Read Akha Yeˬlaˬmiˇ 5 Bible Online

Yeˬlaˬmiˇ 5 - Akha bible

Yeˬlaˬmiˇ 5

¹Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, meuˬ-euˬ gaˇ ma doe ni cehˆ doe haw-awˬ. Doe doe-ehˇ cah-awˇ haw doe-awˬ. Lehˆ kawˆ doe ni poˆ doe haw-awˬ. Yaw tsaˬ yaw dawˇ jeˬ-ahˇ mˇ-awˇ, Miˬyehˇ-ahˇ saˇ jaˇ ziꞈ-awˇ dehꞈ luꞈ-eu, tsawˇ haˬ tiˬ gʼaˬ nawˇ mawˇ nya naˇ, Yeˬluˇsaˬlehˬ meuˬ-ahˇ Sahˬpaˬ Miˬyehˇ iˬ baˇ pyehˬ nehˬ tehꞈ-a.

²“Sahˬpaˬ Miˬyehˇ-ahˇ uˬ duˬ tahˬ ma” lehˇ nawˇ ehˇ-euˬ kʼawꞈ, nawˬ neh ehˇ taˬ-euˬ loꞈ-ehˇ maˬ jaˆ-a.

³Saˇ jaˇ ziꞈ-eu jeˬ-ahˇ Sahˬpaˬ Miˬyehˇ aˬ diˇ poˆ-awˇ, naw maꞈ-ahˇ diˬ kʼawꞈ maˬ diˬ paˇ nya ehˇ, nawˬ pahˬ nehˬ kʼawꞈ naw maꞈ-ahˇ maˬ dzaw paˇ nya-a. Nawˬ-euˬ nui ma gʼahˇ-awˇ iˬ baˇ-ahˇ maˬ byehˇ-a.

⁴Kʼoeˇ naˇ ngaˇ heu loꞈ-ehˇ shaˇ noeˬ-euˬ ma. “Tsawˇ haˬ heu deuˬ iˇ shaˬ dawˇ ga tehꞈ meh. Aˬ yawꞈ maꞈ aˬ dzawˬ aˇ gah gah-eu meh. Miˬyehˇ-euˬ zahˇ sahˇ kʼoꞈ hawˇ-eu, aˬ yawꞈ-euˬ nui kʼahˇ-ahˇ maˬ siˬ nya-a.

⁵Aˬ yuiꞈ aˬ tsu geuꞈ luꞈ-eu deuˬ-ahˇ ngaˇ ngehˬ cawˬ-iˇ ma. Miˬyehˇ-euˬ zahˇ sahˇ kʼoꞈ hawˇ-eu aˬ yawꞈ-euˬ nui kʼahˇ-ahˇ, aˬ yawꞈ maꞈ siˬ nya-eu yaw duˬ baw meh.” Ehˇ kʼawꞈ aˬ yawꞈ maꞈ dawˬ tawˆ luꞈ gʼeh-awˇ, Sahˬpaˬ Miˬyehˇ uˆ lahˇ luꞈ-eu jeˬ-ahˇ puiˬ-awˇ, aˬ yawꞈ ehˇ dawˬ maˬ naˇ haˬ-a.

⁶Kʼoeˇ baˬ da neh bawˇ tsahˬ aˇ laˬ jaˬ shiˇ neh bi kawꞈ-awˇ, kʼaˇ shuiꞈ deh yaˇ-ahˇ jawˇ-eu kʼaˬ yehˇ deuˬ, aˬ yawꞈ maꞈ-ahˇ gʼeu paˆ dzaˬ-awˇ, kʼaˬ zuiˬ kʼaˬ laˬ aˬ yawꞈ maꞈ-euˬ meuˬ-ahˇ shahˇ-awˇ, meuˬ laꞈ nyiˇ kʼaˇ doˆ-iˇ-eu deuˬ, bi kawꞈ sehꞈ dzaˬ tehꞈ-a. Aˬ jeˬ miˇ neh ehˇ naˇ, aˬ yawꞈ maꞈ iˬ baˇ mˇ myaˬ-awˇ, Miˬyehˇ-ahˇ gʼawˬ mya poˆ byehˇ dzeh-euˬ meh.

⁷Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ tsawˇ haˬ deuˬ-ahˇ aˬ jeˬ miˇ neh ngaˇ iˬ baˇ ya pyehˬ ta. Aˬ yawꞈ maꞈ ngaˬ-ahˇ byehˇ dzeh-awˇ, miˬ yehˇ maˬ ngeuˇ-eu deuˬ-ahˇ uˬ duˬ tahˬ-euˬ meh. Ngaˬ-euˬ tsawˇ haˬ deuˬ-ahˇ ngaˇ bi dzaˬ dehˆ-euˬ kʼawꞈ, aˬ cawˬ-euˬ zaˬ miˬ zaˬ yo-ahˇ bahˬ-awˇ, meh maˬ laˇ deuˬ nehˬ-ehˇ aˇ yamˬ laˆ jiˇ-euˬ meh.

⁸Mah paˬ yaw tsuˇ yaw gʼeh loꞈ-ehˇ, yawˬ gʼaˬ na luꞈ aˬ cawˬ miˬ zaˬ-ahˇ bahˬ-eu meh.

⁹Kʼoeˇ baˬ da neh aˬ yawꞈ maꞈ-ahˇ, ngaˇ maˬ kʼehˬ ni oˇ coeˇ nmˇ loˇ. Kʼoeˇ loꞈ-ehˇ gʼeh-eu tsawˇ jeuˬ-ahˇ, ngaˇ laꞈ poˆ maˬ poˆ ni jawˇ coeˇ nmˇ loˇ.

¹⁰Ngaˬ-euˬ tsawˇ haˬ deuˬ-euˬ aˬ gaꞈ baw duˆ bi tuˇ dzeh-eu gʼaˇ duˬ, muiˇ-eu deuˬ-ahˇ ngaˇ pyehˬ gʼeh ma. Ehˇ kʼawꞈ, dawˬ tawˆ luꞈ-ahˇ maˬ bi tuˇ cuˬ jiˇ ni, ngaˬ-ahˇ maˬ taꞈ-eu uˬ laꞈ deuˬ tehꞈ-ehˇ, aˬ yawꞈ maꞈ-ahˇ bi deuˆ dzeh ma.

¹¹Iˇsaˬleˬlaˆ tsawˇ haˬ hawˇ-eu Yuˇdaˆ tsawˇ haˬ, nui kʼahˇ tiˬ shiˇ ngaˬ-ahˇ saˇ jaˇ puiˬ-euˬ meh lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹²Sahˬpaˬ Miˬyehˇ-euˬ tsawˇ haˬ deuˬ, Sahˬpaˬ Miˬyehˇ-ahˇ yaw zeu maˬ baw-ehˇ, heu loꞈ-ehˇ ehˇ-eu meh. “Aˬ dui-ahˇ aˬ yawꞈ tiˬ jeˬ-iˬ maˬ jahˇ laˇ-aˇ. Aˬ dui shaˬ zahˬ naꞈ gaˇ maˬ ya keuˆ-aˇ. Mehꞈ-eu shuꞈ-eu hawˇ-eu miˬ siˬ miˬ kaˆ, aˬ dui kʼoeˇ taˆ maˬ keuˆ le-aˇ.

¹³Miˬyehˇ gʼaˇ duˬ ngehˬ dah-eu tsawˇ haˬ deuˬ, jaˬ lehˇ kʼehˬ bahˬ loꞈ-ehˇ tehꞈ meh. Sahˬpaˬ Miˬyehˇ-euˬ dawˬ aˬ yawꞈ maꞈ laꞈ kʼoeˇ maˬ ahˇ-a. Kʼoeˇ baˬ da neh aˬ yawꞈ maꞈ neh kʼaˇ ehˇ-euˬ jeˬ, aˬ yawꞈ maꞈ-euˬ kʼoeˇ taˆ keuˆ le luꞈ-uˇ.”

¹⁴Kʼoeˇ miˇ neh Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Yeˬlaˬmiˇ-oˇ, tsawˇ haˬ heu deuˬ kʼoeˇ loꞈ-ehˇ ehˇ-eu baˬ da neh, nawˬ-euˬ kʼaˬ meh laꞈ kʼoeˇ ahˇ-eu ngaˬ-euˬ dawˬ deuˬ, miˬ dzaˬ doꞈ gaˇ bi duˇ leˇ ma. Tsawˇ haˬ kʼoeˇ deuˬ miˬ dzaˬ miˬ kawˬ loꞈ-ehˇ, miˬ dzaˬ neh bi puiˆ jiˇ tehꞈ-a.”

¹⁵Iˇsaˬleˬlaˆ tsawˇ haˬ deuˬ-oˇ, naw maꞈ-ahˇ guiˇ bi deuˆ le-eu gʼaˇ duˬ, naw maꞈ-ahˇ dawˬ maˬ duˇ leˇ-eu, aˇ hu ba neh ziꞈ luꞈ-eu tsawˇ jeuˬ-ahˇ, naw maꞈ jawˇ gaˇ Sahˬpaˬ Miˬyehˇ sheuˬ leꞈ tehꞈ-a.

¹⁶Kaˆ beuˆ-eu aˬ yawꞈ maꞈ-euˬ yehˇ deuˬ kʼaˬ dui dui-awˇ, kʼaˇ mawˇ le-eu deuˬ-ahˇ gʼawˬ shaˬ maˬ gaˬ ni sehꞈ-eu meh.

¹⁷Naw maꞈ-euˬ dzaˬ la gʼo cehˇ aˬ yawꞈ maꞈ dzaˬ-awˇ, naw maꞈ-euˬ aˬ buˇ aˬ li deuˬ-ahˇ aˬ yawꞈ maꞈ sehꞈ tehꞈ-a. Naw maꞈ-euˬ yawˇ hawˇ-eu mawˇ neˇ sehꞈ dzaˬ-awˇ, aˬ gaꞈ yaˇ kmˇ, siˬ guˬ guˬ yaˇ, aˬ yawꞈ maꞈ laˆ cawˆ jiˇ tehꞈ-a. Naw maꞈ nui kʼaˬ tsmˬ-eu ziꞈ dah ni gʼeh-eu meuˬ deuˬ kʼawꞈ, aˬ yawꞈ maꞈ-euˬ guiˇ maꞈ neh bi laˆ cawˆ tehꞈ-a.

¹⁸Sahˬpaˬ Miˬyehˇ heu loꞈ-ehˇ ehˇ-eu meh. “Aˇ nah aˇ yamˬ kʼoeˇ keuˆ le kʼawꞈ, ngaˬ-euˬ tsawˇ haˬ deuˬ luˬ-iˇ seˇ-iˇ jiˇ gaˇ keuˆ ni ngaˇ maˬ kʼehˬ nehˬ.

¹⁹Aˬ jeˬ miˇ neh aˬ yawꞈ maꞈ-ahˇ kʼoeˇ loꞈ-ehˇ jahˇ nehˬ laꞈ-euˬ gaˇ kawˆ naˇ haˬ laˇ naˇ, Yeˬlaˬmiˇ nawˇ heu loꞈ-ehˇ ehˇ kʼoꞈ nehˬ-awˬ. Aˬ yawꞈ maꞈ ngaˬ-ahˇ byehˇ dzeh-awˇ, yawˬ ha-euˬ miˇ kʼahˬ laꞈ kʼoeˇ boeˇ miˬ siˬ kʼaˬ deuˬ-euˬ miˬ yehˇ deuˬ-ahˇ uˬ duˬ tahˬ-euˬ loꞈ-ehˇ, aˬ cawˬ miˇ kʼahˬ laꞈ kʼoeˇ boeˇ miˬ siˬ kʼaˬ deuˬ-euˬ zaˬ kʼaˆ ya geuꞈ tehꞈ-a lehˇ ehˇ nehˬ-awˬ.”

²⁰Sahˬpaˬ Miˬyehˇ heu loꞈ-ehˇ ehˇ-eu meh. “Yaˬkoˆ-euˬ zaˬ deuˬ uˆ deuˬ-ahˇ heu loꞈ-ehˇ ehˇ nehˬ-awˬ. Yuˇdaˆ tsawˇ haˬ deuˬ-ahˇ heu loꞈ-ehˇ ehˇ gaˬ-awˬ.

²¹Myaˆ nuiˆ tsoꞈ-awˇ maˬ mawˇ nya-eu, naˬ bawˇ tsoꞈ-awˇ maˬ gaˬ nya-eu, aˬ dzawˬ aˇ gah deuˬ naˇ haˬ sheˇ.

²²Ngaˇ Sahˬpaˬ Miˬyehˇ pyeuꞈ-eu ma. Aˬ jeˬ baˬ da neh naw maꞈ ngaˬ-ahˇ maˬ guˆ-ehˇ, ngaˬ-euˬ mehˬ shi yaw dzuˬ maˬ dzuˬ-eu nya. Kʼaˇ shuiꞈ neh iˬ ma laˆ shaˆ-euˬ miˇ kaˬ ngaˇ taw taˬ-awˇ, kʼaˇ shuiꞈ lawˇ deh nui paw tiˬ jawˇ-iˬ maˬ oe dzeuˇ nya-a. Iˇ luˆ dzeh kʼawꞈ maˬ dzeh dzeuˇ leꞈ nya-ehˇ, iˇ kʼawˇ tahˬ kʼawꞈ maˬ tahˬ paˆ doˆ nya-a.

²³Ehˇ kʼawꞈ naw maꞈ nui ma gʼahˇ-awˇ puiˬ-eu laꞈ kʼoeˇ, ngaˬ-ahˇ naˇ kʼah ciˬ pyawˇ-awˇ byehˇ dzeh laꞈ-euˬ meh.

²⁴Tsahˬ gaˆ uˬ yehˇ hawˇ-eu jawˇ la uˬ yehˇ biꞈ-awˇ, naw maꞈ-ahˇ ngaˇ aˬ yawꞈ kʼoꞈ yawꞈ cehˇ bi yehˬ dzaˬ-euˬ kʼawꞈ, ngaˬ-ahˇ taˬ huiˬ ma lehˇ naw maꞈ tiˬ pawꞈ-iˬ maˬ noeˬ-a.

²⁵Naw maꞈ mˇ-euˬ yaw lehˬ hawˇ-eu iˬ baˇ baˬ da, muiˬ-eu guiˬ lahˬ naw maꞈ-ahˇ maˬ oꞈ-a.

²⁶Ngaˬ-euˬ tsawˇ haˬ laꞈ kʼoeˇ haiˬ-eu deuˬ kʼawꞈ keuˬ-awˇ, aˇ jiˇ lahˇ ju kʼmˇ-awˇ loꞈ-eu loꞈ-ehˇ, tsawˇ haˬ-ahˇ nyehꞈ-eu gʼaˇ duˬ loꞈ-eu meh.

²⁷Aˇ jiˇ kʼmˇ-eu tsawˇ haˬ kʼa loˇ nyehꞈ byah taˬ-euˬ loꞈ-ehˇ, myawꞈ geuꞈ kʼaˆ geuꞈ taˬ-euˬ myawˬ gahˬ, aˬ yawꞈ maꞈ-euˬ nymˇ laꞈ kʼoeˇ byah-eu meh. Kʼoeˇ miˇ neh aˬ yawꞈ maꞈ smˇ muiˬ muiˬ-awˇ baoˬ ahˇ-eu meh.

²⁸Aˬ yawꞈ maꞈ ya dzaˬ ya dawˇ dehˆ-awˇ tsuˇ dui dui-eu meh. yaw haiˬ jeˬ mˇ-eu aˇ saˬ saˬ-euˬ maˬ baw-ehˇ, muˇ coe aˬ nmˇ deuˬ-ahˇ ngehˬ maˬ gʼeh-eu uˬ taꞈ, yaw shaˬ zaˬ-ahˇ yaw dawˇ dawˇ-ehˇ yaˇ kʼaˬ maˬ daˇ nehˬ-a.

²⁹Ehˇ kʼawꞈ Sahˬpaˬ Miˬyehˇ pyeuꞈ-eu ngaˇ-aˬ, gaˇ kawˆ kʼoeˇ deuˬ baˬ da neh aˬ yawꞈ maꞈ-ahˇ kʼehˬ-awˇ, tsawˇ jeuˬ heu jeuˬ-ahˇ laꞈ poˆ poˆ nehˬ ma.

³⁰Guˆ dui dui laˇ paˬ-ehˇ gʼeh-eu gaˇ kawˆ, miˇ kʼahˬ heu kʼahˬ kʼoeˇ taˆ keuˆ le-euˬ meh.

³¹Miˬyehˇ gʼaˇ duˬ ngehˬ dah-eu deuˬ jaˬ myawꞈ myawꞈ-awˇ, aˬ yawꞈ maꞈ neh ehˇ-euˬ loꞈ-ehˇ piˇ ma deuˬ mˇ byah-eu, ngaˬ-euˬ tsawˇ haˬ deuˬ nui kʼahˇ shiˇ-eu meh. Ehˇ kʼawꞈ aˇ saˬ saˬ-eu aˇ yamˬ keuˆ le ngeh jawˇ, aˬ yawꞈ maꞈ aˬ joˆ-ehˇ jahˇ nmˇ.