Read Akha Yeˬlaˬmiˇ 31 Bible Online

Yeˬlaˬmiˇ 31 - Akha bible

Yeˬlaˬmiˇ 31

¹Sahˬpaˬ Miˬyehˇ ehˇ-eu, “Ngaˇ Iˇsaˬleˬlaˆ tsawˇ jeuˬ tsawˇ ca dawˬ tawˆ luꞈ-euˬ Miˬyehˇ pyeuꞈ-awˇ, aˬ yawꞈ maꞈ ngaˬ-euˬ tsawˇ haˬ pyeuꞈ laˇ-eu aˇ yamˬ keuˆ le tehꞈ-a.”

²Sahˬpaˬ Miˬyehˇ heu loꞈ-ehˇ ehˇ-eu meh. “Mi zaˬ mi cehˇ uˬ moˆ dzeuˇ-iˇ-euˬ deuˬ, bawˇ tsahˬ bawˇ dahˇ laꞈ kʼoeˇ ngaˇ gʼawˬ shaˬ gaˬ nehˬ ma. Iˇsaˬleˬlaˆ tsawˇ haˬ deuˬ-ahˇ nui saˇ oꞈ-eu jeˬ biꞈ le ma.”

³Gaˇ mahˇ kaˬ-eu jawˇ duˬ-ahˇ neh Sahˬpaˬ Miˬyehˇ oe-awˇ, nga maꞈ-ahˇ heu loꞈ-ehˇ ehˇ le-euˬ meh. “Mˬ maˬ maˬ byaˆ zaˇ ziˇ ziꞈ-eu gʼoeˇ-eu gaˬ-eu jeˬ neh, naw maꞈ-ahˇ ngaˇ gaˬ-awˇ, naw maꞈ-ahˇ gʼawˬ shaˬ gaˬ-eu jeˬ laꞈ kʼoeˇ, iˬ nah keuˆ ni ngaˇ saˇ jaˇ ziꞈ luꞈ ma.

⁴Miˬ shuiꞈ-ahˇ duˇ-eu Iˇsaˬleˬlaˆ-oˇ, nawˬ-ahˇ paˇ bi dehꞈ doˆ laˇ ma. Nawˇ cehˇ lehˇ ciˆ ciˆ-ehˇ, laˬ kʼaˬ cehˇ-awˇ gaˇ nyeh ya nyeh tehꞈ-a.

⁵Saˬmaˬliˆ gawˬ jawˬ deuˬ kʼoeˇ taˆ, nawˇ aˬ gaꞈ yaˇ kmˇ paˇ mˇ-awˇ, aˬ gaꞈ baw duˆ kʼaˇ ka-eu deuˬ, aˬ gaꞈ aˇ siˬ za dui dui le tehꞈ-a.

⁶Meuˬ-ahˇ loꞈ piˇ-eu tsawˇ haˬ deuˬ, aˬ dui maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ gaˇ, Ziˇoˬ gawˬ jawˬ-ahˇ le beuˇ lehˇ, Eˇpaˬleˬ miˇ kʼahˬ gawˬ jawˬ gawˬ duˇ kʼoeˇ taˆ guˇ tehꞈ-a.”

⁷Sahˬpaˬ Miˬyehˇ heu loꞈ-ehˇ ehˇ-eu meh. “Dawˬ tawˆ kʼoeˇ taˆ huiˬ-eu tsawˇ jeuˬ pyeuꞈ-eu, Iˇsaˬleˬlaˆ gʼaˇ duˬ laˬ kʼaˬ cehˇ-eu caˇ dawˬ caˇ-awˬ. Sahˬpaˬ Miˬyehˇ aˬ yawꞈ-euˬ tsawˇ jeuˬ ka kʼoꞈ-awˇ, kʼaˇ dzeˇ luꞈ-eu deuˬ-ahˇ sheuˬ kʼoꞈ laꞈ-euˬ meh lehˇ, ja ceuˬ-eu caˇ dawˬ caˇ-awˬ.

⁸Laꞈ taˆ paw kʼahˬ-ahˇ neh aˬ yawꞈ maꞈ-ahˇ ngaˇ sheuˬ kʼoꞈ ka leꞈ-awˇ, mˬ dzeˇ miˇ dzeˇ-ahˇ neh poˆ kʼoꞈ uiˬ ma. Myaˆ behꞈ kuiˇ kuˆ hawˇ-eu gʼawˇ mawˇ maˬ ngehꞈ-eu deuˬ, aˬ nyiˇ ciˬ deˇ le-euˬ aˬ ma deuˬ ahˇ leˇ-ehˇ, teu myaˆ heu myaˆ maˬ siˬ ni gʼoꞈ uiˬ laˇ tehꞈ-a.

⁹Myaˆ biˇ yoeˇ-awˇ guiˬ lahˬ shaˇ-eu laꞈ kʼoeˇ, ngaˬ-euˬ tsawˇ haˬ ngaˬ-euˬ mehˬ nah caw teh kʼoꞈ laꞈ tehꞈ-a. Iˇ cuꞈ lawˇ gawˆ yoeˇ-eu paw sheuˬ gʼeh-awˇ, pehˆ toˆ kʼaˇ maˬ za-eu gaˇ ma yaw juiˇ paw neh, aˬ yawꞈ maꞈ-ahˇ ngaˇ sheuˬ doˆ kʼoꞈ laꞈ ma. Ngaˇ Iˇsaˬleˬlaˆ-euˬ aˬ da loꞈ-ehˇ gʼeh-awˇ, Eˇpaˬleˬ ngaˬ-euˬ aˬ li aˬ yuiꞈ yuiꞈ saˬ ma.”

¹⁰Sahˬpaˬ Miˬyehˇ heu loꞈ-ehˇ ehˇ-eu meh. “Miˇ kʼahˬ tsawˇ jeuˬ dawˬ tawˆ luꞈ naˇ haˬ sheˇ. Iˬ ma laˆ shaˆ kʼoeˇ baˬ keuˆ ni ngaˬ-euˬ dawˬ naˬ gaˬ-awˬ. Ngaˬ-euˬ tsawˇ haˬ deuˬ-ahˇ ngaˇ teh byaˆ-euˬ ngeuˇ ma. Ehˇ kʼawꞈ aˬ yawꞈ maꞈ-ahˇ ngaˇ poˆ kʼoꞈ-awˇ, yawˇ bo-eu gʼaˬ yawˇ yawˇ maꞈ-ahˇ haw-eu loꞈ-ehˇ, aˬ yawꞈ maꞈ-ahˇ ngehˬ gʼeh dah teˬ ma.

¹¹Iˇsaˬleˬlaˆ tsawˇ jeuˬ-ahˇ ngaˇ bi buˬ-iˇ-awˇ, baoˬ huiˬ-eu tsawˇ jeuˬ-euˬ laꞈ-ahˇ neh ka kʼoꞈ doˆ-euˬ ma.

¹²Aˬ yawꞈ maꞈ Ziˇoˬ gawˬ jawˬ-ahˇ laˇ-awˇ, laˬ kʼaˬ cehˇ-eu caˇ dawˬ caˇ laˇ tehꞈ-a. Ngaˬ neh biꞈ-euˬ laꞈ sawˬ pyeuꞈ-eu, dzaˬ la gʼo cehˇ, aˬ gaꞈ dzaˇ uiˇ, saˬ loˬ tsiˇ deuˬ hawˇ-eu, mawˇ nyoˬ jeˬ kaˇ deuˬ-ahˇ aˬ yawꞈ maꞈ nui kʼahˇ shiˇ tehꞈ-a. Iˇ cuꞈ tiˬ loꞈ za-eu yaˇ kmˇ tiˬ kmˇ loꞈ-ehˇ, aˬ yawꞈ maꞈ ehˇ kʼaˇ maˬ za ni dehꞈ dzaˬ tehꞈ-a.

¹³Kʼoeˇ ngeh aˬ buˇ miˬ daꞈ deuˬ gaˇ nyeh nyeh tehꞈ-a. Zaˬ guˬ tsawˇ mawˬ maˬ ehˇ laˬ kʼaˬ ya cehˇ tehꞈ-a. Aˬ yawꞈ maꞈ-euˬ nui ma-ahˇ ngaˇ laˆ saˆ nehˬ-eu miˇ neh, myaˆ biˇ yoeˇ-eu dah zaˇ laˬ kʼaˬ cehˇ-awˇ, shaˬ zahˬ dah zaˇ nui saˇ oꞈ le tehꞈ-a.

¹⁴Piˇ ma deuˬ-ahˇ dzaˇ muiˬ oꞈ-awˇ, nui kʼahˇ tiˬ shiˇ bi dzaˬ dehˆ ma. Ngaˬ-euˬ tsawˇ haˬ deuˬ dzaˬ tuiˆ dawˇ tuiˆ jaˆ le tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁵Sahˬpaˬ Miˬyehˇ heu loꞈ-ehˇ ehˇ-eu meh. “Laˬmahˇ meuˬ-ahˇ teˇ saˇ gaˬ doˆ laˇ nya. Shaˬ zahˬ naꞈ-awˇ ngoeˇ-eu teˇ saˇ gaˬ doˆ laˇ nya. Laˬkeˬlaˇ ngoeˇ dui dui luꞈ meh. Aˬ li dawˬ tawˆ luꞈ maˬ paˇ ya mawˇ-eu miˇ neh, maˬ muˇ taˬ nya ni ngoeˇ-eu meh.”

¹⁶Sahˬpaˬ Miˬyehˇ heu loꞈ-ehˇ ehˇ-eu meh. “Maˬ ngoeˇ ni taˬ leˇ-awˬ. Myaˆ biˇ shiˆ shawˇ dzeh-awˬ. Nawˬ li kʼoeˇ deuˬ gʼaˇ duˬ nawˬ neh mˇ-euˬ gaˇ deuˬ, yawꞈ ngehꞈ-ehˇ maˬ ngeuˇ-aˇ. Muiˇ-eu deuˬ-euˬ miˇ kʼahˬ-ahˇ neh, aˬ yawꞈ maꞈ gʼoꞈ doˆ laˇ tehꞈ-a.

¹⁷Mehˬ hu paw nawˇ noeˬ tmˬ kʼaˇ za tehꞈ-a. Nawˬ-euˬ zaˬ deuˬ gʼoꞈ doˆ laˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹⁸“Iˇsaˬleˬlaˆ tsawˇ haˬ heu loꞈ-ehˇ mahˇ-eu ngaˇ gaˬ-euˬ ma. Sahˬpaˬ Miˬyehˇ-oˇ nga maꞈ-aˬ, jeˬ zaˬ yaw gahˇ tiˬ mawˇ-ahˇ duˇ-euˬ kʼawꞈ, nawˬ neh laˆ yah nehˬ laꞈ-euˬ meh. Nga maꞈ-ahˇ sheuˬ kʼoꞈ laˬ le-awˬ. Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ jawˇ gaˇ gʼoꞈ laˇ-eu gʼaˇ duˬ, nga maꞈ noeˬ jiˇ-euˬ ma.

¹⁹Nawˬ-ahˇ byehˇ dzeh-awˇ gʼoˆ doˆ-iˇ-euˬ kʼawꞈ, nymˬ-mˇ nga maꞈ noeˬ poˆ-euˬ ma. Nawˇ nga maꞈ-ahˇ kʼehˬ nehˬ laꞈ ngeh, nui ma zahˇ tsui ni shaˬ-euˬ ma. Zaˬ guˬ pyeuꞈ ngeh mˇ lehˬ-euˬ iˬ baˇ baˬ da neh, daˬ ga-awˇ shaꞈ dawˇ dui dui nya.

²⁰“Iˇsaˬleˬlaˆ nawˇ ngaˇ gaˬ dzehˬ-eu aˬ li ma. Aˬ cawˬ naˆ maˬ tseˇ gaˬ-euˬ gʼaˬ nawˇ ma. Nawˬ-euˬ tsawˇ myahˇ ngaˇ kʼaˇ kuˇ ngeh, nawˬ-ahˇ gaˬ-eu maˬ jiˇ leˇ-ehˇ, nawˬ-ahˇ noeˬ-eu maˬ byoˆ-iˇ nya. Nawˬ-ahˇ ngaˇ gʼawˬ shaˬ aˬ diˇ gaˬ nehˬ ma.

²¹Gaˇ ma-ahˇ tsaˬ tsoˆ taˬ yaꞈ-awˬ. Nawˬ neh iˇ-euˬ gaˇ ma paˇ noeˬ doˆ-awˬ. Iˇsaˬleˬlaˆ-oˇ, gʼoꞈ laˇ-awˬ. Nawˬ neh byehˇ-euˬ meuˬ-ahˇ gʼoꞈ jawˇ laˇ-awˬ.

²²Saˇ jaˇ maˬ ziꞈ-eu tsawˇ jeuˬ-oˇ, aˇ myah keuˆ ni nyi naˬ-eu lehˇ gʼeh te. Miˇ tsaˬ kʼoeˇ taˆ yaw shuiꞈ tiˬ jeˬ ngaˇ beh paˇ taˬ-euˬ ma. Kʼaˬ dzeˇ zaˬ-ahˇ zaˬ miˬ zaˬ ya haw piˇ paˬ-ehˇ, tahˬ poˆ-ehˇ beh paˇ taˬ-euˬ ma.”

²³Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ jeuˬ heu jeuˬ-ahˇ aˬ yawꞈ maꞈ-euˬ miˇ kʼahˬ laꞈ kʼoeˇ ngaˇ sheuˬ kʼoꞈ gʼeh nehˬ-awˇ paˇ bi jawˇ ngeh, Yuˇdaˆ miˇ kʼahˬ hawˇ-eu kʼoeˇ gaˇ jaˆ-eu meuˬ deuˬ laꞈ kʼoeˇ, aˬ yawꞈ maꞈ heu loꞈ-ehˇ paˇ ya ehˇ tehꞈ-a. ‘Yaw tsaˬ yaw dawˇ jeˬ jawˇ-eu jawˇ duˬ-oˇ, muiˬ-eu shawˇ-eu gawˬ jawˬ-oˇ[5] Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ’ lehˇ ya ehˇ tehꞈ-a.

²⁴Yuˇdaˆ miˇ kʼahˬ hawˇ-eu kʼoeˇ gaˇ kʼaˇ jaˆ-eu meuˬ deuˬ laꞈ kʼoeˇ, aˬ yawꞈ maꞈ jawˇ byah jiˇ-awˇ, deh yaˇ mˇ dzaˬ-eu deuˬ hawˇ-eu, yawˇ yawˇ maꞈ teh-awˇ bo-eu yawˇ cu-eu tsawˇ haˬ deuˬ tiˬ byah ni jawˇ laˇ tehꞈ-a.

²⁵Nui ma shaˬ zahˬ mˇ-euˬ tsawˇ haˬ deuˬ-ahˇ nui saˇ bi za-awˇ, mehꞈ-eu shuꞈ-eu baˬ da neh gʼaˬ baˬ-eu tsawˇ haˬ deuˬ-ahˇ, bi dzaˬ bi dawˇ dehˆ ma.

²⁶Kʼoeˇ ngeh jawˇ, ‘Ngaˇ yuꞈ kʼaˆ-euˬ noeˬ laˇ ngeh, gʼaˬ ahˇ laˇ-awˇ zoˇ tseuˆ ni miˇ-a’ lehˇ, aˬ yawꞈ maꞈ ja tehꞈ-a.

²⁷“Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ laꞈ kʼoeˇ, tsawˇ haˬ hawˇ-eu jeˬ zaˬ deuˬ ngaˇ bi byah laˇ-eu aˇ yamˬ dawˬ peh peh le luꞈ meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

²⁸Aˬ yawꞈ maꞈ-ahˇ puˇ ngawˬ ngawˬ dzeh-eu gʼaˇ duˬ maˬ ehˇ, gʼeu ka-eu gʼaˇ duˬ maˬ ehˇ, teh dzeh-eu gʼaˇ duˬ maˬ ehˇ, laˆ luˬ laˆ seˇ nehˬ-eu gʼaˇ duˬ maˬ ehˇ, laˆ shaˬ laˆ zahˬ nehˬ-eu gʼaˇ duˬ maˬ ehˇ, ngaˇ shaˇ noeˬ-awˇ jahˇ nehˬ gʼaˬ-euˬ loꞈ-ehˇ, aˬ yawꞈ maꞈ-ahˇ paˇ ka ziꞈ-awˇ, laˆ saˆ huiˬ laˆ saˆ mahˇ nehˬ-eu gʼaˇ duˬ kʼawꞈ, ngaˇ shaˇ noeˬ-awˇ jahˇ nehˬ ma.

²⁹Aˇ yamˬ kʼoeˇ yamˬ keuˆ laˇ ngeh, ‘Aˬ da aˬ gaꞈ yaw cehˇ dzaˬ-euˬ, zaˬ-ahˇ seuˬ kmˬ kmˬ leˇ-mˇ jeˇ’ lehˇ aˬ yawꞈ maꞈ dawˬ daˬ maˬ paˇ daˬ-aˇ.

³⁰Yawˬ ha aˬ gaꞈ aˇ siˬ siˬ cehˇ kʼaˇ pyaˆ dzaˬ-eu tsawˇ haˬ, yawˬ haˇ yawˬ ha seuˬ kmˬ kmˬ-awˇ, yawˬ ha neh mˇ-euˬ iˬ baˇ baˬ da neh, yawˬ haˇ yawˬ ha ya shiˇ tehꞈ-a.”

³¹Sahˬpaˬ Miˬyehˇ heu loꞈ-ehˇ ehˇ-eu meh. “Haw taˬ yawˬ. Iˇsaˬleˬlaˆ tsawˇ haˬ deuˬ hawˇ-eu Yuˇdaˆ tsawˇ haˬ deuˬ nehˬ-ehˇ, ngaˇ dawˬ ma saˇ jaˇ yaw shuiꞈ paˇ dzaˬ poˆ-eu aˇ yamˬ keuˆ le luꞈ meh.

³²Dawˬ ma saˇ jaˇ yaw shuiꞈ heu-aˬ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ, Iˇjiˇtuˆ miˇ kʼahˬ laꞈ kʼoeˇ shaˬ luꞈ gaˇ, ngaˬ neh aˬ laꞈ-ahˇ tuˆ tehˬ-awˇ tsahˇ doˆ nehˬ ngeh, aˬ yawꞈ maꞈ nehˬ-ehˇ ngaˇ dzaˬ-euˬ dawˬ ma saˇ jaˇ yaw oeˇ-ahˇ maˬ duˇ-a. Ngaˇ-aˬ, aˬ yawꞈ maꞈ-euˬ kʼaˬ dzeˇ zaˬ-ahˇ duˇ kʼawꞈ, dawˬ ma saˇ jaˇ kʼoeˇ hmˬ-ahˇ aˬ yawꞈ maꞈ maˬ ziꞈ-a.

³³Iˇsaˬleˬlaˆ tsawˇ haˬ nehˬ-ehˇ ngaˇ dzaˬ-eu lehˇ gʼeh-eu dawˬ ma saˇ jaˇ yaw shuiꞈ-aˬ, heu loꞈ-ehˇ ma. Ngaˬ-euˬ zahˇ dawˬ kʼoꞈ dawˬ aˬ yawꞈ maꞈ laꞈ kʼoeˇ dawˆ ahˇ-awˇ, aˬ yawꞈ maꞈ-euˬ nui ma laꞈ kʼoeˇ boꞈ ahˇ nehˬ ma. Ngaˇ aˬ yawꞈ maꞈ-euˬ Miˬyehˇ pyeuꞈ laˇ-awˇ, aˬ yawꞈ maꞈ-ahˇ ngaˬ-euˬ tsawˇ haˬ bi pyeuꞈ laˇ ma.

³⁴Ngaˬ-ahˇ siˬ nya laˇ ni, aˬ yawꞈ maꞈ tiˬ gʼaˬ tiˇ gʼaˬ mehˬ-eu tsoˆ-eu maˬ paˇ loˬ-aˇ. Aˬ jeˬ miˇ neh ehˇ naˇ, huiˬ zaˬ nyiˇ zaˬ dawˬ tawˆ luꞈ ngaˬ-ahˇ siˬ nya jiˇ tehꞈ-a. Aˬ yawꞈ maꞈ-ahˇ ngaˇ iˬ baˇ pyehˬ nehˬ-awˇ, aˬ yawꞈ maꞈ-euˬ yaw lehˬ ngaˇ maˬ paˇ noeˬ taˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

³⁵Nah gʼahˇ paw bi bya-eu gʼaˇ duˬ, Sahˬpaˬ Miˬyehˇ nahˇ ma biꞈ-awˇ, uˬ ciꞈ paw bi bya-eu gʼaˇ duˬ, ba la hawˇ-eu aˬ guiˇ biꞈ taˬ-euˬ meh. Iˬ ma laˆ shaˆ-ahˇ aˬ yawꞈ sheu nyeh-awˇ, iˇ luˆ dzeh-awˇ bi mahˇ-euˬ meh. Aˬ yawꞈ-euˬ tsawˇ myahˇ-aˬ, Baoˬ huiˬ-eu Sahˬpaˬ Miˬyehˇ meh.

³⁶Mˬ hawˇ-eu miˇ kʼaˇ ziꞈ kʼoeˇ keuˆ, Iˇsaˬleˬlaˆ tsawˇ jeuˬ maˬ bi byoˆ-iˇ ma lehˇ, Sahˬpaˬ Miˬyehˇ saˇ jaˇ dzaˬ taˬ-euˬ meh.

³⁷Mˬ-ahˇ aˇ lmˇ lmˇ haw nya-awˇ, miˇ tsaˬ ciˇ tahˬ mawˇ laˇ ngeh nah hawˇ-eu, Iˇsaˬleˬlaˆ tsawˇ jeuˬ mˇ-euˬ iˬ baˇ baˬ da, aˬ yawꞈ maꞈ-ahˇ byehˇ dzeh ma lehˇ, Sahˬpaˬ Miˬyehˇ ehˇ taˬ-euˬ meh.

³⁸Sahˬpaˬ Miˬyehˇ heu loꞈ-ehˇ ehˇ-eu meh. “Nahˇ ma ga kʼehˬ paw jaˆ-eu meuˬ-ahˇ loꞈ piˇ-eu Haˬnaˬneˬlaˇ nymˇ goˇ ahˇ neh laꞈ coeˇ lahˇ kʼehˬ-ahˇ doˆ ni, Yeˬluˇsaˬlehˬ meuˬ meuˬ lah-ehˇ, paˇ gawˬ ziꞈ-eu aˇ yamˬ keuˆ le luꞈ meh.

³⁹Meuˬ-euˬ miˇ kaˬ-aˬ, kʼoeˇ gaˇ neh Gaˬyehˆ gawˬ duˇ nahˇ ma ga kʼehˬ paw iˇ gʼeh-awˇ, Goˇhaˬ gawˬ duˇ iˇ zah gʼeh tehꞈ-a.

⁴⁰Lmˬ bymˇ jaˆ-awˇ yaw jawꞈ yaw laꞈ biˬ dzeh duˬ pyeuꞈ-eu deh kʼawꞈ kʼawꞈ lah-ehˇ maˬ ehˇ, Giˇdaˬloˬ lawˇ gawˆ kʼoeˇ taˆ paw dzeˇ, nahˇ ma doˆ kʼehˬ paw Mahˬ-euˬ lahˇ kʼehˬ-ahˇ keuˆ ni jaˆ-eu deh ga ga lah-ehˇ maˬ ehˇ, ngaˬ-euˬ gʼaˇ duˬ muiˬ-eu shawˇ-eu pehˇ tsahˇ pyeuꞈ laˇ tehꞈ-a. Meuˬ heu meuˬ-ahˇ tiˬ jawˇ-iˬ maˬ paˇ bi byaˆ-iˇ-ehˇ, tiˬ jawˇ-iˬ maˬ paˇ bi laˆ cawˆ ma.”