Read Akha Yeˬlaˬmiˇ 24 Bible Online

Yeˬlaˬmiˇ 24 - Akha bible

Yeˬlaˬmiˇ 24

¹Uˬ duˬ tahˬ nymˇ nymˇ ma mehˬ shi ciˬ taˬ-euˬ siˬ guˬ aˇ siˬ kʼaˆ puˬ nyiˬ puˬ, Sahˬpaˬ Miˬyehˇ ngaˬ-ahˇ mehˬ nehˬ laꞈ-euˬ meh. (Heu-aˬ, Yeˬhawˇyaˬkmˬ-euˬ aˬ li pyeuꞈ-eu Yuˇdaˆ sahˬ paˬ Yeˬhawˇyaˬciˬ-ahˇ, Yuˇdaˆ miˇ kʼahˬ-ahˇ aˬ yuiꞈ aˬ tsu geuꞈ luꞈ-eu deuˬ hawˇ-eu, ba jiˬ deuˬ, laꞈ saˇ maˇ deuˬ, laꞈ myawˬ laꞈ muˆ nya-eu deuˬ nehˬ-ehˇ tiˬ kawˆ loꞈ-ehˇ, Baˬbuˇloˬ sahˬ paˬ Neˬbuˬkaˬneˬzaˬ neh bi nyehꞈ daˆ leꞈ gʼaˬ miˇ tsa meh.)

²Kʼaˆ puˬ yaw beh puˬ-aˬ, yaw naꞈ-ehˇ myah laˇ-euˬ siˬ guˬ aˇ siˬ yaw loˆ deuˬ pyaˆ ahˇ taˬ-euˬ meh. Kʼaˆ puˬ yawˬ puˬ yawˬ-aˬ, maˬ dzaˬ nya-eu maˬ muiˬ-eu siˬ guˬ aˇ siˬ pyaˆ ahˇ taˬ-euˬ meh.

³“Yeˬlaˬmiˇ-oˇ, nawˇ aˬ jeˬ mawˇ teˬ” lehˇ Sahˬpaˬ Miˬyehˇ ngaˬ-ahˇ naˇ haˬ ngeh, “Siˬ guˬ aˇ siˬ mawˇ-euˬ ma. Muiˬ-eu deuˬ muiˬ dui dui-awˇ, doeˇ-eu deuˬ maˬ dzaˬ nya ni doeˇ-eu meh” lehˇ ehˇ kʼoꞈ nehˬ-euˬ ma.

⁴Kʼoeˇ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁵“Iˇsaˬleˬlaˆ-euˬ Miˬyehˇ pyeuꞈ-eu ngaˇ Sahˬpaˬ Miˬyehˇ heu loꞈ-ehˇ sawˇ taˬ-euˬ ma. Baˬbuˇloˬ miˇ kʼahˬ-ahˇ bi nyehꞈ doˆ gʼeh-euˬ tsawˇ haˬ deuˬ-aˬ, muiˬ-eu siˬ guˬ aˇ siˬ kʼoeˇ deuˬ-ahˇ duˇ-awˇ, aˬ yawꞈ maꞈ-ahˇ ngaˇ gʼawˬ shaˬ gaˬ-eu laꞈ kʼoeˇ ngehˬ gʼeh nehˬ ma.

⁶Aˬ yawꞈ maꞈ-ahˇ ngaˇ haw piˇ-awˇ, miˇ kʼahˬ heu kʼahˬ laꞈ kʼoeˇ paˇ sheuˬ kʼoꞈ laꞈ ma. Aˬ yawꞈ maꞈ-ahˇ ngaˇ maˬ laˆ coeˬ maˬ laˆ ciˆ nehˬ ni, bo saˆ huiˬ nehˬ ma. Aˬ yawꞈ maꞈ-ahˇ ngaˇ maˬ gʼawˇ dzeh-ehˇ ka dehꞈ nehˬ ma.

⁷Ngaˇ Sahˬpaˬ Miˬyehˇ pyeuꞈ-eu gaˇ kawˆ siˬ mawꞈ-eu nui ma aˬ yawꞈ maꞈ-ahˇ ngaˇ biꞈ nehˬ ma. Aˬ yawꞈ maꞈ-ahˇ ngaˬ-euˬ tsawˇ haˬ bi pyeuꞈ laˇ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ ma. Aˬ jeˬ miˇ neh ehˇ naˇ, aˬ yawꞈ maꞈ-euˬ nui ma gʼawˇ mawˇ dawˬ tawˆ luꞈ, ngaˇ jawˇ gaˇ gʼoꞈ kʼoꞈ laˇ tehꞈ-a.

⁸“Ehˇ kʼawꞈ, Yuˇdaˆ sahˬ paˬ Zeˬdaˬkiˇ maˬ ehˇ, aˬ yawꞈ nehˬ-ehˇ sahˬ paˬ sahˬ ma geuꞈ-awˇ miˇ kʼahˬ-ahˇ uˆ lahˇ-eu deuˬ maˬ ehˇ, miˇ kʼahˬ heu kʼahˬ laꞈ kʼoeˇ kʼaˇ jawˇ yaꞈ-euˬ deuˬ hawˇ-eu, Iˇjiˇtuˆ miˇ kʼahˬ-ahˇ cehˆ jawˇ-iˇ-euˬ deuˬ maˬ ehˇ, maˬ dzaˬ nya ni doeˇ-eu siˬ guˬ aˇ siˬ loꞈ-ehˇ ngaˇ sawˇ ma.

⁹Guˆ dui dui laˇ paˬ-ehˇ gʼeh-eu shaˬ-eu zahˬ-eu jeˬ aˬ yawꞈ maꞈ kʼoeˇ taˆ ngaˇ bi keuˆ le-eu miˇ neh, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ guˆ-iˇ tehꞈ-a. Aˬ yawꞈ maꞈ-ahˇ aˬ cawˬ ja bu ja doeˇ-awˇ, kʼaˇ ehˇ mawꞈ-eu jeˬ ehˇ niˇ gʼa-eu uˬ taꞈ, ngaˬ neh aˬ yawꞈ maꞈ-ahˇ kʼaˇ teh byaˆ-euˬ jawˇ duˬ laꞈ kʼoeˇ, aˬ cawˬ yaˬ kʼehˇ yaˬ ngeh, aˬ yawꞈ maꞈ-euˬ tsawˇ myahˇ-ahˇ dawˬ daˬ daˬ-awˇ yaˬ tehꞈ-a.

¹⁰Aˬ yawꞈ maꞈ hawˇ-eu aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ tiˬ gʼaˬ-iˬ maˬ dzeˇ-ehˇ pyeuꞈ-iˇ ngeh keuˆ ni, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ, aˬ yawꞈ maꞈ kʼoeˇ taˆ ngaˇ bi keuˆ le ma.”