Read Akha Uˬ duˬ 6 Bible Online

Uˬ duˬ 6 - Akha bible

Uˬ duˬ 6

¹Zahˇ sahˇ kʼoꞈ heu deuˬ Moˇseˬ-ahˇ Sahˬpaˬ Miˬyehˇ neh biꞈ nehˬ-euˬ meh.

²Tsawˇ haˬ tiˬ gʼaˬ na, yawˬ ha-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ tiˬ gʼaˬ neh yawˬ ha-ahˇ bi jeˬ hmˬ taˬ-euˬ mˇ myawˬ maˬ biꞈ kʼoꞈ nehˬ-euˬ, aˬ cawˬ-eu myawˬ kʼoeˬ-euˬ, aˬ cawˬ kʼoeˇ taˆ kʼaˆ dzaˬ-euˬ,

³aˬ cawˬ-euˬ myawˬ byoˆ-euˬ aˬ yawꞈ mawˇ-euˬ kʼawꞈ, maˬ mawˇ-aˬ lehˇ kamˬ-euˬ, kʼoeˇ loꞈ-ehˇ gʼeh-eu Sahˬpaˬ Miˬyehˇ-ahˇ bahˬ-eu iˬ baˇ mˇ naˇ, ya lawˇ ya shehˇ meh.

⁴Tsawˇ haˬ tiˬ gʼaˬ kʼoeˇ loꞈ-ehˇ jahˇ-awˇ iˬ baˇ mˇ naˇ, maˬ tsaˬ maˬ dawˇ-eu laꞈ kʼoeˇ, aˬ yawꞈ neh laˆ za taˬ-euˬ myawˬ dawˬ tawˆ luꞈ ya biꞈ kʼoꞈ jiˇ meh. Aˬ yawꞈ kʼoeˇ loꞈ-ehˇ mˇ-euˬ miˇ neh, iˬ baˇ ahˇ meh lehˇ siˬ leˇ-euˬ tiˬ nah neh, myawˬ dawˬ tawˆ luꞈ yaw sahˇ gʼaˬ-ahˇ ya biꞈ kʼoꞈ jiˇ-eu uˬ taꞈ, aˇ dzehˬ ngaˬ bymˇ tiˬ bymˇ paˇ ya tsoeˬ meh.

⁶Dziˇ dzoˆ tsoeˬ-eu lawˇ-eu jeˬ Sahˬpaˬ Miˬyehˇ-ahˇ lawˇ nehˬ-eu gʼaˇ duˬ, maˇ byawꞈ maˬ baw-eu yawˇ aˬ buˬ maˬ ngeuˇ naˇ, maˇ byawꞈ maˬ baw-eu ciꞈ myehꞈ ciꞈ buˬ tiˬ mawˇ, piˇ ma jawˇ gaˇ aˬ yawꞈ ya tsahˇ laꞈ meh. Jeˬ zaˬ kʼoeˇ mawˇ-ahˇ, kʼaˇ poeˬ kʼaˇ lawˬ-eu loꞈ-ehˇ, aˇ poeˬ ya pyehˆ meh.

⁷Tsawˇ haˬ kʼoeˇ gʼaˬ-euˬ iˬ baˇ gʼaˇ duˬ, piˇ ma gʼaˬ ya lawˇ ya shehˇ nehˬ-awˇ, tsawˇ haˬ kʼoeˇ gʼaˬ iˬ baˇ buˬ-iˇ-eu meh.

⁸Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

⁹Miˬ dzaˬ-ahˇ dzah puiˆ-awˇ lawˇ-eu jeˬ ahˇ taꞈ leˇ-eu zahˇ sahˇ kʼoꞈ heu deuˬ, Aˬloˬ hawˇ-eu aˬ yawꞈ-euˬ aˬ li deuˬ-ahˇ biꞈ-awˬ. Miˬ dzaˬ dzah puiˆ-awˇ lawˇ-eu jeˬ kʼoeˇ, lawˇ duˬ kʼoeˇ taˆ uˬ ciꞈ miˇ lah-ehˇ bi jaˆ-awˇ miˬ dzaˬ maˬ ya bi miˆ tsehˆ-a.

¹⁰Kʼoeˇ naˇ, shawˇ jehˆ ni gʼeh-eu pehˇ kʼahˬ pehˇ mahˇ hawˇ-eu, laꞈ kʼoeˇ dm-eu mehˬ tsoeˬ deuˬ-ahˇ piˇ ma gʼaˬ dm-awˇ, lawˇ duˬ kʼoeˇ taˆ jaˆ-eu tsiˇ lehꞈ-eu kʼaˬ lehˇ deuˬ-ahˇ, lawˇ duˬ gaˇ dzeˇ ya tawˆ taˬ meh.

¹¹Kʼoeˇ naˇ, aˬ yawꞈ mehˬ tsoeˬ dm paˇ-awˇ, kʼaˬ lehˇ kʼoeˇ deuˬ-ahˇ, pu pu dzeˇ jaˆ-eu muiˬ-eu shawˇ-eu jawˇ duˬ-ahˇ ya tawˆ taˬ-iˇ meh.

¹²Lawˇ duˬ kʼoeˇ taˆ doꞈ luꞈ-eu miˬ dzaˬ maˬ ya bi miˆ tsehˆ-a. yawˬ shawˬ na luꞈ, piˇ ma gʼaˬ miˬ dzaˬ ya gʼoˆ doꞈ lahˬ-awˇ, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ ya lehˬ hmˬ meh. Kʼoeˇ naˇ, tsiˇ dzah puiˆ-awˇ, cawˬ cawˬ taꞈ-eu lawˇ-eu jeˬ ya lawˇ meh.

¹³Lawˇ duˬ kʼoeˇ taˆ doꞈ luꞈ-eu miˬ dzaˬ kʼoeˇ, tiˬ jawˇ-iˬ maˬ miˆ tsehˆ ni ya bi doꞈ meh.

¹⁴Heu-aˬ, dzaˬ la gʼo cehˇ lawˇ-eu gʼaˇ duˬ zahˇ sahˇ kʼoꞈ pyeuꞈ-eu meh. Aˬloˬ-euˬ aˬ li piˇ ma tiˬ gʼaˬ, lawˇ duˬ mehˬ shi Sahˬpaˬ Miˬyehˇ jawˇ gaˇ, dzaˬ la gʼo cehˇ lawˇ-eu jeˬ ya yuˇ laꞈ meh.

¹⁵Cehˇ meu dawˬ tawˆ luꞈ hawˇ-eu tsiˇ dawˬ tawˆ luꞈ lawˇ-eu dah zaˇ, laꞈ tsuˆ tiˬ tsuˆ aˬ yawꞈ ya yuˇ doˆ meh. Kʼoeˇ naˇ, kʼoeˇ-euˬ kʼoeˇ taˆ yaw saw jeˬ dawˆ daˆ-awˇ, lawˇ duˬ kʼoeˇ taˆ dzah puiˆ-awˇ, Sahˬpaˬ Miˬyehˇ-ahˇ ya lawˇ meh. Lawˇ-euˬ yaw saꞈ kʼoeˇ-ahˇ Sahˬpaˬ Miˬyehˇ nui ma tsaˬ-eu meh.

¹⁶Dzehˬ laˇ-euˬ deuˬ-ahˇ, Aˬloˬ hawˇ-eu aˬ yawꞈ-euˬ aˬ li deuˬ ya dzaˬ meh. Cehˇ meu kʼoeˇ neh, dehˬ tseˬ maˬ keuˬ-eu kaˬ muˇ jahˇ-awˇ, Sahˬpaˬ Miˬyehˇ jawˇ-eu sehˬ gʼawˆ yaˇ kmˇ laꞈ kʼoeˇ, muiˬ-eu shawˇ-eu jawˇ duˬ tiˬ tsahˇ-ahˇ, kaˬ muˇ kʼoeˇ aˬ yawꞈ maꞈ ya dzaˬ meh.

¹⁷Cehˇ meu kʼoeˇ neh kaˬ muˇ jahˇ ngeh, dehˬ tseˬ maˬ ya dawˆ-a. Kʼoeˇ-aˬ, ngaˬ-ahˇ lawˇ-euˬ dzaˬ dzaˬ dawˇ dawˇ lawˇ-eu jeˬ laꞈ kʼoeˇ, aˬ yawꞈ maꞈ-ahˇ ngaˇ biꞈ nehˬ-eu shaˬ bymˇ meh. Kʼoeˇ-aˬ, iˬ baˇ shawˇ-eu lawˇ-eu jeˬ hawˇ-eu dziˇ dzoˆ tsoeˬ-eu lawˇ-eu jeˬ loꞈ-ehˇ muiˬ-eu shawˇ-eu meh.

¹⁸Mehˬ hu paw yaw dehꞈ dehꞈ daˆ leꞈ-eu aˇ yamˬ laꞈ kʼoeˇ, Aˬloˬ o neh jeuˬ le o le-euˬ kʼaˬ dzeˇ zaˬ aˬ geu gʼaˬ maˬ kaˬ, dzehˬ laˇ-euˬ cehˇ meu kʼoeˇ neh jahˇ taˬ-euˬ ka muˇ dzaˬ nya meh. Aˬ jeˬ miˇ neh ehˇ naˇ, kʼoeˇ-aˬ, Sahˬpaˬ Miˬyehˇ-ahˇ lawˇ nehˬ-euˬ jeˬ laꞈ kʼoeˇ, aˬ yawꞈ maꞈ-ahˇ oꞈ-eu shaˬ bymˇ meh. Dzaˬ dzaˬ dawˇ dawˇ lawˇ-eu jeˬ-ahˇ toeˬ ciˆ leˇ-eu tsawˇ haˬ aˬ geu gʼaˬ maˬ kaˬ, kʼoeˇ-euˬ muiˬ-eu shawˇ-eu baoˬ baˬ da neh guˬ leˇ tehꞈ-a.

¹⁹Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

²⁰Aˬloˬ-ahˇ piˇ ma aˇ yaˬ biꞈ ngeh nah, aˬ yawꞈ hawˇ-eu aˬ yawꞈ-euˬ aˬ li deuˬ, heu loꞈ-ehˇ ya lawˇ ya shehˇ meh. Dzaˬ la gʼo cehˇ kʼaˇ lawˇ ngeh, cehˇ meu tiˬ pehˬ ya lawˇ ahˇ-eu loꞈ-ehˇ, cehˇ meu tiˬ pehˬ aˬ yawꞈ yuˇ-awˇ, uˬ shawˬ paw tiˬ paˆ, uˬ ciꞈ paw tiˬ paˆ ya lawˇ meh.

²¹Cehˇ meu kʼoeˇ-ahˇ tsiˇ keuˬ-awˇ, mui za kʼoeˇ taˆ ya laˆ jaꞈ meh. Kʼoeˇ naˇ, tiˬ poˆ paˇ laˆ loeˇ-awˇ, dzaˬ la gʼo cehˇ lawˇ-eu jeˬ ya lawˇ meh. Kʼoeˇ loꞈ-ehˇ lawˇ-euˬ yaw saꞈ-ahˇ, Sahˬpaˬ Miˬyehˇ nui ma tsaˬ-eu meh

²²Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, Aˬloˬ-euˬ zaˬ deuˬ uˆ deuˬ laꞈ kʼoeˇ, Piˇ ma Yaw huiˬ gʼaˬ kʼaˇ keuˆ leˇ-euˬ gʼaˬ, kʼoeˇ loꞈ-ehˇ ya lawˇ meh. Kʼoeˇ-aˬ, Sahˬpaˬ Miˬyehˇ-ahˇ lawˇ nehˬ shehˇ nehˬ-euˬ jeˬ loꞈ-ehˇ, dawˬ tawˆ luꞈ ya bi puiˆ dzaˬ jiˇ meh.

²³Piˇ ma neh dzaˬ dzaˬ dawˇ dawˇ lawˇ-euˬ dzaˇ kʼoeˇ ma ya dzaˬ-a. Dawˬ tawˆ luꞈ ya dzah puiˆ jiˇ meh.

²⁴Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh.

²⁵Iˬ baˇ shawˇ-eu lawˇ-eu jeˬ-ahˇ taꞈ leˇ-eu zahˇ sahˇ kʼoꞈ heu deuˬ, Aˬloˬ hawˇ-eu aˬ yawꞈ-euˬ aˬ li deuˬ-ahˇ biꞈ nehˬ-awˬ. Miˬ dzaˬ dzah puiˆ-awˇ lawˇ-eu jeˬ zaˬ deuˬ sehꞈ-eu jawˇ duˬ pyeuꞈ-eu, lawˇ duˬ-euˬ laꞈ taˆ paw pyawˬ kʼoeˇ tsahˇ-ahˇ, iˬ baˇ shawˇ-eu lawˇ-eu jeˬ zaˬ ya sehꞈ meh. Heu-aˬ, muiˬ dui shawˇ dui dui-eu lawˇ-eu jeˬ pyeuꞈ-eu meh.

²⁶Jeˬ zaˬ kʼoeˇ mawˇ-ahˇ lawˇ-eu piˇ ma gʼaˬ, Sahˬpaˬ Miˬyehˇ jawˇ-eu Sehˬ gʼawˆ yaˇ kmˇ laꞈ kʼoeˇ, muiˬ-eu shawˇ-eu jawˇ duˬ tiˬ tsahˇ-ahˇ, jeˬ zaˬ kʼoeˇ mawˇ-euˬ shaˬ jiˇ ya dzaˬ meh.

²⁷Jeˬ zaˬ kʼoeˇ mawˇ-euˬ shaˬ jiˇ-ahˇ kʼaˇ toeˬ ciˆ leˇ-eu tsawˇ haˬ aˬ geu gʼaˬ maˬ kaˬ, aˬ geu jeˬ maˬ kaˬ, kʼoeˇ-euˬ muiˬ-eu shawˇ-eu baoˬ baˬ da neh, guˬ leˇ tehꞈ-a. Jeˬ zaˬ kʼoeˇ mawˇ-euˬ shiˬ lehꞈ leˇ-euˬ mehˬ tsoeˬ-ahˇ, muiˬ-eu shawˇ-eu jawˇ duˬ tiˬ tsahˇ-ahˇ iˇ-awˇ ya tsiˬ shawˇ meh.

²⁸Jeˬ zaˬ kʼoeˇ mawˇ-euˬ shaˬ jiˇ caꞈ-euˬ miˇ tsaˬ oeˬ lahˬ aˬ geu siˬ maˬ kaˬ, ya kʼoˆ paˆ dzeh meh. Guiˬ ba oeˬ lah laꞈ kʼoeˇ caꞈ naˇ, guiˬ ba oeˬ lahˬ kʼoeˇ shawˇ jehˆ ni ya jeˬ shawˇ-awˇ, iˇ cuꞈ neh ya joˆ dzeh meh.

²⁹Piˇ maˬ deuˬ-euˬ nymˇ kʼahˬ zaˬ deuˬ pyeuꞈ-eu kʼaˬ dzeˇ zaˬ deuˬ, lawˇ gʼaˬ-euˬ dzaˇ kʼoeˇ dzaˬ nya meh. Dzaˇ kʼoeˇ-aˬ, muiˬ dui shawˇ dui dui-eu meh.

³⁰Ehˇ kʼawꞈ, iˬ baˇ shawˇ-eu gʼaˇ duˬ, jeˬ zaˬ kʼoeˇ mawˇ-euˬ shiˬ, Sehˬ gʼawˆ laꞈ kʼoeˇ ui cuiˆ yuˇ ahˇ gʼeh-euˬ ngeuˇ naˇ, jeˬ zaˬ kʼoeˇ mawˇ-euˬ shaˬ jiˇ maˬ dzaˬ kʼmˬ-a. Miˬ dzaˬ ya keuˬ dzeh meh.