Read Akha Yeˬlaˬmiˇ 41 Bible Online

Yeˬlaˬmiˇ 41 - Akha bible

Yeˬlaˬmiˇ 41

¹Kʼoeˇ ngeh kʼoꞈ ba la shiꞈ siˬ tiˬ siˬ-ahˇ, Eˇliˇshaˬmaˇ-euˬ aˬ li Neˬdaˬniˇ-euˬ aˬ li, sahˬ paˬ-euˬ aˇ jeuˬ aˇ ca pyeuꞈ-awˇ sahˬ paˬ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu Iˇshaˬmeˬlaˇ-aˬ, tsawˇ haˬ tseˇ gʼaˬ sheuˬ-awˇ, Miˇzaˬpaˬ meuˬ-ahˇ Geˬdaˬliˇ jawˇ gaˇ le-euˬ meh. Aˬ yawꞈ maꞈ tiˬ kawˆ loꞈ-ehˇ dzaˬ taꞈ dawˇ taꞈ luꞈ ngeh,

²Iˇshaˬmeˬlaˇ hawˇ-eu aˬ yawꞈ-euˬ tsawˇ haˬ kʼoeˇ tseˇ gʼaˬ mi cehˇ gʼawˇ doˆ-awˇ, Geˬdaˬliˇ-ahˇ sehꞈ-euˬ meh.

³Geˬdaˬliˇ nehˬ-ehˇ Miˇzaˬpaˬ meuˬ-ahˇ kʼaˇ jawˇ-eu Iˇsaˬleˬlaˆ tsawˇ haˬ deuˬ hawˇ-eu, kʼoeˇ gaˇ kʼaˇ jawˇ zaˬ-eu Baˬbuˇloˬ yehˇ deuˬ-ahˇ kʼawꞈ, Iˇshaˬmeˬlaˇ neh sehꞈ-euˬ meh.

⁴Yawˬ nah yawˬ, Geˬdaˬliˇ bi sehꞈ-euˬ gaˇ kawˆ tsawˇ haˬ tiˬ gʼaˬ-iˬ maˬ siˬ nya dah mi naˆ-ehˇ,

⁵Sheˬkmˬ meuˬ, Shiˇloˬ meuˬ hawˇ-eu, Saˬmaˬliˆ meuˬ-ahˇ neh tsawˇ haˬ yehꞈ tseˇ gʼaˬ oe-euˬ meh. Aˬ yawꞈ maꞈ mehˬ mahˬ jehˆ dzeh-awˇ, mehˬ tsoeˬ cehˬ pyaˬ-awˇ, gʼawˇ mawˇ-ahˇ kahˬ naˇ taˬ-euˬ meh. Uˬ duˬ tahˬ nymˇ nymˇ ma laꞈ kʼoeˇ lawˇ-eu gʼaˇ duˬ, dzaˬ la gʼo cehˇ lawˇ-eu jeˬ hawˇ-eu yaw saw jeˬ aˬ yawꞈ maꞈ yuˇ leꞈ-euˬ meh.

⁶Kʼoeˇ ngeh Miˇzaˬpaˬ meuˬ-ahˇ neh Iˇshaˬmeˬlaˇ doˆ le-awˇ, ngoeˇ ngoeˇ-ehˇ aˬ yawꞈ maꞈ-ahˇ tahˬ puˬ le-awˇ, “Geˬdaˬliˇ-ahˇ tiˬ poˆ haw laˇ sheˇ” lehˇ ehˇ nehˬ-eu meh.

⁷Aˬ yawꞈ maꞈ meuˬ laꞈ kʼoeˇ uˇ laˇ-euˬ nehˬ-ehˇ, Iˇshaˬmeˬlaˇ hawˇ-eu aˬ yawꞈ-euˬ tsawˇ haˬ deuˬ neh aˬ yawꞈ maꞈ-ahˇ sehꞈ-awˇ, lah duˬ-ahˇ biˬ ahˇ-euˬ meh.

⁸Ehˇ kʼawꞈ, tsawˇ haˬ kʼoeˇ deuˬ laꞈ kʼoeˇ tseˇ gʼaˬ-aˬ, “Nga maꞈ-ahˇ taˬ sehꞈ nehˬ laꞈ. Nga maꞈ cehˇ, lawˬ loeˇ, saˬ loˬ tsiˇ, hawˇ-eu byaˬ byaˬ uiˇ deuˬ deh yaˇ-ahˇ laˆ zaꞈ taˬ-awˇ jaˆ ma” lehˇ ehˇ-eu miˇ neh, maˬ sehꞈ ni byehˇ nehˬ-euˬ meh.

⁹Iˇshaˬmeˬlaˇ neh sehꞈ-euˬ tsawˇ haˬ kʼoeˇ deuˬ biˬ ahˇ-euˬ lah duˬ kʼoeˇ duˬ-aˬ, sahˬ paˬ Aˬsaˬ-ahˇ Iˇsaˬleˬlaˆ sahˬ paˬ Bawˬshaˬ guiˇ deuˆ le ngeh, Aˬsaˬ neh duˬ-euˬ lah duˬ duˬ ma tiˬ duˬ pyeuꞈ-eu meh. Iˇshaˬmeˬlaˇ neh lah duˬ kʼoeˇ duˬ-ahˇ tsawˇ haˬ baꞈ byah-euˬ meh.

¹⁰Kʼoeˇ naˇ, sahˬ paˬ zaˬ miˬ deuˬ hawˇ-eu, Baˬbuˇloˬ guiˇ maꞈ deuˬ kʼoeˇ taˆ uˆ lahˇ-eu Neˬbuˬzaˬlaˬdaˬ neh Geˬdaˬliˇ uˆ lahˇ-eu uˬ moˆ Miˇzaˬpaˬ meuˬ-ahˇ kʼaˇ bi jawˇ yaꞈ-euˬ tsawˇ haˬ dawˬ tawˆ luꞈ-ahˇ aˬ yawꞈ nyehꞈ jiˇ-euˬ meh. Aˬ yawꞈ maꞈ-ahˇ Iˇshaˬmeˬlaˇ nyehꞈ-awˇ, Aˬmoˬ miˇ kʼahˬ paw doˆ-iˇ-eu meh.

¹¹Iˇshaˬmeˬlaˇ neh yaw doeˇ jahˇ-euˬ gaˇ kawˆ kʼoeˇ, Yoˇhaˬnaˬ hawˇ-eu aˬ yawꞈ nehˬ-ehˇ kʼaˇ jawˇ-eu yehˇ deuˬ kʼoeˇ taˆ aˬ yuiꞈ geuꞈ-eu deuˬ dawˬ tawˆ luꞈ ya gaˬ-euˬ meh.

¹²Kʼoeˇ miˇ neh, aˬ yawꞈ maꞈ tsawˇ haˬ sheuˬ-awˇ, aˬ yawꞈ-euˬ mehˬ nah teh-iˇ-awˇ, Giˇbyoˬ meuˬ-ahˇ jaˆ-eu lah duˬ duˬ ma dawˬ peh aˬ yawꞈ-ahˇ deuˆ gʼaˬ-euˬ meh.

¹³Yoˇhaˬnaˬ hawˇ-eu aˬ yawꞈ-euˬ yehˇ deuˬ kʼoeˇ taˆ aˬ yuiꞈ geuꞈ-eu deuˬ-ahˇ, Iˇshaˬmeˬlaˇ neh bi nyehꞈ gʼeh-euˬ tsawˇ haˬ kʼoeˇ deuˬ ya mawˇ ngeh, laˬ kʼaˬ cehˇ dui dui-eu meh.

¹⁴Kʼoeˇ miˇ neh, Miˇzaˬpaˬ meuˬ-ahˇ neh Iˇshaˬmeˬlaˇ neh bi nyehꞈ gʼeh-euˬ tsawˇ haˬ kʼoeˇ deuˬ dawˬ tawˆ luꞈ, naˇ kʼah ciˬ pyawˇ-awˇ, Yoˇhaˬnaˬ jawˇ gaˇ cehˆ gʼoꞈ gʼeh-euˬ meh.

¹⁵Ehˇ kʼawꞈ, Iˇshaˬmeˬlaˇ hawˇ-eu aˬ yawꞈ-euˬ tsawˇ haˬ yehꞈ gʼaˬ-aˬ, Yoˇhaˬnaˬ-euˬ laꞈ-ahˇ neh cehˆ dzeuˇ-awˇ, Aˬmoˬ miˇ kʼahˬ paw cehˆ-euˬ meh.

¹⁶Kʼoeˇ naˇ, Geˬdaˬliˇ-ahˇ sehꞈ gʼaˬ miˇ tsa Miˇzaˬpaˬ meuˬ-ahˇ Iˇshaˬmeˬlaˇ neh kʼaˇ nyehꞈ gʼeh-euˬ tsawˇ haˬ deuˬ pyeuꞈ-eu, yehˇ deuˬ, zaˬ miˬ zaˬ deuˬ, zaˬ yaw nyiˇ deuˬ hawˇ-eu saˇ naˇ gaˇ mˇ-eu tsawˇ haˬ deuˬ-ahˇ, Yoˇhaˬnaˬ hawˇ-eu aˬ yawꞈ-euˬ guiˇ maꞈ haw piˇ-euˬ meh.

¹⁷Kʼoeˇ naˇ, Iˇjiˇtuˆ miˇ kʼahˬ paw iˇ-eu gʼaˇ duˬ, Behˬlehˬhehˬ meuˬ dawˬ peh jaˆ-eu Ciˇmaˬhaˬ meuˬ-ahˇ aˬ yawꞈ maꞈ jawˇ naˬ-euˬ meh.

¹⁸Aˬ jeˬ miˇ neh ehˇ naˇ, Baˬbuˇloˬ sahˬ paˬ neh miˇ kʼahˬ kʼoeˇ kʼahˬ-ahˇ bi uˆ lahˇ yaꞈ-euˬ gʼaˬ pyeuꞈ-eu Geˬdaˬliˇ-ahˇ, Iˇshaˬmeˬlaˇ neh sehꞈ-euˬ miˇ neh, Baˬbuˇloˬ tsawˇ haˬ deuˬ-ahˇ aˬ yawꞈ maꞈ guˆ-eu meh.