Read Akha Uˬ duˬ 5 Bible Online

Uˬ duˬ 5 - Akha bible

Uˬ duˬ 5

¹Laꞈ oˆ paw ehˇ taˬ-euˬ gaˇ kawˆ heu deuˬ pyeuꞈ doˆ laˇ ngeh, iˬ baˇ shawˇ-eu lawˇ-eu jeˬ ya lawˇ meh. Tsawˇ haˬ tiˬ gʼaˬ na, yawˬ ha neh kʼaˇ ya gaˬ kʼaˇ ya mawˇ-euˬ jeˬ, yaˇ kʼaˬ daˇ-eu nymˇ-ahˇ saˇ kiˇ geuꞈ-awˇ ya ngehˬ ya tmˇ doˆ jiˇ meh lehˇ ehˇ taˬ-euˬ kʼawꞈ, yawˬ ha neh ya mawˇ-euˬ loꞈ-ehˇ maˬ ngehˬ maˬ tmˇ ni jawˇ naˇ, iˬ baˇ ya pi meh.

²Tsawˇ haˬ tiˬ gʼaˬ na, maˬ noeˬ maˬ duˇ-euˬ laꞈ kʼoeˇ, zahˇ sahˇ kʼoꞈ laꞈ kʼoeˇ maˬ shawˇ-eu jeˬ lehˇ myahˇ taˬ-euˬ tiˬ jeˬ paˬ-ahˇ ya toeˬ ciˆ naˇ, yaw jeˬ ma jeˬ, shiˇ taˬ-eu jeˬ zaˬ tiˬ mawˇ na-ahˇ ya toeˬ ciˆ naˇ, aˬ yawꞈ kʼoeˇ loꞈ-ehˇ ya toeˬ ciˆ gʼaˬ-euˬ gaˇ kawˆ aˬ yawˇ yawꞈ siˬ leˇ-eu nehˬ-ehˇ tiˬ poˆ tehꞈ-ehˇ, iˬ baˇ ahˇ-eu maˬ shawˇ-eu tsawˇ haˬ pyeuꞈ laˇ-euˬ meh.

³Tsawˇ haˬ tiˬ gʼaˬ na, maˬ noeˬ maˬ duˇ-euˬ laꞈ kʼoeˇ, tsawˇ haˬ zaˬ-euˬ gʼawˇ mawˇ-ahˇ taꞈ leˇ-eu maˬ shawˇ-eu tiˬ jeˬ na-ahˇ ya toeˬ ciˆ naˇ, aˬ geu jeˬ-ahˇ ya toeˬ ciˆ-euˬ maˬ kaˬ, aˬ yawꞈ kʼoeˇ loꞈ-ehˇ toeˬ ciˆ gʼaˬ-euˬ gaˇ kawˆ aˬ yawˇ yawꞈ siˬ leˇ-eu nehˬ-ehˇ tiˬ poˆ tehꞈ-ehˇ, iˬ baˇ ahˇ-eu meh.

⁴Tsawˇ haˬ tiˬ gʼaˬ na, maˬ shaˇ noeˬ maˬ shaˇ sawˇ ni, tiˬ jeˬ paˬ gʼaˇ duˬ kamˬ naˇ, aˬ geu jeˬ gʼaˇ duˬ kamˬ-eu maˬ kaˬ, aˬ yawꞈ kʼoeˇ loꞈ-ehˇ kamˬ-euˬ aˬ yawˇ yawꞈ siˬ leˇ-eu nehˬ-ehˇ tiˬ poˆ tehꞈ-ehˇ, iˬ baˇ ahˇ-eu meh.

⁵Tsawˇ haˬ tiˬ gʼaˬ na iˬ baˇ mˇ naˇ, yawˬ ha-euˬ iˬ baˇ ya ehˇ doˆ meh.

⁶Kʼoeˇ naˇ, aˬ yawꞈ-euˬ iˬ baˇ aˇ poeˬ, yawˇ a ma tiˬ mawˇ maˬ ngeuˇ naˇ, ciꞈ myehꞈ ciꞈ ma tiˬ mawˇ, Sahˬpaˬ Miˬyehˇ jawˇ gaˇ tsahˇ laꞈ-awˇ ya lawˇ meh. Piˇ ma gʼaˬ, tsawˇ haˬ kʼoeˇ gʼaˬ gʼaˇ duˬ lawˇ-eu shehˇ-eu jeˬ ya mˇ nehˬ meh.

⁷Tsawˇ haˬ tiˬ gʼaˬ na, yawˬ ha-euˬ iˬ baˇ aˇ poeˬ lawˇ kʼoꞈ nehˬ-eu gʼaˇ duˬ, yawˇ hawˇ-eu ciꞈ myehꞈ maˬ jawˇ naˇ, kʼaˬ kʼoeˬ nyiˬ mawˇ, maˬ ngeuˇ naˇ, kʼaˬ guˬ nyiˬ mawˇ yuˇ laꞈ-awˇ, iˬ baˇ shawˇ-eu lawˇ-eu jeˬ gʼaˇ duˬ tiˬ mawˇ hawˇ-eu, miˬ dzaˬ-ahˇ dzah puiˆ-awˇ lawˇ-eu jeˬ gʼaˇ duˬ tiˬ mawˇ ya lawˇ meh.

⁸Piˇ ma jawˇ gaˇ, aˇ jiˇ kʼoeˇ nyiˬ mawˇ aˬ yawꞈ yuˇ laꞈ-awˇ, iˬ baˇ shawˇ-eu lawˇ-eu jeˬ aˬ hu ya bi lawˇ-eu meh. Piˇ ma gʼaˬ, aˇ jiˇ kʼoeˇ mawˇ-euˬ uˬ duˬ maˬ yeuꞈ tsehˆ ni, kawˬ lahˇ ngawˬ kʼehꞈ-awˇ,

⁹shiˬ ui cuiˆ yuˇ-awˇ, lawˇ duˬ-euˬ gaˇ dzeˇ paw ya byaˆ shehˬ meh. Dzeˇ-eu shiˬ deuˬ-ahˇ, lawˇ duˬ-euˬ dawˬ pehˬ-ahˇ ya nyehꞈ dzeˇ-eu meh. Heu-aˬ, iˬ baˇ shawˇ-eu lawˇ-eu jeˬ pyeuꞈ-eu meh.

¹⁰Kʼoeˇ naˇ, aˇ jiˇ yawˬ mawˇ yawˬ-ahˇ, zahˇ sahˇ kʼoꞈ jaˆ-eu loꞈ-ehˇ miˬ dzaˬ-ahˇ dzah puiˆ-awˇ ya lawˇ meh. Kʼoeˇ loꞈ-ehˇ, piˇ ma gʼaˬ tsawˇ haˬ kʼoeˇ gʼaˬ-euˬ iˬ baˇ gʼaˇ duˬ lawˇ-eu shehˇ-eu jeˬ mˇ-awˇ, tsawˇ haˬ kʼoeˇ gʼaˬ iˬ baˇ buˬ-iˇ-eu meh.

¹¹Tsawˇ haˬ tiˬ gʼaˬ na, kʼaˬ kʼoeˬ nyiˬ mawˇ maˬ ehˇ, kʼaˬ guˬ nyiˬ mawˇ maˬ ehˇ, maˬ jawˇ naˇ, iˬ baˇ shawˇ-eu lawˇ-eu jeˬ lawˇ-eu gʼaˇ duˬ, cehˇ meu tiˬ pehˬ ya yuˇ laꞈ meh. Saˬ loˬ tsiˇ maˬ ehˇ, yaw saw jeˬ maˬ ehˇ, cehˇ meu-ahˇ aˬ yawꞈ maˬ ya keuˬ-a. Aˬ jeˬ miˇ neh ehˇ naˇ, kʼoeˇ-aˬ, dzaˬ la gʼo cehˇ lawˇ-eu gʼaˇ duˬ maˬ ngeuˇ-a. Iˬ baˇ shawˇ-eu lawˇ-eu jeˬ gʼaˇ duˬ pyeuꞈ-eu meh.

¹²Cehˇ meu kʼoeˇ piˇ ma jawˇ gaˇ aˬ yawꞈ ya yuˇ laꞈ-eu meh. Cehˇ meu kʼoeˇ dawˬ tawˆ luꞈ-euˬ dah zaˇ, piˇ ma gʼaˬ cehˇ meu tiˬ tsuˆ tsuˆ doˆ-awˇ, dzaˬ dzaˬ dawˇ dawˇ lawˇ-eu jeˬ loꞈ-ehˇ, lawˇ duˬ kʼoeˇ taˆ puiˆ-awˇ, Sahˬpaˬ Miˬyehˇ-ahˇ ya lawˇ meh. Kʼoeˇ-aˬ, iˬ baˇ tsiˬ shawˇ-eu lawˇ-eu jeˬ pyeuꞈ-eu meh.

¹³Kʼoeˇ loꞈ-ehˇ, tsawˇ haˬ kʼoeˇ gʼaˬ-euˬ iˬ baˇ gʼaˇ duˬ, piˇ ma gʼaˬ lawˇ-eu shehˇ-eu jeˬ mˇ-awˇ, tsawˇ haˬ kʼoeˇ gʼaˬ iˬ baˇ buˬ-iˇ-eu meh. Dzaˬ la gʼo cehˇ lawˇ ngeh loꞈ-ehˇ, dzehˬ laˇ-euˬ cehˇ meu kʼoeˇ deuˬ piˇ ma gʼaˬ ya geuꞈ-eu meh.

¹⁴Zahˇ sahˇ kʼoꞈ heu deuˬ, Moˇseˬ-ahˇ Sahˬpaˬ Miˬyehˇ biꞈ nehˬ-euˬ meh.

¹⁵Tsawˇ haˬ tiˬ gʼaˬ na, Sahˬpaˬ Miˬyehˇ-ahˇ biꞈ paˬ-ehˇ gʼeh-eu muiˬ-eu shawˇ-eu jeˬ maˬ biꞈ ni, maˬ noeˬ maˬ duˇ-ehˇ jawˇ-euˬ iˬ baˇ ahˇ naˇ, maˇ byawꞈ maˬ baw-eu yawˇ aˬ buˬ maˬ ngeuˇ naˇ, maˇ byawꞈ maˬ baw-eu ciꞈ myehꞈ ciꞈ buˬ tiˬ mawˇ tsahˇ laꞈ-awˇ, dziˇ dzoˆ tsoeˬ-eu lawˇ-eu jeˬ, Sahˬpaˬ Miˬyehˇ-ahˇ ya lawˇ nehˬ meh. Jeˬ zaˬ kʼoeˇ mawˇ-euˬ aˇ poeˬ, kʼaˇ poeˬ kʼaˇ lawˬ-eu loꞈ-ehˇ, ya pyehˆ tsehˆ meh.

¹⁶Aˬ yawꞈ-aˬ, aˬ yawꞈ biꞈ nehˬ paˬ-ehˇ gʼeh-eu jeˬ zaˬ maˬ biꞈ-euˬ miˇ neh, kʼaˇ poeˬ kʼaˇ lawˬ-eu loꞈ-ehˇ ya tsoeˬ-eu uˬ taꞈ, ngaˬ bymˇ tiˬ bymˇ ya biꞈ dzehˬ meh. Jeˬ zaˬ kʼoeˇ mawˇ, piˇ ma-ahˇ aˬ yawꞈ ya a nehˬ-eu meh. Piˇ ma gʼaˬ jeˬ zaˬ kʼoeˇ mawˇ yuˇ-awˇ, tsawˇ haˬ kʼoeˇ gʼaˬ-euˬ iˬ baˇ gʼaˇ duˬ lawˇ-eu shehˇ-eu jeˬ mˇ-awˇ, tsawˇ haˬ kʼoeˇ gʼaˬ iˬ baˇ ya buˬ-iˇ-eu meh.

¹⁷Tsawˇ haˬ tiˬ gʼaˬ na, maˬ noeˬ maˬ duˇ-ehˇ, Sahˬpaˬ Miˬyehˇ neh biꞈ taˬ-euˬ zahˇ dawˬ kʼoꞈ dawˬ tiˬ dawˬ na-ahˇ puiˬ-eu laꞈ kʼoeˇ iˬ baˇ mˇ naˇ, iˬ baˇ aˇ poeˬ aˬ yawꞈ ya biꞈ tsoeˬ meh.

¹⁸Dziˇ dzoˆ tsoeˬ-eu lawˇ-eu jeˬ gʼaˇ duˬ, maˇ byawꞈ maˬ baw-eu yawˇ aˬ buˬ maˬ ngeuˇ naˇ, maˇ byawꞈ maˬ baw-eu ciꞈ myehꞈ ciꞈ buˬ tiˬ mawˇ, piˇ ma jawˇ gaˇ aˬ yawꞈ ya tsahˇ laꞈ meh. Jeˬ zaˬ kʼoeˇ mawˇ-ahˇ, kʼaˇ poeˬ kʼaˇ lawˬ-eu loꞈ-ehˇ aˇ poeˬ ya pyehˆ meh. Tsawˇ haˬ kʼoeˇ gʼaˬ neh maˬ noeˬ maˬ duˇ-ehˇ mˇ lehˬ-euˬ iˬ baˇ gʼaˇ duˬ, piˇ ma gʼaˬ lawˇ-eu shehˇ-eu jeˬ mˇ-awˇ, tsawˇ haˬ kʼoeˇ gʼaˬ iˬ baˇ buˬ-iˇ-eu meh.

¹⁹Kʼoeˇ-aˬ, aˬ yawꞈ neh Sahˬpaˬ Miˬyehˇ-ahˇ mˇ lehˬ-euˬ gʼaˇ duˬ, dziˇ dzoˆ tsoeˬ-eu lawˇ-eu jeˬ pyeuꞈ-eu meh.