Read Akha Yeˬlaˬmiˇ 49 Bible Online

Yeˬlaˬmiˇ 49 - Akha bible

Yeˬlaˬmiˇ 49

¹Aˬmoˬ miˇ kʼahˬ-ahˇ taꞈ leˇ-awˇ, Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ tsawˇ haˬ deuˬ aˬ geu paw iˇ jiˇ taˬ. Yawˬ ha-euˬ miˇ kʼahˬ-ahˇ deuˆ piˇ-eu tiˬ gʼaˬ-iˬ maˬ paˇ jawˇ meh loˇ. Miˇlaˬkoˬ miˬ yehˇ-ahˇ uˬ duˬ tahˬ-eu tsawˇ haˬ deuˬ, Gaˆ miˇ kʼahˬ-ahˇ deuˆ gʼaˬ-awˇ, kʼoeˇ gaˇ jawˇ geuꞈ laˇ ngeh keuˆ ni, aˬ jeˬ miˇ neh tiˬ jeˬ-iˬ maˬ gʼeh ni jawˇ ta.

²Ehˇ kʼawꞈ, Aˬmoˬ tsawˇ jeuˬ-euˬ meuˬ meuˬ ma pyeuꞈ-eu Laˬbah meuˬ-ahˇ jawˇ-eu tsawˇ haˬ deuˬ guiˇ deuˆ le-eu teˇ saˇ ya gaˬ-awˇ, meuˬ cawˆ-iˇ-awˇ pu deuˬ miˬ dzaˬ bi keuˬ dzeh jiˇ ngeh keuˆ ni, aˬ yawꞈ maꞈ kʼoeˇ taˆ bi keuˆ le-eu lehˇ ngaˬ neh lehˬ hmˬ taˬ-euˬ aˇ yamˬ keuˆ le-eu dawˬ peh peh laˇ-euˬ meh. Kʼoeˇ ngeh jawˇ, Iˇsaˬleˬlaˆ tsawˇ haˬ deuˬ aˬ cawˬ-euˬ laꞈ-ahˇ ahˇ leˇ-euˬ yawˬ ha-euˬ miˇ kʼahˬ paˇ za kʼoꞈ tehꞈ-a.

³Heˬshaˬboˬ meuˬ-ahˇ jawˇ-eu deuˬ-oˇ, yaw kʼaˆ-ehˇ ngoeˇ-awˬ. Aˬiˇ meuˬ maˬ paˇ baw meh. Laˬbah meuˬ-ahˇ jawˇ-eu zaˬ miˬ zaˬ deuˬ-oˇ, tsawˇ ngoeˇ ngoeˇ-awˬ. Guˬ daˇ pehˇ zeuˇ mehˬ tsoeˬ dm-awˇ ngoeˇ-awˬ. Gʼoꞈ laˆ gʼoꞈ dmˇ-ehˇ cehˆ cehˆ-ehˇ shaˬ gʼa-awˬ. Naw maꞈ-euˬ miˬ yehˇ Miˇlaˬkoˬ-aˬ, aˬ yawꞈ-euˬ piˇ ma deuˬ hawˇ-eu sahˬ paˬ zaˬ yo deuˬ nehˬ-ehˇ, tiˬ kawˆ loꞈ-ehˇ bi nyehꞈ byoˆ gʼeh tehꞈ-a.

⁴Aˬ jeˬ miˇ neh naw maꞈ loꞈ-ehˇ gʼeh-eu saˇ jaˇ maˬ ziꞈ-eu tsawˇ jeuˬ kʼahˬ sehˇ jehˆ te. Naw maꞈ-euˬ gʼaˬ teˬ le luꞈ-eu maˬ siˬ laˇ nya loˇ. Naw maꞈ-euˬ gʼaˬ-ahˇ naw maꞈ gʼoe-awˇ, tsawˇ haˬ tiˬ gʼaˬ-iˬ nga maꞈ-ahˇ guiˇ maꞈ deuˆ laˇ peuˬ-aˇ lehˇ, aˬ jeˬ miˇ neh naw maꞈ ehˇ te.

⁵Naw maꞈ kʼoeˇ taˆ yawˬ paw yawˬ coeˇ na luꞈ guˆ-eu gaˆ-eu jeˬ ngaˇ bi keuˆ le-awˇ, naw maꞈ dawˬ tawˆ luꞈ cehˆ byoˆ jiˇ tehꞈ-a. Yawˬ gʼaˬ na luꞈ uˬ kʼawˇ kʼaˇ buˬ maˬ buˬ cehˆ-awˇ, naw maꞈ-euˬ guiˇ maꞈ kuˇ uiˬ-eu gʼaˬ maˬ jawˇ-ehˇ pyeuꞈ-iˇ tehꞈ-a.

⁶“Ehˇ kʼawꞈ, aˬ kaˇ Aˬmoˬ miˇ kʼahˬ paˇ dehꞈ dzaˬ laˇ ni ngaˇ jahˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁷Eˬdoˬ miˇ kʼahˬ-ahˇ taꞈ leˇ-awˇ, Sahˬpaˬ Miˬyehˇ heu loꞈ-ehˇ ehˇ-eu meh. “Eˬdoˬ tsawˇ haˬ deuˬ tsawˇ gahˇ maˬ paˇ ahˇ mehˬ loˇ. Aˬ yawꞈ maꞈ-ahˇ nui noeˬ nui duˇ biꞈ-eu deuˬ, aˬ joˆ-ehˇ ya jahˇ-eu gaˇ kawˆ aˬ yawꞈ maꞈ-ahˇ maˬ paˇ ehˇ nehˬ nya meh loˇ. Aˬ yawꞈ maꞈ-euˬ zaˬ siˬ tsawˇ gahˇ dawˬ tawˆ luꞈ byoˆ jiˇ mehˬ loˇ.

⁸Deˬdaˬ meuˬ-ahˇ jawˇ-eu tsawˇ haˬ deuˬ-oˇ, naˇ kʼah ciˬ pyawˇ-awˇ cehˆ byoˆ-awˇ, dzuˇ zaꞈ byoˆ-awˬ. Iˇsawˇ-euˬ zaˬ deuˬ uˆ deuˬ-ahˇ ngaˇ laˆ cawˆ-eu lehˇ gʼeh-eu ma. Aˬ jeˬ miˇ neh ehˇ naˇ, aˬ yawꞈ maꞈ-ahˇ ngaˇ kʼehˬ nehˬ kʼaˆ nehˬ-eu aˇ yamˬ tsaˬ laˇ-euˬ meh.

⁹Aˬ gaꞈ aˇ siˬ pyaˆ ngeh maˬ pyaˆ jiˇ ni ui cuiˆ bi dzeˇ yaꞈ-awˇ, uˬ ciꞈ paw tahˇ joe deh ngeh kʼawꞈ, kʼaˇ mawꞈ-eu jeˬ tehꞈ-ehˇ yuˇ geuꞈ gʼeh-eu meh.

¹⁰Ehˇ kʼawꞈ, Iˇsawˇ-euˬ zaˬ deuˬ uˆ deuˬ-ahˇ ngaˇ dzuˇ tsui ni ya jiˇ nehˬ-awˇ, aˬ yawꞈ maꞈ maˬ cehˆ zaꞈ dzeuˇ nya ni, ngaˇ poˆ mawˇ jiˇ-euˬ ma. Eˬdoˬ tsawˇ haˬ tiˬ gʼaˬ-iˬ maˬ dzeuˇ-iˇ ni bi laˆ cawˆ jiˇ-euˬ meh.

¹¹Naw maꞈ tsawˇ haˬ muˇ coe aˬ nmˇ deuˬ ngaˬ nehˬ-ehˇ taˬ yaꞈ-awˬ. Ngaˇ haw piˇ nehˬ ma. Naw maꞈ-euˬ miˬ coeˬ miˬ ma deuˬ ngaˬ-ahˇ gʼoe nya meh.

¹²“Kʼehˬ-eu kʼaˆ-eu jeˬ-ahˇ ya daˬ paˬ-ehˇ maˬ gʼeh-eu tsawˇ haˬ deuˬ kʼawꞈ kʼehˬ-eu kʼaˆ-eu kʼmˬ maˬ ya ciˬ dawˇ gaˇ keuˆ-euˬ-aˬ, naw maꞈ dzeuˇ-iˇ nya ma lehˇ noeˬ te loˇ. Maˬ dzeuˇ-iˇ nya-a. Naw maꞈ kʼawꞈ kʼehˬ-eu kʼaˆ-eu kʼmˬ maˬ ya ciˬ dawˇ meh.

¹³Bawˇzaˬlahˬ meuˬ-aˬ, guˆ dui dui laˇ paˬ-ehˇ bi laˆ pyeuꞈ-awˇ, kʼaˇ shuiꞈ deh yaˇ loꞈ-ehˇ pyeuꞈ-iˇ tehꞈ-a lehˇ, ngaˇ kamˬ tsehˆ taˬ-euˬ ma. Meuˬ kʼoeˇ meuˬ-ahˇ aˬ cawˬ kʼaˇ ehˇ mawꞈ-eu ehˇ niˇ gʼa-awˇ, yaˬ kʼehˇ yaˬ ngeh zmˬ-eu tsawˇ myahˇ tiˬ myahˇ pyeuꞈ laˇ tehꞈ-a. Jawˬ jawˬ-ehˇ jaˆ-eu pu dawˬ tawˆ luꞈ, mˬ maˬ maˬ byaˆ zaˇ ziˇ cawˆ jiˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁴Kʼoeˇ naˇ, ngaˇ heu loꞈ-ehˇ ehˇ-euˬ ma. “Eˬdoˬ miˇ kʼahˬ-oˇ, Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le taˬ-euˬ meh. Miˇ kʼahˬ tsawˇ jeuˬ deuˬ jawˇ gaˇ aˬ yawꞈ-euˬ gʼaˬ kʼehˇ pyehˬ gʼeh-awˇ, guiˇ maꞈ laˆ uiˬ-awˇ, nawˬ-ahˇ guiˇ deuˆ le-eu gʼaˇ duˬ lehˬ hmˬ-awˬ lehˇ bi tsaꞈ gaˬ-iˇ-euˬ meh.

¹⁵Nawˇ gʼaˬ baˬ-iˇ ni Sahˬpaˬ Miˬyehˇ jahˇ-awˇ, tsawˇ haˬ tiˬ gʼaˬ-iˬ nawˬ-ahˇ yaw zeu maˬ baw ni pyeuꞈ-iˇ tehꞈ-a.

¹⁶Nawˇ nui ma huiˬ-eu mahˇ-eu jeˬ, nawˬ-ahˇ mehˇ shuiˇ shuiˇ-euˬ meh. Nawˬ neh noeˬ-euˬ loꞈ-ehˇ, aˬ cawˬ tiˬ gʼaˬ-iˬ nawˬ-ahˇ maˬ guˆ-a. Gawˬ jawˬ uˬ du jaˆ-eu lo guˇ uˬ gʼmˬ-ahˇ nawˇ jawˇ-eu meh. Kʼaˬ dzeˇ loꞈ-ehˇ goˇ dui dui-eu tsahˇ-ahˇ jawˇ kʼawꞈ, Sahˬpaˬ Miˬyehˇ nawˬ-ahˇ dehˬ ka nya meh lehˇ, Sahˬpaˬ Miˬyehˇ ehˇ taˬ-euˬ dawˬ jaˆ meh.”

¹⁷Sahˬpaˬ Miˬyehˇ heu loꞈ-ehˇ ehˇ-eu meh. “Eˬdoˬ miˇ kʼahˬ kʼoeˇ taˆ keuˆ le-eu luˬ-iˇ seˇ-iˇ-eu jeˬ-aˬ, guˆ dui dui laˇ paˬ-ehˇ gʼeh-eu miˇ neh, kʼaˇ iˇ kʼaˇ laˇ tsehˆ-eu yawˬ gʼaˬ na luꞈ, tsawˬ guˆ-iˇ-awˇ zahˬ leˇ tehꞈ-a.

¹⁸Sawˇdoˬ meuˬ, Gawˇmawˇlaˆ meuˬ hawˇ-eu, dawˬ peh jaˆ-eu meuˬ deuˬ-ahˇ laˆ cawˆ nehˬ ngeh keuˆ le-euˬ loꞈ-ehˇ, Eˬdoˬ miˇ kʼahˬ kʼoeˇ taˆ keuˆ le tehꞈ-a. Tsawˇ haˬ tiˬ gʼaˬ-iˬ maˬ jawˇ ni pyeuꞈ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹⁹Yawˇdaˬ lawˇ baˬ gawˆ taw sahˬ kʼaˆ uˬ moˆ jawˇ-eu aˇ laˬ jaˬ shiˇ, jeˬ zaˬ gaˆ kʼahˬ-ahˇ tsawˬ doˆ laꞈ-eu loꞈ-ehˇ ngaˇ oe-awˇ, Eˬdoˬ tsawˇ haˬ deuˬ aˬ yawꞈ maꞈ-euˬ miˇ kʼahˬ-ahˇ byehˇ-awˇ tehˬ law tsaˇ law-ehˇ bi cehˆ byaˆ ma. Kʼoeˇ naˇ, ngaˬ neh tseˇ doˆ-euˬ tsawˇ haˬ, miˇ kʼahˬ kʼoeˇ kʼahˬ-ahˇ paˇ bi uˆ lahˇ ma. Ngaˬ-ahˇ yawꞈ cehˆ haw laˇ peuˬ-eu aˬ suˇ gʼaˬ jawˇ ta. Ngaˬ-ahˇ ciˬ daˬ laˇ peuˬ-eu aˬ suˇ gʼaˬ jawˇ ta. Ngaˬ-ahˇ jahˇ gʼeh haw peuˬ-eu sahˬ paˬ sahˬ ma aˬ gaˇ jawˇ ta.

²⁰Kʼoeˇ miˇ neh, Eˬdoˬ tsawˇ haˬ deuˬ-ahˇ ngaˇ jahˇ nehˬ-eu lehˇ lehˬ hmˬ taˬ-euˬ jeˬ hawˇ-eu, Teˬmaˬ meuˬ-ahˇ jawˇ-eu deuˬ-ahˇ ngaˇ jahˇ nehˬ mawꞈ-eu gaˇ kawˆ-ahˇ naˇ haˬ-awˬ. Aˬ yawꞈ maꞈ-euˬ zaˬ deuˬ-ahˇ keuˆ ni bi tsahˇ byoˆ gʼeh gaˇ keuˆ-awˇ, tsawˇ haˬ yawˬ gʼaˬ na luꞈ guˆ dui dui-iˇ tehꞈ-a.

²¹Eˬdoˬ meuˬ byaˆ-iˇ ngeh, teˇ saˇ kʼaˆ dui dui-eu miˇ neh, miˇ tsaˬ tahˬ kʼawˇ nyeh laˇ-awˇ, tsawˇ haˬ zaˬ guˇ-awˇ ngoeˇ-eu teˇ saˇ, Aˬgaˬbaˬ iˬ ma laˆ shaˆ lahˇ gʼoꞈ-ahˇ keuˆ ni gaˬ keuˆ iˇ tehꞈ-a.

²²Kʼaˬ dzeˇ aˬ dahˇ mˇ pyeh-awˇ ga le-eu loꞈ-ehˇ, muiˇ-eu deuˬ Bawˇzaˬlahˬ meuˬ-ahˇ ga dawꞈ le tehꞈ-a. Aˇ nah kʼoeˇ nah keuˆ le ngeh, Eˬdoˬ yehˇ deuˬ-aˬ, aˬ nyiˇ ciˬ luꞈ-eu zaˬ miˬ zaˬ tiˬ gʼaˬ loꞈ-ehˇ guˆ dui dui tehꞈ-a.”

²³Daˬmaˬsehˇ meuˬ gaˇ kawˆ Sahˬpaˬ Miˬyehˇ heu loꞈ-ehˇ ehˇ-eu meh. “Haˬmaˆ meuˬ hawˇ-eu Aˬpaˆ meuˬ-ahˇ jawˇ-eu tsawˇ haˬ deuˬ, kʼahˬ lahˇ laˇ paˬ-ehˇ gʼeh-eu gaˇ kawˆ ya gaˬ-euˬ miˇ neh, noeˬ shaˬ luꞈ-eu meh. Noeˬ shaˬ noeˬ zahˬ-eu jeˬ iˬ ma laˆ shaˆ iˇ luˆ dzeh-eu loꞈ-ehˇ, aˬ yawꞈ maꞈ kʼoeˇ taˆ keuˆ le-eu miˇ neh, maˬ jawˇ tehˬ coeˇ-a.

²⁴Daˬmaˬsehˇ meuˬ-ahˇ jawˇ-eu tsawˇ haˬ deuˬ nui ma baˬ laˇ-awˇ, guˆ-eu miˇ neh cehˆ jiˇ-euˬ meh. Aˬ nyiˇ ciˬ luꞈ-eu zaˬ miˬ zaˬ tiˬ gʼaˬ loꞈ-ehˇ, aˬ yawꞈ maꞈ shaˬ zahˬ naꞈ-eu meh.

²⁵Laˬ kʼaˬ cehˇ-eu paw tsawˇ myahˇ doˆ-euˬ meuˬ, ciˬ cuˇ ni pyeuꞈ-iˇ-euˬ meh.

²⁶Aˇ nah kʼoeˇ nah keuˆ laˇ ngeh, zaˬ guˬ deuˬ meuˬ laꞈ kʼoeˇ jaˆ-eu gaˇ ma doe ni bi sehꞈ dzeh-awˇ, aˬ yawꞈ maꞈ-euˬ yehˇ deuˬ bi laˆ cawˆ jiˇ tehꞈ-a.

²⁷Daˬmaˬsehˇ meuˬ-euˬ meuˬ lahˇ-ahˇ ngaˇ miˬ dzaˬ keuˬ dzeh-awˇ, sahˬ paˬ Beˬhaˬdaˇ-euˬ hawˇ nymˇ deuˬ bi puiˆ dzaˬ jiˇ tehꞈ-a lehˇ, ngaˇ Baoˬ huiˬ-eu Sahˬpaˬ Miˬyehˇ ehˇ-eu ma.”

²⁸Geˬdaˬ tsawˇ jeuˬ gaˇ kawˆ hawˇ-eu Baˬbuˇloˬ sahˬ paˬ Neˬbuˬkaˬneˬzaˬ neh deuˆ gʼaˬ-euˬ miˇ kʼahˬ pyeuꞈ-eu, Haˬzawˇ meuˬ uˆ lahˇ-eu uˬ moˆ jawˇ-eu gahˬ kaˬ-ahˇ taꞈ leˇ-awˇ, Sahˬpaˬ Miˬyehˇ heu loꞈ-ehˇ ehˇ-eu meh. “Geˬdaˬ tsawˇ jeuˬ-ahˇ guiˇ deuˆ-awˇ. Nahˇ ma doˆ kʼehˬ paw jawˇ-eu tsawˇ jeuˬ kʼoeˇ jeuˬ-ahˇ laˆ cawˆ nehˬ-awˬ.

²⁹Aˬ yawꞈ maꞈ-euˬ sehˬ gʼawˆ deuˬ maˬ ehˇ, jeˬ zaˬ baˬ maꞈ maˬ ehˇ, sehˬ gʼawˆ laꞈ kʼoeˇ zmˬ-eu saˬ paˇ lawˆ kaˬ hawˇ-eu sehˬ gʼawˆ laꞈ kʼoeˇ kʼaˇ jaˆ-eu yawˬ jeˬ na luꞈ maˬ ehˇ, yuˇ geuꞈ jiˇ-awˬ. Aˬ yawꞈ maꞈ-euˬ law taw deuˬ tsahˇ geuꞈ-awˇ, ‘Guˆ-eu gaˆ-eu jeˬ naw maꞈ-euˬ tiˬ jawˬ keuˆ le luꞈ meh’ lehˇ, aˬ yawꞈ maꞈ-ahˇ ehˇ nehˬ-awˬ.

³⁰Haˬzawˇ meuˬ-ahˇ jawˇ-eu tsawˇ haˬ deuˬ-oˇ, gaˇ mahˇ kaˬ gaˇ cehˆ zaꞈ-iˇ-awˬ lehˇ, Sahˬpaˬ Miˬyehˇ pyeuꞈ-eu ngaˇ naw maꞈ-ahˇ ehˇ-eu ma. Baˬbuˇloˬ sahˬ paˬ Neˬbuˬkaˬneˬzaˬ-aˬ, naw maꞈ kʼoeˇ taˆ nui ma jaˆ-awˇ, heu loꞈ-ehˇ ehˇ luꞈ meh.

³¹‘Oe-awˬ. Guˆ kʼaˇ maˬ za ni saˇ lehˆ ni miˇ-a lehˇ noeˬ luꞈ-eu tsawˇ haˬ kʼoeˇ deuˬ-ahˇ guiˇ deuˆ-iˇ kaˇ-euˇ. Aˬ yawꞈ maꞈ-euˬ meuˬ lahˇ kʼehˬ maˬ baw-ehˇ, mawˬ tawꞈ maˬ tawꞈ tehˬ taˬ-euˬ uˬ taꞈ, caw ba nehˬ-eu gʼaˬ maˬ jawˇ ni yaw awˇ laꞈ-ehˇ jaˆ-eu meh’ lehˇ ehˇ luꞈ meh.

³²Aˬ yawꞈ maꞈ-euˬ law taw deuˬ hawˇ-eu mawˇ neˇ dawˬ tawˆ luꞈ teh geuꞈ jiˇ-awˬ. Uˬ duˬ tsehˇ kahˇ yaw nymˇ nymˇ-ehˇ tehˬ-eu tsawˇ haˬ kʼoeˇ deuˬ-ahˇ ngaˇ teh byaˆ-awˇ, aˬ yawꞈ maꞈ kʼoeˇ taˆ luˬ-iˇ seˇ-iˇ-eu jeˬ tiˬ jawˬ bi keuˆ le ma.

³³Haˬzawˇ meuˬ-aˬ, mˬ maˬ maˬ byaˆ zaˇ ziˇ bawˇ tsahˬ aˬ kuiˬ jawˇ-eu kʼaˇ shuiꞈ deh ga bi pyeuꞈ-iˇ ma. Tsawˇ haˬ tiˬ gʼaˬ-iˬ kʼoeˇ gaˇ maˬ paˇ jawˇ leˇ-aˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

³⁴Zeˬdaˬkiˇ Yuˇdaˆ sahˬ paˬ pyeuꞈ laˇ gʼaˬ-awˇ gʼawˬ myahˇ maˬ gʼeh-ehˇ, Eˇlamˬ miˇ kʼahˬ gaˇ kawˆ Baoˬ huiˬ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

³⁵Sahˬpaˬ Miˬyehˇ ehˇ-eu, “Eˇlamˬ miˇ kʼahˬ-euˬ baoˬ pyeuꞈ-eu, kaˆ yuˇ-awˇ guiˇ deuˆ-eu tsawˇ haˬ kʼoeˇ deuˬ-ahˇ ngaˇ sehꞈ jiˇ ma.

³⁶Yawˬ paw yawˬ coeˇ na luꞈ neh Eˇlamˬ miˇ kʼahˬ laꞈ kʼoeˇ jaˬ lehˇ bi baw ahˇ leꞈ-awˇ, Eˇlamˬ miˇ kʼahˬ zaˬ deuˬ maˬ cehˆ jawˇ-iˇ-euˬ miˇ kʼahˬ maˬ jaˆ ni bi pyeuꞈ-iˇ ma.

³⁷Aˬ yawꞈ maꞈ-ahˇ sehꞈ mawꞈ-eu muiˇ-eu deuˬ-ahˇ guˆ guˆ-ehˇ bi shaˬ-awˇ, ngaˇ nui ma pehˇ dui dui-eu miˇ neh, Eˇlamˬ tsawˇ haˬ kʼoeˇ deuˬ-ahˇ laˆ cawˆ nehˬ ma. Aˬ yawꞈ maꞈ-ahˇ ngaˇ maˬ laˆ cawˆ jiˇ kʼoeˇ keuˆ ni, aˬ yawꞈ maꞈ jawˇ gaˇ guiˇ maꞈ deuˬ pyehˬ gʼeh ma.

³⁸Aˬ yawꞈ maꞈ-euˬ sahˬ paˬ sahˬ ma deuˬ-ahˇ ngaˇ sehꞈ jiˇ-awˇ, ngaˬ-euˬ nuiˇ mahˬ kʼoeˇ gaˇ baꞈ taˬ ma.

³⁹Ehˇ kʼawꞈ, Eˇlamˬ tsawˇ haˬ deuˬ aˬ kaˇ paˇ baw paˇ za le ni jahˇ nehˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”