Read Akha Yeˬlaˬmiˇ 10 Bible Online

Yeˬlaˬmiˇ 10 - Akha bible

Yeˬlaˬmiˇ 10

¹Iˇsaˬleˬlaˆ tsawˇ haˬ deuˬ-oˇ, naw maꞈ-ahˇ Sahˬpaˬ Miˬyehˇ ehˇ luꞈ-eu dawˬ-ahˇ naˇ haˬ-awˬ.

²Sahˬpaˬ Miˬyehˇ heu loꞈ-ehˇ ehˇ-eu meh. “Aˬ cawˬ tsawˇ jeuˬ dehꞈ jeˬ dehꞈ kawˆ-ahˇ taˬ dzaw geuꞈ. Mˬ kʼoeˇ taˆ maˬ mawˇ haw-euˬ jeˬ keuˆ le gaˇ, tsawˇ jeuˬ nui deuˬ guˆ kʼawꞈ naw maꞈ taˬ guˆ.

³Tsawˇ jeuˬ kʼoeˇ deuˬ-euˬ uˬ duˬ tahˬ-eu zahˇ sahˇ kʼoꞈ, tiˬ jeˬ-iˬ gaˇ dahˇ maˬ tsoeˬ-a. Sahˬ kʼaˆ laꞈ kʼoeˇ dehꞈ-eu aˇ bawˇ tuˇ-awˇ, tawˆ zaˬ tawˆ jeˇ neh pyaꞈ doˆ seuˆ doˆ-awˇ,

⁴pyuˇ yaw shuiˇ yaw yaw-eu laꞈ kʼoeˇ, maˬ bi coˬ dzeh-iˇ-eu gʼaˇ duˬ smˇ sehˬ taꞈ tehˬ-euˬ meh.

⁵Kʼoeˇ loꞈ-ehˇ gʼeh-eu tahˬ pahˬ aˬ ma mawˇ kawˇ deuˬ-aˬ, siˬ kʼoˬ kʼoˬ yaˇ bi loꞈ piˇ-eu gʼaˇ duˬ, gʼo yoeˬ neh jahˇ-euˬ tsawˇ haˬ mawˇ kawˇ-ahˇ duˇ-awˇ, dawˬ ngehˬ maˬ ngehˬ nya-a. Gaˇ ma maˬ cah nya-eu miˇ neh, tsawˇ haˬ neh ya bi baꞈ-eu meh. Tahˬ pahˬ aˬ ma mawˇ kawˇ deuˬ-ahˇ naw maꞈ taˬ guˆ. Naw maꞈ-ahˇ yaw doeˇ maˬ jahˇ laˇ nya-eu uˬ taꞈ, yaw muiˬ kʼawꞈ maˬ mˇ nehˬ nya-a.”

⁶Sahˬpaˬ Miˬyehˇ-oˇ, nawˬ-ahˇ duˇ-eu tiˬ gʼaˬ-iˬ maˬ jawˇ-a. Nawˇ-aˬ, baoˬ huiˬ-eu meh. Nawˬ-euˬ tsawˇ myahˇ baoˬ yaw shehꞈ kʼahˬ sehˇ huiˬ-eu meh.

⁷Tsawˇ jeuˬ dawˬ tawˆ luꞈ-euˬ sahˬ paˬ pyeuꞈ-eu gʼaˬ-oˇ, nawˬ-ahˇ maˬ taˬ huiˬ-ehˇ aˬ suˇ gʼaˬ jawˇ coeˇ nmˇ. Nawˬ-ahˇ yaw zeu baw dui dui paˬ-ehˇ gʼeh-eu meh. Tsawˇ jeuˬ heu myaˆ kʼoeˇ taˆ tsawˇ gahˇ dzehˬ-eu tsawˇ haˬ maˬ ehˇ, miˇ kʼahˬ sahˬ paˬ kʼaˇ ngeuˇ-eu deuˬ maˬ ehˇ, nawˬ-ahˇ duˇ-eu tiˬ gʼaˬ-iˬ maˬ jawˇ-a.

⁸Aˬ yawꞈ maꞈ dawˬ tawˆ luꞈ aˬ dzawˬ aˇ gah tehꞈ meh. Daˇ kawˬ neh jahˇ taˬ-euˬ tahˬ pahˬ aˬ ma, aˬ yawꞈ maꞈ-ahˇ aˬ jeˬ paˇ mehˬ nya nmˇ.

⁹Aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-aˬ, Saˬbeˬ miˇ kʼahˬ-ahˇ doˆ-eu shuiˇ hawˇ-eu, Uˇpaˆ miˇ kʼahˬ-ahˇ doˆ-eu shuiˇ yaw-awˇ, ba jiˬ deuˬ neh jahˇ taˬ-euˬ mˇ myawˬ meh. Saˬ nmˇ saˬ paˇ nya-eu tsawˇ haˬ deuˬ neh zaꞈ-euˬ, neˇ naˆ neˇ puiˇ puiˇ-eu saˬ paˇ bi dm-euˬ meh.

¹⁰Ehˇ kʼawꞈ Sahˬpaˬ Miˬyehˇ nawˇ-aˬ, maˇ maˇ ni gʼeh-eu Miˬyehˇ meh. Nawˇ dehꞈ luꞈ-eu Miˬyehˇ pyeuꞈ-awˇ, mˬ maˬ maˬ byaˆ zaˇ ziˇ nawˇ sahˬ paˬ meh. Nawˇ nui ma pehˇ laˇ ngeh, miˇ tsaˬ tahˬ kʼawˇ yaw dzuˬ dzuˬ-awˇ, miˇ kʼahˬ tsawˇ jeuˬ nawˬ-euˬ nui pehˇ maˬ daˬ coeˇ-a.

¹¹(Mˬ hawˇ-eu miˇ-ahˇ beh-euˬ gʼaˬ maˬ ngeuˇ-eu miˬ yehˇ deuˬ ya luˬ ya seˇ-iˇ-awˇ, miˇ tsaˬ kʼoeˇ taˆ tiˬ gʼaˬ-iˬ maˬ jaˆ maˬ jawˇ nya ni pyeuꞈ-iˇ tehꞈ-a lehˇ, tsawˇ haˬ kʼoeˇ deuˬ-ahˇ naw maꞈ ya ehˇ nehˬ meh.)

¹²Sahˬpaˬ Miˬyehˇ baoˬ-ahˇ gʼoe-awˇ, miˇ beh beh taˬ-euˬ meh. Aˬ yawꞈ-euˬ zaˬ siˬ nui gahˇ-ahˇ gʼoe-awˇ, miˇ maˬ sheu kʼawˬ-awˇ mˬ maˬ toˆ pyeh-euˬ meh.

¹³Aˬ yawꞈ dawˬ biꞈ nehˬ ngeh mˬ taˆ iˇ cuꞈ teˇ saˇ mahˇ-awˇ, mˬ dzeˇ jaˆ-eu mˬ dmˇ-ahˇ aˬ yawꞈ hehˇ ahˇ laꞈ-eu meh. Uˬ yehˇ yehˇ gaˇ mˬ myawꞈ bi myawꞈ laˇ-awˇ, kuˆ lawˆ laꞈ kʼoeˇ piˬ lahˇ taˬ-euˬ jaˬ lehˇ pyehˬ leꞈ-eu meh.

¹⁴Kʼoeˇ gaˇ mawˇ ngeh tsawˇ haˬ yawˬ gʼaˬ na luꞈ, yawˬ ha aˬ dzawˬ aˇ gah nya lehˇ siˬ duˬ-euˬ meh. Tahˬ pahˬ aˬ ma mawˇ kawˇ tehˆ-eu tsawˇ haˬ daˬ ga-eu meh. Aˬ jeˬ miˇ neh ehˇ naˇ aˬ yawꞈ maꞈ neh tehˆ-euˬ miˬ yehˇ, miˬ yehˇ maˬ ngeuˇ-ehˇ saꞈ maˬ gʼawˇ nya-a.

¹⁵Miˬ yehˇ kʼoeˇ deuˬ tiˬ pawꞈ-iˬ gaˇ dahˇ maˬ tsoeˬ-ehˇ, tsawˇ haˬ zaˬ-euˬ cehꞈ lehꞈ ka duˬ tehꞈ meh. Sahˬpaˬ Miˬyehˇ zaꞈ le-awˇ kʼehˬ nehˬ ngeh, aˬ yawꞈ maꞈ byoˆ-iˇ laˆ-iˇ jiˇ tehꞈ-a.

¹⁶Yaˬkoˆ-euˬ Miˬyehˇ aˬ yawꞈ maꞈ-ahˇ maˬ duˇ-a. Yawˬ jeˬ na luꞈ-ahˇ beh-euˬ gʼaˬ aˬ yawꞈ pyeuꞈ-awˇ, aˬ yawꞈ-euˬ tsawˇ jeuˬ bi pyeuꞈ-eu gʼaˇ duˬ, Iˇsaˬleˬlaˆ-ahˇ aˬ yawꞈ neh tseˇ doˆ-euˬ meh. Aˬ yawꞈ tsawˇ myahˇ Baoˬ huiˬ-eu Sahˬpaˬ Miˬyehˇ meh.

¹⁷Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ-ahˇ aˬ cawˬ loꞈ jawˬ taˬ-euˬ meh. Miˇ kʼahˬ heu kʼahˬ-ahˇ byehˇ dzeh-awˇ cehˆ-eu gʼaˇ duˬ, mˇ myawˬ lehˬ hmˬ taˬ-awˬ.

¹⁸Naw maꞈ-ahˇ miˇ kʼahˬ heu kʼahˬ laꞈ kʼoeˇ neh biˬ doˆ-eu lehˇ, Sahˬpaˬ Miˬyehˇ lehˬ hmˬ luꞈ meh. Naw maꞈ tiˬ gʼaˬ-iˬ maˬ bi dzeuˇ-iˇ ni jahˇ nehˬ ma lehˇ, Sahˬpaˬ Miˬyehˇ ehˇ taˬ-euˬ meh.

¹⁹Yeˬluˇsaˬlehˬ meuˬ laꞈ kʼoeˇ jawˇ-eu deuˬ ngoeˇ-awˇ ehˇ-eu, “Nga maꞈ-ahˇ coeˬ dui dui laˇ nya. Nga maꞈ-euˬ naˇ gawˇ maˬ paˇ taˬ leˇ nya miˇ-a. Nga maꞈ maˬ daˬ coeˇ gaˇ keuˆ ni maˬ pyeuꞈ laˇ-aˇ lehˇ noeˬ-euˬ ma.

²⁰Nga maꞈ-euˬ sehˬ gʼawˆ deuˬ coˬ pyaˆ jiˇ-awˇ, aˇ neˬ aˇ caˆ deuˬ tsehˆ-iˇ jiˇ-euˬ meh. Nga maꞈ-euˬ zaˬ iˇ byoˆ jiˇ-awˇ, sehˬ gʼawˆ paˇ ciˬ tuˇ-eu tsawˇ haˬ maˬ paˇ jawˇ-ehˇ, saˬ paˇ lawˆ kaˬ sheu taw-eu gʼaˬ maˬ paˇ jawˇ meh.”

²¹Ngaˇ heu loꞈ-ehˇ ehˇ kʼoꞈ nehˬ-euˬ ma. “Aˬ dui-euˬ aˬ yuiꞈ aˬ tsu deuˬ dzawˬ dui dui-awˇ, Sahˬpaˬ Miˬyehˇ gaˇ ma sheuˬ mehˬ gaˇ maˬ juˬ-a. Kʼoeˇ baˬ da neh aˬ yawꞈ maꞈ byoˆ le-awˇ, aˬ dui tsawˇ jeuˬ cehˆ gʼawˬ cehˆ gʼehˇ-euˬ meh.

²²Naˇ haˬ sheˇ. Gaˇ kawˆ gaˬ keuˆ le miˇ-a. Laꞈ taˆ paw jaˆ-eu miˇ kʼahˬ tiˬ kʼahˬ-ahˇ, yaw kʼaˆ-ehˇ luiˬ gʼa luꞈ miˇ-a. Aˬ yawꞈ maꞈ-euˬ guiˇ maꞈ deuˬ-aˬ, Yuˇdaˆ miˇ kʼahˬ-ahˇ jaˆ-eu meuˬ deuˬ-ahˇ, bawˇ tsahˬ aˬ kuiˬ jawˇ zaˇ loꞈ-ehˇ, kʼaˇ shuiꞈ shuiꞈ yaˇ laˆ pyeuꞈ tehꞈ-a.”

²³Sahˬpaˬ Miˬyehˇ-oˇ, tsawˇ haˬ zaˬ yaw dehꞈ dehꞈ-eu-aˬ, yawˬ ha gaˇ kawˆ yawˬ ha maˬ gʼaˬ leˇ-ehˇ, yawˬ ha saꞈ laˇ-ahˇ maˬ tuˆ tehˬ nya-eu ngaˇ siˬ nya ma.

²⁴Sahˬpaˬ Miˬyehˇ-oˇ, nawˬ-euˬ tsawˇ jeuˬ-ahˇ mehˬ nehˬ tsoˆ nehˬ laꞈ-awˬ. Ehˇ kʼawꞈ, aˇ dzehˬ taˬ dzeuˇ nehˬ laꞈ. Nga maꞈ-ahˇ nawˇ nui ma pehˇ-awˇ kʼehˬ ngeh, aˇ saˬ saˬ-eu jeˬ taˬ bi keuˆ le laꞈ.

²⁵Nawˬ-ahˇ uˬ duˬ maˬ tahˬ-eu tsawˇ jeuˬ deuˬ jawˇ paw, nawˬ-ahˇ byehˇ dzeh-euˬ tsawˇ haˬ deuˬ jawˇ paw, nawˬ-euˬ nui pehˇ sheu pyawˇ nehˬ-awˬ. Aˬ yawꞈ maꞈ nawˬ-euˬ tsawˇ haˬ deuˬ-ahˇ sehꞈ-euˬ meh. Aˬ yawꞈ maꞈ nga maꞈ-ahˇ laˆ byoˆ laˆ laˆ yaꞈ-awˇ, nga maꞈ miˇ kʼahˬ laˆ cawˆ-awˇ byehˇ dzeh yaꞈ-euˬ meh.