mehˬ shi jaˆ-eu maˇ jawˆ ni gʼeh-eu shuiˇ yaw taˬ-euˬ hawˬ jeh kʼoeˇ taˆ, kaˬ muˇ kʼoeˇ nyiˬ cehˆ bi jaˆ-awˇ, tiˬ cehˆ-euˬ koꞈ siˬ bi ahˇ-awˬ.

⁷Kaˬ muˇ kʼoeˇ deuˬ dah zaˇ, dzaˬ dzaˬ dawˇ dawˇ lawˇ-eu jeˬ lawˇ nehˬ-eu gʼaˇ duˬ, kaˬ muˇ aˬ yawꞈ cehˆ yawꞈ kʼoeˇ taˆ, shawˇ jehˆ ni gʼeh-eu yaw saw jeˬ yuˇ daˆ taˬ-awˬ.

⁸Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, jawˇ nah aˬ yawꞈ nah yawꞈ, Sahˬpaˬ Miˬyehˇ-euˬ mehˬ shi, kaˬ muˇ ya bi jaˆ meh. Heu-aˬ, mˬ maˬ maˬ byaˆ zaˇ ziˇ Iˇsaˬleˬlaˆ tsawˇ haˬ deuˬ ya mˇ-eu gaˇ meh.

⁹Kaˬ muˇ kʼoeˇ-aˬ, Aˬloˬ hawˇ-eu aˬ yawꞈ-euˬ zaˬ deuˬ uˆ deuˬ-euˬ shaˬ bymˇ pyeuꞈ-awˇ, muiˬ-eu shawˇ-eu jawˇ duˬ tiˬ tsahˇ-ahˇ, kaˬ muˇ kʼoeˇ aˬ yawꞈ maꞈ ya dzaˬ meh. Aˬ jeˬ miˇ neh ehˇ naˇ, kaˬ muˇ kʼoeˇ-aˬ, piˇ ma deuˬ gʼaˇ duˬ Sahˬpaˬ Miˬyehˇ-ahˇ lawˇ nehˬ-euˬ muiˬ dui shawˇ dui dui-eu dzaˬ dzaˬ dawˇ dawˇ pyeuꞈ-eu meh.

¹⁰Tsawˇ haˬ tiˬ gʼaˬ jawˇ-eu meh. Aˬ yawꞈ-euˬ aˬ da-aˬ, Iˇjiˇtuˆ tsawˇ jeuˬ pyeuꞈ-awˇ, aˬ yawꞈ-euˬ aˬ ma-aˬ, Iˇsaˬleˬlaˆ tsawˇ jeuˬ pyeuꞈ-eu meh. Tsawˇ haˬ kʼoeˇ gʼaˬ Iˇsaˬleˬlaˆ tsawˇ haˬ deuˬ nehˬ-ehˇ tiˬ kawˆ loꞈ-ehˇ dawˬ deh gʼa luꞈ ngeh, Iˇsaˬleˬlaˆ tsawˇ haˬ tiˬ gʼaˬ nehˬ-ehˇ, pu laꞈ kʼoeˇ ceh dzaˬ-euˬ meh.

¹¹Iˇsaˬleˬlaˆ zaˬ miˬ zaˬ-euˬ aˬ li pyeuꞈ-eu tsawˇ haˬ kʼoeˇ gʼaˬ, Sahˬpaˬ Miˬyehˇ-euˬ tsawˇ myahˇ-ahˇ yaˬ kʼehˇ yaˬ-euˬ meh. Kʼoeˇ miˇ neh, tsawˇ haˬ kʼoeˇ gʼaˬ-ahˇ, Moˇseˬ jawˇ gaˇ aˬ yawꞈ maꞈ sheuˬ gʼeh-euˬ meh. (Aˬ yawꞈ-euˬ aˬ ma-aˬ, Daˬ aˇ jeuˬ Diˇbaˬliˇ-euˬ aˬ buˇ Sheˬloˇmiˇ pyeuꞈ-eu meh.)

¹²Sahˬpaˬ Miˬyehˇ-euˬ nui noeˬ maˬ siˬ duˬ kʼoeˇ keuˆ ni, aˬ yawꞈ maꞈ aˬ yawꞈ-ahˇ ha lahˇ taˬ-euˬ meh.

¹³Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁴“Tsawˇ haˬ kʼoeˇ gʼaˬ-ahˇ pu laꞈ nyiˇ sheuˬ doˆ gʼeh-awˬ. Tsawˇ haˬ kʼoeˇ gʼaˬ iˬ baˇ ahˇ-eu saˇ kiˇ pyeuꞈ-eu gʼaˇ duˬ, aˬ yawꞈ yaˬ kʼehˇ yaˬ-euˬ gaˇ kʼaˇ ya gaˬ-euˬ tsawˇ haˬ deuˬ aˬ yawꞈ-euˬ uˬ duˬ-ahˇ aˬ laꞈ baꞈ daˆ-awˇ, tsawˇ haˬ aˇ maꞈ dawˬ tawˆ luꞈ, tsawˇ haˬ kʼoeˇ gʼaˬ-ahˇ kʼaˬ lo ya biˬ sehꞈ meh.

¹⁵Kʼoeˇ naˇ, Miˬyehˇ-ahˇ yaˬ kʼehˇ yaˬ-eu tsawˇ haˬ-aˬ, yawˬ ha-euˬ iˬ baˇ yawˬ ha ya pi meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ.

¹⁶Kʼoeˇ loꞈ-ehˇ gʼeh-eu tsawˇ haˬ-aˬ, sehꞈ nehˬ gaˇ ya daˬ tehꞈ-a. Iˇsaˬleˬlaˆ tsawˇ haˬ maˬ kaˬ, Iˇsaˬleˬlaˆ tsawˇ haˬ deuˬ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ maˬ kaˬ, Sahˬpaˬ Miˬyehˇ-ahˇ yaˬ kʼehˇ yaˬ naˇ, tsawˇ haˬ aˇ maꞈ dawˬ tawˆ luꞈ uiˬ leˇ-awˇ, kʼaˬ lo biˬ sehꞈ gaˇ ya daˬ tehꞈ-a.

¹⁷“Aˬ cawˬ-ahˇ sehꞈ-eu tsawˇ haˬ-aˬ, yaw ha-ahˇ sehꞈ nehˬ gaˇ paˇ ya daˬ tehꞈ-a.

¹⁸Aˬ cawˬ-euˬ jeˬ zaˬ sehꞈ-eu tsawˇ haˬ-aˬ, aˬ cawˬ-ahˇ paˇ ya tsoeˬ kʼoꞈ nehˬ tehꞈ-a. Saꞈ laˇ-ahˇ laˆ deuˬ naˇ, saꞈ laˇ paˇ ya biꞈ tsoeˬ tehꞈ-a.

¹⁹“Tsawˇ haˬ tiˬ gʼaˬ aˬ cawˬ-ahˇ laˆ tahˬ laˆ naˇ naˇ, yawˬ ha neh aˬ cawˬ-ahˇ jahˇ nehˬ-euˬ loꞈ-ehˇ, yawˬ ha-ahˇ paˇ jahˇ kʼoꞈ nehˬ gaˇ ya daˬ tehꞈ-a.

²⁰Aˬ cawˬ-euˬ shaˬ yoeˬ laˆ kʼehꞈ naˇ, yawˬ ha-euˬ shaˬ yoeˬ laˆ kʼehꞈ nehˬ gaˇ ya daˬ tehꞈ-a. Aˬ cawˬ-euˬ myaˆ nuiˆ tiˬ nuiˆ laˆ behꞈ naˇ, yawˬ ha-euˬ myaˆ nuiˆ tiˬ nuiˆ laˆ behꞈ nehˬ gaˇ ya daˬ tehꞈ-a. Aˬ cawˬ-euˬ seuˬ tiˬ seuˬ laˆ juˆ naˇ, yawˬ ha-euˬ seuˬ tiˬ seuˬ laˆ juˆ gaˇ paˇ ya daˬ tehꞈ-a. Aˬ cawˬ-ahˇ yawˬ ha neh kʼaˇ laˆ tahˬ kʼaˇ laˆ naˇ nehˬ-euˬ loꞈ-ehˇ, yawˬ ha-ahˇ paˇ jahˇ kʼoꞈ nehˬ gaˇ ya daˬ tehꞈ-a.

²¹Jeˬ zaˬ-ahˇ sehꞈ-euˬ tsawˇ haˬ-aˬ, jeˬ zaˬ ya tsoeˬ kʼoꞈ nehˬ tehꞈ-a. Ehˇ kʼawꞈ, tsawˇ haˬ-ahˇ sehꞈ-eu tsawˇ haˬ-aˬ, aˬ yawꞈ-ahˇ sehꞈ nehˬ gaˇ paˇ ya daˬ tehꞈ-a.

²²Zahˇ dawˬ kʼoꞈ dawˬ heu dawˬ-aˬ, Iˇsaˬleˬlaˆ tsawˇ haˬ deuˬ maˬ ehˇ, Iˇsaˬleˬlaˆ tsawˇ haˬ deuˬ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, dawˬ tawˆ luꞈ-ahˇ taꞈ-eu zahˇ dawˬ kʼoꞈ dawˬ meh. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.”

²³Gaˇ kawˆ kʼoeˇ, Iˇsaˬleˬlaˆ tsawˇ haˬ deuˬ-ahˇ Moˇseˬ dzawˇ nehˬ gʼaˬ ngeh, aˬ yawꞈ maꞈ tsawˇ haˬ kʼoeˇ gʼaˬ-ahˇ pu laꞈ nyiˇ sheuˬ doˆ gʼeh-awˇ, kʼaˬ lo neh biˬ sehꞈ-euˬ meh. Kʼoeˇ loꞈ-ehˇ, Sahˬpaˬ Miˬyehˇ neh Moˇseˬ-ahˇ kʼaˇ ehˇ nehˬ-euˬ loꞈ-ehˇ, Iˇsaˬleˬlaˆ tsawˇ haˬ deuˬ mˇ-euˬ meh.