Read Akha Yeˬlaˬmiˇ 42 Bible Online

Yeˬlaˬmiˇ 42 - Akha bible

Yeˬlaˬmiˇ 42

¹Kʼoeˇ naˇ, Kaˬyaˬ-euˬ aˬ li Yoˇhaˬnaˬ hawˇ-eu, Hawˇshaˬyaˇ-euˬ aˬ li Aˬzaˬyiˇ aˬ nyaꞈ ahˇ leˇ-ehˇ, guiˇ maꞈ kʼoeˇ taˆ uˆ lahˇ-eu aˬ yuiꞈ deuˬ dawˬ tawˆ luꞈ hawˇ-eu, miˇ kʼahˬ zaˬ huiˬ zaˬ nyiˇ zaˬ dawˬ tawˆ luꞈ,

²ngaˇ jawˇ gaˇ oe-awˇ heu loꞈ-ehˇ ehˇ le-euˬ meh. “Nga maꞈ nawˬ-ahˇ shaˇ-eu loꞈ-ehˇ jahˇ nehˬ laꞈ-awˬ. Nga maꞈ gʼaˇ duˬ nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ-awˬ. Buˬ-iˇ law-iˇ-euˬ tsawˇ haˬ deuˬ pyeuꞈ-eu nga maꞈ dawˬ tawˆ luꞈ gʼaˇ duˬ guiˬ lahˬ shaˇ nehˬ laꞈ-awˬ. Dzeuˇ laˇ ngeh aˬ dui tsawˇ haˬ myaˬ dui dui-euˬ kʼawꞈ, nymˬ-mˇ nawˇ mawˇ luꞈ-eu loꞈ-ehˇ ui cuiˆ dzeˇ-eu tehꞈ meh.

³Nga maꞈ ya mˇ-eu jeˬ hawˇ-eu ya iˇ-eu gaˇ ma mehˬ nehˬ laꞈ-eu gʼaˇ duˬ, Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ-awˬ.”

⁴Ngaˇ heu loꞈ-ehˇ ehˇ kʼoꞈ nehˬ-euˬ ma. “Muiˬ tehꞈ-a. Naw maꞈ ngaˬ-ahˇ shaˇ-eu loꞈ-ehˇ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngaˇ guiˬ lahˬ shaˇ-awˇ, aˬ yawꞈ neh kʼaˇ ehˇ nehˬ laꞈ-euˬ jeˬ, tiˬ jeˬ-iˬ maˬ zaꞈ taˬ ni, naw maꞈ-ahˇ ngaˇ paˇ dzawˇ poˆ nehˬ ma.”

⁵Kʼoeˇ naˇ, aˬ yawꞈ maꞈ ngaˬ-ahˇ heu loꞈ-ehˇ ehˇ-eu meh. “Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh, nga maꞈ gʼaˇ duˬ nawˬ-ahˇ kʼaˇ biꞈ nehˬ-euˬ dawˬ deuˬ-ahˇ nga maꞈ maˬ naˇ haˬ geuꞈ jiˇ naˇ, Sahˬpaˬ Miˬyehˇ dawˇ coe ni saˇ kiˇ pyeuꞈ luꞈ-uˇ.

⁶Muiˬ-eu maˬ ehˇ, doeˇ-eu maˬ ehˇ, nga maꞈ neh nawˬ-ahˇ guiˬ lahˬ shaˇ nehˬ laꞈ lehˇ ehˇ-euˬ gʼaˬ pyeuꞈ-eu, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ -euˬ dawˬ-ahˇ nga maꞈ naˇ haˬ geuꞈ ma. Aˬ yawꞈ-euˬ ehˇ dawˬ-ahˇ naˇ haˬ geuꞈ naˇ, nga maꞈ gʼaˇ duˬ yawˬ jeˬ na luꞈ muiˬ tehꞈ-a.”

⁷Tseˇ nah byah laˇ ngeh, Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ meh.

⁸Kʼoeˇ ngeh, Yoˇhaˬnaˬ hawˇ-eu aˬ yawꞈ nehˬ-ehˇ kʼaˇ jawˇ-eu guiˇ maꞈ-ahˇ uˆ lahˇ-eu aˬ yuiꞈ aˬ tsu dawˬ tawˆ luꞈ-ahˇ maˬ ehˇ, huiˬ zaˬ nyiˇ zaˬ kʼaˇ jawˇ kʼaˇ deuˬ-ahˇ maˬ ehˇ, ngaˇ kuˇ uiˬ-euˬ ma.

⁹Aˬ yawꞈ maꞈ-ahˇ ngaˇ heu loꞈ-ehˇ ehˇ nehˬ-euˬ ma. “Naw maꞈ ngaˬ-ahˇ kʼehˇ-awˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ gaˇ guiˬ lahˬ bi shaˇ leˇ laꞈ-euˬ meh.

¹⁰Sahˬpaˬ Miˬyehˇ heu loꞈ-ehˇ ehˇ-eu meh. ‘Miˇ kʼahˬ heu kʼahˬ laꞈ kʼoeˇ naw maꞈ jawˇ daˆ leꞈ mawꞈ naˇ, naw maꞈ-ahˇ ngaˇ maˬ laˆ pyaˆ ni ciˬ tuˇ nehˬ ma. Naw maꞈ-ahˇ ngaˇ maˬ gʼawˇ lehˆ ni, tsoˆ ziꞈ nehˬ ma. Naw maꞈ-ahˇ ngaˬ neh laˆ luˬ laˆ seˇ nehˬ-euˬ gaˇ ngaˇ nui ma tiˬ pawꞈ-iˬ maˬ saˇ nya.

¹¹Baˬbuˇloˬ sahˬ paˬ-ahˇ guˆ-eu nui ma taˬ paˇ bi ahˇ. Naw maꞈ nehˬ-ehˇ ngaˇ jawˇ-awˇ, aˬ yawꞈ-euˬ aˬ laꞈ laꞈ kʼoeˇ naw maꞈ-ahˇ ngaˇ ka kʼoꞈ nehˬ ma.

¹²Ngaˇ gʼawˬ shaˬ gaˬ nya-eu miˇ neh, aˬ yawꞈ naw maꞈ-ahˇ gʼawˬ shaˬ gaˬ-eu laꞈ kʼoeˇ, naw maꞈ-ahˇ pyehˬ nehˬ-awˇ bi gʼoꞈ le ni ngaˇ jahˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma’ lehˇ ehˇ-eu meh.

¹³“Ehˇ kʼawꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ naw maꞈ maˬ naˇ haˬ ni, ‘Miˇ kʼahˬ heu kʼahˬ laꞈ kʼoeˇ maˬ paˇ jawˇ ma’ lehˇ naw maꞈ ehˇ -awˇ,

¹⁴‘Guiˇ deuˆ gaˇ maˬ ya mawˇ-ehˇ, guiˇ deuˆ ngeh baw-euˬ daˇ heh teˇ saˇ maˬ paˇ ya gaˬ-eu uˬ taꞈ, mehꞈ-eu shuꞈ-eu jeˬ-ahˇ maˬ ya tahˬ puˬ-eu miˇ kʼahˬ pyeuꞈ-eu Iˇjiˇtuˆ miˇ kʼahˬ-ahˇ jawˇ-iˇ ma’ lehˇ naw maꞈ ehˇ mawꞈ te loˇ.

¹⁵Yuˇdaˆ miˇ kʼahˬ laꞈ kʼoeˇ dzeˇ yaꞈ-euˬ tsawˇ haˬ deuˬ-oˇ, toˆ-ehˇ ngeuˇ naˇ, Sahˬpaˬ Miˬyehˇ ehˇ gaˇ naˇ haˬ sheˇ. Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Naw maꞈ Iˇjiˇtuˆ miˇ kʼahˬ paw mehˬ shiˬ ciˬ pyawˇ-awˇ, kʼoeˇ gaˇ jawˇ -iˇ te lehˇ ngeuˇ naˇ,

¹⁶naw maꞈ guˆ luꞈ-eu guiˇ deuˆ-eu jeˬ, Iˇjiˇtuˆ miˇ kʼahˬ laꞈ kʼoeˇ naw maꞈ kʼoeˇ taˆ paˇ keuˆ le-awˇ, kʼoeˇ gaˇ naw maꞈ-ahˇ paˇ deuˆ gʼaˬ tehꞈ-a. Naw maꞈ guˆ luꞈ-eu mehꞈ-eu shuꞈ-eu jeˬ kʼawꞈ, Iˇjiˇtuˆ miˇ kʼahˬ-ahˇ keuˆ ni naw maꞈ-euˬ jeˬ nah caw teh keuˆ le-awˇ, naw maꞈ ya mehꞈ sehꞈ tehꞈ-a.

¹⁷Iˇjiˇtuˆ miˇ kʼahˬ-ahˇ jawˇ-iˇ-eu lehˇ mehˬ shiˬ kʼaˇ ciˬ pyawˇ-eu tsawˇ haˬ yawˬ gʼaˬ na luꞈ, guiˇ deuˆ-eu baˬ da neh maˬ ehˇ, mehꞈ-eu shuꞈ-eu baˬ da neh maˬ ehˇ, naˇ-eu gawˇ-eu baˬ da neh maˬ ehˇ, ya shiˇ jiˇ tehꞈ-a. Ngaˬ neh aˬ yawꞈ maꞈ kʼoeˇ taˆ pyehˬ gʼeh leꞈ-euˬ luˬ-iˇ seˇ-iˇ-eu jeˬ baˬ da neh, aˬ yawꞈ maꞈ tiˬ gʼaˬ-iˬ maˬ dzeuˇ-iˇ nya ni pyeuꞈ laˇ tehꞈ-a’ lehˇ ehˇ-eu meh.

¹⁸“Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Ngaˇ nui ma pehˇ dui dui-eu jeˬ Yeˬluˇsaˬlehˬ meuˬ kʼoeˇ taˆ tahˬ daˆ nehˬ-euˬ loꞈ-ehˇ, naw maꞈ Iˇjiˇtuˆ miˇ kʼahˬ-ahˇ iˇ naˇ, naw maꞈ kʼoeˇ taˆ kʼawꞈ paˇ tahˬ daˆ nehˬ ma. Guˆ dui dui laˇ paˬ-ehˇ gʼeh-eu jeˬ naw maꞈ kʼoeˇ taˆ keuˆ le tehꞈ-a. Aˬ cawˬ naw maꞈ-ahˇ yahˬ caˆ neh juiꞈ-awˇ, naw maꞈ-euˬ tsawˇ myahˇ -ahˇ kuˇ kuˇ-ehˇ yaˬ kʼehˇ yaˬ tehꞈ-a. Jawˇ duˬ heu tsahˇ-ahˇ naw maꞈ maˬ paˇ ya gʼoꞈ mawˇ haw laˇ-aˇ’ lehˇ ehˇ-eu meh.”

¹⁹Kʼoeˇ naˇ, ngaˇ heu loꞈ-ehˇ paˇ ehˇ nehˬ-euˬ ma. “Yuˇdaˆ miˇ kʼahˬ laꞈ kʼoeˇ kʼaˇ dzeˇ yaꞈ-euˬ naw maꞈ deuˬ-ahˇ, Iˇjiˇtuˆ miˇ kʼahˬ-ahˇ taˬ iˇ lehˇ Sahˬpaˬ Miˬyehˇ-ehˇ gaˇ yaw kʼaˆ kʼaˆ-ehˇ shaˇ noeˬ-awˬ lehˇ, naw maꞈ-ahˇ ngaˇ ehˇ-eu ma.

²⁰Naw maꞈ lehˬ dui dui-iˇ-eu jeˬ maˬ mˇ ni yahˇ-awˬ. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ lehˇ, naw maꞈ ngaˬ-ahˇ ehˇ-awˇ, aˬ yawꞈ neh kʼaˇ ehˇ-euˬ jeˬ geuꞈ ma lehˇ naw maꞈ saˇ jaˇ dzaˬ taˬ gʼaˬ-euˬ meh.

²¹Ehˇ kʼawꞈ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ kʼehˇ-awˇ, naw maꞈ-ahˇ bi ehˇ gaˬ le-euˬ yawˬ jeˬ na luꞈ-ahˇ nymˬ-mˇ naw maꞈ maˬ naˇ haˬ geuꞈ-a.

²²Kʼoeˇ miˇ neh, naw maꞈ heu loꞈ-ehˇ siˬ duˬ-awˬ. Naw maꞈ jawˇ-iˇ mawꞈ-eu miˇ kʼahˬ kʼoeˇ kʼahˬ laꞈ kʼoeˇ guiˇ deuˆ-eu baˬ da neh maˬ ehˇ, mehꞈ-eu shuꞈ-eu baˬ da neh maˬ ehˇ, naˇ gawˇ baˬ da neh maˬ ehˇ, naw maꞈ ya shiˇ tehꞈ-a lehˇ siˬ duˬ-awˬ.”