Read Akha Yeˬsaˬgeˬlaˇ 11 Bible Online

Yeˬsaˬgeˬlaˇ 11 - Akha bible

Yeˬsaˬgeˬlaˇ 11

¹Miˬyehˇ-euˬ yaw sahˇ ngaˬ-ahˇ ciˬ diˇ-awˇ, Uˬ duˬ tahˬ nymˇ nymˇ ma-euˬ nahˇ ma doˆ kʼehˬ paw jaˆ-eu lahˇ kʼehˬ-ahˇ sheuˬ gʼeh nehˬ laꞈ-euˬ meh. Lahˇ kʼehˬ dawˬ peh, miˇ kʼahˬ zaˬ kʼoeˇ taˆ aˬ yuiꞈ aˬ tsu geuꞈ luꞈ-eu nyiˬ gʼaˬ pyeuꞈ-eu, Aˬzuˆ-euˬ aˬ li Yaˬzaˬniˇ hawˇ-eu Baˬnaˇyaˬ-euˬ aˬ li Peˬlaˬtiˇ aˬ nyaꞈ ahˇ leˇ-ehˇ, tsawˇ haˬ nyiˬ tseˇ ngaˬ gʼaˬ jawˇ luꞈ gaˇ ngaˇ mawˇ-euˬ ma.

²Miˬyehˇ ngaˬ-ahˇ ehˇ-eu, “Tsawˇ haˬ zaˬ-oˇ, tsawˇ haˬ heu deuˬ yaw haiˬ jeˬ mˇ-eu lehˇ bawˬ uˇ luꞈ-awˇ, meuˬ heu meuˬ laꞈ kʼoeˇ maˬ muiˬ-eu nui noeˬ nui duˇ deuˬ biꞈ luꞈ-eu meh.

³Aˬ yawꞈ maꞈ heu loꞈ-ehˇ ehˇ luꞈ meh. ‘Gʼawˬ myahˇ maˬ gʼeh-ehˇ, aˬ dui nymˇ paˇ ya tsoˆ tehꞈ-a. Meuˬ heu meuˬ-aˬ, gʼawˬ nyoeˇ oeˬ lahˬ-ahˇ duˇ-awˇ aˬ dui-aˬ, oeˬ lahˬ laꞈ kʼoeˇ ahˇ-eu shaˬ jiˇ-ahˇ duˇ-eu ma. Ehˇ kʼawꞈ, oeˬ lahˬ laꞈ kʼoeˇ ahˇ-eu miˇ neh, aˬ dui-ahˇ miˬ dzaˬ puiˆ laˇ gaˇ maˬ keuˆ-a’ lehˇ ehˇ luꞈ meh.

⁴“Kʼoeˇ miˇ neh Tsawˇ haˬ zaˬ-oˇ, nymˬ-mˇ aˬ yawꞈ maꞈ-ahˇ bi noeˬ shaˬ-eu gaˇ kawˆ pyeuꞈ-eu ngaˬ-euˬ dawˬ ngehˬ dah nehˬ-awˬ.”

⁵Kʼoeˇ naˇ, Sahˬpaˬ Miˬyehˇ yaw sahˇ ngaˬ-euˬ kʼoeˇ taˆ keuˆ le-awˇ, heu loꞈ-ehˇ ngehˬ dah-awˬ lehˇ, Sahˬpaˬ Miˬyehˇ ngaˬ-ahˇ ehˇ-eu meh. “Iˇsaˬleˬlaˆ tsawˇ haˬ deuˬ-oˇ, naw maꞈ ngehˬ luꞈ tmˇ luꞈ-eu gaˇ kawˆ hawˇ-eu, naw maꞈ mˇ-eu shaˇ-eu lehˇ gʼeh-eu gaˇ kawˆ ngaˇ siˬ nya jiˇ ma.

⁶Meuˬ heu meuˬ laꞈ kʼoeˇ naw maꞈ tsawˇ haˬ aˇ dzehˬ sehꞈ dzeuˇ-euˬ miˇ neh, gaˇ ma doe ni tsawˇ shiˇ ga byah taˬ-euˬ meh.

⁷“Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, naw maꞈ-ahˇ heu loꞈ-ehˇ ehˇ-eu ma. Meuˬ heu meuˬ-aˬ, gʼawˬ nyoeˇ oeˬ lahˬ-ahˇ duˇ-eu ngeuˇ meh. Ehˇ kʼawꞈ, shaˬ jiˇ aˬ geu-a. Naw maꞈ neh sehꞈ dzeh taˬ-euˬ tsawˇ haˬ kʼoeˇ deuˬ-a loˇ. Naw maꞈ heu gaˇ maˬ ya jawˇ-a. Meuˬ-euˬ laꞈ nyiˇ paw naw maꞈ-ahˇ ngaˇ biˬ doˆ ma.

⁸Naw maꞈ mi cehˇ-ahˇ guˆ miˇ-a loˇ. Naw maꞈ-ahˇ guiˇ bi deuˆ le-eu gʼaˇ duˬ, mi cehˇ tuˆ tehˬ taˬ-euˬ tsawˇ haˬ deuˬ ngaˇ pyehˬ gʼeh leꞈ ma.

⁹Naw maꞈ-ahˇ ngaˇ meuˬ laꞈ nyiˇ tsahˇ doˆ-awˇ, aˬ cawˬ tsawˇ jeuˬ-euˬ laꞈ-ahˇ a nehˬ ma. Naw maꞈ bi shiˇ-eu gʼaˇ duˬ ngaˇ yaˇ kʼaˬ daˇ gʼaˬ taˬ-euˬ ma.

¹⁰Naw maꞈ-aˬ, yawˬ ha-euˬ miˇ kʼahˬ laꞈ kʼoeˇ guiˇ deuˆ gaˇ bi deuˆ sehꞈ tehꞈ-a. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ, yawˬ gʼaˬ na luꞈ ya siˬ duˬ tehꞈ-a.

¹¹Gʼawˬ nyoeˇ oeˬ lahˬ laꞈ kʼoeˇ ahˇ-eu shaˬ jiˇ-ahˇ, gʼawˬ nyoeˇ oeˬ lahˬ neh loꞈ piˇ taˬ-euˬ loꞈ-ehˇ, meuˬ heu meuˬ naw maꞈ-ahˇ maˬ loꞈ piˇ nya-aˇ. Iˇsaˬleˬlaˆ miˇ kʼahˬ laꞈ kʼoeˇ naw maꞈ aˬ geu coeˇ-ahˇ jawˇ kʼawꞈ, naw maꞈ-ahˇ ngaˇ kʼehˬ nehˬ kʼaˆ nehˬ ma.

¹²Ngaˇ Sahˬpaˬ Miˬyehˇ pyeuꞈ-eu gaˇ kawˆ hawˇ-eu, dawˬ peh jawˇ-eu tsawˇ jeuˬ deuˬ-euˬ zahˇ sahˇ kʼoꞈ-ahˇ naw maꞈ caw teh-eu jeˬ-aˬ, ngaˬ-euˬ zahˇ sahˇ kʼoꞈ-ahˇ puiˬ-awˇ, ngaˬ-euˬ ehˇ dawˬ maˬ naˇ haˬ geuꞈ gaˇ duˇ-eu gaˇ kawˆ, naw maꞈ ya siˬ duˬ tehꞈ-a.”

¹³Ngaˇ Miˬyehˇ gʼaˇ duˬ ngehˬ dah luꞈ ngeh, Baˬnaˇyaˬ-euˬ aˬ li Peˬlaˬtiˇ shiˇ-euˬ meh. Ngaˇ miˇ tsa moꞈ tsahˬ-ehˇ coˬ lah-awˇ, “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, Iˇsaˬleˬlaˆ miˇ kʼahˬ laꞈ kʼoeˇ kʼaˇ dzeˇ-eu tsawˇ haˬ yawˬ gʼaˬ na luꞈ sehꞈ jiˇ-eu gʼeh te loˇ” lehˇ guˇ-euˬ ma.

¹⁴Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁵“Tsawˇ haˬ zaˬ-oˇ, nawˇ hawˇ-eu nawˬ nehˬ-ehˇ aˬ cawˬ miˇ kʼahˬ-ahˇ bi nyehꞈ daˆ laꞈ-euˬ nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ gaˇ kawˆ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ ja luꞈ meh. ‘Aˬ cawˬ miˇ kʼahˬ-ahˇ bi nyehꞈ byoˆ gʼeh-euˬ tsawˇ haˬ kʼoeˇ deuˬ-aˬ, gaˇ mahˇ kaˬ-iˇ-euˬ miˇ neh, Sahˬpaˬ Miˬyehˇ-ahˇ maˬ gʼoe miˇ coeˇ-a. Miˇ kʼahˬ heu kʼahˬ aˬ yawꞈ aˬ dui-ahˇ biꞈ tsehˆ nehˬ laꞈ gʼaˬ-euˬ meh’ lehˇ ja luꞈ meh.

¹⁶“Nymˬ-mˇ poˆ jawˇ, nawˬ nehˬ-ehˇ tiˬ kawˆ loꞈ-ehˇ bi nyehꞈ daˆ laꞈ-euˬ tsawˇ haˬ deuˬ-ahˇ, ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Aˬ yawꞈ maꞈ-ahˇ gaˇ mahˇ kaˬ-eu tsawˇ jeuˬ deuˬ jawˇ gaˇ biˇ jawˇ laˇ-awˇ, aˬ cawˬ miˇ kʼahˬ doe ni bi jawˇ byaˆ-euˬ gʼaˬ ngaˇ ma. Ehˇ kʼawꞈ, nymˬ-mˇ poˆ jawˇ-aˬ, aˬ yawꞈ maꞈ kʼaˇ jawˇ luꞈ-eu miˇ kʼahˬ laꞈ kʼoeˇ aˬ yawꞈ maꞈ nehˬ-ehˇ ngaˇ jawˇ ma.

¹⁷Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ aˬ yawꞈ maꞈ-ahˇ ehˇ nehˬ-awˇ, Ngaˬ neh teh byaˆ-awˇ bi jawˇ-euˬ miˇ kʼahˬ deuˬ laꞈ kʼoeˇ neh aˬ yawꞈ maꞈ-ahˇ ngaˇ sheuˬ kʼoꞈ-awˇ, Iˇsaˬleˬlaˆ miˇ kʼahˬ biꞈ kʼoꞈ nehˬ ma.

¹⁸Aˬ yawꞈ maꞈ gʼoꞈ le ngeh, aˬ yawꞈ maꞈ kʼaˇ ya mawˇ-eu jawꞈ dui dui-awˇ nui daˆ daˆ laˇ paˬ-ehˇ gʼeh-eu tahˬ pahˬ aˬ ma mawˇ kawˇ deuˬ, aˬ yawꞈ maꞈ ya biˬ dzeh jiˇ meh.

¹⁹Aˬ yawꞈ maꞈ-ahˇ ngaˇ nui ma saꞈ laˇ yaw shuiꞈ biꞈ paˇ nehˬ ma. Kʼaˬ lo loꞈ-ehˇ gʼahˇ-eu aˬ yawꞈ maꞈ-euˬ nui ma ngaˇ yuˇ dzeh-awˇ, shaˬ jiˇ loꞈ-ehˇ nahˬ-eu nui ma dawˆ paˇ nehˬ ma.

²⁰Kʼoeˇ ngeh jawˇ, ngaˬ-euˬ zahˇ dawˬ kʼoꞈ dawˬ mehˬ nah aˬ yawꞈ maꞈ caw teh-awˇ, ngaˬ-euˬ dawˬ-ahˇ saˇ jaˇ ziꞈ-eu laꞈ kʼoeˇ naˇ haˬ geuꞈ tehꞈ-a. Aˬ yawꞈ maꞈ ngaˬ-euˬ tsawˇ jeuˬ pyeuꞈ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ tehꞈ-a.

²¹Ehˇ kʼawꞈ, jawꞈ dui dui-awˇ nui daˆ daˆ laˇ paˬ-ehˇ gʼeh-eu tahˬ pahˬ aˬ ma mawˇ kawˇ deuˬ-ahˇ uˬ duˬ kʼaˇ tahˬ-eu tsawˇ haˬ deuˬ-ahˇ, ngaˇ kʼehˬ nehˬ kʼaˆ nehˬ ma. Aˬ yawꞈ maꞈ neh mˇ-euˬ shaˇ-euˬ loꞈ-ehˇ, aˬ yawꞈ maꞈ-ahˇ ngaˇ kʼehˬ nehˬ kʼaˆ nehˬ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

²²Jeˬluˇbeˬ kʼoeˇ deuˬ zaw diˇ-awˇ, aˇ beuˆ kʼoeˇ deuˬ kʼawꞈ aˬ yawꞈ maꞈ nehˬ-ehˇ le gʼeh leꞈ-euˬ meh. Iˇsaˬleˬlaˆ Miˬyehˇ-euˬ yaw shehꞈ kʼahˬ sehˇ Jeˬluˇbeˬ kʼoeˇ deuˬ-euˬ kʼoeˇ taˆ jaˆ-eu meh.

²³Kʼoeˇ naˇ Sahˬpaˬ Miˬyehˇ-euˬ yaw shehꞈ kʼahˬ sehˇ kʼoeˇ Yeˬluˇsaˬlehˬ meuˬ-ahˇ neh luˆ laˇ-awˇ, nahˇ ma doˆ kʼehˬ paw jaˆ-eu gawˬ jawˬ paw le-euˬ meh.

²⁴Yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Miˬyehˇ ngaˬ-ahˇ ciˬ diˇ-awˇ, Baˬbuˇloˬ miˇ kʼahˬ-ahˇ bi nyehꞈ gʼeh-euˬ tsawˇ haˬ deuˬ jawˇ gaˇ sheuˬ kʼoꞈ gʼeh nehˬ laꞈ-euˬ meh. Kʼoeˇ naˇ, yaw sahˇ laꞈ kʼoeˇ ya siˬ ya mawˇ-eu jeˬ jiˇ-euˬ meh.

²⁵Sahˬpaˬ Miˬyehˇ neh ngaˬ-ahˇ kʼaˇ mehˬ nehˬ laꞈ-euˬ jeˬ, Baˬbuˇloˬ miˇ kʼahˬ-ahˇ bi nyehꞈ ka gʼeh-awˇ jawˇ luꞈ-eu deuˬ-ahˇ ngaˇ dzawˇ nehˬ-euˬ ma.