Read Akha Ngoeˇ dawˬ 5 Bible Online

Ngoeˇ dawˬ 5 - Akha bible

Ngoeˇ dawˬ 5

¹Nga maꞈ kʼoeˇ taˆ keuˆ le-euˬ jeˬ, Sahˬpaˬ Miˬyehˇ taˬ ngehˇ nehˬ laꞈ. Nga maꞈ daˬ ga gaˇ haw nehˬ laꞈ.

²Nga maꞈ za taˬ-euˬ jeˬ biˇ deuˬ, aˬ cawˬ tsawˇ jeuˬ yuˇ geuꞈ jiˇ-awˇ, nga maꞈ neh tsoˆ-euˬ nymˇ laꞈ kʼoeˇ, boeˇ miˬ siˬ kʼaˬ deuˬ jawˇ luꞈ meh.

³Nga maꞈ aˬ da maˬ paˇ baw-ehˇ, aˬ ma miˬ coeˬ coeˬ jiˇ-euˬ meh.

⁴Iˇ cuꞈ-ahˇ keuˆ ya zeuˇ dawˇ-awˇ, miˬ dzaˬ-ahˇ keuˆ zeuˇ doꞈ luꞈ ma.

⁵Nga maꞈ-ahˇ kʼaˆ daˬ baꞈ daˆ-awˇ, maˬ naˬ ni teh nehˬ laꞈ-eu meh.

⁶Nga maꞈ mehꞈ-awˇ maˬ ya shiˇ ni, Iˇjiˇtuˆ-ahˇ shaˇ dzaˬ-iˇ-awˇ, Aˬshuˇliˆ-ahˇ shaˇ dzaˬ-euˬ ma.

⁷Aˬ poeˬ ziˇ-ahˇ mˇ-euˬ iˬ baˇ, nga maꞈ kʼoeˇ taˆ keuˆ le-euˬ meh.

⁸Zaˬ kʼaˆ deuˬ dzoeˬ dzaˬ-eu miˇ neh, aˬ cawˬ uˆ lahˇ-eu baoˬ uˬ moˆ, nga maꞈ-ahˇ maˬ ka kʼoꞈ nya-a.

⁹Bawˇ tsahˬ-ahˇ mi cehˇ dzoeˬ luꞈ ngeh, uˬ kʼawˇ daˬ-awˇ ya poˆ dzaˬ nya.

¹⁰Mehꞈ-eu baˬ da gʼawˇ mawˇ lahˇ-eu, miˬ dzaˬ tsawˬ bu-ahˇ duˇ leˇ nya.

¹¹Ziˇoˬ meuˬ-euˬ zaˬ miˬ zaˬ deuˬ, Yuˇdaˆ miˇ kʼahˬ-euˬ miˬ daꞈ deuˬ, aˬ cawˬ dawꞈ gaˇ ya daˬ-euˬ meh.

¹²Sahˬ paˬ sahˬ ma-ahˇ paꞈ gʼeu-awˇ, tsawˇ mawˬ tsawˇ kʼaˆ-ahˇ maˬ zeu-a.

¹³Zaˬ guˬ deuˬ lo lehˬ bi ngawˬ-awˇ, aˬ li deuˬ miˬ dzaˬ bi kʼehꞈ-euˬ, maˬ behˇ coeˇ-ehˇ coˬ dzeh luꞈ meh.

¹⁴Meuˬ-euˬ lahˇ kʼehˬ laˇ gʼoˆ dawˬ peh, tsawˇ mawˬ jawˇ zaˇ maˬ paˇ mawˇ-ehˇ, zaˬ guˬ dawˬ caˇ maˬ ya gaˬ-a.

¹⁵Nui ma laˬ kʼaˬ cehˇ-eu byoˆ-awˇ, gaˇ nyeh dah zaˇ ngoeˇ luꞈ-eu meh.

¹⁶Yaw shehꞈ kʼahˬ sehˇ byoˆ jiˇ miˇ-a. Nga maꞈ iˬ baˇ mˇ-euˬ miˇ neh, noeˬ shaˬ noeˬ zahˬ dui dui luꞈ ma.

¹⁷Nui ma laꞈ kʼoeˇ gawˇ dui dui-awˇ, myaˆ biˇ yoeˇ-eu myaˆ maˬ mawˇ nya.

¹⁸Ziˇoˬ gawˬ jawˬ ciˬ cuˇ jaˆ-awˇ, bawˇ tsahˬ kʼaˬ yehˇ gaˆ dzaˬ luꞈ meh.

¹⁹Ehˇ kʼawꞈ Sahˬpaˬ Miˬyehˇ nawˇ-aˬ, mˬ maˬ maˬ byaˆ sahˬ paˬ pyeuꞈ-awˇ, nawˬ-euˬ dzoeˬ dzaˬ zaˇ ziˇ ziꞈ meh.

²⁰Aˬ jeˬ miˇ neh nga maꞈ-ahˇ nawˇ, teu myah myah-ehˇ byehˇ dzeh laꞈ-awˇ, teu naˆ naˆ-ehˇ ngehˇ dzeh laꞈ te.

²¹Sahˬpaˬ Miˬyehˇ-oˇ, nga maꞈ-ahˇ, nawˇ jawˇ gaˇ sheuˬ kʼoꞈ nehˬ laꞈ-awˬ. Aˇ hu ba-euˬ yaw shehꞈ kʼahˬ sehˇ, nga maꞈ paˇ bi geuꞈ kʼoꞈ laꞈ-awˬ.

²²Nga maꞈ-ahˇ byehˇ tsehˆ tsehˆ teˬ loˇ. Nui ma pehˇ taˬ-euˬ maˬ baw loˇ.