Read Akha Yeˬsaˬgeˬlaˇ 10 Bible Online

Yeˬsaˬgeˬlaˇ 10 - Akha bible

Yeˬsaˬgeˬlaˇ 10

¹Jeˬluˇbeˬ kʼoeˇ deuˬ-euˬ uˬ duˬ uˬ taˆ jaˆ-eu mˬ-ahˇ duˇ-eu kʼoeˇ hmˬ-ahˇ ngaˇ haw gʼeh ngeh, nyoeˇ naˆ naˆ-eu kʼaˬ lo sehˇ neh jahˇ taˬ-euˬ nuiˇ mahˬ-ahˇ duˇ-eu tiˬ jeˬ ngaˇ mawˇ-euˬ ma.

²Shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ dm luꞈ-eu gʼaˬ-ahˇ Miˬyehˇ ehˇ nehˬ-eu, “Jeˬluˇbeˬ kʼoeˇ deuˬ-euˬ uˬ moˆ jaˆ-eu aˇ beuˆ kʼoeˇ deuˬ-euˬ yaw kaˬ-ahˇ uˇ leˇ-awˇ, nawˬ-euˬ aˬ laꞈ tiˬ byah ni, doꞈ luꞈ-eu miˬ jiˆ tawˆ doˆ laˬ-iˇ-awˇ, meuˬ-euˬ kʼoeˇ taˆ byaˆ gʼeh-awˬ.”

³Aˬ yawꞈ le gaˇ ngaˇ haw haw-ehˇ jawˇ-euˬ ma. Aˬ yawꞈ le uˇ ngeh, Jeˬluˇbeˬ kʼoeˇ deuˬ Uˬ duˬ tahˬ nymˇ nymˇ ma-euˬ laꞈ oˆ paw pyawˬ-ahˇ yawꞈ luꞈ-awˇ, Uˬ duˬ tahˬ nymˇ nymˇ ma-euˬ laꞈ kʼoeˇ lahˇ-ahˇ mˬ dmˇ tmˬ byah taˬ-euˬ meh.

⁴Sahˬpaˬ Miˬyehˇ-euˬ yaw shehꞈ kʼahˬ sehˇ Jeˬluˇbeˬ kʼoeˇ deuˬ jawˇ gaˇ neh tuˇ laˇ-awˇ, Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ le-euˬ meh. Kʼoeˇ ngeh, Uˬ duˬ tahˬ nymˇ nymˇ ma-ahˇ mˬ dmˇ byah-awˇ, pu ka tiˬ byah ni yaw shehꞈ bya-eu meh.

⁵Jeˬluˇbeˬ-euˬ aˬ dahˇ mahˇ-eu teˇ saˇ laꞈ nyiˇ lahˇ keuˆ ni gaˬ keuˆ le-awˇ, Baoˬ huiˬ-eu Miˬyehˇ-euˬ teˇ saˇ-ahˇ duˇ-eu meh.

⁶“Jeˬluˇbeˬ kʼoeˇ deuˬ-euˬ uˬ moˆ jaˆ-eu aˇ beuˆ kʼoeˇ deuˬ-euˬ yaw kaˬ-ahˇ doꞈ luꞈ-eu miˬ jiˆ laˬ doˆ laˬ leˇ-awˬ” lehˇ, shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ dm luꞈ-eu gʼaˬ-ahˇ Sahˬpaˬ Miˬyehˇ dawˬ biꞈ ngeh, tsawˇ haˬ kʼoeˇ gʼaˬ uˇ leˇ-awˇ, aˇ beuˆ tiˬ beuˆ dawˬ peh yawꞈ leˇ-euˬ meh.

⁷Jeˬluˇbeˬ tiˬ mawˇ aˬ yawꞈ maꞈ gʼahˇ ceh doꞈ luꞈ-eu miˬ dzaˬ laꞈ kʼoeˇ aˬ laꞈ cawˬ ahˇ-awˇ, miˬ jiˆ tawˆ doˆ laꞈ-awˇ, tsawˇ haˬ kʼoeˇ gʼaˬ-euˬ aˬ laꞈ laꞈ kʼoeˇ tawˆ ahˇ nehˬ ngeh, tsawˇ haˬ kʼoeˇ gʼaˬ miˬ jiˆ kʼoeˇ yuˇ-awˇ doˆ-iˇ-euˬ meh.

⁸Jeˬluˇbeˬ aˬ yawꞈ mawˇ yawꞈ-euˬ aˬ dahˇ uˬ moˆ, tsawˇ haˬ zaˬ-euˬ aˬ laꞈ-ahˇ duˇ-eu aˬ laꞈ tsoꞈ gaˇ ngaˇ mawˇ-euˬ ma.

⁹Jeˬluˇbeˬ kʼoeˇ deuˬ-euˬ gaˇ dzeˇ aˇ beuˆ oeˬ beuˆ tsoꞈ gaˇ ya mawˇ-euˬ ma. Tiˬ mawˇ-euˬ gaˇ dzeˇ tiˬ beuˆ tsoꞈ-awˇ, aˇ beuˆ kʼoeˇ deuˬ aˇ poeˬ kʼaˆ-eu kʼaˬ lo sehˇ loꞈ-ehˇ yaw shehꞈ bya-eu meh.

¹⁰Aˇ beuˆ kʼoeˇ tiˬ beuˆ tiˇ beuˆ daˇ leˇ-awˇ, aˬ yawꞈ beuˆ yawꞈ byaˇ gʼaˇ paw pyawˇ-eu aˇ beuˆ tiˬ beuˆ paˇ tsoꞈ-eu meh.

¹¹Jeˬluˇbeˬ kʼoeˇ deuˬ kʼaˇ luˆ-iˇ ngeh, mehˬ shiˬ ciˬ pyawˇ-eu maˬ loˬ-ehˇ, kʼaˇ iˇ mawꞈ-eu paw iˇ nya-eu meh. Aˬ yawꞈ maꞈ dawˬ tawˆ luꞈ kʼaˇ iˇ mawꞈ-eu paw tiˬ kawˆ loꞈ-ehˇ iˇ-awˇ, mehˬ shiˬ ciˬ pyawˇ ciˬ pyawˇ-ehˇ jawˇ-eu maˬ loˬ-a.

¹²Naˇ kʼah paw maˬ ehˇ, aˬ laꞈ-ahˇ maˬ ehˇ, aˬ dahˇ-ahˇ maˬ ehˇ, aˇ beuˆ deuˬ-ahˇ maˬ ehˇ, mawˇ lah-ehˇ myaˆ nuiˆ tsoꞈ byah taˬ-euˬ meh.

¹³Aˇ beuˆ kʼoeˇ deuˬ-aˬ, yaw beh poˆ yaw sahˇ laꞈ kʼoeˇ ngaˬ neh mawˇ-euˬ aˇ beuˆ kʼoeˇ deuˬ-ahˇ duˇ-eu meh.

¹⁴Jeˬluˇbeˬ tiˬ mawˇ-euˬ myaˆ pyawˬ oeˬ pyawˬ tsoꞈ-eu meh. Mawˇ neˇ myaˆ pyawˬ, tsawˇ haˬ myaˆ pyawˬ, aˇ laˬ jaˬ shiˇ myaˆ pyawˬ hawˇ-eu, kʼaˬ dzeˇ myaˆ pyawˬ meh.

¹⁵Jeˬluˇbeˬ kʼoeˇ deuˬ-aˬ, Ceˬbaˬ lawˇ baˬ dawˬ peh ngaˬ neh mawˇ-euˬ kʼoeˇ deuˬ meh. Jeˬluˇbeˬ kʼoeˇ deuˬ jaˬ lehˇ laꞈ kʼoeˇ tuˇ diˇ laˇ-euˬ meh.

¹⁶Aˬ yawꞈ maꞈ luˆ-iˇ ngeh, aˇ beuˆ kʼoeˇ deuˬ kʼawꞈ aˬ yawꞈ maꞈ nehˬ-ehˇ iˇ gʼeh-awˇ, aˬ yawꞈ maꞈ aˬ dahˇ mˇ pyeh-awˇ zaw gʼeh ngeh kʼawꞈ, aˇ beuˆ kʼoeˇ deuˬ iˇ caw gʼeh-eu meh.

¹⁷Jeˬluˇbeˬ kʼoeˇ deuˬ naˬ leˇ ngeh, aˇ beuˆ kʼoeˇ deuˬ kʼawꞈ naˬ leˇ-eu meh. Aˬ yawꞈ maꞈ zaw ngeh, aˇ beuˆ kʼoeˇ deuˬ aˬ yawꞈ maꞈ nehˬ-ehˇ zaw gʼeh-eu meh. Aˬ jeˬ miˇ neh ehˇ naˇ, Jeˬluˇbeˬ kʼoeˇ deuˬ-euˬ nui ma aˬ yawꞈ maꞈ-ahˇ uˆ lahˇ-eu meh.

¹⁸Kʼoeˇ naˇ, Sahˬpaˬ Miˬyehˇ-euˬ yaw shehꞈ kʼahˬ sehˇ Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ neh luˆ laˇ-awˇ, Jeˬluˇbeˬ kʼoeˇ deuˬ-euˬ kʼoeˇ taˆ naˬ leˇ-euˬ meh.

¹⁹Aˬ yawꞈ maꞈ aˬ dahˇ dahˇ diˬ diˬ laˇ-awˇ, ngaˇ haw haw-ehˇ jawˇ ngeh zaw diˇ-euˬ meh. Aˇ beuˆ kʼoeˇ deuˬ kʼawꞈ caw teh gʼeh-euˬ meh. Uˬ duˬ tahˬ nymˇ nymˇ ma-euˬ nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ-ahˇ aˬ yawꞈ maꞈ naˬ leˇ-awˇ, Iˇsaˬleˬlaˆ Miˬyehˇ-euˬ yaw shehꞈ kʼahˬ sehˇ kʼoeˇ, aˬ yawꞈ maꞈ-euˬ kʼoeˇ taˆ jaˆ luꞈ-eu meh.

²⁰Aˬ yawꞈ maꞈ-aˬ, Ceˬbaˬ lawˇ baˬ dawˬ peh Iˇsaˬleˬlaˆ Miˬyehˇ-euˬ uˬ moˆ ngaˬ neh mawˇ-euˬ Jeˬluˇbeˬ kʼoeˇ deuˬ meh.

²¹Aˬ yawꞈ mawˇ yawꞈ myaˆ pyawˬ oeˬ pyawˬ tsoꞈ-awˇ, aˬ dahˇ oeˬ dahˇ tsoꞈ-eu meh. Aˬ dahˇ aˬ yawꞈ dahˇ yawꞈ-euˬ uˬ moˆ, tsawˇ haˬ zaˬ-euˬ aˬ laꞈ-ahˇ duˇ-eu aˬ laꞈ tiˬ laꞈ tsoꞈ-eu meh.

²²Aˬ yawꞈ maꞈ-euˬ myaˆ pyawˬ-aˬ, Ceˬbaˬ lawˇ baˬ dawˬ peh ngaˬ neh mawˇ-euˬ kʼoeˇ deuˬ-ahˇ duˇ-eu meh. Jeˬluˇbeˬaˬ yawꞈ mawˇ yawꞈ, mehˬ hu paw dawˇ coe ni iˇ gʼeh-euˬ meh.