Read Akha Yeˬlaˬmiˇ 43 Bible Online

Yeˬlaˬmiˇ 43 - Akha bible

Yeˬlaˬmiˇ 43

¹Aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh aˬ yawꞈ maꞈ-ahˇ kʼaˇ bi ehˇ nehˬ laꞈ-euˬ jeˬ, tsawˇ haˬ kʼoeˇ deuˬ-ahˇ ngaˇ ehˇ nehˬ-euˬ ma.

²Kʼoeˇ naˇ, Hawˇshaˬyaˇ-euˬ aˬ li Aˬzaˬyiˇ, Kaˬyaˬ-euˬ aˬ li Yoˇhaˬnaˬ aˬ nyaꞈ hawˇ-eu, nui ma kʼaˇ huiˬ-eu tsawˇ haˬ deuˬ ngaˬ-ahˇ heu loꞈ-ehˇ ehˇ laˇ-eu meh. “Nawˇ jaˬ myawꞈ myawꞈ-eu nga. Iˇjiˇtuˆ miˇ kʼahˬ-ahˇ taˬ jawˇ-iˇ lehˇ nga maꞈ-ahˇ bi ehˇ le-eu gʼaˇ duˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ kʼehˇ gʼeh leꞈ-euˬ maˬ ngeuˇ-aˇ.

³Nga maꞈ-ahˇ Baˬbuˇloˬ tsawˇ haˬ deuˬ neh bi sehꞈ-eu gʼaˇ duˬ, maˬ ngeuˇ naˇ, Baˬbuˇloˬ miˇ kʼahˬ-ahˇ bi nyehꞈ daˆ gʼeh-eu gʼaˇ duˬ, Neˬliˇyaˆ-euˬ aˬ li Baˬluˆ neh tsawˇ gahˇ gahˇ-awˇ nawˬ-ahˇ bi oe-euˬ ngaˇ.”

⁴Kʼoeˇ miˇ neh, Yuˇdaˆ miˇ kʼahˬ laꞈ kʼoeˇ jawˇ-eu gʼaˇ duˬ Sahˬpaˬ Miˬyehˇ neh dawˬ biꞈ taˬ-euˬ gaˇ, Yoˇhaˬnaˬ maˬ ehˇ, guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ maˬ ehˇ, huiˬ zaˬ nyiˇ zaˬ dawˬ tawˆ luꞈ, tiˬ gʼaˬ-iˬ maˬ naˇ haˬ geuꞈ-a.

⁵Kʼoeˇ naˇ, Yuˇdaˆ miˇ kʼahˬ laꞈ kʼoeˇ kʼaˇ jawˇ yaꞈ-euˬ tsawˇ haˬ dawˬ tawˆ luꞈ-ahˇ, aˬ cawˬ miˇ kʼahˬ-ahˇ jawˇ byoˆ-awˇ kʼaˇ gʼoꞈ laˇ-euˬ tsawˇ haˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, Yoˇhaˬnaˬ hawˇ-eu guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ deuˬ neh, tiˬ gʼaˬ-iˬ maˬ bi dzeuˇ-iˇ ni Iˇjiˇtuˆ miˇ kʼahˬ-ahˇ sheuˬ ka gʼeh jiˇ-euˬ meh.

⁶Baˬluˆ nga nyaꞈ ahˇ leˇ-ehˇ, kʼaˬ dzeˇ zaˬ hawˇ-eu zaˬ miˬ zaˬ deuˬ maˬ ehˇ, zaˬ yaw nyiˇ deuˬ maˬ ehˇ, sahˬ paˬ zaˬ miˬ deuˬ maˬ ehˇ, Baˬbuˇloˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Neˬbuˬzaˬlaˬdaˬ neh Geˬdaˬliˇ haw-u pyaˆ-eu uˬ moˆ kʼaˇ bi jawˇ yaꞈ-euˬ tsawˇ haˬ dawˬ tawˆ luꞈ-ahˇ, aˬ yawꞈ maꞈ sheuˬ ka gʼeh-euˬ meh.

⁷Sahˬpaˬ Miˬyehˇ neh biꞈ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ ni, Iˇjiˇtuˆ miˇ kʼahˬ laꞈ kʼoeˇ paw, Taˬpaˬneˬ meuˬ-ahˇ keuˆ ni aˬ yawꞈ maꞈ iˇ gʼeh-euˬ meh.

⁸Kʼoeˇ naˇ, Taˬpaˬneˬ meuˬ-ahˇ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ le-euˬ meh.

⁹“Kʼaˬ lo yaw huiˬ heu myaˆ siˬ baꞈ-awˇ, Iˇsaˬleˬlaˆ tsawˇ haˬ tiˬ paˆ na deuˬ mawˇ gaˇ, Taˬpaˬneˬ meuˬ-ahˇ jaˆ-eu Iˇjiˇtuˆ sahˬ paˬ-euˬ nymˇ gʼoˆ kʼehˬ dawˬ peh, tsaˬ byaˆ kʼawˬ taˬ-euˬ uˬ moˆ baꞈ pahˬ-awˬ.

¹⁰Kʼoeˇ naˇ, Iˇsaˬleˬlaˆ-euˬ Miˬyehˇ pyeuꞈ-eu ngaˇ Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ, aˬ yawꞈ maꞈ-ahˇ ehˇ nehˬ-awˬ. Ngaˬ-euˬ zaˬ kʼaˆ Baˬbuˇloˬ sahˬ paˬ Neˬbuˬkaˬneˬzaˬ-ahˇ ngaˇ heu gaˇ sheuˬ leꞈ-awˇ, nawˬ neh baꞈ pahˬ taˬ-euˬ kʼaˬ lo heu deuˬ kʼoeˇ taˆ aˬ yawꞈ-euˬ dzoeˬ dzaˬ nuiˇ mahˬ ka tuˇ-awˇ, aˬ yawꞈ jawˇ-eu dzoeˬ dzaˬ sehˬ gʼawˆ kʼoeˇ tsahˇ nyiˬ paˆ-ehˇ gʼawˆ tehꞈ-a.

¹¹Neˬbuˬkaˬneˬzaˬ oe-awˇ, Iˇjiˇtuˆ miˇ kʼahˬ-ahˇ deuˆ gʼaˬ tehꞈ-a. Naˇ gawˇ gawˇ sehꞈ-eu jeˬ oꞈ-eu tsawˇ haˬ deuˬ-ahˇ naˇ gawˇ bi gawˇ sehꞈ-awˇ, bi paꞈ byoˆ gʼeh-eu jeˬ oꞈ-eu tsawˇ haˬ deuˬ-ahˇ bi paꞈ byoˆ gʼeh-awˇ, guiˇ deuˆ gaˇ bi deuˆ sehꞈ-eu jeˬ oꞈ-eu tsawˇ haˬ deuˬ-ahˇ, guiˇ bi deuˆ sehꞈ tehꞈ-a.

¹²Iˇjiˇtuˆ miˬ yehˇ deuˬ-euˬ uˬ duˬ tahˬ nymˇ deuˬ-ahˇ ngaˇ miˬ dzaˬ dzah puiˆ-awˇ, aˬ yawꞈ maꞈ-euˬ miˬ yehˇ tiˬ paˆ na deuˬ-ahˇ Baˬbuˇloˬ sahˬ paˬ neh bi laˆ cawˆ-awˇ, tiˬ paˆ na deuˬ aˬ yawꞈ neh bi yuˇ geuꞈ gʼeh tehꞈ-a. Yawˇ bo-eu tsawˇ haˬ yawˬ ha-euˬ pehˇ kʼahˬ-ahˇ shehˇ mawˇ tseuˆ shawˇ dzeh-eu loꞈ-ehˇ, Baˬbuˇloˬ sahˬ paˬ Iˇjiˇtuˆ miˇ kʼahˬ-ahˇ tseuˆ shawˇ dzeh-awˇ, nui kʼahˇ shiˇ taˆ ni gʼoꞈ leˇ tehꞈ-a.

¹³Iˇjiˇtuˆ miˇ kʼahˬ Heˬliˬpawˇliˆ meuˬ-ahˇ jaˆ-eu muiˬ-eu shawˇ-eu kʼaˬ lo kʼawˇ zeuˇ deuˬ-ahˇ aˬ yawꞈ laˆ cawˆ-awˇ, Iˇjiˇtuˆ miˬ yehˇ deuˬ-euˬ uˬ duˬ tahˬ nymˇ deuˬ-ahˇ aˬ yawꞈ miˬ dzaˬ keuˬ dzeh tehꞈ-a.”