Read Akha Yeˬlaˬmiˇ 1 Bible Online

Yeˬlaˬmiˇ 1 - Akha bible

Yeˬlaˬmiˇ 1

¹Sahˬ boꞈ heu taꞈ-aˬ, Hiˇlaˬkiˇ-euˬ aˬ li Yeˬlaˬmiˇ-euˬ dawˬ boꞈ taˬ-euˬ sahˬ boꞈ tiˬ taꞈ pyeuꞈ-eu meh. Hiˇlaˬkiˇ-aˬ, Beˬyaˬmiˬ miˇ kʼahˬ Aˬnaˬtawˇ meuˬ-ahˇ jawˇ-eu piˇ ma tiˬ gʼaˬ pyeuꞈ-eu meh.

²Aˬmo-euˬ aˬ li Yawˇshiˆ gʼaˬ, Yuˇdaˆ miˇ kʼahˬ-ahˇ sahˬ paˬ geuꞈ-awˇ uˆ lahˇ-euˬ tseˇ smˇ kʼoꞈ tiˬ kʼoꞈ-ahˇ, Yeˬlaˬmiˇ kʼoeˇ taˆ Sahˬpaˬ Miˬyehˇ-euˬ dawˬ keuˆ le-euˬ meh.

³Yawˇshiˆ-euˬ aˬ li Yeˬhawˇyaˬkmˬ sahˬ paˬ geuꞈ-awˇ uˆ lahˇ ngeh kʼawꞈ, tiˬ poˆ paˇ keuˆ le-euˬ meh. Kʼoeˇ ngeh neh naˇ, Yawˇshiˆ-euˬ aˬ li Zeˬdaˬkiˇ sahˬ paˬ geuꞈ-awˇ uˆ lahˇ-euˬ tseˇ tiꞈ kʼoꞈ tiˬ kʼoꞈ-ahˇ keuˆ ni, Sahˬpaˬ Miˬyehˇ-euˬ dawˬ aˬ yawꞈ kʼoeˇ taˆ tiˬ poˆ saˇ-iˬ tiˬ poˆ keuˆ le-euˬ meh. Kʼoeˇ ngeh kʼoꞈ ba la ngaˬ siˬ tiˬ siˬ-ahˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ aˬ cawˬ nyehꞈ gʼeh-euˬ meh.

⁴Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁵“Nawˬ ma-euˬ uˬ maˆ laꞈ kʼoeˇ nawˇ maˬ tsehˆ leˇ mi naˆ-ehˇ nawˬ-ahˇ ngaˇ siˬ nya-awˇ, nawˇ maˬ dehꞈ doˆ le mi naˆ-ehˇ, miˇ kʼahˬ tsawˇ jeuˬ dawˬ tawˆ luꞈ-ahˇ, ngaˬ-euˬ gʼaˇ duˬ bi ngehˬ dah-eu gʼaˇ duˬ, nawˬ-ahˇ ngaˇ tseˇ doˆ taˬ-euˬ ma.”

⁶Kʼoeˇ ngeh ngaˇ heu loꞈ-ehˇ ehˇ kʼoꞈ nehˬ-euˬ ma. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, ngaˇ dawˬ ngehˬ tsaˬ maˬ siˬ-ehˇ, aˇ kʼoꞈ kʼawꞈ maˬ zeh laˇ nyaˬ siˬ.”

⁷Ehˇ kʼawꞈ, Sahˬpaˬ Miˬyehˇ ngaˬ-ahˇ ehˇ-eu, “Aˇ kʼoꞈ maˬ zeh nya siˬ lehˇ maˬ ehˇ ni, ngaˬ neh bi iˇ-euˬ tsawˇ haˬ deuˬ jawˇ gaˇ iˇ-awˇ, ngaˬ neh bi ngehˬ bi tmˇ-euˬ jeˬ, aˬ yawꞈ maꞈ-ahˇ ehˇ nehˬ-iˇ-awˬ.

⁸Ngaˇ nawˬ nehˬ-ehˇ jawˇ-awˇ haw piˇ nehˬ-eu miˇ neh, aˬ yawꞈ maꞈ-ahˇ nawˇ taˬ guˆ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁹Kʼoeˇ naˇ, Sahˬpaˬ Miˬyehˇ aˬ laꞈ cawˬ ja-awˇ, ngaˬ-euˬ mehˬ luˬ-ahˇ toeˬ-awˇ, heu loꞈ-ehˇ ehˇ-eu meh. “Naˇ haˬ-awˬ. Nawˇ ya ngehˬ-eu dawˬ nawˬ-ahˇ ngaˇ biꞈ-eu ma.

¹⁰Miˇ kʼahˬ tsawˇ jeuˬ dawˬ tawˆ luꞈ kʼoeˇ taˆ, iˬ nah ngaˇ nawˬ-ahˇ baoˬ biꞈ-eu ma. Aˬ yawꞈ maꞈ-ahˇ ngawˬ lehˆ-awˇ deh kʼehꞈ-eu gʼaˇ duˬ maˬ ehˇ, laˆ cawˆ-awˇ teh byoˆ nehˬ-euˬ gʼaˇ duˬ maˬ ehˇ, tsoˆ muiˬ ka muiˬ nehˬ-eu gʼaˇ duˬ maˬ ehˇ, nawˬ-ahˇ ngaˇ baoˬ biꞈ nehˬ-eu ma.”

¹¹“Yeˬlaˬmiˇ-oˇ, nawˬ-ahˇ aˬ jeˬ mawˇ laˇ-eu nya” lehˇ Sahˬpaˬ Miˬyehˇ ngaˬ-ahˇ naˇ haˬ laˇ ngeh, “Aˬlaˬmoˬ[1] aˇ bawˇ uˬ laꞈ tiˬ laꞈ mawˇ-euˬ ma” lehˇ ngaˇ ehˇ kʼoꞈ nehˬ-euˬ ma.

¹²Sahˬpaˬ Miˬyehˇ ehˇ-eu, “Nawˇ mawˇ-euˬ tsaˬ meh. Ngaˬ neh ehˇ taˬ-euˬ dawˬ byah laˇ gaˇ ngaˇ haw luꞈ-eu[2] ma” lehˇ ehˇ-eu meh.

¹³Kʼoeˇ naˇ, Sahˬpaˬ Miˬyehˇ ngaˬ-ahˇ dawˬ tiˬ poˆ paˇ ngehˬ cawˬ laˇ-awˇ, “Nawˬ-ahˇ aˬ jeˬ paˇ mawˇ laˇ-eu nya” lehˇ naˇ haˬ laˇ ngeh, “Laˬ taˆ paw pyawˬ-ahˇ iˇ buiˇ buiˇ luꞈ-eu oeˬ lahˬ tiˬ sawˇ mawˇ laˇ-awˇ, heu paw dzeˇ coˬ kʼaˇ le-eu lehˇ gʼeh luꞈ-eu nga” lehˇ ehˇ kʼoꞈ nehˬ-euˬ ma.

¹⁴Kʼoeˇ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Miˇ kʼahˬ heu kʼahˬ-ahˇ kʼaˇ jawˇ-eu tsawˇ haˬ dawˬ tawˆ luꞈ kʼoeˇ taˆ, laꞈ taˆ paw neh shaˬ zahˬ guˆ gaˆ tahˬ kʼaˇ daˆ leꞈ tehꞈ-a.

¹⁵Aˬ jeˬ miˇ neh ehˇ naˇ, laꞈ taˆ paw kʼaˇ jawˇ-eu tsawˇ jeuˬ dawˬ tawˆ luꞈ-ahˇ, ngaˇ kuˇ ka-eu lehˇ gʼeh-eu ma. Yeˬluˇsaˬlehˬ meuˬ-euˬ lahˇ kʼehˬ-ahˇ maˬ ehˇ, meuˬ lahˇ jawˬ jawˬ-ehˇ maˬ ehˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-euˬ meuˬ lahˇ jawˬ jawˬ-ehˇ maˬ ehˇ, tsawˇ jeuˬ kʼoeˇ deuˬ-euˬ sahˬ paˬ deuˬ nuiˇ mahˬ ciˬ tsoꞈ le tehꞈ-a.

¹⁶Ngaˬ-euˬ tsawˇ jeuˬ iˬ baˇ mˇ-euˬ miˇ neh ngaˇ kʼehˬ nehˬ ma. Aˬ yawꞈ maꞈ ngaˬ-ahˇ byehˇ dzeh-awˇ, tahˬ pahˬ aˬ ma mawˇ kawˇ tehˆ-awˇ lawˇ-eu shehˇ-eu laꞈ kʼoeˇ uˬ duˬ tahˬ-euˬ meh.

¹⁷Yeˬlaˬmiˇ-oˇ, lehˬ hmˬ-awˬ. Ngaˬ neh kʼaˇ bi ehˇ-euˬ yawˬ jeˬ na luꞈ, aˬ yawꞈ maꞈ-ahˇ ehˇ nehˬ-iˇ-awˬ. Aˬ yawꞈ maꞈ-ahˇ taˬ guˆ. Aˬ yawꞈ maꞈ-ahˇ nawˇ guˆ naˇ, aˬ yawꞈ maꞈ-euˬ mehˬ shi kʼoeˇ naˆ maˬ tseˇ nawˬ-ahˇ ngaˇ paˇ laˆ guˆ nehˬ ma.

¹⁸Iˬ nah ngaˇ nawˬ-ahˇ ziꞈ dah ni gʼeh-eu meuˬ tiˬ meuˬ bi pyeuꞈ laˇ-eu ma. Yuˇdaˆ sahˬ paˬ deuˬ-ahˇ maˬ ehˇ, aˬ yawꞈ maꞈ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, piˇ ma deuˬ-ahˇ maˬ ehˇ, miˇ kʼahˬ zaˬ deuˬ-ahˇ maˬ ehˇ, miˇ kʼahˬ tiˬ kʼahˬ kʼahˬ lah ni-ahˇ nawˇ yawꞈ daˬ peuˬ ni, shmˇ kʼawˇ zeuˇ hawˇ-eu guiˬ shuiˇ kaˇ pyawˇ loꞈ-ehˇ nawˬ-ahˇ ngaˇ ziꞈ dah ni bi pyeuꞈ laˇ ma.

¹⁹Aˬ yawꞈ maꞈ nawˬ-ahˇ ceh kʼawꞈ, maˬ ceh gʼaˬ laˇ nya-aˇ. Aˬ jeˬ miˇ neh ehˇ naˇ, nawˬ nehˬ-ehˇ ngaˇ jawˇ-awˇ haw piˇ nehˬ ma lehˇ Sahˬpaˬ Miˬyehˇ pyeuꞈ-eu ngaˇ ehˇ-eu ma.”