Read Akha Yeˬlaˬmiˇ 48 Bible Online

Yeˬlaˬmiˇ 48 - Akha bible

Yeˬlaˬmiˇ 48

¹Mawˇbaˆ miˇ kʼahˬ gaˇ kawˆ, Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Neˬboˬ meuˬ-ahˇ jawˇ-eu deuˬ-ahˇ gʼawˬ shaˬ gaˬ-awˬ. Aˬ yawꞈ maꞈ-euˬ meuˬ bi laˆ cawˆ-euˬ meh. Kiˇlaˬdeˬ meuˬ-ahˇ aˬ cawˬ deuˆ gʼaˬ-awˇ, ziꞈ dui dui-eu taˆ deuˬ bi deuˆ byaˆ-awˇ, meuˬ-ahˇ jawˇ-eu deuˬ daˬ ga dui dui-awˇ,

²Mawˇbaˆ miˇ kʼahˬ kʼahˬ sehˇ maˬ paˇ jaˆ meh. Muiˇ-eu deuˬ Heˬshaˬboˬ meuˬ-ahˇ deuˆ za-awˇ, Mawˇbaˆ miˇ kʼahˬ laˆ cawˆ-eu lehˇ lehˬ hmˬ luꞈ meh. Maˬdaˬmehˇ meuˬ ciˬ cuˇ ni bi laˆ pyeuꞈ tehꞈ-a. Guiˇ maꞈ deuˬ kʼoeˇ paw le luꞈ meh.

³Hawˇloˬneˬ meuˬ-ahˇ jawˇ-eu tsawˇ haˬ deuˬ, ‘Shiˇ jiˇ miˇ-a. Cawˆ jiˇ miˇ-a’ lehˇ guˇ tehꞈ-a.

⁴“Mawˇbaˆ miˇ kʼahˬ bi laˆ cawˆ gʼaˬ-euˬ meh. Zaˬ deuˬ ngoeˇ luꞈ gaˇ naˇ haˬ sheˇ.

⁵Luˇhiˆ meuˬ-ahˇ le-eu gaˇ ma kahˇ li, aˬ yawꞈ maꞈ ngoeˇ gaˇ naˇ haˬ sheˇ. Hawˇloˬneˬ gaˇ ma law caw, shaˬ zahˬ maˬ mˇ coeˇ-ehˇ guˇ luꞈ gaˇ naˇ haˬ sheˇ.

⁶Uˬ kʼawˇ kʼaˇ buˬ maˬ buˬ cehˆ-awˬ. Bawˇ tsahˬ mahˬ tahˬ laˆ deuˬ loꞈ-ehˇ cehˆ-awˬ.

⁷“Mawˇbaˆ nawˇ-aˬ, yawˬ ha-euˬ gʼaˬ hawˇ-eu, yawˬ ha pyuˇ shuiˇ-ahˇ nui kʼaˬ tsmˬ-euˬ meh. Ehˇ kʼawꞈ, nymˬ-mˇ aˬ cawˬ neh guiˇ bi deuˆ gʼaˬ-awˇ, naw maꞈ-euˬ Sheˬmoˇshaˆ miˬ yehˇ kʼoeˇ yehˇ, sahˬ paˬ zaˬ yo deuˬ hawˇ-eu piˇ ma deuˬ nehˬ-ehˇ, aˬ cawˬ miˇ kʼahˬ-ahˇ bi nyehꞈ gʼeh tehꞈ-a.

⁸Meuˬ tiˬ meuˬ-iˬ maˬ dzeuˇ-iˇ ni cawˆ-iˇ jiˇ-awˇ, deh kʼahˬ deh ga maˬ dzeˇ ni cawˆ-iˇ jiˇ meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

⁹Mawˇbaˆ gʼaˇ duˬ mawˇ dmˬ lehˬ hmˬ taˬ-awˬ. Gʼawˬ myahˇ maˬ gʼeh-ehˇ shiˇ cawˆ-eu yaw duˬ baw meh. Mawˇbaˆ meuˬ deuˬ cawˆ-iˇ jiˇ-awˇ, tsawˇ haˬ maˬ jawˇ ni pyeuꞈ-iˇ jiˇ tehꞈ-a.”

¹⁰Sahˬpaˬ Miˬyehˇ neh bi mˇ-euˬ jeˬ-ahˇ nui ma pi-awˇ maˬ mˇ-eu tsawˇ haˬ, yaˬ kʼehˇ yaˬ gaˇ ya daˬ tehꞈ-a. Mi cehˇ tuˆ tehˬ-awˇ tsawˇ haˬ-ahˇ maˬ sehꞈ peuˬ-eu tsawˇ haˬ-aˬ, yaˬ kʼehˇ yaˬ gaˇ ya daˬ tehꞈ-a.

¹¹Sahˬpaˬ Miˬyehˇ heu loꞈ-ehˇ ehˇ-eu meh. “Mawˇbaˆ miˇ kʼahˬ-aˬ, dzeuˇ laˇ ngeh tiˬ gaˇ-iˬ guˆ kʼaˇ maˬ za ni dehꞈ-awˇ, aˬ cawˬ miˇ kʼahˬ-ahˇ maˬ bi nyehꞈ gʼeh haw-aˬ siˬ. Mawˇbaˆ miˇ kʼahˬ-aˬ, ciˬ cuˇ yawˬ siˬ yawˬ-ahˇ maˬ kʼaˇ paˇ ahˇ haw-euˬ aˬ gaꞈ dzaˇ uiˇ-ahˇ duˇ-eu meh. Aˬ yawꞈ-euˬ yaw kuiˇ kui-eu jeˬ maˬ byoˆ-iˇ ni jaˆ luꞈ gaˇ duˇ-eu meh.

¹²Nymˬ-mˇ poˆ jawˇ-aˬ, ngaˇ tsawˇ haˬ kʼehˇ gʼeh-awˇ, aˬ gaꞈ dzaˇ uiˇ kʼaˇ doˆ-eu loꞈ-ehˇ, Mawˇbaˆ miˇ kʼahˬ-ahˇ ya kʼaˇ doˆ-eu aˇ yamˬ tsaˬ laˇ-euˬ meh. Aˬ yawꞈ-euˬ ciˬ cuˇ deuˬ aˬ yawꞈ maꞈ kʼaˇ ngehꞈ-awˇ, kʼoˆ paˆ dzeh tehꞈ-a.

¹³Kʼoeˇ ngeh jawˇ, Beˬdeˬlaˇ miˬ yehˇ-ahˇ gʼoe-euˬ baˬ da neh, Iˇsaˬleˬlaˆ tsawˇ haˬ deuˬ kʼoeˇ taˆ shaꞈ dawˇ-eu jeˬ keuˆ le-euˬ loꞈ-ehˇ, Sheˬmoˇshaˆ miˬ yehˇ-ahˇ gʼoe-euˬ baˬ da neh, Mawˇbaˆ tsawˇ haˬ deuˬ kʼoeˇ taˆ shaꞈ dawˇ-eu jeˬ keuˆ le tehꞈ-a.

¹⁴“Mawˇbaˆ tsawˇ haˬ deuˬ-oˇ, naw maꞈ guiˇ deuˆ-eu kʼaˬ dui kʼaˆ dui dui ma lehˇ, aˬ jeˬ miˇ neh ehˇ te.

¹⁵Mawˇbaˆ miˇ kʼahˬ hawˇ-eu kʼoeˇ gaˇ jaˆ-euˬ meuˬ deuˬ, dawˬ tawˆ luꞈ bi laˆ cawˆ jiˇ-awˇ loˆ dui dui-eu zaˬ guˬ deuˬ bi sehꞈ-euˬ meh lehˇ, ngaˇ Baoˬ huiˬ-eu Sahˬpaˬ Miˬyehˇ, miˇ kʼahˬ sahˬ paˬ pyeuꞈ-eu gʼaˬ ehˇ-eu ma.

¹⁶Mawˇbaˆ kʼoeˇ taˆ shaˬ zahˬ keuˆ le luꞈ-awˇ, ya luˬ ya seˇ-iˇ-eu yaw duˬ baw meh.

¹⁷“Miˇ kʼahˬ tsawˇ myahˇ doˆ-euˬ kʼaˇ siˬ nya-eu, dawˬ peh jawˇ-eu tsawˇ jeuˬ dawˬ tawˆ, miˇ kʼahˬ kʼoeˇ kʼahˬ gʼaˇ duˬ tsawˇ ngoeˇ ngoeˇ-awˬ. Aˬ yawꞈ dzoeˬ dzaˬ kʼehꞈ-iˇ kʼoeˆ-iˇ jiˇ-awˇ, baoˬ hawˇ-eu kʼahˬ sehˇ maˬ paˇ jaˆ meh lehˇ ehˇ-awˬ.

¹⁸Diˇboˬ meuˬ-ahˇ jawˇ-eu tsawˇ haˬ deuˬ-oˇ, kʼahˬ sehˇ jaˆ-eu jawˇ duˬ-ahˇ neh zaꞈ ka le-awˇ, miˇ tsaˬ kʼaˬ lehˇ tsahˬ-ahˇ nuiˇ pahˬ le-awˬ. Mawˇbaˆ miˇ kʼahˬ laˆ cawˆ le-eu deuˬ laˇ keuˆ-awˇ, naw maꞈ-euˬ taˆ laˆ cawˆ-euˬ meh.

¹⁹Aˬyawˬ meuˬ-ahˇ jawˇ-eu tsawˇ haˬ deuˬ-oˇ, gaˇ ma gaˇ dzeˇ loꞈ-awˇ, cehˆ byoˆ luꞈ-eu tsawˇ haˬ deuˬ-ahˇ, gaˇ kawˆ naˇ haˬ duˬ-awˬ.

²⁰‘Mawˇbaˆ miˇ kʼahˬ bi deuˆ gʼaˬ-awˇ, shaꞈ dawˇ dui dui paˬ-ehˇ gʼeh-eu miˇ neh, tsawˇ ngoeˇ ngoeˇ-awˬ’ lehˇ ehˇ tehꞈ-a. ‘Mawˇbaˆ miˇ kʼahˬ cawˆ-iˇ gʼaˬ-euˬ gaˇ kawˆ, Aˬnoˬ lawˇ gawˆ gawˆ cawˬ tsaꞈ gaˬ-iˇ-awˬ’ lehˇ ehˇ tehꞈ-a.

²¹Yaw goˇ-ahˇ jaˆ-eu meuˬ deuˬ kʼoeˇ taˆ yaˇ kʼaˬ daˇ-eu jeˬ keuˆ le-euˬ meh. Meuˬ kʼoeˇ deuˬ-aˬ, Hawˇloˬ meuˬ, Yaˬzah meuˬ, Meˬpaˇ meuˬ,

²²Diˇboˬ meuˬ, Neˬboˬ meuˬ, Behˬdiˇbaˬlaˬdeˬ meuˬ,

²³Kiˇlaˬdeˬ meuˬ, Behˬgaˬbuˇlaˆ meuˬ, Behˬmyoˬ meuˬ,

²⁴Kiˇliˇyoˆ meuˬ, Bawˇzaˬlahˬ meuˬ, heu deuˬ meh. Mawˇbaˆ miˇ kʼahˬ laꞈ kʼoeˇ, dawˬ peh gaˇ mahˇ kʼaˇ jaˆ-eu meuˬ deuˬ kʼoeˇ taˆ yaˬ kʼehˇ yaˬ-eu jeˬ keuˆ le-euˬ meh.

²⁵Mawˇbaˆ-euˬ gʼaˬ gʼaˬ siˬ bi nyehꞈ paˆ-awˇ, baoˬ bi laˆ cawˆ-euˬ mehˬ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

²⁶Sahˬpaˬ Miˬyehˇ heu loꞈ-ehˇ ehˇ-eu meh. “Mawˇbaˆ miˇ kʼahˬ ngaˬ-ahˇ puiˬ-euˬ miˇ neh, aˬ gaꞈ dzaˇ uiˇ bi dawˇ yehꞈ-awˬ. Mawˇbaˆ-aˬ, yawˬ ha uˬ pehꞈ pehꞈ taˬ-euˬ gaˇ yawˬ ha mahˬ poˆ poˆ lehꞈ-awˇ, aˬ cawˬ bi uiˇ tehꞈ-a.

²⁷Mawˇbaˆ-oˇ, Iˇsaˬleˬlaˆ tsawˇ haˬ deuˬ-ahˇ nawˬ neh aˬ jaꞈ jaꞈ niˇ gʼa-euˬ ngehˇ-euˬ te loˇ. Tahˇ joe aˇ muˇ nehˬ-ehˇ tiˬ kawˆ loꞈ-ehˇ bi nyehꞈ mi-euˬ tsawˇ haˬ loꞈ-ehˇ, aˬ yawꞈ maꞈ-ahˇ nawˇ noeˬ doeˇ dui dui-euˬ meh.

²⁸“Mawˇbaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-oˇ, yawˬ ha jawˇ-eu meuˬ-ahˇ byehˇ dzeh-awˇ, lo guˇ-ahˇ cehˆ jawˇ leˇ-awˬ. Lo kʼahˬ mehˬ kʼehˬ-ahˇ bahˬ bahˬ-eu kʼaˬ kʼoeˬ loꞈ-ehˇ noeˬ gahˇ-awˬ.

²⁹Mawˇbaˆ-aˬ, nui ma huiˬ dui mahˇ dui dui meh. Aˬ yawꞈ maꞈ nui ma aˇ naˆ ni huiˬ-eu gʼahˇ-eu gaˇ kawˆ, aˇ naˆ ni kʼahˬ sehˇ jehˆ-eu gaˇ kawˆ, aˇ naˆ ni jahˇ gʼeh-eu gaˇ kawˆ, ngaˇ ya gaˬ gʼaˬ-euˬ ma. Yawˬ haˇ yawˬ ha maˬ gaˇ dui dui ma lehˇ noeˬ luꞈ meh.

³⁰Aˬ yawꞈ maꞈ jahˇ gʼeh dui dui luꞈ-eu gaˇ kawˆ, Sahˬpaˬ Miˬyehˇ pyeuꞈ-eu ngaˇ siˬ nya ma. Aˬ yawꞈ maꞈ kʼahˬ sehˇ jehˆ-eu tiˬ jeˬ-iˬ gaˇ dahˇ maˬ tsoeˬ-a. Aˬ yawꞈ maꞈ-euˬ bawˬ toˆ gʼawˬ myahˇ ni maˬ ziꞈ-a.

³¹Kʼoeˇ miˇ neh, Mawˇbaˆ miˇ kʼahˬ laꞈ kʼoeˇ jawˇ-eu tsawˇ haˬ yawˬ gʼaˬ na luꞈ gʼaˇ duˬ hawˇ-eu, Kiˇlaˆheˬyehˆ meuˬ-ahˇ jawˇ-eu tsawˇ haˬ deuˬ gʼaˇ duˬ, ngaˇ tsawˇ ngoeˇ ngoeˇ ma.

³²Yaˬzeuˬ meuˬ-ahˇ jawˇ-eu deuˬ gʼaˇ duˬ ngoeˇ-eu naˆ maˬ tseˇ, Siˇbaˬmaˬ meuˬ-ahˇ jawˇ-eu deuˬ gʼaˇ duˬ ngaˇ ngoeˇ ma. Siˇbaˬmaˬ meuˬ-oˇ, nawˇ-aˬ, Shiˇ-eu iˬ ma laˆ shaˆ kʼoeˇ taˆ uˬ laꞈ cawˬ tsehˆ gʼeh-awˇ, Yaˬzeuˬ meuˬ-ahˇ cawˬ keuˆ-euˬ aˬ gaꞈ baw duˆ-ahˇ duˇ-eu meh. Ehˇ kʼawꞈ, jawˇ la yamˬ-ahˇ siˬ-eu nawˬ-euˬ aˬ gaꞈ aˇ siˬ deuˬ bi laˆ cawˆ jiˇ-euˬ meh.

³³Miˇ tsaˬ miˇ muiˬ muiˬ-eu Mawˇbaˆ miˇ kʼahˬ laꞈ kʼoeˇ jaˆ-eu laˬ kʼaˬ cehˇ nui saˇ za-eu jeˬ, bi yuˇ byoˆ gʼeh jiˇ-euˬ meh. Aˬ gaꞈ dzaˇ uiˇ nawˬ duˬ-ahˇ aˬ gaꞈ dzaˇ uiˇ maˬ paˇ yoeˇ ni ngaˇ bi naˬ leˇ-euˬ ma. Aˬ gaꞈ dzaˇ uiˇ nawˬ nawˬ-ehˇ laˬ kʼaˬ cehˇ-awˇ guˇ-eu tsawˇ haˬ maˬ paˇ jawˇ meh.

³⁴“Heˬshaˬboˬ meuˬ hawˇ-eu Eˇlaˬleˬ meuˬ-ahˇ jawˇ-eu tsawˇ haˬ deuˬ guˇ guˇ-ehˇ ngoeˇ-awˇ, aˬ yawꞈ maꞈ ngoeˇ-eu teˇ saˇ Yaˬhaˇ meuˬ-ahˇ keuˆ ni gaˬ keuˆ laˇ-eu meh. Zoˇlaˆ meuˬ-ahˇ jawˇ-eu tsawˇ haˬ deuˬ kʼawꞈ, aˬ yawꞈ maꞈ ngoeˇ-eu teˇ saˇ ya gaˬ-awˇ, Hawˇloˬneˬ meuˬ hawˇ-eu Eˇgaˬlaˆsheˬliˇshahˬ meuˬ-ahˇ keuˆ ni gaˬ keuˆ leˇ-euˬ meh. Nymˇlmˬ lah-ahˇ keuˆ ni, gui coˇ ni gui-iˇ-euˬ meh.

³⁵Mawˇbaˆ tsawˇ haˬ deuˬ, aˬ yawꞈ maꞈ uˬ duˬ tahˬ-eu jawˇ duˬ-ahˇ miˬ dzaˬ-ahˇ dzah puiˆ-awˇ lawˇ-eu jeˬ hawˇ-eu, aˬ yawꞈ maꞈ-euˬ miˬ yehˇ deuˬ-ahˇ lawˇ-eu shehˇ-eu jeˬ-ahˇ, bi naˬ leˇ jiˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

³⁶“Tsawˇ shiˇ baꞈ pahˬ-iˇ ngeh, aˬ cawˬ noeˬ shaˬ noeˬ shaˬ-ehˇ mehˬ liˇ baw-eu loꞈ-ehˇ duˇ ni, Mawˇbaˆ tsawˇ haˬ hawˇ-eu Kiˇlaˆheˬyehˆ tsawˇ haˬ deuˬ-euˬ gʼaˇ duˬ ngaˇ noeˬ shaˬ dui dui nya. Aˬ jeˬ miˇ neh ehˇ naˇ, aˬ yawꞈ maꞈ-euˬ myawˬ dawˬ tawˆ luꞈ byoˆ jiˇ-euˬ meh.

³⁷Aˬ yawꞈ maꞈ dawˬ tawˆ luꞈ yawˬ ha-euˬ uˬ duˬ tsehˇ kahˇ hawˇ-eu mehˬ mahˬ jehˆ dzeh jiˇ-euˬ meh. Aˬ yawꞈ maꞈ yawˬ ha-euˬ aˬ laꞈ-ahˇ mi cehˇ neh deuˆ taˆ-awˇ, pehˇ zeuˇ neh mehˬ tsoeˬ guꞈ dm-eu meh.

³⁸Nymˇ mˬ kʼoeˇ taˆ hawˇ-eu pu kaˬ-ahˇ kʼaˇ jawˇ-eu tsawˇ haˬ dawˬ tawˆ luꞈ, tsawˇ ngoeˇ ngoeˇ-eu jeˬ oꞈ-eu tehꞈ meh. Aˬ jeˬ miˇ neh ehˇ naˇ, tiˬ gʼaˬ-iˬ maˬ geuꞈ mawꞈ-eu miˇ tsaˬ oeˬ lahˬ-ahˇ diˬ paˆ-eu loꞈ-ehˇ, ngaˇ Mawˇbaˆ tsawˇ haˬ-ahˇ laˆ cawˆ jiˇ-euˬ ma.

³⁹Mawˇbaˆ miˇ kʼahˬ cawˆ-iˇ ngaˇ lehˇ guˇ-awˬ. Mawˇbaˆ tsawˇ haˬ deuˬ myaˆ pyawˬ naˇ mehˇ cawˆ jiˇ-euˬ meh. Dawˬ peh jawˇ-eu tsawˇ jeuˬ dawˬ tawˆ luꞈ aˬ yawꞈ maꞈ-ahˇ yehˬ bawˬ sehˇ lu-ehˇ gʼeh-eu meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁴⁰Sahˬpaˬ Miˬyehˇ heu loꞈ-ehˇ ehˇ-eu meh. “Kʼaˬ dzeˇ aˬ dahˇ mˇ pyeh-awˇ ga le-eu loꞈ-ehˇ, Mawˇbaˆ miˇ kʼahˬ kʼoeˇ taˆ tsawˇ jeuˬ tiˬ jeuˬ ga dawꞈ le tehꞈ-a.

⁴¹Meuˬ deuˬ hawˇ-eu taˆ deuˬ-ahˇ aˬ yawꞈ maꞈ deuˆ gʼaˬ tehꞈ-a. Kʼoeˇ ngeh, Mawˇbaˆ yehˇ deuˬ, zaˬ baw luꞈ-eu zaˬ miˬ zaˬ loꞈ-ehˇ guˆ dui dui tehꞈ-a.

⁴²Mawˇbaˆ miˇ kʼahˬ ngaˬ-ahˇ puiˬ-euˬ miˇ neh, tsawˇ jeuˬ meh-iˇ gaˇ keuˆ ni bi laˆ cawˆ byoˆ leꞈ tehꞈ-a.

⁴³Guˆ-eu gaˆ-eu jeˬ, duˬ kʼahˬ hawˇ-eu lahˇ ju deuˬ, Mawˇbaˆ tsawˇ haˬ deuˬ-ahˇ loꞈ luꞈ meh lehˇ, Sahˬpaˬ Miˬyehˇ ehˇ-eu meh.

⁴⁴Guˆ-eu gaˆ-eu jeˬ-ahˇ buˬ-iˇ ni cehˆ-eu tsawˇ haˬ deuˬ duˬ kʼahˬ-ahˇ ga ahˇ-awˇ, duˬ kʼahˬ-ahˇ neh daˆ doˆ laˇ-eu tsawˇ haˬ deuˬ lahˇ ju-ahˇ paꞈ leˇ tehꞈ-a. Aˬ jeˬ miˇ neh ehˇ naˇ, Sahˬpaˬ Miˬyehˇ neh Mawˇbaˆ miˇ kʼahˬ ya cawˆ-iˇ-eu aˇ yamˬ bi keuˆ le taˬ-euˬ meh.

⁴⁵Uˬ duˬ tahˬ shaˇ kʼaˇ maˬ za-eu tsawˇ haˬ kʼoeˇ deuˬ, yaw beh sahˬ paˬ Siˇhoˬ neh uˆ lahˇ-euˬ Heˬsahˬboˬ meuˬ-ahˇ cehˆ leˇ-euˬ meh. Ehˇ kʼawꞈ, meuˬ kʼoeˇ meuˬ miˬ dzaˬ puiˆ luꞈ-eu meh. Guiˇ deuˆ haw ma lehˇ lmˬ-eu Mawˇbaˆ tsawˇ haˬ deuˬ-euˬ miˇ kʼahˬ gaˇ dzeˇ gaˇ taw maˬ ehˇ, gawˬ jawˬ yaw goˇ deuˬ-ahˇ maˬ ehˇ, miˬ dzaˬ puiˆ dzaˬ jiˇ-euˬ meh.

⁴⁶Mawˇbaˆ tsawˇ haˬ deuˬ gʼawˬ shaˇ shaˬ-ehˇ meh. Sheˬmiˇshaˆ miˬ yehˇ-ahˇ uˬ duˬ tahˬ-euˬ tsawˇ haˬ deuˬ cawˆ-iˇ-awˇ, aˬ yawꞈ maꞈ-euˬ aˬ buˇ aˬ li deuˬ -ahˇ aˬ cawˬ nyehꞈ byoˆ gʼeh-euˬ meh.

⁴⁷Ehˇ kʼawꞈ, aˬ kaˇ keuˆ laˇ-eu aˇ yamˬ laꞈ kʼoeˇ, Mawˇbaˆ miˇ kʼahˬ paˇ dehꞈ dzaˬ laˇ ni, Sahˬpaˬ Miˬyehˇ jahˇ tehꞈ-a. Sahˬpaˬ Miˬyehˇ neh kʼaˇ ehˇ taˬ-euˬ heu deuˬ dawˬ tawˆ luꞈ Mawˇbaˆ miˇ kʼahˬ kʼoeˇ taˆ keuˆ le tehꞈ-a.