Read Akha Yeˬlaˬmiˇ 38 Bible Online

Yeˬlaˬmiˇ 38 - Akha bible

Yeˬlaˬmiˇ 38

¹Maˬtaˬ-euˬ aˬ li Sheˬpaˬtiˇ, Paˬshuˇlaˆ-euˬ aˬ li Geˬdaˬliˇ, Sheˬleˬmiˇ-euˬ aˬ li Yeˬhuˇkaˬlaˆ hawˇ-eu, Maˬlaˬkiˇyaˆ-euˬ aˬ li Paˬshuˇlaˆ aˬ ha maꞈ-aˬ, miˇ kʼahˬ zaˬ deuˬ-ahˇ ngaˇ heu loꞈ-ehˇ ehˇ nehˬ luꞈ-eu gaˇ kawˆ ya gaˬ-euˬ meh.

²“Meuˬ heu meuˬ laꞈ kʼoeˇ kʼaˇ jawˇ yaꞈ-eu tsawˇ haˬ deuˬ, guiˇ deuˆ-eu laꞈ kʼoeˇ, maˬ ngeuˇ naˇ mehꞈ-eu shuꞈ-eu laꞈ kʼoeˇ, maˬ ngeuˇ naˇ naˇ-eu gawˇ-eu laꞈ kʼoeˇ ya shiˇ jiˇ tehꞈ-a. Ehˇ kʼawꞈ, laꞈ nyiˇ doˆ-iˇ-awˇ, Baˬbuˇloˬ tsawˇ haˬ deuˬ jawˇ gaˇ uˇ leˇ-eu tsawˇ haˬ deuˬ-aˬ, yaw li uˬ duˬ yawˬ ha-euˬ uˬ kʼawˇ ya buˬ-iˇ tehꞈ-a” lehˇ, Sahˬpaˬ Miˬyehˇ ehˇ-eu gaˇ kawˆ, miˇ kʼahˬ zaˬ deuˬ-ahˇ ngaˇ ehˇ nehˬ-euˬ aˬ yawꞈ maꞈ ya gaˬ-euˬ meh.

³“Meuˬ heu meuˬ Baˬbuˇloˬ guiˇ maꞈ-ahˇ ngaˇ a nehˬ-awˇ bi deuˆ gʼaˬ ma” lehˇ, Sahˬpaˬ Miˬyehˇ ehˇ-eu gaˇ kawˆ kʼawꞈ, aˬ yawꞈ maꞈ-ahˇ ngaˇ dzawˇ nehˬ luꞈ-eu ma.

⁴Kʼoeˇ naˇ, yaw huiˬ yaw mahˇ kʼoeˇ deuˬ sahˬ paˬ-ahˇ heu loꞈ-ehˇ ehˇ nehˬ leˇ-euˬ meh. “Tsawˇ haˬ heu gʼaˬ-ahˇ maˬ sehꞈ-ehˇ maˬ gʼeh nya luꞈ-a. Aˬ yawꞈ kʼoeˇ loꞈ-ehˇ ja ja-ehˇ cah-eu laꞈ kʼoeˇ, meuˬ laꞈ kʼoeˇ jawˇ-eu yehˇ deuˬ nui ma baˬ-iˇ ni jahˇ luꞈ-eu meh. Meuˬ laꞈ kʼoeˇ kʼaˇ jawˇ-eu tsawˇ haˬ deuˬ-ahˇ kʼawꞈ, aˬ yawꞈ kʼoeˇ loꞈ-ehˇ dzawˇ nehˬ-euˬ meh. Aˬ yawꞈ-aˬ, miˇ kʼahˬ zaˬ deuˬ gʼaˇ duˬ yaw muiˬ jeˬ mˇ-eu maˬ ngeuˇ nga. Yaw cawˆ jeˬ mˇ-eu nga.”

⁵Kʼoeˇ ngeh, sahˬ paˬ Zeˬdaˬkiˇ ehˇ-eu, “Muiˬ tehꞈ-a. Naw maꞈ aˬ yawꞈ-ahˇ kʼaˇ jahˇ nehˬ mawꞈ-eu loꞈ-ehˇ jahˇ nehˬ-awˬ. Ngaˇ naw maꞈ-ahˇ aˬ joˆ-ehˇ paˇ laˆ tsoeˬ nya nmˇ.”

⁶Kʼoeˇ naˇ, aˬ yawꞈ maꞈ ngaˬ-ahˇ nyehꞈ-awˇ, sahˬ paˬ zaˬ yo Maˬlaˬkiˇyaˆ-euˬ lah duˬ-ahˇ, aˇ caˆ neh pyehˬ ka ahˇ nehˬ laꞈ-euˬ meh. Lah duˬ kʼoeˇ duˬ-aˬ, sahˬ paˬ-euˬ hawˇ nymˇ lahˇ laꞈ kʼoeˇ jaˆ-awˇ, iˇ cuꞈ maˬ dahˬ ni, lah yaˬ yaˬ-eu meh. Lah yaˬ kʼoeˇ-euˬ laꞈ kʼoeˇ ngaˇ ga nuiꞈ-awˇ jawˇ-euˬ ma.

⁷Ehˇ kʼawꞈ, aˬ yawꞈ maꞈ neh ngaˬ-ahˇ lah duˬ laꞈ kʼoeˇ nyehꞈ ahˇ-euˬ gaˇ kawˆ-ahˇ, sahˬ paˬ-euˬ hawˇ nymˇ laꞈ kʼoeˇ yaw huiˬ yaw mahˇ tiˬ gʼaˬ geuꞈ luꞈ-eu Suˬdaˬ tsawˇ haˬ Eˇbehˆmeˬlehˆ[6] ya gaˬ-euˬ meh. Kʼoeˇ ngeh, Beˬyaˬmiˬ lahˇ kʼehˬ dawˬ peh sahˬ paˬ nuiˇ luꞈ-eu meh.

⁸Eˇbehˆmeˬlehˆ sahˬ paˬ jawˇ gaˇ le-awˇ, heu loꞈ-ehˇ ehˇ nehˬ-euˬ meh.

⁹“Sahˬ paˬ-oˇ, tsawˇ haˬ kʼoeˇ deuˬ neh mˇ-euˬ jeˬ maˬ tsaˬ maˬ dawˇ-a. Yeˬlaˬmiˇ-ahˇ lah duˬ laꞈ kʼoeˇ aˬ yawꞈ maꞈ nyehꞈ ahˇ-euˬ meh. Meuˬ laꞈ kʼoeˇ dzaˬ dzaˬ dawˇ dawˇ nym laˇ taˬ-euˬ miˇ neh, Yeˬlaˬmiˇ ya shiˇ-eu yaw duˬ baw meh.”

¹⁰Ngaˇ maˬ shiˇ tsehˆ mi naˆ-ehˇ ngaˬ-ahˇ bi gʼeu doˆ laˇ-eu gʼaˇ duˬ, Eˇbehˆmeˬlehˆ-ahˇ sahˬ paˬ neh dawˬ biꞈ-awˇ, tsawˇ haˬ smˇ gʼaˬ sheuˬ-awˇ bi oe-euˬ meh.

¹¹Kʼoeˇ naˇ, tsawˇ haˬ kʼoeˇ smˇ gʼaˬ sheuˬ-awˇ, sahˬ paˬ-euˬ hawˇ nymˇ laꞈ kʼoeˇ jaˆ-eu myawˬ taˬ-euˬ kuˆ lawˆ-ahˇ Eˇbehˆmeˬlehˆ le-awˇ, ngaˬ-ahˇ lah duˬ laꞈ kʼoeˇ neh gʼeu doˆ-eu gʼaˇ duˬ, mehˬ tsoeˬ paˇ cehˇ yuˇ doˆ laˬ leˇ-euˬ meh.

¹²Ngaˬ-ahˇ aˇ caˆ neh gʼeu doˆ ngeh maˬ bi naˇ laˇ-eu gʼaˇ duˬ, mehˬ tsoeˬ paˇ cehˇ kʼoeˇ laꞈ gʼoꞈ laꞈ tah-ahˇ dehˬ tehˬ-awˬ lehˇ aˬ yawꞈ ehˇ-eu miˇ neh, aˬ yawꞈ ehˇ-eu loꞈ-ehˇ jahˇ-euˬ ma.

¹³Kʼoeˇ naˇ, aˬ yawꞈ maꞈ ngaˬ-ahˇ lah duˬ laꞈ kʼoeˇ neh gʼeu doˆ nehˬ laꞈ-euˬ meh. Lah duˬ laꞈ kʼoeˇ neh doˆ laˇ gʼaˬ ngeh jawˇ, sahˬ paˬ-euˬ hawˇ nymˇ lahˇ laꞈ kʼoeˇ ngaˬ-ahˇ ka lahˇ-awˇ bi jawˇ laꞈ-euˬ meh.

¹⁴Tiˬ poˆ-aˬ, Uˬ duˬ tahˬ nymˇ nymˇ ma-ahˇ uˇ leˇ-eu lahˇ kʼehˬ smˇ kʼehˬ tiˬ kʼehˬ-ahˇ, aˬ yawꞈ jawˇ gaˇ bi laˇ-eu gʼaˇ duˬ, ngaˬ-ahˇ bi sheuˬ laˬ le-awˇ, “Nawˬ-ahˇ, ngaˇ tiˬ jeˬ naˇ haˬ mawꞈ nya. Yawˬ jeˬ na luꞈ kʼaˇ ngeuˇ-eu loꞈ-ehˇ bi ehˇ doˆ jiˇ mawꞈ miˇ-a” lehˇ ehˇ-eu meh.

¹⁵“Kʼaˇ ngeuˇ-eu loꞈ-ehˇ dawˇ coe ni ngaˇ ehˇ naˇ, nawˇ ngaˬ-ahˇ sehꞈ laˇ gaˇ guˆ nya. Ja noeˬ ja duˇ nehˬ naˇ kʼawꞈ, nawˇ maˬ naˇ haˬ geuꞈ gaˇ yahˇ nya” lehˇ ngaˇ ehˇ kʼoꞈ nehˬ-euˬ ma.

¹⁶Kʼoeˇ ngeh, sahˬ paˬ Zeˬdaˬkiˇ ngaˬ-ahˇ ciˬ cuˇ ni kʼoeˬ saˆ-awˇ, “Nawˬ-ahˇ ngaˇ maˬ sehꞈ-eu uˬ taꞈ, nawˬ-ahˇ sehꞈ mawꞈ-eu deuˬ-euˬ laꞈ-ahˇ kʼawꞈ maˬ bi ahˇ leˇ lehˇ, aˬ dui-ahˇ dehꞈ-eu saꞈ laˇ biꞈ laꞈ-euˬ Miˬyehˇ pyeuꞈ-eu, dehꞈ luꞈ-eu Miˬyehˇ mehˬ shi ngaˇ kamˬ-eu ma.”

¹⁷Kʼoeˇ naˇ, Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ neh kʼaˇ ehˇ taˬ-euˬ jeˬ, Zeˬdaˬkiˇ-ahˇ ngaˇ heu loꞈ-ehˇ paˇ dzawˇ poˆ nehˬ-euˬ ma. Sahˬpaˬ Miˬyehˇ heu loꞈ-ehˇ ehˇ-eu meh. “Baˬbuˇloˬ sahˬ paˬ-euˬ yaw huiˬ yaw mahˇ deuˬ-euˬ laꞈ oꞈ nawˇ awꞈ nehˬ naˇ, nawˇ shiˇ gaˇ maˬ keuˆ-ehˇ, meuˬ heu meuˬ kʼawꞈ maˬ cawˆ-iˇ-aˇ. Nawˇ hawˇ-eu nawˬ-euˬ miˬ sawˇ zaˬ dawˬ tawˆ luꞈ shiˇ gaˇ maˬ keuˆ ni ya dzeuˇ-iˇ tehꞈ-a.

¹⁸Ehˇ kʼawꞈ, nawˇ laꞈ oꞈ maˬ awꞈ naˇ, meuˬ heu meuˬ Baˬbuˇloˬ tsawˇ haˬ deuˬ-euˬ laꞈ-ahˇ ahˇ leˇ-awˇ, meuˬ-ahˇ miˬ dzaˬ dzah puiˆ dzeh-eu uˬ taꞈ, nawˬ-euˬ gʼawˇ mawˇ kʼawꞈ aˬ yawꞈ maꞈ-euˬ laꞈ-ahˇ maˬ dzeuˇ-iˇ nya-aˇ lehˇ ehˇ-eu meh.”

¹⁹Sahˬ paˬ Zeˬdaˬkiˇ ehˇ-eu, “Baˬbuˇloˬ tsawˇ haˬ deuˬ jawˇ paw cehˆ ahˇ-iˇ-euˬ aˬ dui -euˬ miˇ kʼahˬ zaˬ deuˬ-ahˇ ngaˇ guˆ nya. Ngaˬ-ahˇ aˬ yawꞈ maꞈ-euˬ laꞈ-ahˇ a ahˇ nehˬ-awˇ bi kʼehˬ laꞈ-eu maˬ siˬ.”

²⁰Ngaˇ heu loꞈ-ehˇ ehˇ nehˬ-euˬ ma. “Nawˬ-ahˇ tsawˇ haˬ kʼoeˇ deuˬ-euˬ laꞈ-ahˇ maˬ bi ahˇ leˇ-aˇ. Sahˬpaˬ Miˬyehˇ neh ehˇ taˬ-euˬ dawˬ-ahˇ naˇ haˬ geuꞈ-awˬ lehˇ, nawˬ-ahˇ ngaˇ shaˇ-eu ma. Kʼoeˇ loꞈ-ehˇ jahˇ naˇ, nawˬ-euˬ gʼaˇ duˬ muiˬ dui dui-awˇ, shiˇ gaˇ maˬ keuˆ-aˇ.

²¹Ehˇ kʼawꞈ, nawˇ laꞈ oꞈ maˬ awꞈ ma lehˇ ngeuˇ naˇ, aˬ joˆ-ehˇ pyeuꞈ laˇ-eu gaˇ kawˆ Sahˬpaˬ Miˬyehˇ ngaˬ-ahˇ yaw sahˇ laꞈ kʼoeˇ heu loꞈ-ehˇ bi siˬ bi mawˇ laꞈ-euˬ meh.

²²Yuˇdaˆ sahˬ paˬ-euˬ hawˇ nymˇ laꞈ kʼoeˇ kʼaˇ dzeˇ-eu zaˬ miˬ zaˬ deuˬ-ahˇ, Baˬbuˇloˬ tsawˇ haˬ yaw huiˬ yaw mahˇ deuˬ jawˇ gaˇ sheuˬ doˆ gʼeh nehˬ-eu ngaˇ ya mawˇ-euˬ ma. Aˬ yawꞈ maꞈ heu loꞈ-ehˇ ehˇ-awˇ doˆ-iˇ luꞈ-eu meh. ‘Sahˬ paˬ-ahˇ gʼoeˇ dui dui-eu cawˬ deuˬ, sahˬ paˬ-ahˇ tsawˇ gahˇ gahˇ gʼaˬ-euˬ meh. Sahˬ paˬ aˬ kuiˇ lah yaˬ-ahˇ nawˬ pahˬ-awˇ, cawˬ deuˬ byehˇ dzeh nehˬ yaꞈ-euˬ meh’ lehˇ ehˇ-eu meh.”

²³Kʼoeˇ naˇ, ngaˇ heu loꞈ-ehˇ paˇ ehˇ nehˬ-euˬ ma. “Nawˬ-euˬ zaˬ miˬ zaˬ deuˬ hawˇ-eu aˬ buˇ aˬ li dawˬ tawˆ luꞈ Baˬbuˇloˬ tsawˇ haˬ deuˬ jawˇ gaˇ bi sheuˬ gʼeh jiˇ-awˇ, nawˇ kʼawꞈ, aˬ yawꞈ maꞈ-euˬ laꞈ-ahˇ maˬ dzeuˇ-iˇ-aˇ. Baˬbuˇloˬ sahˬ paˬ nawˬ-ahˇ nyehꞈ-awˇ, meuˬ heu meuˬ-ahˇ miˬ dzaˬ keuˬ byoˆ dzeh tehꞈ-a.”

²⁴Zeˬdaˬkiˇ ehˇ-eu, “Aˇ nyaꞈ neh ngehˬ cawˬ-euˬ gaˇ kawˆ heu tsawˇ haˬ tiˬ gʼaˬ-iˬ maˬ bi siˬ ni yahˇ-awˬ. Nawˬ-ahˇ ngaˇ shiˇ gaˇ maˬ bi keuˆ.

²⁵Ngaˇ nawˬ nehˬ-awˇ ngehˬ cawˬ-euˬ gaˇ kawˆ yaw huiˬ yaw mahˇ deuˬ ya gaˬ naˇ, aˬ jeˬ gaˇ kawˆ ngehˬ cawˬ-euˬ nga lehˇ siˬ mawꞈ-eu miˇ neh, nawˬ-ahˇ naˇ haˬ laˇ tehꞈ-a. Kʼaˇ ngeuˇ-eu loꞈ-ehˇ dawˇ coe ni ehˇ doˆ nehˬ jiˇ naˇ, nawˬ-ahˇ maˬ sehꞈ ni bi dzeuˇ-iˇ ma lehˇ aˬ yawꞈ maꞈ ehˇ laˇ tehꞈ-a.

²⁶Kʼoeˇ loꞈ-ehˇ ehˇ laˇ naˇ, paꞈ kuˆ-ahˇ paˇ dawˆ-awˇ taˬ bi shiˇ nehˬ laꞈ lehˇ, ngaˬ-ahˇ nawˇ shaˇ-euˬ tehꞈ ma lehˇ ehˇ kʼoꞈ nehˬ naˇ gʼaˬ tehꞈ-a.”

²⁷Kʼoeˇ naˇ, yaw huiˬ yaw mahˇ dawˬ tawˆ luꞈ ngaˬ-ahˇ naˇ haˬ laˇ-awˇ, sahˬ paˬ neh kʼaˇ ehˇ nehˬ laꞈ-euˬ loꞈ-ehˇ ngaˇ ehˇ kʼoꞈ nehˬ-euˬ ma. Sahˬ paˬ nga nyaꞈ dawˬ ngehˬ cawˬ-euˬ gaˇ, tsawˇ haˬ tiˬ gʼaˬ-iˬ maˬ ya gaˬ-euˬ miˇ neh, aˬ yawꞈ maꞈ tiˬ jeˬ-iˬ maˬ ehˇ nya-a.

²⁸Kʼoeˇ naˇ, Yeˬluˇsaˬlehˬ meuˬ-ahˇ aˬ cawˬ deuˆ gʼaˬ ngeh nah keuˆ ni, sahˬ paˬ hawˇ nymˇ lahˇ laꞈ kʼoeˇ ngaˇ jawˇ-euˬ ma.