Read Akha Uˬ duˬ 9 Bible Online

Uˬ duˬ 9 - Akha bible

Uˬ duˬ 9

¹Gʼawˇ mawˇ a nehˬ-eu zahˇ jahˇ gʼaˬ-awˇ, yawˬ nah yawˬ-ahˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ maˬ ehˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-ahˇ maˬ ehˇ, Moˇseˬ kuˇ uiˬ-euˬ meh.

²Aˬloˬ-ahˇ Moˇseˬ ehˇ nehˬ-eu, “Maˇ byawꞈ maˬ baw-eu mawˇ neˇ mawˇ gaw zaˬ tiˬ mawˇ hawˇ-eu maˇ byawꞈ maˬ baw-eu yawˇ aˬ buˬ tiˬ mawˇ tsahˇ-awˇ, Sahˬpaˬ Miˬyehˇ-ahˇ lawˇ nehˬ-awˬ. Mawˇ neˇ mawˇ-ahˇ iˬ baˇ shawˇ-eu lawˇ-eu jeˬ gʼaˇ duˬ lawˇ-awˇ, yawˇ mawˇ-ahˇ miˬ dzaˬ dzah puiˆ-awˇ lawˇ-eu jeˬ gʼaˇ duˬ lawˇ-awˬ.

³Kʼoeˇ naˇ, iˬ baˇ shawˇ-eu lawˇ-eu jeˬ lawˇ-eu gʼaˇ duˬ, ciꞈ myehꞈ ciꞈ buˬ tiˬ mawˇ maˬ ehˇ, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ, tiˬ myaˇ byah laˇ-euˬ maˇ byawꞈ maˬ baw-eu mawˇ neˇ mawˇ gaw zaˬ tiˬ mawˇ hawˇ-eu, tiˬ myaˇ byah laˇ-euˬ maˇ byawꞈ maˬ baw-eu yawˇ zaˬ aˬ buˬ tiˬ mawˇ maˬ ehˇ, tsahˇ laꞈ-awˬ lehˇ Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ.

⁴Cawˬ cawˬ taꞈ-eu lawˇ-eu jeˬ lawˇ-eu gʼaˇ duˬ kʼawꞈ, mawˇ neˇ mawˇ gaw tiˬ mawˇ hawˇ-eu, yawˇ aˬ buˬ tiˬ mawˇ tsahˇ laꞈ-awˬ lehˇ aˬ yawꞈ maꞈ-ahˇ ehˇ nehˬ-awˬ. Jeˬ zaˬ kʼoeˇ deuˬ-ahˇ, tsiˇ keuˬ-euˬ dzaˬ dzaˬ dawˇ dawˇ lawˇ-eu jeˬ nehˬ-ehˇ, Sahˬpaˬ Miˬyehˇ-ahˇ aˬ yawꞈ maꞈ ya lawˇ nehˬ meh. Aˬ jeˬ miˇ neh ehˇ naˇ, iˬ nah aˬ yawꞈ maꞈ-euˬ mehˬ shi, Sahˬpaˬ Miˬyehˇ doˆ le tehꞈ-a.”

⁵Moˇseˬ neh dawˬ kʼaˇ biꞈ-euˬ loꞈ-ehˇ, yawˬ jeˬ na luꞈ Sehˬ gʼawˆ mehˬ shi aˬ yawꞈ maꞈ yuˇ keuˆ laꞈ-awˇ, tsawˇ haˬ aˇ maꞈ aˇ muˇ dawˬ tawˆ luꞈ, Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ uiˬ laˇ-euˬ meh.

⁶“Aˬ yawꞈ-euˬ yaw shehꞈ kʼahˬ sehˇ naw maꞈ-euˬ mehˬ shi doˆ le ni, heu deuˬ dawˬ tawˆ luꞈ-ahˇ naw maꞈ ya mˇ meh lehˇ Sahˬpaˬ Miˬyehˇ dawˬ biꞈ taˬ-euˬ meh” lehˇ aˬ yawꞈ maꞈ-ahˇ Moˇseˬ ehˇ nehˬ-euˬ meh.

⁷Kʼoeˇ naˇ, Aˬloˬ-ahˇ Moˇseˬ ehˇ nehˬ-eu, “Nawˬ-euˬ iˬ baˇ hawˇ-eu Iˇsaˬleˬlaˆ tsawˇ haˬ deuˬ-euˬ iˬ baˇ bi shawˇ laˇ-eu gʼaˇ duˬ, lawˇ duˬ-ahˇ iˇ-awˇ, iˬ baˇ shawˇ-eu lawˇ-eu jeˬ hawˇ-eu miˬ dzaˬ dzah puiˆ-awˇ lawˇ-eu jeˬ lawˇ-awˬ. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, tsawˇ haˬ heu deuˬ-euˬ iˬ baˇ bi shawˇ laˇ-eu gʼaˇ duˬ, kʼoeˇ loꞈ-ehˇ lawˇ-awˬ.”

⁸Lawˇ duˬ-ahˇ Aˬloˬ iˇ-awˇ, aˬ yawꞈ-euˬ iˬ baˇ shawˇ-eu lawˇ-eu jeˬ lawˇ-eu gʼaˇ duˬ, mawˇ neˇ mawˇ gaw zaˬ kʼoeˇ mawˇ sehꞈ-euˬ meh.

⁹Aˬ yawꞈ-euˬ aˬ li deuˬ mawˇ neˇ kʼoeˇ mawˇ-euˬ shiˬ yuˇ laꞈ ngeh, aˬ yawꞈ-euˬ laꞈ noeˇ cawˬ duiˆ-awˇ, lawˇ duˬ-euˬ laꞈ coeˇ deuˬ-ahˇ tsoꞈ-eu uˬ coeˇ deuˬ-ahˇ lehꞈ-awˇ, dzehˬ laˇ-euˬ shiˬ deuˬ lawˇ duˬ-euˬ dawˬ pehˬ-ahˇ shehˆ-euˬ meh.

¹⁰Kʼoeˇ naˇ, Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, mawˇ neˇ kʼoeˇ mawˇ-euˬ tsiˇ, gʼawˬ siˬ hawˇ-eu, muiˬ dui dui-eu shaˬ tsahˬ ui cuiˆ yuˇ-awˇ, lawˇ duˬ kʼoeˇ taˆ dzah puiˆ-euˬ meh.

¹¹Ehˇ kʼawꞈ, shaˬ jiˇ hawˇ-eu baˆ kʼoˆ deuˬ-ahˇ pu pu dzeˇ keuˬ puiˆ dzeh-euˬ meh.

¹²Kʼoeˇ naˇ, aˬ yawꞈ-euˬ gʼawˇ mawˇ gʼaˇ duˬ, miˬ dzaˬ dzah puiˆ-awˇ lawˇ-eu jeˬ lawˇ-eu lehˇ, jeˬ zaˬ sehꞈ-euˬ meh. Aˬ yawꞈ-euˬ aˬ li deuˬ jeˬ zaˬ kʼoeˇ mawˇ-euˬ shiˬ yuˇ laꞈ-awˇ, lawˇ duˬ-euˬ oeˬ paw pyawˬ luꞈ-ahˇ, shiˬ kʼoeˇ neh aˬ yawꞈ byaˆ-euˬ meh.

¹³Uˬ duˬ hawˇ-eu deuˆ gʼaˬ-euˬ shaˬ jiˇ deuˬ aˬ yawꞈ maꞈ aˬ yawꞈ-ahˇ biꞈ-awˇ lawˇ duˬ kʼoeˇ taˆ aˬ yawꞈ dzah puiˆ-euˬ meh.

¹⁴Kʼoeˇ naˇ, tsahˬ nahˬ uˇ jiˇ deuˬ hawˇ-eu aˬ kuiˇ deuˬ aˬ yawꞈ tsiˬ-awˇ, miˬ dzaˬ dzah puiˆ-awˇ lawˇ-eu jeˬ lawˇ taˬ-euˬ kʼoeˇ taˆ lawˇ daˆ-euˬ meh.

¹⁵Kʼoeˇ naˇ, Iˇsaˬleˬlaˆ tsawˇ haˬ deuˬ gʼaˇ duˬ, lawˇ-eu shehˇ-eu jeˬ aˬ yawꞈ mˇ-euˬ meh. Aˬ yawꞈ-euˬ gʼawˇ mawˇ gʼaˇ duˬ iˬ baˇ shawˇ-eu lawˇ-eu jeˬ lawˇ-eu loꞈ-ehˇ, Iˇsaˬleˬlaˆ tsawˇ haˬ-euˬ iˬ baˇ gʼaˇ duˬ tsahˇ laꞈ-euˬ ciꞈ myehꞈ kʼoeˇ mawˇ aˬ yawꞈ sehꞈ-awˇ lawˇ-euˬ meh.

¹⁶Miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ jeˬ zaˬ tsahˇ doˆ laꞈ-awˇ, zahˇ sahˇ kʼoꞈ jaˆ-eu loꞈ-ehˇ aˬ yawꞈ lawˇ-euˬ meh.

¹⁷Dzaˬ la gʼo cehˇ lawˇ-eu jeˬ aˬ yawꞈ yuˇ laꞈ-awˇ, cehˇ meu tiˬ tsuˆ tsuˆ doˆ-awˇ, lawˇ duˬ kʼoeˇ taˆ dzah puiˆ-euˬ meh. Kʼoeˇ-aˬ, yawˬ nah na luꞈ lawˇ luꞈ-eu dzaˬ la gʼo cehˇ lawˇ-euˬ jeˬ maˬ ngeuˇ ni, yawˬ jawˇ yawˬ lawˇ-eu tiˬ jeˬ pyeuꞈ-eu meh.

¹⁸Iˇsaˬleˬlaˆ tsawˇ haˬ deuˬ gʼaˇ duˬ, cawˬ cawˬ taꞈ-eu lawˇ-eu jeˬ lawˇ nehˬ-eu mawˇ neˇ mawˇ gaw hawˇ-eu yawˇ aˬ buˬ aˬ yawꞈ sehꞈ-euˬ meh. Aˬ yawꞈ-euˬ aˬ li deuˬ jeˬ zaˬ kʼoeˇ nyiˬ mawˇ-euˬ shiˬ yuˇ laꞈ-awˇ, lawˇ duˬ-euˬ oeˬ paw pyawˬ luꞈ-ahˇ byaˆ-euˬ meh.

¹⁹Mawˇ neˇ kʼoeˇ mawˇ hawˇ-eu yawˇ kʼoeˇ mawˇ-ahˇ kʼaˇ dawꞈ-eu tsiˇ deuˬ Aˬloˬ yuˇ doˆ-awˇ,

²⁰kʼahˬ nyiˬ hmˬ-euˬ kʼoeˇ taˆ gʼoˆ daˆ-awˇ, lawˇ duˬ-ahˇ yuˇ gʼeh jiˇ-euˬ meh. Lawˇ duˬ kʼoeˇ taˆ, tsiˇ kʼoeˇ deuˬ aˬ yawꞈ dzah puiˆ-euˬ meh.

²¹Kʼoeˇ naˇ, Moˇseˬ neh dawˬ biꞈ taˬ-euˬ loꞈ-ehˇ piˇ ma deuˬ gʼaˇ duˬ pyeuꞈ-eu kʼahˬ hawˇ-eu aˇ maˇ paw aˬ kuiˇ deuˬ-ahˇ, muiˬ dui dui-eu laꞈ sawˬ loꞈ-ehˇ, Sahˬpaˬ Miˬyehˇ jawˇ gaˇ yuˇ gʼeh nehˬ-euˬ meh.

²²Lawˇ-eu shehˇ-eu jeˬ dawˬ tawˆ luꞈ-ahˇ Aˬloˬ mˇ gʼaˬ ngeh, Iˇsaˬleˬlaˆ tsawˇ haˬ deuˬ kʼoeˇ taˆ aˬ yawꞈ aˬ laꞈ cawˬ ja-awˇ, dawˬ ngehˬ gʼeh nehˬ-euˬ meh.

²³Kʼoeˇ naˇ, aˬ yawꞈ zaꞈ ka le-euˬ meh. Moˇseˬ hawˇ-eu Aˬloˬ aˬ nyaꞈ, Sahˬpaˬ miˬyehˇ jawˇ-eu sehˬ gʼawˆ laꞈ kʼoeˇ uˇ leˇ-awˇ doˆ le ngeh, Iˇsaˬleˬlaˆ tsawˇ haˬ deuˬ-ahˇ aˬ yawꞈ nyaꞈ dawˬ ngehˬ gʼeh nehˬ-euˬ meh. Kʼoeˇ ngeh, Iˇsaˬleˬlaˆ tsawˇ haˬ dawꞈ tawˆ luꞈ-euˬ mehˬ shi, Sahˬpaˬ Miˬyehˇ-euˬ yaw shehꞈ kʼahˬ sehˇ doˆ le-euˬ meh.

²⁴Ja pyuˬ ni, Sahˬpaˬ Miˬyehˇ miˬ dzaˬ pyehˬ gʼeh leꞈ-awˇ, miˬ dzaˬ dzah puiˆ-awˇ lawˇ-eu jeˬ-ahˇ maˬ ehˇ, lawˇ duˬ kʼoeˇ taˆ tsiˇ kʼaˇ lehꞈ-eu tsahˇ-ahˇ maˬ ehˇ, miˬ dzaˬ doꞈ leˇ-euˬ meh. Iˇsaˬleˬlaˆ tsawˇ haˬ deuˬ kʼoeˇ gaˇ ya mawˇ ngeh, aˬ yawꞈ maꞈ dawˬ tawˆ luꞈ guˇ-awˇ, baˬ ba miˇ tsaˬ-ahˇ tuˆ ni awˆ byaˆ jiˇ-euˬ meh.