Read Akha Uˬ duˬ 26 Bible Online

Uˬ duˬ 26 - Akha bible

Uˬ duˬ 26

¹Sahˬpaˬ Miˬyehˇ ehˇ-eu, “Naw maꞈ uˬ duˬ tahˬ-eu gʼaˇ duˬ, tahˬ pahˬ aˬ ma mawˇ kawˇ tehˆ-eu maˬ ehˇ, kʼaˬ lo kʼawˇ zeuˇ ka tuˇ-eu maˬ ehˇ, kʼaˬ lo-ahˇ dzahˬ taꞈ taꞈ-eu maˬ ehˇ, maˬ ya jahˇ-a. Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

²Uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-eu bawˬ-iˬ deuˬ naw maꞈ maˬ byehˇ-ehˇ, ngaˬ-ahˇ uˬ duˬ tahˬ-eu jawˇ duˬ-ahˇ naw maꞈ yaw zeu ya baw meh. Ngaˇ-aˬ, Sahˬpaˬ Miˬyehˇ ma.

³“Ngaˬ-euˬ zahˇ dawˬ kʼoꞈ dawˬ deuˬ-ahˇ naw maꞈ naˇ haˬ geuꞈ-awˇ yaw dehꞈ dehꞈ naˇ,

⁴dzaˬ la gʼo cehˇ deuˬ bi muiˬ laˇ-awˇ, aˇ siˬ aˇ bawˇ deuˬ aˇ siˬ bi siˬ laˇ-eu gʼaˇ duˬ, aˇ yamˬ tsaˬ tsaˬ ni uˬ yehˇ bi yehˇ le ma.

⁵Naw maꞈ dzaˬ la gʼo cehˇ za dui dui le-eu miˇ neh, aˬ gaꞈ aˇ siˬ pyaˆ yamˬ-ahˇ keuˆ ni, cehˇ ya laˆ luiˆ luꞈ gaˇ keuˆ-awˇ, siˬ yoeˬ sehˬ-eu yamˬ-ahˇ keuˆ ni, aˬ gaꞈ aˇ siˬ pyaˆ pyaˆ-ehˇ ya jawˇ gaˇ keuˆ tehꞈ-a. Yawˬ ha kʼaˇ dzaˬ mawꞈ-eu jeˬ tiˬ byah tiˬ loꞈ jaˆ-awˇ, guˆ-eu gaˆ-eu jeˬ-ahˇ kʼahˬ lahˇ kʼaˇ maˬ za ni, naw maꞈ-euˬ miˇ kʼahˬ laꞈ kʼoeˇ, saˇ lehˆ ni naw maꞈ ya jawˇ tehꞈ-a.

⁶“Miˇ kʼahˬ saˇ-eu jeˬ, naw maꞈ-euˬ miˇ kʼahˬ kʼoeˇ taˆ ngaˇ bi keuˆ le-awˇ, tsawˇ haˬ tiˬ gʼaˬ-ahˇ-iˬ guˆ kʼaˇ maˬ za ni, naw maꞈ ya yuꞈ ya jawˇ tehꞈ-a. Miˇ kʼahˬ kʼoeˇ kʼahˬ laꞈ kʼoeˇ, haiˬ-eu jeˬ zaˬ deuˬ ngaˇ laˆ byoˆ-awˇ, guiˇ deuˆ-eu jeˬ kʼawꞈ maˬ jaˆ ni pyeuꞈ-iˇ tehꞈ-a.

⁷Naw maꞈ-ahˇ muiˇ-eu tsawˇ haˬ deuˬ-ahˇ naw ma teh-awˇ, naw maꞈ-euˬ mi cehˇ uˬ moˆ, aˬ yawꞈ maꞈ saꞈ gʼawˇ li tehꞈ-a.

⁸Naw maꞈ tsawˇ haˬ ngaˬ gʼaˬ, aˬ cawˬ tiˬ yaˇ gʼaˬ-ahˇ gʼaˬ leˇ-awˇ, naw maꞈ tsawˇ haˬ tiˬ yaˇ gʼaˬ, aˬ cawˬ tiˬ muiˇ gʼaˬ-ahˇ gʼaˬ leˇ tehꞈ-a.

⁹Naw maꞈ-ahˇ ngaˇ guiˬ lahˬ biꞈ-awˇ, naw maꞈ-euˬ zaˬ deuˬ bi jeuˬ bi o le ma. Naw maꞈ nehˬ-ehˇ dzaˬ taˬ-euˬ saˇ jaˇ-ahˇ ngaˇ ziꞈ ma.

¹⁰Naw maꞈ mˇ dzaˬ kʼawꞈ dawˇ-eu za dui dui le-eu miˇ neh, cehˇ shuiꞈ keuˆ le ngeh, cehˇ oeˇ ya tahˬ dzeh gaˇ keuˆ tehꞈ-a.

¹¹Muiˬ-eu shawˇ-eu Sehˬ gʼawˆ laꞈ kʼoeˇ, naw maꞈ nehˬ-ehˇ ngaˇ jawˇ-awˇ, naw maꞈ-ahˇ ngaˇ maˬ byehˇ dzeh.

¹²Naw maꞈ nehˬ-ehˇ ngaˇ jawˇ-eu laꞈ kʼoeˇ, naw maꞈ-euˬ Miˬyehˇ ngaˇ ya pyeuꞈ-awˇ, naw maꞈ ngaˬ-euˬ tsawˇ haˬ ya pyeuꞈ tehꞈ-a.

¹³Naw maꞈ aˬ cawˬ zaˬ kʼaˆ maˬ ya geuꞈ-eu gʼaˇ duˬ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ gʼaˬ, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ sheuˬ doˆ laꞈ-euˬ ma. Naw maꞈ-ahˇ daˇ awˆ taˬ-euˬ kʼaˆ baꞈ kawˬ ngaˇ ngawˬ kʼehꞈ-awˇ, naw maꞈ dawˇ coe ni yawꞈ-awˇ cah nya ni ngaˇ jahˇ-euˬ ma.”

¹⁴Sahˬpaˬ Miˬyehˇ ehˇ-eu, “Ngaˬ-euˬ zahˇ dawˬ kʼoꞈ dawˬ-ahˇ naw maꞈ maˬ naˇ haˬ geuꞈ naˇ, kʼehˬ-eu kʼaˆ-eu jeˬ-ahˇ ya daˬ tehꞈ-a.

¹⁵Ngaˬ-euˬ zahˇ dawˬ kʼoꞈ dawˬ deuˬ-ahˇ maˬ naˇ haˬ geuꞈ ni, ngaˬ nehˬ-ehˇ dzaˬ taˬ-euˬ saˇ jaˇ-ahˇ naw maꞈ puiˬ naˇ,

¹⁶naw maꞈ-ahˇ ngaˇ kʼehˬ nehˬ kʼaˆ nehˬ ma. Naw maꞈ kʼoeˇ taˆ shaˬ zahˬ guˆ gaˆ bi keuˆ le ma. Naw maꞈ-euˬ myaˆ nuiˆ myaˆ behꞈ behꞈ-iˇ-awˇ, tsawˇ shiˇ uˬ kʼawˇ-ahˇ deuˬ leˇ gaˇ keuˆ ni kʼaˆ-eu maˬ laˆ taˬ nya-eu naˇ gawˇ deuˬ, naw maꞈ kʼoeˇ taˆ ngaˇ bi keuˆ le ma. Naw maꞈ siˬ yoeˬ sehˬ kʼawꞈ, guiˬ lahˬ maˬ baw-aˇ. Aˬ jeˬ miˇ neh ehˇ naˇ, naw maꞈ-ahˇ muiˇ-eu deuˬ naw maꞈ-ahˇ deuˆ gʼaˬ-awˇ, naw maꞈ neh kʼaˇ ka taˬ-euˬ deuˬ yuˇ dzaˬ jiˇ tehꞈ-a.

¹⁷Aˬ cawˬ naw maꞈ-ahˇ bi gʼaˬ leˇ ni, naw maꞈ-ahˇ ngaˇ byehˇ dzeh-awˇ, naw maꞈ-ahˇ muiˇ-eu tsawˇ haˬ deuˬ naw maꞈ kʼoeˇ taˆ uˇ lahˇ tehꞈ-a. Naw maꞈ tsawˬ guˆ-iˇ dui dui-eu miˇ neh, aˬ cawˬ naw maꞈ-ahˇ maˬ teh kʼawꞈ, naw maꞈ cehˆ cehˆ-ehˇ jawˇ tehꞈ-a.

¹⁸“Kʼoeˇ loꞈ-ehˇ pyeuꞈ laˇ gʼaˬ-euˬ kʼawꞈ, ngaˬ-euˬ ehˇ dawˬ-ahˇ naw maꞈ maˬ naˇ haˬ geuꞈ naˇ, shiꞈ bymˇ kʼaˆ dzehˬ-eu kʼehˬ-eu kʼaˆ-eu jeˬ, naw maꞈ kʼoeˇ taˆ keuˆ le tehꞈ-a.

¹⁹Naw maꞈ-euˬ nui ma huiˬ-eu gʼahˇ-eu jeˬ-ahˇ ngaˇ laˆ cawˆ ma. Uˬ yehˇ maˬ jaˆ-eu uˬ taꞈ, naw maꞈ-euˬ miˇ kʼahˬ gui coˇ ni pyeuꞈ-iˇ-awˇ, shmˇ loꞈ-ehˇ gʼahˇ tehꞈ-a.

²⁰Naw maꞈ mˇ sehꞈ leꞈ kʼawꞈ, guiˬ lahˬ maˬ baw-aˇ. Aˬ jeˬ miˇ neh ehˇ naˇ, naw maꞈ-euˬ miˇ tsaˬ naw maꞈ-ahˇ dzaˬ la gʼo cehˇ maˬ bi za le-eu uˬ taꞈ, aˇ siˬ aˇ bawˇ deuˬ kʼawꞈ, aˇ siˬ maˬ bi siˬ le-a.

²¹“Naw maꞈ ngaˬ-euˬ ehˇ dawˬ maˬ naˇ haˬ-ehˇ, ngaˬ-ahˇ puiˬ te siˬ lehˇ ngeuˇ naˇ, naw maꞈ-ahˇ kʼehˬ nehˬ kʼaˆ nehˬ-eu jeˬ shiꞈ bymˇ paˇ bi kʼaˆ dzehˬ laˇ ma.

²²Jeˬ zaˬ yaw haiˬ deuˬ naw maꞈ jawˇ gaˇ ngaˇ pyehˬ gʼeh leꞈ-awˇ, naw maꞈ-euˬ zaˬ deuˬ-ahˇ kawꞈ sehꞈ-awˇ, naw maꞈ-euˬ jeˬ zaˬ deuˬ-ahˇ laˆ piˬ laˆ byoˆ nehˬ tehꞈ-a. Naw maꞈ tsawˇ haˬ ui cuiˆ tehꞈ-ehˇ dzeˇ-eu miˇ neh, naw maꞈ iˇ-eu gaˇ ma ciˬ cuˇ ni jaˆ tehꞈ-a.

²³“Kʼoeˇ loꞈ-ehˇ, naw maꞈ-ahˇ ngaˇ gʼawˬ mya poˆ kʼehˬ nehˬ gʼaˬ-euˬ kʼawꞈ, ngaˬ-euˬ ehˇ dawˬ-ahˇ naw maꞈ maˬ naˇ haˬ-ehˇ, ngaˬ-ahˇ paˇ puiˬ te siˬ lehˇ ngeuˇ naˇ,

²⁴yaw beh naˆ maˬ tseˇ shiꞈ bymˇ kʼaˆ dzehˬ-euˬ kʼehˬ-eu kʼaˆ-eu jeˬ, naw maꞈ kʼoeˇ taˆ ngaˇ paˇ bi keuˆ le ma.

²⁵Ngaˬ nehˬ-ehˇ dzaˬ taˬ-euˬ saˇ jaˇ-ahˇ naw maꞈ puiˬ-eu miˇ neh, naw maꞈ kʼoeˇ taˆ guiˇ deuˆ-eu jeˬ bi keuˆ le-awˇ, naw maꞈ-ahˇ ngaˇ kʼehˬ ma. Naw maꞈ-euˬ meuˬ deuˬ laꞈ kʼoeˇ naw maꞈ uiˬ leˇ-awˇ jawˇ ngeh, maˬ laˆ taˬ nya-eu naˇ gawˇ deuˬ naw maꞈ kʼoeˇ taˆ bi keuˆ le-awˇ, naw maꞈ-ahˇ muiˇ-eu deuˬ-euˬ laꞈ-ahˇ, naw maꞈ ya ahˇ leˇ tehꞈ-a.

²⁶Naw maꞈ-euˬ dzaˬ dzaˬ dawˇ dawˇ sha miˇ-eu gaˇ ma ngaˇ deuˆ tsehˆ-euˬ miˇ neh, zaˬ miˬ zaˬ tseˇ gʼaˬ kʼaˇ jaˆ-eu kaˬ muˇ yuˇ uiˬ-awˇ jahˇ ngeh, mui za za zaˬ tiˬ siˬ laꞈ kʼoeˇ jahˇ loꞈ ni tehꞈ-ehˇ jaˆ tehꞈ-a. Kaˬ muˇ kʼoeˇ aˬ yawꞈ maꞈ biˇ doe nehˬ-awˇ, naw maꞈ dzaˬ jiˇ ngeh, maˬ ya dzaˬ dehˆ-ehˇ ya shaˬ tehꞈ-a.

²⁷“Naw maꞈ-ahˇ kʼoeˇ naˆ naˆ-ehˇ kʼehˬ nehˬ gʼaˬ-euˬ kʼawꞈ, ngaˬ-euˬ ehˇ dawˬ-ahˇ naw maꞈ maˬ naˇ haˬ ni ngaˬ-ahˇ puiˬ naˇ,

²⁸ngaˇ nui ma pehˇ laˇ-eu laꞈ kʼoeˇ, yaw beh naˆ maˬ tseˇ shiꞈ bymˇ paˇ kʼaˆ dzehˬ-eu kʼehˬ-eu kʼaˆ-eu jeˬ, naw maꞈ kʼoeˇ taˆ paˇ bi keuˆ le ma.

²⁹Naw maꞈ mehꞈ-eu shuꞈ-eu jeˬ naꞈ dui dui-eu miˇ neh, yawˬ ha-euˬ zaˬ yawˬ ha ya sehꞈ dzaˬ gaˇ keuˆ tehꞈ-a.

³⁰Gawˬ jawˬ gawˬ duˇ kʼoeˇ taˆ jaˆ-eu naw maꞈ-euˬ uˬ duˬ tahˬ-eu jawˇ duˬ-ahˇ ngaˇ laˆ cawˆ-awˇ, yaw saw jeˬ doꞈ-awˇ damˬ-eu lawˇ duˬ kʼawꞈ ngaˇ laˆ pyaˆ ma. Shiˇ taˬ-euˬ naw maꞈ-euˬ gʼawˇ mawˇ deuˬ-ahˇ, coˬ dzeh taˬ-euˬ tahˬ pahˬ aˬ ma mawˇ kawˇ deuˬ kʼoeˇ taˆ gahˬ daˆ-awˇ, naw maꞈ-ahˇ ngaˇ nui daˆ daˆ dui dui ma.

³¹Naw maꞈ-euˬ meuˬ deuˬ hawˇ-eu, uˬ duˬ tahˬ-eu jawˇ duˬ deuˬ ngaˇ laˆ cawˆ byoˆ jiˇ-awˇ, naw maꞈ neh lawˇ-euˬ jeˬ-ahˇ maˬ ha geuꞈ ni ngaˇ jawˇ ma.

³²Naw maꞈ-euˬ miˇ kʼahˬ-ahˇ ngaˇ nui kʼahˇ tiˬ shiˇ laˆ cawˆ-euˬ miˇ neh, naw maꞈ miˇ kʼahˬ-ahˇ deuˆ gʼaˬ-euˬ naw maꞈ-ahˇ muiˇ-eu tsawˇ haˬ deuˬ kʼawꞈ, ya tsawˬ guˆ-iˇ gaˇ keuˆ tehꞈ-a.

³³Naw maꞈ kʼoeˇ taˆ guiˇ deuˆ-eu jeˬ ngaˇ bi keuˆ le-awˇ, aˬ cawˬ miˇ kʼahˬ laꞈ kʼoeˇ, tiˬ gaˇ tiˬ gʼaˬ-ehˇ naw maꞈ ya jawˇ byoˆ tehꞈ-a. Naw maꞈ-euˬ miˇ kʼahˬ ciˬ cuˇ ni jaˆ yaꞈ-awˇ, naw maꞈ-euˬ meuˬ deuˬ yaw pyaˆ yaw shaˆ-ehˇ jaˆ yaꞈ tehꞈ-a.

³⁴Naw maꞈ-euˬ miˇ kʼahˬ-aˬ, ciˬ cuˇ ni jaˆ-eu laꞈ kʼoeˇ gʼaˬ doeˇ naˬ dah tehꞈ-a. Naw maꞈ-ahˇ muiˇ-eu tsawˇ haˬ deuˬ-euˬ miˇ kʼahˬ laꞈ kʼoeˇ naw maꞈ jawˇ luꞈ ngeh, naw maꞈ-euˬ miˇ kʼahˬ laˬ kʼaˬ cehˇ taˆ ni gʼaˬ naˬ naˬ tehꞈ-a.

³⁵Naw maꞈ jawˇ ngeh, naw maꞈ-euˬ miˇ kʼahˬ gʼaˬ naˬ maˬ ya naˬ-euˬ kʼawꞈ, aˬ yawˇ yawꞈ ciˬ cuˇ ni jaˆ ngeh, gʼaˬ naˬ ya naˬ dehˆ tehꞈ-a.

³⁶“Aˬ cawˬ-euˬ miˇ kʼahˬ-ahˇ bi nyehꞈ gʼeh-euˬ naw maꞈ-euˬ tsawˇ haˬ deuˬ, aˇ paꞈ-ahˇ jaˬ lehˇ baw shawˆ-eu teˇ saˇ-ahˇ keuˆni, cehˆ byoˆ paˬ-ehˇ guˆ-eu nui ma ahˇ ni ngaˇ jahˇ nehˬ ma. Guiˇ deuˆ luꞈ ngeh aˬ cawˬ neh bi teh-euˬ loꞈ-ehˇ aˬ yawꞈ maꞈ cehˆ-awˇ, muiˇ-eu tsawˇ haˬ deuˬ aˬ yawꞈ maꞈ-euˬ dawˬ peh maˬ jawˇ kʼawꞈ, coˬ lah gaˇ keuˆ ni guˆ-iˇ tehꞈ-a.

³⁷Tsawˇ haˬ tiˬ gʼaˬ-iˬ aˬ yawꞈ maꞈ mehˬ nah maˬ teh gaˇ, tiˬ gʼaˬ tiˇ gʼaˬ pehˆ toˆ sehꞈ gaˇ keuˆ ni aˬ yawꞈ maꞈ cehˆ-awˇ, aˬ yawꞈ maꞈ-ahˇ muiˇ-eu tsawˇ haˬ deuˬ-ahˇ guiˇ maˬ deuˆ peuˬ ni pyeuꞈ-iˇ tehꞈ-a.

³⁸Aˬ cawˬ-euˬ miˇ kʼahˬ laꞈ kʼoeˇ naw maꞈ shiˇ-awˇ naw maꞈ-ahˇ muiˇ-eu tsawˇ haˬ deuˬ-euˬ miˇ tsaˬ neh bi myoꞈ ahˇ tehꞈ-a.

³⁹Aˬ cawˬ miˇ kʼahˬ laꞈ kʼoeˇ naw maꞈ tsawˇ haˬ ui cuiˆ dzeˇ yaꞈ-euˬ kʼawꞈ, naw maꞈ-euˬ aˬ piˬ aˬ bawˇ deuˬ-euˬ iˬ baˇ hawˇ-eu naw maꞈ-euˬ iˬ baˇ baˬ da neh ya shaˬ ya zahˬ tehꞈ-a.

⁴⁰“Ehˇ kʼawꞈ, naw maꞈ-euˬ zaˬ deuˬ uˆ deuˬ-aˬ, aˬ yawꞈ maꞈ-euˬ iˬ baˇ maˬ ehˇ, ngaˬ-euˬ ehˇ dawˬ maˬ naˇ haˬ ni ngaˬ-ahˇ puiˬ-euˬ aˬ yawꞈ maꞈ-euˬ aˬ poeˬ aˬ bawˇ deuˬ-euˬ iˬ baˇ maˬ ehˇ, maˬ zaꞈ ni ehˇ doˆ tehꞈ-a.

⁴¹Aꞈ yawꞈ maꞈ-euˬ aˬ poeˬ aˬ bawˇ deuˬ kʼoeˇ loꞈ-ehˇ mˇ-euˬ miˇ neh, ngaˬ neh aˬ yawꞈ maꞈ-ahˇ, muiˇ-eu deuˬ-euˬ miˇ kʼahˬ-ahˇ bi nyehꞈ gʼeh-euˬ gaˇ kawˆ, aˬ yawꞈ maꞈ ehˇ doˆ tehꞈ-a. Aˇ saˬ saˬ laˇ ngeh, naw maꞈ-euˬ zaˬ deuˬ uˆ deuˬ nui ma nahˬ yu ni taˬ-awˇ, aˬ yawꞈ maꞈ-euˬ iˬ baˇ aˇ poeˬ hawˇ-eu, ngaˬ-ahˇ puiˬ-euˬ aˇ poeˬ biꞈ tsoeˬ gʼaˬ ngeh,

⁴²Yaˬkoˆ, Iˇtsaˆ, Aˬbyaˬhaˬ aˬ ha maꞈ-ahˇ ngaˬ neh dzaˬ taˬ-euˬ dawˬ ma saˇ jaˇ-ahˇ ngaˇ paˇ noeˬ keuˆ-awˇ, miˇ kʼahˬ kʼoeˇ kʼahˬ ngaˬ-euˬ tsawˇ haˬ deuˬ-ahˇ biꞈ ma lehˇ, ngaˬ neh ehˇ tsehˆ taˬ-euˬ loꞈ-ehˇ, yaw shuiꞈ shuiꞈ-ehˇ ngaˇ paˇ noeˬ paˇ ma.

⁴³Ehˇ kʼawꞈ, miˇ kʼahˬ kʼoeˇ kʼahˬ laꞈ kʼoeˇ tsawˇ haˬ maˬ jawˇ ni, miˇ tsaˬ-ahˇ gʼaˬ naˬ ya bi naˬ meh. Aˬ yawꞈ maꞈ ngaˬ-euˬ zahˇ dawˬ kʼoꞈ dawˬ-ahˇ maˬ naˇ haˬ geuꞈ ni ngaˬ-ahˇ puiˬ-euˬ miˇ neh, iˬ baˇ aˇ poeˬ dziˇ dzoˆ tiˬ byah tiˬ loꞈ ya tsoeˬ meh.

⁴⁴Ehˇ kʼawꞈ, aˬ yawꞈ maꞈ-ahˇ muiˇ-eu deuˬ-euˬ miˇ kʼahˬ-ahˇ aˬ yawꞈ maꞈ jawˇ luꞈ ngeh, aˬ yawꞈ maꞈ-ahˇ byehˇ tsehˆ tsehˆ-awˇ, laˆ cawˆ byoˆ nehˬ-eu jeˬ ngaˇ maˬ mˇ. Kʼoeˇ loꞈ-ehˇ jahˇ naˇ, ngaˬ neh aˬ yawꞈ maꞈ nehˬ-ehˇ saˇ jaˇ dzaˬ taˬ-euˬ jeˬ aˇ saˬ saˬ gaˇ duˇ tehꞈ-a. Ngaˇ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁴⁵Aˬ yawꞈ maꞈ-euˬ Miˬyehˇ ya pyeuꞈ laˇ ni, miˇ kʼahˬ heu myaˆ ni gʼeh-eu mehˬ shi, Iˇjiˇtuˆ miˇ kʼahˬ laꞈ kʼoeˇ neh ngaˬ neh sheuˬ doˆ laꞈ-euˬ aˬ yawꞈ maꞈ-euˬ aˬ poeˬ aˬ bawˇ deuˬ nehˬ-ehˇ ngaˬ neh dzaˬ taˬ-eu dawˬ ma saˇ jaˇ-ahˇ, yaw shuiꞈ shuiꞈ-ehˇ paˇ noeˬ keuˆ ma.”

⁴⁶Heu deuˬ dawˬ tawˆ luꞈ, Iˇsaˬleˬlaˆ tsawˇ haˬ deuˬ gʼaˇ duˬ, Siˇnaˆ gawˬ jawˬ kʼoeˇ taˆ Moˇseˬ-ahˇ Sahˬpaˬ Miˬyehˇ biꞈ-euˬ zahˇ dawˬ kʼoꞈ dawˬ deuˬ pyeuꞈ-eu meh.