Read Akha Yeˬlaˬmiˇ 2 Bible Online

Yeˬlaˬmiˇ 2 - Akha bible

Yeˬlaˬmiˇ 2

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Yeˬluˇsaˬlehˬ meuˬ-ahˇ iˇ-awˇ, tsawˇ haˬ yawˬ gʼaˬ na luꞈ-ahˇ heu loꞈ-ehˇ ehˇ nehˬ-awˬ. “Iˇsaˬleˬlaˆ-oˇ, nawˇ yaw nyiˇ gʼeh ngeh, ngaˬ-ahˇ saˇ jaˇ ziꞈ-euˬ ngaˇ siˬ nya ma. Aˇ nyaꞈ sheuˬ dahˬ dzaˬ-euˬ yaw shuiꞈ pyeuꞈ ngeh, nawˇ ngaˬ-ahˇ gaˬ dui dui-euˬ meh. Kʼaˇ shuiꞈ deh ga bawˇ tsahˬ bawˇ dahˇ hawˇ-eu, yaˇ maˬ mˇ dzaˬ haw-euˬ miˇ gahˬ gahˬ ma laꞈ kʼoeˇ, ngaˬ-euˬ mehˬ nah nawˇ caw teh laꞈ-euˬ meh.

³Iˇsaˬleˬlaˆ nawˇ nui gʼaˬ-ahˇ maˬ taꞈ. Nawˇ-aˬ shawˇ jehˆ ni gʼeh-eu ngaˬ-euˬ myawˬ gahˬ ma. Nawˬ-ahˇ laˆ coeˬ laˆ ciˆ laˇ-eu tsawˇ haˬ kʼoeˇ taˆ, luˬ-iˇ seˇ-iˇ-eu jeˬ ngaˇ pyehˬ gʼeh-euˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁴Yaˬkoˆ-euˬ zaˬ Yaˬkoˆ-euˬ uˆ, Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ-euˬ dawˬ-ahˇ naˇ haˬ sheˇ.

⁵Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ-euˬ aˬ poeˬ aˬ bawˇ deuˬ ngaˬ-ahˇ byehˇ dzeh paˬ-ehˇ, ngaˬ-euˬ yaw lehˬ aˬ geu jeˬ-ahˇ haw toˆ-euˬ taˬ. Gaˇ dahˇ maˬ tsoeˬ-eu tahˬ pahˬ aˬ ma mawˇ kawˇ-ahˇ uˬ duˬ tahˬ-awˇ, aˇ poeˬ maˬ baw ni dehꞈ pyeuꞈ-euˬ meh.

⁶Iˇjiˇtuˆ miˇ kʼahˬ-ahˇ aˬ yawꞈ maꞈ-ahˇ ngaˬ neh ka kʼoꞈ doˆ-awˇ, kʼaˇ shuiꞈ tehꞈ-ehˇ jaˆ-eu miˇ kʼahˬ, gui coˇ ni gʼeh-eu guˆ-eu gaˆ-eu miˇ kʼahˬ, tsawˇ haˬ zaˬ maˬ jawˇ-eu miˇ kʼahˬ, maˬ iˇ maˬ laˇ tsehˆ-eu miˇ kʼahˬ pyeuꞈ-eu, bawˇ tsahˬ bawˇ dahˇ laꞈ kʼoeˇ aˬ yawꞈ maꞈ-ahˇ sheuˬ doˆ-euˬ kʼawꞈ, ngaˇ jawˇ meh lehˇ aˬ yawꞈ maꞈ tiˬ pawꞈ-iˬ maˬ noeˬ-a.

⁷Dzaˬ la gʼo cehˇ mˇ za-awˇ baw le za le ni, miˇ tsaˬ miˇ muiˬ muiˬ-eu miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ sheuˬ uˇ nehˬ-euˬ kʼawꞈ, ngaˬ-euˬ miˇ kʼahˬ aˬ yawꞈ maꞈ laˆ cawˆ-awˇ, ngaˬ neh biꞈ-euˬ jeˬ biˇ laˆ jawꞈ-euˬ meh.

⁸‘Sahˬpaˬ Miˬyehˇ aˬ geu gaˇ jawˇ ta’ lehˇ, piˇ ma deuˬ gʼeh naˇ haˬ-eu maˬ baw-ehˇ, ngaˬ-euˬ piˇ ma kʼoeˇ deuˬ ngaˬ-ahˇ maˬ siˬ nya gaˇ duˇ meh. Sahˬ paˬ sahˬ ma bi geuꞈ-euˬ deuˬ ngaˬ-ahˇ puiˬ-awˇ, ngaˬ-euˬ gʼaˇ duˬ bi ngehˬ dah-euˬ deuˬ kʼawꞈ, Baˬlaˇ miˬ yehˇ-euˬ tsawˇ myahˇ-ahˇ gʼoe-awˇ, gaˇ dahˇ maˬ tsoeˬ-eu tahˬ pahˬ aˬ ma mawˇ kawˇ-ahˇ, aˬ yawꞈ maꞈ uˬ duˬ tahˬ-eu meh.

⁹“Teu miˇ neh Sahˬpaˬ Miˬyehˇ pyeuꞈ-eu ngaˇ, ngaˬ-euˬ tsawˇ haˬ deuˬ-ahˇ pyehˆ tseˇ haw ma. Aˬ yawꞈ maꞈ-euˬ zaˬ deuˬ-ahˇ ngaˇ caw tseˇ ma.

¹⁰Nahˇ ma ga kʼehˬ paw jaˆ luꞈ-eu, Guˇbaˬluˇ iˇ jaw lahˇ-ahˇ iˇ haw-awˬ. Nahˇ ma doˆ kʼehˬ paw jaˆ-eu Geˬdaˬ miˇ kʼahˬ-ahˇ, tsawˇ haˬ pyehˬ-awˇ bi iˇ haw-awˬ. Heu loꞈ-ehˇ gʼeh-eu jeˬ maˬ pyeuꞈ laˇ haw-euˬ gaˇ, naw maꞈ yaw duˬ duˬ-ehˇ ya siˬ tehꞈ-a.

¹¹Aˬ cawˬ tsawˇ jeuˬ miˬ yehˇ maˇ maˇ ni gʼeh gaˇ uˬ duˬ maˬ tahˬ kʼawꞈ, yawˬ ha uˬ duˬ tahˬ-euˬ miˬ yehˇ maˬ paˇ dzeh-a. Ehˇ kʼawꞈ, ngaˬ-euˬ tsawˇ haˬ deuˬ-aˬ, aˬ yawꞈ maꞈ-euˬ yaw shehꞈ kʼahˬ sehˇ pyeuꞈ-eu ngaˬ-ahˇ, gaˇ dahˇ maˬ tsoeˬ-eu miˬ yehˇ neh paˇ dzeh-euˬ meh.

¹²Kʼoeˇ miˇ neh guˆ dui dui laˇ-awˇ tsoˆ leˇ jiˇ ni, mˬ nyeh laˇ-awˬ lehˇ ngaˇ dawˬ biꞈ-euˬ ma.

¹³Aˬ jeˬ miˇ neh ehˇ naˇ ngaˬ-euˬ tsawˇ jeuˬ, iˬ baˇ nyiˬ jeˬ mˇ taˬ-euˬ meh. Dehꞈ-eu saꞈ laˇ iˇ cuꞈ lawˇ kʼawꞈ pyeuꞈ-eu ngaˬ-ahˇ, aˬ yawꞈ maꞈ byehˇ dzeh-awˇ, iˇ cuꞈ maˬ dahˬ ziꞈ nya-eu lah duˬ gawˬ-euˬ meh.

¹⁴“Iˇsaˬleˬlaˆ zaˬ kʼaˆ-a loˇ. Zaˬ kʼaˆ geuꞈ-eu gʼaˇ duˬ dehꞈ le taˬ loˇ. Toˆ-ehˇ ngeuˇ naˇ aˬ yawꞈ-ahˇ muiˇ-eu deuˬ, aˬ jeˬ miˇ neh aˬ yawꞈ-ahˇ yehˬ bawˬ-ehˇ jahˇ ta.

¹⁵Aˇ laˬ jaˬ shiˇ loꞈ-ehˇ aˬ yawꞈ maꞈ aˬ yawꞈ-ahˇ lmˬ-awˇ, aˬ yawꞈ-euˬ miˇ kʼahˬ kʼaˇ shuiꞈ deh yaˇ laˆ pyeuꞈ-awˇ, aˬ yawꞈ-euˬ meuˬ deuˬ cawˆ jiˇ-awˇ, meuˬ tsoeˬ tsoeˬ jiˇ-euˬ meh.

¹⁶Iˇjiˇtuˆ miˇ kʼahˬ-ahˇ jaˆ-eu. Mehˇpiˇ meuˬ hawˇ-eu Taˬpaˬneˬ meuˬ-ahˇ jawˇ-eu deuˬ neh, aˬ yawꞈ-euˬ uˬ duˬ kʼmˬ kʼoˆ paˆ-euˬ meh.

¹⁷Iˇsaˬleˬlaˆ-oˇ, gaˇ kawˆ heu nawˬ-euˬ uˬ duˬ-ahˇ daˇ laˇ ni, nawˇ yawˬ haˇ yawˬ ha mˇ-euˬ meh. Nawˬ-ahˇ ngaˇ sheuˬ gʼeh nehˬ luꞈ ngeh, nawˬ-euˬ Miˬyehˇ pyeuꞈ-eu ngaˇ Sahˬpaˬ Miˬyehˇ-ahˇ, nawˇ byehˇ dzeh yaꞈ-euˬ meh.

¹⁸Iˇjiˇtuˆ miˇ kʼahˬ-ahˇ iˇ-eu aˬ jeˬ gaˇ dahˇ tsoeˬ nmˇ. Niˬlaˇ lawˇ baˬ iˇ cuꞈ dawˇ-iˇ-eu la. Aˇshuˇliˆ miˇ kʼahˬ-ahˇ le-eu aˬ jeˬ gaˇ dahˇ tsoeˬ nmˇ. Uˇpaˬlaˇ lawˇ baˬ-ahˇ iˇ cuꞈ dawˇ leˇ-eu la.

¹⁹Nawˬ-euˬ yaw lehˬ nawˬ-ahˇ kʼehˬ-awˇ, nawˇ saˇ jaˇ puiˬ-euˬ jeˬ nawˬ-ahˇ laˆ shaˬ tehꞈ-a. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-awˇ, ngaˬ-ahˇ saˇ jaˇ maˬ ziꞈ ni dehꞈ-eu jeˬ, aˇ naˆ ni lehˬ-awˇ noeˬ shaˬ paˬ-ehˇ gʼeh nga lehˇ, nawˬ-ahˇ siˬ duˬ laˇ tehꞈ-a lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu, Dawˬ tawˆ kʼoeˇ taˆ uˆ lahˇ-eu ngaˇ heu loꞈ-ehˇ ehˇ-eu ma.”

²⁰Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Iˇsaˬleˬlaˆ-oˇ, nawˇ aˇ hu ngaˬ-euˬ baoˬ-ahˇ puiˬ-awˇ, ngaˬ-euˬ ehˇ dawˬ maˬ naˇ haˬ-eu uˬ taꞈ, ngaˬ-ahˇ nawˇ uˬ duˬ maˬ tahˬ-a. Gawˬ duˇ kʼaˇ goˇ gaˇ hawˇ-eu aˇ bawˇ naˇ shmˇ kʼaˇ muiˬ gaˇ, miˇ muiˬ miˬ yehˇ deuˬ-ahˇ nawˇ uˬ duˬ tahˬ-euˬ meh.

²¹Muiˬ dui dui-eu aˇ nuiˆ pahˬ-awˇ ka-euˬ aˬ gaꞈ baw duˆ loꞈ-ehˇ, nawˬ-ahˇ ngaˇ ka-euˬ ma. Ehˇ kʼawꞈ, nymˬ-mˇ nawˬ-ahˇ haw ngeh, buꞈ-iˇ-awˇ gaˇ dahˇ maˬ tsoeˬ-eu aˬ gaꞈ baw duˆ-ahˇ duˇ-eu meh.

²²Muiˬ dui dui-eu saˇ byaˬ neh tsiˬ shawˇ kʼawꞈ, nawˬ-euˬ iˬ baˇ yaw jawꞈ ngaˇ mawˇ luꞈ ma.

²³Baˬlaˇ miˬ yehˇ-ahˇ nawˇ uˬ duˬ tahˬ-eu laꞈ kʼoeˇ, yawˬ haˇ yawˬ ha maˬ laˆ jawꞈ-aˬ lehˇ nawˇ aˬ joˆ-ehˇ ehˇ nya nmˇ. Deh kʼawꞈ-ahˇ nawˇ iˬ baˇ mˇ taˬ-euˬ gaˇ haw sheˇ. Nawˬ neh mˇ-euˬ gaˇ deuˬ shaˇ noeˬ haw sheˇ. Nawˇ-aˬ, aˇ caˆ behˇ tsehˆ-awˇ cehˆ luꞈ-eu, law taw aˬ ma-ahˇ duˇ-eu nga.

²⁴Kʼaˇ shuiꞈ deh ga doe ni cehˆ-awˇ mahˬ zaˬ shaˇ-eu, mahˬ mahˬ ma-ahˇ aˬ suˇ gʼaˬ nyehꞈ tehˬ taˬ nya ta. Zaˬ caw mawꞈ-eu mahˬ paˬ deuˬ aˬ yawꞈ-ahˇ maˬ ya teh-a. Kʼaˇ caw mawꞈ gaˇ caw nya-eu meh.

²⁵Iˇsaˬleˬlaˆ-oˇ, miˬ yehˇ nui deuˬ-ahˇ poˆ-eu laꞈ kʼoeˇ, nawˬ-euˬ aˬ kuiˇ gʼah-awˇ kuˬ byahˬ taˬ bi gui-iˇ. Ehˇ kʼawꞈ, nawˇ heu loꞈ-ehˇ ehˇ-eu meh. ‘Ngaˇ maˬ paˇ gʼoꞈ kʼoꞈ laˇ haw ma. Aˬ cawˬ-euˬ miˬ yehˇ-ahˇ jawˇ gaˬ taˬ-eu miˇ neh, miˬ yehˇ kʼoeˇ deuˬ-euˬ mehˬ nah caw teh ma’ lehˇ ehˇ-eu meh.”

²⁶Sahˬpaˬ Miˬyehˇ heu loꞈ-ehˇ ehˇ-eu meh. “Smˇ kʼoeˬ bi nyehꞈ mi ngeh ya shaꞈ dawˇ-eu loꞈ-ehˇ, naw maꞈ Iˇsaˬleˬlaˆ tsawˇ jeuˬ dawˬ tawˆ daˬ ga tehꞈ-a. Sahˬ paˬ hawˇ-eu yaw huiˬ yaw mahˇ dawˬ tawˆ maˬ ehˇ, piˇ ma hawˇ-eu miˬ yehˇ gʼaˇ duˬ ngehˬ dah-eu deuˬ maˬ ehˇ, daˬ ga-awˇ ya shaꞈ dawˇ tehꞈ-a.

²⁷Aˇ bawˇ-ahˇ aˬ da shaˇ kuˇ-awˇ, kʼaˬ lo-ahˇ aˬ ma shaˇ kuˇ-eu naw maꞈ, ngaˬ-ahˇ naˇ kʼah ciˬ pyawˇ nehˬ yaꞈ-euˬ baˬ da neh, daˬ ga-awˇ ya shaꞈ dawˇ tehꞈ-a. Ehˇ kʼawꞈ, shaˬ-eu zahˬ-eu jeˬ-ahˇ naw maꞈ ya tahˬ puˬ ngeh, ka kʼoꞈ nehˬ laꞈ lehˇ ngaˬ-ahˇ shaˇ-eu meh.

²⁸Naw maꞈ neh yawˬ ha gʼaˇ duˬ tehˆ taˬ-euˬ miˬ yehˇ kʼoeˇ deuˬ aˬ lehˬ. Naw maꞈ kʼoeˇ taˆ shaˬ-eu zahˬ-eu jeˬ keuˆ le ngeh, aˬ yawꞈ maꞈ ka kʼoꞈ nya naˇ bi ka kʼoꞈ le-awˬ. Yuˇdaˆ miˇ kʼahˬ-oˇ, nawˇ meuˬ jaˆ myaˬ-eu loꞈ-ehˇ, miˬ yehˇ kʼawꞈ myaˬ dui dui-eu meh.

²⁹Nawˇ ngaˬ-ahˇ aˬ jeˬ iˬ baˇ taˬ kʼaˇ paˇ za te. Ngaˬ-ahˇ nawˇ puiˬ-eu maˬ ngeuˇ loˇ.

³⁰Ngaˬ neh mehˬ paˇ-euˬ jeˬ nawˇ maˬ geuꞈ-eu miˇ neh, nawˬ-ahˇ ngaˇ kʼehˬ kʼawꞈ gaˇ dahˇ maˬ tsoeˬ-a. Haiˬ dui dui-eu aˇ laˬ jaˬ shiˇ loꞈ-ehˇ, ngaˬ-euˬ gʼaˇ duˬ bi ngehˬ dah-euˬ deuˬ-ahˇ nawˇ sehꞈ-euˬ meh.

³¹Iˇsaˬleˬlaˆ tsawˇ haˬ deuˬ-oˇ, ngaˇ ehˇ gaˇ naˇ haˬ-awˬ. Ngaˇ-aˬ, naw maꞈ gʼaˇ duˬ kʼaˇ shuiꞈ deh yaˇ-ahˇ duˇ ta loˇ. Zahˇ tsui ni gʼeh-awˇ guˆ kʼaˇ za-eu miˇ kʼahˬ-ahˇ duˇ ta loˇ. Aˬ jeˬ miˇ neh ngaˇ jawˇ paw maˬ gʼoꞈ pyawˇ laˇ-ehˇ, yawˬ ha kʼaˇ noeˬ-euˬ jeˬ mˇ ma ehˇ te.

³²Zaˬ miˬ aˬ buˇ tiˬ gʼaˬ yawˬ ha-euˬ laꞈ duꞈ lahˇ dah-ahˇ ngehˇ nmˇ loˇ. Smˇ miˇ iˇ-eu zaˬ miˬ oeˇ mˇ baˇ-eu mehˬ tsoeˬ ngehˇ kʼmˬ nmˇ loˇ. Ehˇ kʼawꞈ aˇ nah aˇ yamˬ maˬ gui jiˇ coeˇ gaˇ keuˆ ni, ngaˬ-euˬ tsawˇ haˬ ngaˬ-ahˇ ngehˇ byoˆ-euˬ meh.

³³Zaˬ kʼaˬ poˆ-eu gaˇ kawˆ naw maꞈ neh nya jiˇ-awˇ, gʼeh dui dui-eu zaˬ miˬ zaˬ tiˬ gʼaˬ-ahˇ keuˆ ni, naw maꞈ-ahˇ dzaw geuꞈ paˬ-ehˇ jaˆ-eu meh.

³⁴Aˬ cawˬ kʼoeˇ taˆ kʼaˆ dzaˬ-eu deuˬ-euˬ shiˬ maˬ ngeuˇ, maˬ lehˬ maˬ ca-eu iˇ shaˬ zaˬ-euˬ shiˬ, naw maꞈ-euˬ mehˬ tsoeˬ-ahˇ lehꞈ kʼawꞈ,

³⁵‘Ngaˇ tiˬ jeˬ-iˬ iˬ baˇ maˬ ahˇ. Sahˬpaˬ Miˬyehˇ ngaˬ-ahˇ nui ma maˬ pehˇ-a’ lehˇ, naw maꞈ ehˇ luꞈ-eu meh. Ehˇ kʼawꞈ, naw maꞈ iˬ baˇ maˬ ahˇ lehˇ myawꞈ-eu baˬ da neh, Sahˬpaˬ Miˬyehˇ pyeuꞈ-eu ngaˇ naw maꞈ-ahˇ kʼehˬ ma.

³⁶Aˬ cawˬ tsawˇ jeuˬ-euˬ miˬ yehˇ deuˬ-ahˇ caw teh-eu laꞈ kʼoeˇ, naw maꞈ yawˬ haˇ yawˬ ha laˆ shaˬ-eu meh. Aˬshuˇliˆ tsawˇ jeuˬ neh myaˆ pyawˬ bi laˆ cawˆ-euˬ loꞈ-ehˇ, Iˇjiˇtuˆ tsawˇ jeuˬ neh paˇ bi laˆ cawˆ gaˇ keuˆ tehꞈ-a.

³⁷Shaꞈ dawˇ-eu miˇ neh myaˆ pyawˬ maˬ ciˬ diˇ coeˇ ni, Iˇjiˇtuˆ miˇ kʼahˬ-ahˇ naw maꞈ ya doˆ-iˇ tehꞈ-a. Nawˇ nui kʼaˬ tsmˬ luꞈ-eu deuˬ-ahˇ, Sahˬpaˬ Miˬyehˇ pyeuꞈ-eu ngaˇ byehˇ dzeh-euˬ miˇ neh, aˬ yawꞈ maꞈ nawˬ-ahˇ maˬ paˇ caw ba nehˬ nya meh.”