Read Akha Uˬ duˬ 7 Bible Online

Uˬ duˬ 7 - Akha bible

Uˬ duˬ 7

¹Heu-aˬ, dziˇ dzoˆ tsoeˬ-eu lawˇ-eu jeˬ-ahˇ taꞈ leˇ-eu, muiˬ dui shawˇ dui dui-eu zahˇ sahˇ kʼoꞈ deuˬ pyeuꞈ-eu meh.

²Dziˇ dzoˆ tsoeˬ-eu lawˇ-eu jeˬ lawˇ gaˇ geuꞈ-eu jeˬ zaˬ kʼoeˇ mawˇ-ahˇ, miˬ dzaˬ dzah puiˆ-awˇ lawˇ-eu jeˬ lawˇ gaˇ geuꞈ-eu jeˬ zaˬ-ahˇ sehꞈ-eu jawˇ duˬ pyeuꞈ-eu, lawˇ duˬ-euˬ laꞈ taˆ paw pyawˬ kʼoeˇ tsahˇ-ahˇ ya sehꞈ meh. Jeˬ zaˬ kʼoeˇ mawˇ-euˬ shiˬ yuˇ-awˇ, lawˇ duˬ-euˬ oeˬ paw pyawˬ luꞈ-ahˇ ya byaˆ shehˬ meh.

³Jeˬ zaˬ kʼoeˇ mawˇ-euˬ tsiˇ dawˬ tawˆ luꞈ yuˇ doˆ-awˇ, lawˇ duˬ kʼoeˇ taˆ ya lawˇ meh. Ciˇ dawꞈ dui dui-eu dawˬ miˬ maˬ ehˇ, tsahˬ nahˬ uˇ jiˇ deuˬ-ahˇ dawꞈ-eu tsiˇ deuˬ maˬ ehˇ,

⁴gʼawˬ siˬ hawˇ-eu, kʼoeˇ gaˇ dawꞈ-eu tsiˇ deuˬ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, yuˇ doˆ-awˇ ya lawˇ meh.

⁵Piˇ ma gʼaˬ tsiˇ kʼoeˇ deuˬ dawˬ tawˆ luꞈ lawˇ duˬ kʼoeˇ taˆ dzah puiˆ-awˇ, dzaˬ dzaˬ dawˇ dawˇ lawˇ-eu jeˬ Sahˬpaˬ Miˬyehˇ-ahˇ ya lawˇ meh. Kʼoeˇ-aˬ, dziˇ dzoˆ tsoeˬ-eu lawˇ-eu jeˬ pyeuꞈ-eu meh.

⁶Piˇ ma deuˬ-euˬ nymˇ kʼahˬ zaˬ deuˬ laꞈ kʼoeˇ jawˇ-eu kʼaˬ dzeˇ zaˬ dawˬ tawˆ luꞈ, jeˬ zaˬ kʼoeˇ mawˇ-euˬ shaˬ jiˇ dzaˬ nya meh. Ehˇ kʼawꞈ, shaˬ jiˇ kʼoeˇ-ahˇ, muiˬ-eu shawˇ-eu jawˇ duˬ tiˬ tsahˇ laꞈ kʼoeˇ ya dzaˬ meh. Aˬ jeˬ miˇ neh ehˇ naˇ, shaˬ jiˇ kʼoeˇ muiˬ dui shawˇ dui dui-eu meh.

⁷Iˬ baˇ shawˇ-eu lawˇ-eu hawˇ-eu, dziˇ dzoˆ tsoeˬ-eu lawˇ-eu heu nyiˬ jeˬ luꞈ-ahˇ taꞈ leˇ-eu zahˇ sahˇ kʼoꞈ tiˬ hmˬ jaˆ-eu meh. Lawˇ-eu shehˇ-eu jeˬ mˇ nehˬ-eu piˇ ma gʼaˬ, lawˇ gaˇ shehˇ gaˇ sehꞈ-euˬ jeˬ zaˬ shaˬ jiˇ ya geuꞈ meh.

⁸Lawˇ-eu shehˇ-eu jeˬ mˇ nehˬ-eu piˇ ma kʼoeˇ gʼaˬ, miˬ dzaˬ dzah puiˆ-awˇ lawˇ-eu jeˬ lawˇ gaˇ sehꞈ-euˬ jeˬ zaˬ-euˬ baˆ kʼoˆ ya geuꞈ meh.

⁹Miˬ dzaˬ tsawˬ bu-ahˇ ba jaꞈ-euˬ kaˬ muˇ, mui za kʼoeˇ taˆ laˆ jaꞈ-euˬ kaˬ muˇ, mui za oeˬ lahˬ laꞈ kʼoeˇ jahˇ jaꞈ-euˬ kaˬ muˇ, heu deuˬ yuˇ-awˇ, Miˬyehˇ-ahˇ dzaˬ la gʼo cehˇ lawˇ nehˬ-eu piˇ ma gʼaˬ, kaˬ muˇ kʼoeˇ deuˬ ya geuꞈ meh.

¹⁰Ehˇ kʼawꞈ, tsiˇ keuˬ-awˇ neh maˬ ehˇ, maˬ keuˬ ni maˬ ehˇ, maˬ laˆ jaꞈ ni lawˇ-eu dzaˬ la gʼo cehˇ lawˇ-euˬ jeˬ-ahˇ, Aˬloˬ-euˬ aˬ li piˇ ma deuˬ tiˬ kawˆ loꞈ-ehˇ ya biˇ geuꞈ meh.

¹¹Heu-aˬ, Sahˬpaˬ Miˬyehˇ-ahˇ lawˇ nehˬ-eu cawˬ cawˬ taꞈ-eu lawˇ-eu jeˬ-ahˇ taꞈ leˇ-eu zahˇ sahˇ kʼoꞈ deuˬ pyeuꞈ-eu meh.

¹²Tsawˇ haˬ tiˬ gʼaˬ na, lawˇ-eu jeˬ heu jeˬ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-eu lawˇ-eu jeˬ lawˇ naˇ, jeˬ zaˬ hawˇ-eu dehˬ tseˬ maˬ keuˬ-eu kaˬ muˇ tiˬ kawˆ loꞈ-ehˇ ya lawˇ meh. Cehˇ meu hawˇ-eu saˬ loˬ tsiˇ keuˬ-awˇ jahˇ-euˬ tuˇ jawˬ ni gʼeh-eu kaˬ muˇ maˬ ehˇ, saˬ loˬ tsiˇ lehꞈ-euˬ kaˬ muˇ aˇ yaˆ yaˆ zaˬ deuˬ maˬ ehˇ, cehˇ meu hawˇ-eu saˬ loˬ tsiˇ keuˬ-awˇ jahˇ taˬ-euˬ kaˬ muˇ aˇ kʼoˇ deuˬ maˬ ehˇ, tiˬ jeˬ paˬ ya lawˇ meh.

¹³Kʼoeˇ uˬ taꞈ, dehˬ tseˬ maˬ keuˬ-euˬ kaˬ muˇ deuˬ kʼawꞈ ya lawˇ meh.

¹⁴Dehˬ tseˬ keuˬ-eu hawˇ-eu maˬ keuˬ-eu kaˬ muˇ tiˬ jeˬ ui cuiˆ yuˇ-awˇ, Sahˬpaˬ Miˬyehˇ-ahˇ aˬ yawꞈ ya biꞈ nehˬ meh. Jeˬ zaˬ-euˬ shiˬ yuˇ-awˇ, lawˇ duˬ-ahˇ byaˆ shehˬ-eu piˇ ma gʼaˬ, kaˬ muˇ kʼoeˇ deuˬ ya geuꞈ meh.

¹⁵Lawˇ gaˇ geuꞈ-eu jeˬ zaˬ kʼoeˇ mawˇ-euˬ shaˬ jiˇ deuˬ, kʼoeˇ ngeh nah neh ya dzaˬ jiˇ meh. Yawˬ nah yawˬ uˬ bya maˬ ya bi jaˆ bya-a.

¹⁶Saˇ jaˇ mˇ byah-eu gʼaˇ duˬ maˬ ehˇ, yawˬ ha nui ma keuˆ-awˇ lawˇ-eu maˬ ehˇ, tsawˇ haˬ tiˬ gʼaˬ na cawˬ cawˬ taꞈ-eu lawˇ-eu jeˬ lawˇ naˇ, lawˇ gʼaˬ-euˬ dzaˇ-ahˇ aˬ yawꞈ ngeh nah neh dzaˬ jiˇ-eu maˬ loˬ-a. Dzehˬ laˇ-euˬ deuˬ-ahˇ, yawˬ nah yawˬ kʼawꞈ dzaˬ nya meh.

¹⁷Ehˇ kʼawꞈ, smˬ nah jaˆ byah-euˬ shaˬ jiˇ deuˬ ya dzah puiˆ dzeh meh.

¹⁸Smˬ nah jaˆ keuˆ-euˬ shaˬ jiˇ dzaˬ naˇ, kʼoeˇ ngeh poˆ lawˇ-euˬ jeˬ-ahˇ Sahˬpaˬ Miˬyehˇ maˬ ha geuꞈ-a. Lawˇ-euˬ kʼoeˇ-aˬ, maˬ geuˇ-eu lawˇ-eu jeˬ pyeuꞈ-awˇ, maˬ muiˬ maˬ shawˇ-eu uˬ taꞈ, shaˬ jiˇ kʼoeˇ kʼaˇ dzaˬ-euˬ tsawˇ haˬ-aˬ, kʼaˇ keuˆ le-eu iˬ baˇ ya pi meh.

¹⁹Zahˇ sahˇ kʼoꞈ-ahˇ maˬ tsaˬ-eu maˬ muiˬ maˬ shawˇ-eu tiˬ jeˬ paˬ laˆ lehꞈ-eu shaˬ jiˇ-ahˇ, maˬ dzaˬ ni ya dzah puiˆ dzeh meh. Zahˇ sahˇ kʼoꞈ-ahˇ tsaˬ ni muiˬ-eu shawˇ-eu tsawˇ haˬ-aˬ, shaˬ jiˇ kʼoeˇ dzaˬ nya meh.

²⁰Ehˇ kʼawꞈ, maˬ shawˇ-eu tsawˇ haˬ shaˬ jiˇ kʼoeˇ dzaˬ naˇ, Sahˬpaˬ Miˬyehˇ-euˬ tsawˇ haˬ lehˇ maˬ paˇ sawˇ nya meh.

²¹Tsawˇ haˬ tiˬ gʼaˬ na, tsawˇ haˬ zaˬ-ahˇ taꞈ-eu maˬ ehˇ, jeˬ zaˬ-ahˇ taꞈ-eu maˬ ehˇ, zahˇ sahˇ kʼoꞈ-ahˇ maˬ tsaˬ-eu maˬ shawˇ-eu tiˬ jeˬ na-ahˇ toeˬ ciˆ gʼaˬ-awˇ, lawˇ gʼaˬ shehˇ gʼaˬ-euˬ jeˬ zaˬ-euˬ shaˬ jiˇ dzaˬ naˇ, Miˬyehˇ-euˬ tsawˇ haˬ lehˇ maˬ paˇ sawˇ nya meh.

²²Moˇseˬ-ahˇ Sahˬpaˬ Miˬyehˇ zahˇ sahˇ kʼoꞈ heu deuˬ biꞈ-euˬ meh.

²³Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Mawˇ neˇ tsiˇ, yawˇ-euˬ tsiˇ hawˇ-eu, ciꞈ myehꞈ-euˬ tsiˇ maˬ ya dzaˬ-a.

²⁴Aˬ yawˇ yawꞈ shiˇ-euˬ jeˬ zaˬ-euˬ tsiˇ maˬ ehˇ, bawˇ tsahˬ jeˬ zaˬ neh kawꞈ sehꞈ-euˬ jeˬ zaˬ-euˬ tsiˇ maˬ ehˇ, maˬ ya dzaˬ-a. Ehˇ kʼawꞈ, nui gaˇ zmˬ nya meh.

²⁵Sahˬpaˬ Miˬyehˇ-ahˇ dzaˬ dzaˬ dawˇ dawˇ lawˇ nehˬ gaˇ sehꞈ-euˬ jeˬ zaˬ-euˬ tsiˇ kʼaˇ dzaˬ-eu tsawˇ haˬ-ahˇ, Miˬyehˇ-euˬ tsawˇ haˬ lehˇ maˬ paˇ sawˇ nya meh.

²⁶Iˇsaˬleˬlaˆ tsawˇ haˬ deuˬ aˬ geu gaˇ jawˇ keuˆ-eu maˬ kaˬ, aˇ jiˇ hawˇ-eu jeˬ zaˬ-euˬ shiˬ aˬ yawꞈ maꞈ maˬ ya jahˇ dzaˬ-a.

²⁷Zahˇ sahˇ kʼoꞈ heu-ahˇ kʼaˇ puiˬ-eu tsawˇ haˬ-ahˇ, Miˬyehˇ-euˬ tsawˇ haˬ lehˇ maˬ paˇ sawˇ nya meh lehˇ ehˇ nehˬ-awˬ.

²⁸Moˇseˬ-ahˇ Sahˬpaˬ Miˬyehˇ zahˇ sahˇkʼoꞈ heu deuˬ biꞈ nehˬ-euˬ meh.

²⁹Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Cawˬ cawˬ taꞈ-eu lawˇ-eu jeˬ lawˇ-eu tsawˇ haˬ aˬ geu gʼaˬ maˬ kaˬ, lawˇ-euˬ kʼoeˇ ui cuiˆ yuˇ doˆ-awˇ, muiˬ dui dui-eu laꞈ sawˬ loꞈ-ehˇ Sahˬpaˬ Miˬyehˇ-ahˇ ya biꞈ meh.

³⁰Laꞈ sawˬ kʼoeˇ yawˬ ha-euˬ aˬ laꞈ neh yuˇ-awˇ, dzaˬ dzaˬ dawˇ dawˇ lawˇ-eu jeˬ loꞈ-ehˇ ya damˬ laˇ meh. Jeˬ zaˬ kʼoeˇ mawˇ-euˬ tsiˇ hawˇ-eu kʼahˬ yuˇ laꞈ-awˇ, muiˬ dui dui-eu laꞈ sawˬ loꞈ-ehˇ, Sahˬpaˬ Miˬyehˇ-ahˇ ya damˬ nehˬ laˇ meh.

³¹Tsiˇ kʼoeˇ-ahˇ piˇ ma gʼaˬ yuˇ-awˇ, lawˇ duˬ kʼoeˇ taˆ ya lawˇ meh. Ehˇ kʼawꞈ, kʼahˬ kʼoeˇ hmˬ-aˬ, piˇ ma deuˬ-euˬ gʼaˇ duˬ pyeuꞈ-eu meh.

³²Jeˬ zaˬ kʼoeˇ mawˇ-euˬ shaˬ pyaˬ aˇ maˇ pyaˬ piˇ ma-ahˇ ya damˬ nehˬ meh.

³³Aˬloˬ-euˬ aˬ li deuˬ laꞈ kʼoeˇ, jeˬ zaˬ kʼoeˇ mawˇ-euˬ tsiˇ hawˇ-eu shiˬ yuˇ-awˇ, cawˬ cawˬ taꞈ-eu lawˇ-eu jeˬ lawˇ nehˬ-eu gʼaˬ-aˬ, shaˬ pyaˬ kʼoeˇ pyaˬ za-eu meh.

³⁴Muiˬ-eu laꞈ sawˬ pyeuꞈ-eu kʼahˬ hawˇ-eu, muiˬ-eu damˬ-eu jeˬ pyeuꞈ-eu saˬ pyaˬ aˇ maˇ paw pyaˬ-ahˇ, Iˇsaˬleˬlaˆ tsawˇ haˬ deuˬ-euˬ laꞈ-ahˇ neh Sahˬpaˬ Miˬyehˇ yuˇ-awˇ, piˇ ma deuˬ-ahˇ biꞈ-eu meh. Heu-aˬ, mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, Iˇsaˬleˬlaˆ tsawˇ haˬ deuˬ piˇ ma deuˬ-ahˇ ya biꞈ-eu jeˬ pyeuꞈ-eu meh.

³⁵Heu-aˬ, Aˬloˬ hawˇ-eu aˬ yawꞈ-euˬ aˬ li deuˬ-ahˇ piˇ ma-euˬ aˇ yaˬ biꞈ ngeh nah, Sahˬpaˬ Miˬyehˇ-ahˇ lawˇ nehˬ-euˬ dzaˬ dzaˬ dawˇ dawˇ lawˇ-eu jeˬ laꞈ kʼoeˇ, Sahˬpaˬ Miˬyehˇ neh aˬ yawꞈ maꞈ-ahˇ biꞈ nehˬ taˬ-euˬ shaˬ bymˇ pyeuꞈ-eu meh.

³⁶Lawˇ-eu shehˇ-eu jeˬ laꞈ kʼoeˇ, shaˬ bymˇ kʼoeˇ bymˇ aˬ yawꞈ maꞈ-ahˇ biꞈ-eu gʼaˇ duˬ, kʼoeˇ ngeh nah Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ dawˬ biꞈ taˬ-euˬ meh. Heu-aˬ, mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, Iˇsaˬleˬlaˆ tsawˇ haˬ deuˬ ya caw teh-eu zahˇ sahˇ kʼoꞈ pyeuꞈ-eu meh.

³⁷Laꞈ taˆ paw ehˇ gʼaˬ-euˬ gaˇ kawˆ heu deuˬ-aˬ, miˬ dzaˬ dzah puiˆ-awˇ lawˇ-eu jeˬ, dzaˬ la gʼo cehˇ lawˇ-eu jeˬ, iˬ baˇ shawˇ-eu lawˇ-eu jeˬ, dziˇ dzoˆ tsoeˬ-eu lawˇ-eu jeˬ, aˇ yaˬ biꞈ-eu lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ-ahˇ taꞈ leˇ-eu zahˇ sahˇ kʼoꞈ deuˬ pyeuꞈ-eu meh.

³⁸Lawˇ-eu shehˇ-eu jeˬ mˇ-awˬ lehˇ Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ ehˇ nehˬ ngeh nah, kʼaˇ shuiꞈ shuiꞈ yaˇ miˇ kʼahˬ-ahˇ jaˆ-eu Siˇnaˆ gawˬ jawˬ kʼoeˇ taˆ, Sahˬpaˬ Miˬyehˇ Moˇseˬ-ahˇ zahˇ sahˇ kʼoꞈ heu deuˬ biꞈ nehˬ-euˬ meh.