Read Akha Yeˬlaˬmiˇ 47 Bible Online

Yeˬlaˬmiˇ 47 - Akha bible

Yeˬlaˬmiˇ 47

¹Iˇjiˇtuˆ sahˬ paˬ Gaˬzaˬ meuˬ-ahˇ guiˇ maˬ deuˆ mi naˆ-ehˇ Piˇliˇtiˆ miˇ kʼahˬ-ahˇ taꞈ leˇ-eu Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

²Sahˬpaˬ Miˬyehˇ heu loꞈ-ehˇ ehˇ-eu meh. “Haw yawˬ. Kʼoeˇ taˆ paw iˇ cuꞈ dahˬ goˇ daˆ laˇ-awˇ, iˇ jeuˬ jeuˬ le tehꞈ-a. Miˇ tsaˬ hawˇ-eu kʼaˇ jaˆ-eu jeˬ dawˬ tawˆ kʼoeˇ taˆ, meuˬ deuˬ hawˇ-eu meuˬ-ahˇ jawˇ-eu tsawˇ haˬ kʼoeˇ taˆ, iˇ cuꞈ yoeˇ pymˬ tehꞈ-a. Tsawˇ haˬ zaˬ deuˬ caw ba le-awˬ lehˇ guˇ tehꞈ-a. Miˇ tsaˬ zaˬ dawˬ tawˆ luꞈ guˇ guˇ-ehˇ ngoeˇ tehꞈ-a.

³Mahˬ pyehˬ oe-eu teˇ saˇ maˬ ehˇ, mahˬ laˆ lawˬ oe luꞈ-eu teˇ saˇ maˬ ehˇ, laˆ lawˬ aˇ beuˆ gahˇ-eu teˇ saˇ maˬ ehˇ, teu jeˬ heu jeˬ maˬ siˬ laˇ ni gaˬ le tehꞈ-a. Aˬ da zaˬ-ahˇ ngehˬ maˬ gʼeh nehˬ nya ni, aˬ laꞈ laꞈ shiˇ shiˇ jiˇ tehꞈ-a.

⁴Piˇliˇtiˆ-ahˇ laˆ cawˆ nehˬ-eu aˇ yamˬ keuˆ le-euˬ meh. Duˇlu hawˇ-eu Siˇdoˬ meuˬ-ahˇ ngehˬ gʼeh le-eu gaˇ ma, dawˬ tawˆ luꞈ bi deuˆ tsehˆ tehꞈ-a. Gaˬlaˬdeˬ laˆ shaˆ lawˇ deh paw neh jawˇ le-euˬ, Piˇliˇtiˆ tsawˇ haˬ kʼaˇ jawˇ kʼaˇ deuˬ-ahˇ Sahˬpaˬ Miˬyehˇ pyeuꞈ-eu ngaˇ laˆ cawˆ ma.

⁵Gaˬzaˬ tsawˇ haˬ shaˬ zahˬ naꞈ-awˇ, Aˬshaˇgaˬloˇ tsawˇ haˬ ciˬ cuˇ saˆ ni pyeuꞈ-iˇ tehꞈ-a. Buˬ-iˇ-euˬ Piˇliˇtiˆ tsawˇ haˬ nui deuˬ, aˬ myah tsawˇ ngoeˇ ngoeˇ taˬ nya nmˇ.

⁶‘Sahˬpaˬ Miˬyehˇ-euˬ mi cehˇ-oˇ, aˬ myah gʼaˬ naˬ naˬ-eu gʼeh te. Mi cehˇ tawˆ kʼawˆ laꞈ kʼoeˇ gʼoꞈ uˇ leˇ-awˇ, ciˬ cuˇ ni gʼaˬ naˬ naˬ leˇ nehˬ laꞈ-awˬ’ lehˇ, naw maꞈ ngoeˇ ngoeˇ-ehˇ shaˇ tehꞈ-a.

⁷Aˬshaˇgaˬloˇ meuˬ-ahˇ hawˇ-eu, laˆ shaˆ lawˇ deh doe ni jawˇ-eu deuˬ-ahˇ, bi kʼehˬ-eu lehˇ Sahˬpaˬ Miˬyehˇ neh kʼehˇ leꞈ-euˬ, mi cehˇ kʼoeˇ aˬ joˆ-ehˇ naˬ leˇ nya nmˇ.”