Read Akha Yeˬlaˬmiˇ 40 Bible Online

Yeˬlaˬmiˇ 40 - Akha bible

Yeˬlaˬmiˇ 40

¹Guiˇ maꞈ dawˬ tawˆ luꞈ kʼoeˇ taˆ uˆ lahˇ-eu gʼaˬ pyeuꞈ-eu Neˬbuˬzaˬlaˬdaˬ neh, Laˬmahˇ meuˬ-ahˇ ngaˬ-ahˇ pyehˬ nehˬ laꞈ gʼaˬ ngeh, Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ meh. Baˬbuˇloˬ miˇ kʼahˬ-ahˇ bi nyehꞈ daˆ gʼeh-euˬ Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ-ahˇ jawˇ-eu tsawˇ haˬ kʼoeˇ deuˬ nehˬ-ehˇ tiˬ kawˆ loꞈ-ehˇ, ngaˬ-ahˇ shmˇ caˆ bi daˬ laꞈ-awˇ, kʼoeˇ gaˇ sheuˬ gʼeh nehˬ laꞈ-euˬ meh.

²Guiˇ maꞈ kʼoeˇ taˆ uˆ lahˇ-eu kʼoeˇ gʼaˬ, ngaˬ-ahˇ sheuˬ ceuˆ doˆ-awˇ, heu loꞈ-ehˇ ehˇ nehˬ laꞈ-euˬ meh. “Miˇ kʼahˬ heu kʼahˬ-ahˇ laˆ cawˆ nehˬ ma lehˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ehˇ taˬ-euˬ meh.

³Nymˬ-mˇ poˆ jawˇ, aˬ yawꞈ neh kʼaˇ ehˇ taˬ-euˬ loꞈ-ehˇ aˬ yawꞈ jahˇ gʼaˬ-euˬ meh. Naw maꞈ-euˬ tsawˇ haˬ deuˬ Sahˬpaˬ Miˬyehˇ-ahˇ mˇ lehˬ-awˇ, aˬ yawꞈ-euˬ ehˇ dawˬ maˬ naˇ haˬ-euˬ miˇ neh, kʼoeˇ loꞈ-ehˇ pyeuꞈ laˇ-euˬ meh.

⁴Nawˬ-euˬ laꞈ du-ahˇ paꞈ-euˬ shmˇ caˆ ngaˇ puiˇ-awˇ, nawˬ-ahˇ pyehˬ nehˬ-eu ma. Nawˇ ngaˬ nehˬ-ehˇ Baˬbuˇloˬ miˇ kʼahˬ-ahˇ le mawꞈ naˇ, le nya tehꞈ-a. Nawˬ-ahˇ ngaˇ yaw muiˬ paˬ-ehˇ haw nehˬ ma. Nawˇ maˬ le mawꞈ naˇ kʼawꞈ, tiˬ jeˬ-iˬ maˬ ngeuˇ-aˇ. Miˇ kʼahˬ heu kʼahˬ kʼahˬ lah ni laꞈ kʼoeˇ, nawˇ kʼaˇ iˇ mawꞈ-eu paw iˇ nya tehꞈ-a.”

⁵Ngaˇ dawˬ maˬ tmˇ ni jawˇ ngeh, Neˬbuˬzaˬlaˬdaˬ ngaˬ-ahˇ ehˇ-eu, “Baˬbuˇloˬ sahˬ paˬ neh Yuˇdaˆ meuˬ deuˬ kʼoeˇ taˆ uˆ lahˇ-eu gʼaˬ bi geuꞈ-euˬ sahˬ paˬ-euˬ aˬ li Aˬhiˇkamˬ-euˬ aˬ li Geˬdaˬliˇ jawˇ gaˇ gʼoꞈ leˇ-awˇ, miˇ kʼahˬ zaˬ deuˬ nehˬ-ehˇ tiˬ kawˆ loꞈ-ehˇ jawˇ leˇ-awˬ. Maˬ ngeuˇ naˇ kʼawꞈ, nawˇ kʼaˇ iˇ kʼaˇ laˇ mawꞈ gaˇ iˇ iˇ laˇ laˇ-ehˇ jawˇ nya tehꞈ-a.” Kʼoeˇ naˇ, laꞈ sawˬ hawˇ-eu dzaˬ dzaˬ dawˇ dawˇ ui cuiˆ aˬ yawꞈ ngaˬ-ahˇ biꞈ laꞈ-awˇ, ngaˬ-ahˇ pyehˬ nehˬ laꞈ-euˬ meh.

⁶Miˇzaˬpaˬ meuˬ-ahˇ Geˬdaˬliˇ jawˇ gaˇ ngaˇ gʼoꞈ leˇ-awˇ, miˇ kʼahˬ kʼoeˇ kʼahˬ-ahˇ dzeˇ yaꞈ-euˬ miˇ kʼahˬ zaˬ deuˬ nehˬ-ehˇ jawˇ-euˬ ma.

⁷Yuˇdaˆ tsawˇ haˬ yaw huiˬ yaw mahˇ tiˬ paˆ na deuˬ hawˇ-eu yehˇ tiˬ paˆ na deuˬ, Baˬbuˇloˬ guiˇ maꞈ-ahˇ yahˇ pawˇ-awˇ jawˇ-euˬ meh. Baˬbuˇloˬ sahˬ paˬ neh Geˬdaˬliˇ-ahˇ Yuˇdaˆ miˇ kʼahˬ-ahˇ bi haw piˇ-awˇ, Baˬbuˇloˬ miˇ kʼahˬ -ahˇ maˬ nyehꞈ gʼeh ni bi jawˇ yaꞈ-euˬ shaˬ dui zahˬ dui dui-eu tsawˇ haˬ deuˬ kʼoeˇ taˆ uˆ lahˇ-eu gʼaˬ bi geuꞈ yaꞈ-euˬ gaˇ kawˆ, aˬ yawꞈ maꞈ ya gaˬ-euˬ meh.

⁸Kʼoeˇ naˇ, Naˬdaˬneˬlaˇ-euˬ aˬ li Iˇshaˬmeˬlaˇ, Kaˬyaˬ-euˬ aˬ li Yoˇhaˬnaˬ, Taˬhuˇmehˇ-euˬ aˬ li Seˬlehˇyaˬ, Neˬtawˇpaˬ meuˬ-ahˇ jawˇ-eu Eˇpoeˬ-euˬ aˬ li deuˬ hawˇ-eu, Mawˇkah meuˬ-ahˇ jawˇ-eu Yeˬzaˬniˆ aˬ ha maꞈ-aˬ, aˬ yawꞈ maꞈ-euˬ tsawˇ haˬ deuˬ sheuˬ-awˇ, Miˇzaˬpaˬ meuˬ-ahˇ Geˬdaˬliˇ jawˇ gaˇ le-euˬ meh.

⁹Aˬ yawꞈ maꞈ-ahˇ Geˬdaˬliˇ heu loꞈ-ehˇ ehˇ nehˬ-euˬ meh. “Naw maꞈ Baˬbuˇloˬ tsawˇ haˬ deuˬ-ahˇ guˆ-awˇ aˬ yawꞈ maꞈ jawˇ paw cehˆ uˇ leˇ-eu maˬ loˬ-a. Miˇ kʼahˬ heu kʼahˬ laꞈ kʼoeˇ jawˇ-awˇ, Baˬbuˇloˬ sahˬ paˬ-euˬ gaˇ mˇ-awˬ. Naw maꞈ yaw muiˬ-ehˇ ya dehꞈ ya jawˇ tehꞈ-a.

¹⁰Ngaˬ-euˬ gʼawˇ mawˇ heu gaˇ Miˇzaˬpaˬ meuˬ-ahˇ jawˇ-awˇ, Baˬbuˇloˬ tsawˇ haˬ deuˬ oe ngeh, naw maꞈ-euˬ dah zaˇ ngaˇ ngehˬ dah tmˇ dah ma. Aˬ gaꞈ dzaˇ uiˇ maˬ ehˇ, aˇ siˬ aˇ lu deuˬ maˬ ehˇ, saˬ loˬ tsiˇ maˬ ehˇ, naw maꞈ poˆ uiˬ-awˇ, jeˬ hmˬ-eu laꞈ kʼoeˇ, naw maꞈ uˆ lahˇ luꞈ-eu pu deuˬ laꞈ kʼoeˇ jawˇ nya tehꞈ-a.”

¹¹Aˇ yamˬ kʼoeˇ yamˬ laꞈ kʼoeˇ Baˬbuˇloˬ sahˬ paˬ neh Iˇsaˬleˬlaˆ tsawˇ haˬ tiˬ paˆ na deuˬ-ahˇ Yuˇdaˆ miˇ kʼahˬ laꞈ kʼoeˇ jawˇ daˆ leꞈ-eu aˬ kawˬ-aˬ biꞈ-awˇ, Geˬdaˬliˇ-ahˇ aˬ yawꞈ maꞈ kʼoeˇ taˆ bi uˆ lahˇ-euˬ gaˇ kawˆ, Mawˇbaˆ miˇ kʼahˬ, Aˬmoˬ miˇ kʼahˬ hawˇ-eu Eˬdoˬ miˇ kʼahˬ laꞈ kʼoeˇ jawˇ-eu Iˇsaˬleˬlaˆ tsawˇ haˬ dawˬ tawˆ luꞈ ya gaˬ-euˬ meh.

¹²Kʼoeˇ miˇ neh, aˬ yawꞈ maꞈ jawˇ byaˆ taˬ-euˬ miˇ kʼahˬ kʼoeˇ deuˬ-ahˇ neh gʼoꞈ doˆ laˇ-awˇ, Yuˇdaˆ miˇ kʼahˬ-ahˇ gʼoꞈ leˇ-euˬ meh. Miˇzaˬpaˬ meuˬ-ahˇ Geˬdaˬliˇ jawˇ gaˇ aˬ yawꞈ maꞈ gʼoꞈ laˇ-awˇ, aˬ gaꞈ dzaˇ uiˇ hawˇ-eu aˇ siˬ aˇ lu gʼawˬ mya ni mˇ za-euˬ meh.

¹³Kʼoeˇ naˇ, Yoˇhaˬnaˬ hawˇ-eu, Baˬbuˇloˬ sahˬ paˬ-euˬ laˬ oꞈ maˬ awꞈ ni jawˇ luꞈ-eu yehˇ deuˬ kʼoeˇ taˆ aˬ yuiꞈ geuꞈ-eu deuˬ, Miˇzaˬpaˬ meuˬ-ahˇ Geˬdaˬliˇ jawˇ gaˇ laˇ-awˇ,

¹⁴“Aˬmoˬ sahˬ paˬ Baˬliˆ neh Iˇshaˬmeˬlaˇ-ahˇ pyehˬ gʼeh laꞈ-awˇ, nawˬ-ahˇ bi sehꞈ laˇ-euˬ, nawˇ maˬ siˬ te loˇ” lehˇ ehˇ nehˬ-euˬ meh.

¹⁵Ehˇ kʼawꞈ, Geˬdaˬliˇ maˬ jah-a. Kʼoeˇ ngeh, Yoˇhaˬnaˬ neh aˬ yawꞈ-ahˇ heu loꞈ-ehˇ ciˬ cuˇ ni ehˇ nehˬ-euˬ meh. “Ngaˬ-ahˇ Iˇshaˬmeˬlaˇ-ahˇ bi sehꞈ-iˇ laꞈ-awˬ. Aˬ cawˬ tiˬ gʼaˬ-iˬ maˬ bi siˬ ni ngaˇ jahˇ ma. Aˬ jeˬ miˇ neh nawˬ-ahˇ aˬ yawꞈ neh bi sehꞈ nmˇ. Nawˬ-ahˇ bi sehꞈ shaw naˇ, nawˬ nehˬ-ehˇ jawˇ-eu Yuˇdaˆ tsawˇ haˬ dawˬ tawˆ luꞈ cehˆ byaˆ jiˇ-awˇ, Yuˇdaˆ miˇ kʼahˬ laꞈ kʼoeˇ kʼaˇ dzeˇ luꞈ-eu tsawˇ haˬ dawˬ tawˆ luꞈ kʼoeˇ taˆ, shaˬ zahˬ guˆ gaˆ keuˆ le tehꞈ-a.”

¹⁶Ehˇ kʼawꞈ, Geˬdaˬliˇ ehˇ-eu, “Toˆ-ehˇ taˬ jahˇ. Iˇshaˬmeˬlaˇ gaˇ kawˆ nawˇ ehˇ -eu teu maˬ tsaˬ-a.”