Read Akha Yeˬlaˬmiˇ 39 Bible Online

Yeˬlaˬmiˇ 39 - Akha bible

Yeˬlaˬmiˇ 39

¹Zeˬdaˬkiˇ Yuˇdaˆ sahˬ paˬ geuꞈ-euˬ gʼoeˬ kʼoꞈ tiˬ kʼoꞈ ba la tseˇ siˬ tiˬ siˬ-ahˇ, Baˬbuˇloˬ sahˬ paˬ Neˬbuˬkaˬneˬzaˬ gʼaˬ, aˬ yawꞈ-euˬ guiˇ maꞈ dawˬ tawˆ luꞈ sheuˬ-awˇ, Yeˬluˇsaˬlehˬ meuˬ-ahˇ guiˇ deuˆ le-euˬ meh.

²Zeˬdaˬkiˇ sahˬ paˬ geuꞈ-euˬ tseˇ tiꞈ kʼoꞈ tiˬ kʼoꞈ ba la oeˬ siˬ tiˬ siˬ gʼoeˬ nah-ahˇ, meuˬ meuˬ lahˇ byaˆ le-euˬ meh.

³(Yeˬluˇsaˬlehˬ meuˬ-ahˇ deuˆ gʼaˬ ngeh jawˇ, Baˬbuˇloˬ sahˬ paˬ-euˬ yaw huiˬ yaw mahˇ deuˬ dawˬ tawˆ luꞈ, lahˇ kʼehˬ gʼahˇ ceh kʼehˬ-ahˇ jawˇ duˬ yuˇ-awˇ jawˇ le-euˬ meh. Yaw huiˬ yaw mahˇ kʼoeˇ deuˬ laꞈ kʼoeˇ, Neˬlaˬgaˬlaˆshaˬleˬzaˬ, Samˬgaˬneˬboˬ, Saˬseˬkmˬ hawˇ-eu Neˬlaˬgaˬlaˆshaˬleˬzaˬ yawˬ gʼaˬ yawˬ ahˇ-eu meh.)

⁴Kʼoeˇ loꞈ-ehˇ pyeuꞈ laˇ-euˬ gaˇ, sahˬ paˬ Zeˬdaˬkiˇ hawˇ-eu aˬ yawꞈ-euˬ yehˇ dawˬ tawˆ luꞈ ya mawˇ ngeh, uˬ ciꞈ paw meuˬ laꞈ nyiˇ cehˆ doˆ-eu lehˇ lehˬ hmˬ-euˬ meh. Sahˬ paˬ-euˬ yaˇ kmˇ paw neh aˬ yawꞈ maꞈ doˆ-iˇ-awˇ, meuˬ meuˬ lahˇ nyiˬ tiˆ yaw kaˬ-ahˇ dahˇ-eu lahˇ kʼehˬ-ahˇ neh iˇ doˆ-awˇ, Yawˇdaˬ lawˇ baˬ deh kʼawꞈ paw cehˆ dzeuˇ-euˬ meh.

⁵Ehˇ kʼawꞈ, Baˬbuˇloˬ guiˇ maꞈ deuˬ aˬ yawꞈ maꞈ mehˬ nah teh-awˇ, Yeˬliˇkoˇ meuˬ dawˬ peh jaˆ-eu deh ga-ahˇ, Zeˬdaˬkiˇ-ahˇ nyehꞈ-euˬ meh. Kʼoeˇ naˇ, Haˬmaˆ gahˬ kaˬ-ahˇ jaˆ-eu Yiˇbaˬlahˬ meuˬ-ahˇ jawˇ luꞈ-eu sahˬ paˬ Neˬbuˬkaˬneˬzaˬ jawˇ gaˇ aˬ yawꞈ-ahˇ nyehꞈ gʼeh-euˬ meh. Kʼoeˇ gaˇ, Neˬbuˬkaˬneˬzaˬ neh aˬ yawꞈ-ahˇ yaˇ kʼaˬ daˇ nehˬ-euˬ meh.

⁶Yiˇbaˬlahˬ meuˬ-ahˇ, Zeˬdaˬkiˇ-euˬ mehˬ shi, Zeˬdaˬkiˇ-euˬ aˬ li deuˬ-ahˇ Neˬbuˬkaˬneˬzaˬ neh bi sehꞈ-euˬ meh. Yuˇdaˆ miˇ kʼahˬ laꞈ kʼoeˇ yaw huiˬ yaw mahˇ geuꞈ-eu deuˬ-ahˇ kʼawꞈ aˬ yawꞈ bi sehꞈ-euˬ meh.

⁷Kʼoeˇ naˇ, Zeˬdaˬkiˇ-euˬ myaˆ nuiˆ tsawˆ behꞈ nehˬ-awˇ, Baˬbuˇloˬ miˇ kʼahˬ-ahˇ tsahˇ gʼeh-eu gʼaˇ duˬ, shmˇ caˆ daˬ-awˇ bi jawˇ-euˬ meh.

⁸Kʼoeˇ ngeh, Baˬbuˇloˬ tsawˇ haˬ deuˬ sahˬ paˬ-euˬ hawˇ nymˇ hawˇ-eu miˇ kʼahˬ zaˬ-euˬ nymˇ deuˬ keuˬ dzeh-awˇ, Yeˬluˇsaˬlehˬ meuˬ-euˬ meuˬ meuˬ lahˇ deh byaˆ-euˬ meh.

⁹Aˇ saˬ saˬ laˇ jawˬ-ehˇ, Baˬbuˇloˬ guiˇ maꞈ deuˬ kʼoeˇ taˆ uˆ lahˇ-eu Neˬbuˬzaˬlaˬdaˬ-aˬ, meuˬ laꞈ kʼoeˇ kʼaˇ dzeˇ-eu tsawˇ haˬ deuˬ hawˇ-eu, aˬ yawꞈ jawˇ paw kʼaˇ cehˆ uˇ leˇ-euˬ tsawˇ haˬ deuˬ-ahˇ Baˬbuˇloˬ miˇ kʼahˬ-ahˇ nyehꞈ daˆ leꞈ-euˬ meh.

¹⁰Myawˬ gahˬ tiˬ jeˬ-iˬ maˬ jaˆ-eu yaw shaˬ zaˬ tiˬ paˆ na deuˬ-ahˇ, Yuˇdaˆ miˇ kʼahˬ laꞈ kʼoeˇ aˬ yawꞈ bi jawˇ yaꞈ-awˇ, aˬ gaꞈ yaˇ kmˇ hawˇ-eu deh yaˇ biˇ nehˬ yaꞈ-euˬ meh.

¹¹Guiˇ maꞈ dawˬ tawˆ luꞈ kʼoeˇ taˆ uˆ lahˇ-eu Neˬbuˬzaˬlaˬdaˬ-ahˇ sahˬ paˬ Neˬbuˬkaˬneˬzaˬ kʼehˇ-awˇ, heu loꞈ-ehˇ dawˬ biꞈ-euˬ meh.

¹²“Yeˬlaˬmiˇ-ahˇ poˆ mawˇ-iˇ-awˇ, yaw muiˬ paˬ-ehˇ bo saˆ nehˬ-awˇ, aˬ yawꞈ-ahˇ coeˬ leˇ-eu jeˬ maˬ jahˇ nehˬ ni, aˬ yawꞈ kʼaˇ geuꞈ mawꞈ-euˬ jeˬ jahˇ nehˬ-awˬ.”

¹³Kʼoeˇ miˇ neh, Neˬbuˬzaˬlaˬdaˬ-aˬ, yaw huiˬ yaw mahˇ pyeuꞈ-eu Neˬbuˬshaˬzaˬbaˬ, Neˬbaˬgaˬlaˆshaˬleˬzaˬ hawˇ-eu, Baˬbuˇloˬ sahˬ paˬ-euˬ gaˇ mˇ-eu yaw huiˬ yaw mahˇ deuˬ nehˬ-ehˇ, tiˬ kawˆ loꞈ-ehˇ,

¹⁴sahˬ paˬ-euˬ hawˇ nymˇ lahˇ laꞈ kʼoeˇ ngaˬ-ahˇ sheuˬ doˆ laˬ le-euˬ meh. Sahˬ paˬ-euˬ aˬ li Aˬhiˇkamˬ-euˬ aˬ li Geˬdaˬliˇ-ahˇ, ngaˬ-ahˇ bi haw piˇ-awˇ, iˇ kahˇ-ahˇ bi sheuˬ kʼoꞈ keuˆ ha le-euˬ meh. Kʼoeˇ naˇ, miˇ kʼahˬ zaˬ deuˬ nehˬ-ehˇ ngaˇ kʼoeˇ gaˇ jawˇ-euˬ ma.

¹⁵Sahˬ paˬ-euˬ hawˇ nymˇ lahˇ laꞈ kʼoeˇ ngaˬ-ahˇ nyehꞈ lahˇ taˬ ngeh, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ le-euˬ meh.

¹⁶“ ‘Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh’ lehˇ, Suˬdaˬ tsawˇ haˬ Eˇbehˆmeˬlehˆ-ahˇ ehˇ nehˬ-awˬ lehˇ, aˬ yawꞈ ngaˬ-ahˇ ehˇ-eu meh. ‘Ngaˬ neh ehˇ taˬ-euˬ jaˆ-eu loꞈ-ehˇ, meuˬ heu meuˬ kʼoeˇ taˆ luˬ-iˇ seˇ-iˇ-eu jeˬ bi keuˆ le-eu lehˇ gʼeh-eu ma. Baw le za le-eu jeˬ bi keuˆ le-eu lehˇ gʼeh-eu maˬ ngeuˇ. Kʼoeˇ loꞈ-ehˇ bi keuˆ le ngeh, nawˇ kʼoeˇ gaˇ jawˇ-awˇ ya mawˇ tehꞈ-a.

¹⁷Ehˇ kʼawꞈ, Sahˬpaˬ Miˬyehˇ pyeuꞈ-eu ngaˇ nawˬ-ahˇ haw piˇ-awˇ, nawˇ guˆ luꞈ-eu tsawˇ haˬ deuˬ-euˬ laꞈ-ahˇ, nawˬ-ahˇ maˬ bi ahˇ leˇ.

¹⁸Ngaˇ nawˬ-ahˇ yaw muiˬ-ehˇ bo saˆ-awˇ, shiˇ gaˇ maˬ bi keuˆ. Nawˇ ngaˬ-ahˇ gʼoe-euˬ miˇ neh, maˬ ya shiˇ ni dzeuˇ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma’ lehˇ ehˇ nehˬ-awˬ.”