Read Akha Yeˬsaˬgeˬlaˇ 16 Bible Online

Yeˬsaˬgeˬlaˇ 16 - Akha bible

Yeˬsaˬgeˬlaˇ 16

¹Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh.

²“Tsawˇ haˬ zaˬ-oˇ, Yeˬluˇsaˬlehˬ meuˬ-ahˇ aˬ yawꞈ neh mˇ-euˬ jawꞈ dui dui-eu iˬ baˇ deuˬ toeˬ mehˬ nehˬ-awˬ.

³Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ nawˬ-ahˇ heu loꞈ-ehˇ ehˇ luꞈ meh lehˇ, Yeˬluˇsaˬlehˬ meuˬ-ahˇ ehˇ nehˬ-awˬ. “Nawˇ-aˬ, Kaˬnaˬ miˇ kʼahˬ-ahˇ dehꞈ le-euˬ meh. Nawˬ da-aˬ, Aˬmawˇliˆ tsawˇ jeuˬ pyeuꞈ-awˇ, nawˬ ma-aˬ, Heˬtaˆ tsawˇ jeuˬ meh.

⁴Nawˇ dehꞈ le ngeh, nawˬ-euˬ caˆ tahˬ tiˬ gʼaˬ-iˬ maˬ pyehˆ-ehˇ, iˇ cuꞈ kʼawꞈ maˬ juiꞈ nehˬ-aˬ. Nawˬ-ahˇ saˬ deuꞈ sawˆ nehˬ-eu gʼaˬ maˬ jawˇ-ehˇ, bui loˬ loˬ nehˬ-eu gʼaˬ kʼawꞈ maˬ jawˇ-a.

⁵Nawˬ-ahˇ kʼoeˇ loꞈ-ehˇ jahˇ nehˬ paˬ-ehˇ gʼawˬ shaˬ gaˬ nehˬ-eu tiˬ gʼaˬ-iˬ maˬ jawˇ-a. Nawˇ dehꞈ le ngeh, nawˬ-ahˇ gaˬ-eu tiˬ gʼaˬ-iˬ maˬ jawˇ-ehˇ, deh ga-ahˇ ciˬ dzeh-awˇ bi ga-euˬ meh.

⁶Kʼoeˇ naˇ, nawˬ-euˬ dawˬ peh ngaˇ oe tsehˆ ngeh, nawˬ-euˬ shiˬ laꞈ kʼoeˇ nawˇ teuˆ teuˆ-ehˇ jawˇ gaˇ ngaˇ mawˇ-euˬ ma. Nawˬ-euˬ shiˬ lah lehꞈ lah gʼa-awˇ jawˇ ngeh, nawˬ-ahˇ ngaˇ maˬ bi shiˇ-aˬ.

⁷Deh ga-ahˇ dehꞈ-eu baw duˆ loꞈ-ehˇ, nawˬ-ahˇ ngaˇ bi mehˇ laˇ-euˬ ma. Nawˇ goˇ laˇ loˆ laˇ-awˇ, miˬ daꞈ daꞈ laˇ-euˬ meh. Nawˬ-euˬ kʼahˬ dzm laˇ-awˇ, uˬ duˬ tsehˇ kʼahˇ mahˇ le-euˬ meh. Ehˇ kʼawꞈ, nawˇ neˇ myawˆ ni jawˇ-a siˬ.

⁸“Ngaˇ yawˬ poˆ yawˬ paˇ oe tsehˆ ngeh, nawˇ cawˬ shaˇ baw yamˬ tsaˬ laˇ taˬ-euˬ meh. Neˇ myawˆ ni gʼeh-eu nawˬ-euˬ gʼawˇ mawˇ-ahˇ, ngaˬ-euˬ pehˇ kʼahˬ neh tsahˇ lahˇ nehˬ-awˇ, nawˬ-ahˇ sheuˬ ma lehˇ saˇ jaˇ biꞈ yaꞈ-euˬ ma. Ngeuˇ ma. Nawˬ-ahˇ sheuˬ-eu gʼaˇ duˬ ngaˇ saˇ jaˇ dzaˬ gʼaˬ-awˇ, nawˇ ngaˬ-euˬ zaˬ kʼaˬ pyeuꞈ laˇ gʼaˬ-euˬ ma” lehˇ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

⁹“Kʼoeˇ naˇ, ngaˇ iˇ cuꞈ ciˬ-awˇ, nawˬ-euˬ shiˬ tsiˬ shawˇ dzeh-awˇ, saˬ loˬ tsiˇ lehꞈ nehˬ-euˬ ma.

¹⁰Aˇ boꞈ aˇ yehˆ yehˆ taˬ-euˬ pi di di mahˇ bi dm-awˇ, muiˬ dui dui-eu shaˬ kʼoˆ neh guꞈ taˬ-euˬ sehˬ nawˆ bi nawˬ-euˬ ma. Shawˇ jehˆ ni gʼeh-eu saˬ paˇ neh guꞈ taˬ-euˬ uˬ dzahˬ bi dzahˬ-awˇ, boeˬ kahˇ neh zaꞈ taˬ-euˬ pehˇ kʼahˬ bi dm-euˬ ma.

¹¹Myawˬ guˇ deuˬ bi geuꞈ-awˇ, laꞈ duꞈ lahˇ dah nyehꞈ duꞈ nyehꞈ dah nehˬ-euˬ ma.

¹²Naˇ mehˇ naˇ yoˆ hawˇ-eu naˬ tsiˇ naˬ yoˆ bi geuꞈ kuꞈ-awˇ, muiˬ dui dui-eu shuiˇ uˬ kʼoˆ bi kʼoˆ-euˬ ma.

¹³Pyuˇ hawˇ-eu shuiˇ myawˬ guˇ deuˬ nawˇ geuꞈ byah luꞈ-awˇ, shawˇ jehˆ ni gʼeh-eu saˬ paˇ neh guꞈ-awˇ, aˇ boꞈ aˇ yehˆ yehˆ taˬ-euˬ muiˬ dui dui-eu mehˬ tsoeˬ hawˇ-eu, boeˬ kahˇ neh zaꞈ taˬ-euˬ mehˬ tsoeˬ tehꞈ-ehˇ aˬ myah luꞈ nawˇ dm-euˬ meh. Muiˬ dui dui-eu cehˇ meu neh jahˇ taˬ-euˬ kaˬ muˇ nawˇ ya dzaˬ-awˇ, byaˬ byaˬ uiˇ hawˇ-eu saˬ loˬ tsiˇ tiˬ jawˇ-iˬ maˬ tsehˆ-iˇ haw-aˬ. Nawˇ aˇ dzehˬ dzeuˇ ni aˇ gʼehˇ muiˬ-awˇ, sahˬpaˬ-euˬ miˬ zaˬ loꞈ-ehˇ keuˆ leˇ taˬ-euˬ meh.

¹⁴Nawˬ-ahˇ ngaˬ neh laˆ muiˬ nehˬ-euˬ miˇ neh, miˇ kʼahˬ yawˬ kʼahˬ na luꞈ laꞈ kʼoeˇ nawˇ aˇ gʼehˇ muiˬ-eu tsawˇ myahˇ doˆ dui dui meh” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

¹⁵“Ehˇ kʼawꞈ, nawˇ aˇ gʼehˇ muiˬ-awˇ tsawˇ myahˇ doˆ dui dui miˇ-a lehˇ noeˬ noeˬ-ehˇ, kʼaˇ puˬ kʼaˇ mawˇ le-eu tsawˇ haˬ nehˬ-ehˇ yuꞈ-euˬ meh.

¹⁶Nawˬ-euˬ mehˬ tsoeˬ tiˬ paˆ na deuˬ nawˇ yuˇ-awˇ, nawˇ uˬ duˬ tahˬ-eu jawˇ duˬ-ahˇ laˆ muiˬ-awˇ, meh maˬ laˇ loꞈ-ehˇ kʼaˇ mawˇ le-eu gʼaˬ nehˬ-ehˇ joe-euˬ meh.

¹⁷Ngaˬ neh biꞈ-euˬ pyuˇ hawˇ-eu shuiˇ myawˬ guˇ deuˬ neh, kʼaˬ dzeˇ zaˬ tahˬ pahˬ aˬ ma mawˇ kawˇ nawˇ jahˇ-awˇ, kʼoeˇ nehˬ-ehˇ nawˇ bahˬ-euˬ meh.

¹⁸Ngaˬ neh biꞈ-euˬ aˇ boꞈ aˇ yehˆ yehˆ-eu mehˬ tsoeˬ deuˬ, tahˬ pahˬ aˬ ma mawˇ kawˇ kʼoeˇ deuˬ-ahˇ nawˇ sheu lahˇ-awˇ, ngaˬ neh biꞈ-euˬ saˬ loˬ tsiˇ hawˇ-eu tsiˇ yaw saw jeˬ neh doꞈ damˬ nehˬ-euˬ meh.

¹⁹Ngaˬ neh nawˬ-ahˇ biꞈ-euˬ dzaˬ dzaˬ dawˇ dawˇ deuˬ pyeuꞈ-eu, muiˬ dui dui-eu cehˇ meu, saˬ loˬ tsiˇ, byaˬ byaˬ uiˇ, heu deuˬ nawˇ yuˇ-awˇ, nawˬ-euˬ myaˆ pyawˬ naˇ mehˇ gʼaˇ duˬ tahˬ pahˬ aˬ ma mawˇ kawˇ deuˬ-ahˇ nawˇ damˬ nehˬ-euˬ meh” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

²⁰Kʼoeˇ naˇ, nawˬ neh baw-euˬ aˇ nyaꞈ-euˬ aˬ buˇ aˬ li deuˬ tahˬ pahˬ aˬ ma mawˇ kawˇ kʼoeˇ deuˬ-ahˇ nawˇ lawˇ nehˬ-euˬ meh. Nawˇ meh maˬ laˇ geuꞈ-euˬ tehꞈ-ehˇ kʼawꞈ maˬ gʼaˬ-a siˬ loˇ.

²¹Ngaˬ-euˬ aˬ buˇ aˬ li deuˬ-ahˇ sehꞈ-awˇ, tahˬ pahˬ aˬ ma mawˇ kawˇ-ahˇ aˬ jeˬ miˇ neh lawˇ nehˬ te.

²²Nawˇ meh maˬ laˇ geuꞈ-awˇ dehꞈ doeˇ dui dui luꞈ ngeh, aˇ hu nawˇ yaw nyiˇ gʼeh ngeh neˇ myawˆ ni shiˬ laꞈ kʼoeˇ teuˆ teuˆ-ehˇ jawˇ-euˬ gaˇ, tiˬ jawˇ-iˬ maˬ noeˬ mawˇ-a.”

²³Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nawˇ ya noeˬ shaˬ dui dui tehꞈ-a. Nawˇ ya noeˬ shaˬ dui dui tehꞈ-a. Yaw haiˬ jeˬ dawˬ tawˆ luꞈ nawˇ mˇ jiˇ-euˬ meh.

²⁴Kʼoeˇ uˬ taꞈ, gaˇ ma aˬ yawꞈ kahˇ yawꞈ-euˬ gaˇ dzeˇ, tahˬ pahˬ aˬ ma mawˇ kawˇ-ahˇ uˬ duˬ tahˬ-eu jawˇ duˬ nawˇ tsoˆ byah-awˇ, meh maˬ laˇ dehꞈ pyeuꞈ taˬ-euˬ meh.

²⁵Nawˬ-euˬ aˇ gʼehˇ muiˬ-eu jeˬ lah yaˬ-ahˇ nawˇ gʼeu pahˬ-awˇ, kʼaˇ mawˇ le-eu tsawˇ haˬ-ahˇ nawˬ-euˬ gʼawˇ mawˇ dehˬ nuiꞈ nehˬ-eu meh. Tiˬ nah taꞈ-ehˇ tiˬ nah nawˇ dehꞈ jawꞈ dui dui luꞈ meh.

²⁶Nawˬ-ahˇ miˇ kaˬ taꞈ-eu kʼaˬ miˬ sheu gaˇ cehˇ gʼa-eu Iˇjiˇtuˆ tsawˇ haˬ deuˬ-ahˇ nawˇ sheuˬ yuꞈ-awˇ, ngaˇ nui ma bi pehˇ-eu lehˇ, nawˇ meh maˬ laˇ geuꞈ dzaˬ luꞈ-eu meh.

²⁷“Nymˬ-mˇ poˆ jawˇ-aˬ, nawˬ-ahˇ kʼehˬ nehˬ kʼaˆ nehˬ-awˇ, ngaˬ neh nawˬ-ahˇ biˇ oꞈ nehˬ-euˬ guiˬ lahˬ jeˬ biˇ yuˇ kʼoꞈ doˆ-eu gʼaˇ duˬ ngaˇ aˬ laꞈ cawˬ diˇ taˬ-euˬ ma. Nawˬ-ahˇ bye-awˇ, nawˇ dehꞈ jawꞈ gaˇ nui daˆ daˆ luꞈ-eu Piˇliˇtiˆ tsawˇ haˬ deuˬ-euˬ laꞈ-ahˇ, nawˬ-ahˇ ngaˇ a nehˬ ma.

²⁸“Aˬ cawˬ kʼoeˇ myaˆ ni gʼeh-eu nehˬ-ehˇ yuꞈ-euˬ nawˇ nui kʼahˇ maˬ shiˇ-eu miˇ neh, Aˬshuˇliˆ tsawˇ haˬ deuˬ-euˬ mehˬ nah nawˇ caw teh-eu meh. Kʼoeˇ deuˬ nehˬ-ehˇ paˇ yuꞈ gʼaˬ-euˬ kʼawꞈ, nawˇ nui kʼahˇ maˬ shiˇ-a siˬ.

²⁹Jeˬ gaꞈ jeˬ ka gʼeh-eu tsawˇ jeuˬ pyeuꞈ-eu Baˬbuˇloˬ tsawˇ haˬ deuˬ nehˬ-ehˇ nawˇ meh maˬ laˇ geuꞈ-awˇ jawˇ-euˬ meh. Ehˇ kʼawꞈ, kʼoeˇ deuˬ kʼawꞈ, nawˬ-ahˇ nui kʼahˇ maˬ laˆ shiˇ nehˬ nya-a.”

³⁰Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Shaꞈ dawˇ maˬ baw-eu meh maˬ laˇ loꞈ-ehˇ kʼoeˇ deuˬ dawˬ tawˆ luꞈ nawˇ mˇ jiˇ-euˬ meh.

³¹Gaˇ ma yawˬ kahˇ na luꞈ tahˬ pahˬ aˬ ma mawˇ kawˇ-ahˇ uˬ duˬ tahˬ-eu jawˇ duˬ nawˇ tsoˆ doe-awˇ, meh maˬ laˇ geuꞈ doe jiˇ-euˬ meh. Ehˇ kʼawꞈ, meh maˬ laˇ nui deuˬ loꞈ-ehˇ, pyuˇ za laˇ ni nawˇ meh maˬ laˇ geuꞈ-euˬ maˬ ngeuˇ-a.

³²Yawˬ ha-euˬ kʼaˬ dzeˇ zaˬ-ahˇ maˬ gaˬ ni, aˬ cawˬ nehˬ-ehˇ joe-eu zaˬ miˬ zaˬ-ahˇ nawˇ duˇ-eu meh.

³³Meh maˬ laˇ geuꞈ-eu tsawˇ haˬ deuˬ pyuˇ za-eu meh. Ehˇ kʼawꞈ, nawˇ-aˬ, nawˇ jawˇ gaˇ laˇ-eu tsawˇ haˬ deuˬ-ahˇ laˬ sawˬ biꞈ nehˬ-awˇ, yawˬ paw yawˬ coeˇ na luꞈ jawˇ-eu tsawˇ haˬ deuˬ, nawˬ nehˬ-ehˇ yuꞈ laˇ ni, laꞈ nmꞈ nmꞈ nehˬ-eu meh.

³⁴Nawˇ-aˬ, aˬ cawˬ-ahˇ maˬ duˇ-eu meh maˬ laˇ meh. Aˬ cawˬ neh guˆ tsiˬ nyehꞈ-awˇ nawˬ-ahˇ meh maˬ laˇ bi geuꞈ-euˬ maˬ ngeuˇ-a. Aˬ cawˬ nawˬ-ahˇ pyuˇ biꞈ-euˬ maˬ ngeuˇ-a. Nawˇ aˬ cawˬ-ahˇ pyuˇ biꞈ-awˇ geuꞈ luꞈ-eu meh. Ngeuˇ meh. Nawˇ-aˬ, aˬ cawˬ-ahˇ maˬ duˇ-eu meh maˬ laˇ meh.

³⁵Nymˬ-mˇ poˆ jawˇ, Yeˬluˇsaˬlehˬ meh maˬ laˇ-oˇ, Sahˬpaˬ Miˬyehˇ ehˇ gaˇ naˇ haˬ sheˇ.

³⁶Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nawˇ mehˬ tsoeˬ neˇ myawˆ ni lehˆ dzeh-awˇ, meh maˬ laˇ loꞈ-ehˇ, nawˇ mawꞈ leˇ-eu tsawˇ haˬ deuˬ hawˇ-eu nui daˆ daˆ laˇ paˬ-ehˇ gʼeh-eu tahˬ pahˬ aˬ ma mawˇ kawˇ deuˬ-ahˇ, nawˬ-euˬ gʼawˇ mawˇ biꞈ nehˬ-awˇ, nawˬ-euˬ zaˬ deuˬ-ahˇ kʼawꞈ nawˇ sehꞈ-awˇ, tahˬ pahˬ aˬ ma mawˇ kawˇ-ahˇ lawˇ nehˬ-euˬ meh.

³⁷Nawˇ kʼoeˇ loꞈ-ehˇ jahˇ-eu baˬ da neh, yaw beh nawˬ-euˬ zaˬ kʼaˬ kʼaˇ ngeuˇ-eu dawˬ tawˆ luꞈ, nawˇ gaˬ-eu deuˬ maˬ ehˇ, bye-eu deuˬ maˬ ehˇ, ngaˇ sheuˬ uiˬ laꞈ jiˇ ma. Aˬ yawꞈ maꞈ-ahˇ nawˬ-euˬ tiˬ jawˬ sheuˬ uiˬ-awˇ, nawˬ-ahˇ mehˬ tsoeˬ neˇ myawˆ ni lehˆ dzeh-awˇ bi haw ma.

³⁸Aˬ cawˬ aˬ da nehˬ-ehˇ bahˬ-euˬ jeˬ hawˇ-eu meh maˬ laˇ geuꞈ-euˬ jeˬ aˇ poeˬ, ngaˇ nawˬ-ahˇ yaˇ kʼaˬ daˇ-awˇ, ngaˇ nui ma pehˇ dui dui-eu laꞈ kʼoeˇ, shiˇ gaˇ keuˆ ni nawˬ-ahˇ ngaˇ kʼehˬ ma.

³⁹Ngaˇ nawˬ-ahˇ aˬ yawꞈ maꞈ-euˬ aˬ laꞈ laꞈ kʼoeˇ a nehˬ-awˇ, nawˬ neh meh maˬ laˇ geuꞈ-euˬ jawˇ duˬ deuˬ hawˇ-eu tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ jawˇ duˬ deuˬ-ahˇ, aˬ yawꞈ maꞈ laˆ cawˆ tehꞈ-a. Nawˇ dm luꞈ-eu mehˬ tsoeˬ hawˇ-eu nawˇ geuꞈ luꞈ-eu myawˬ guˇ deuˬ aˬ yawꞈ maꞈ lehˆ doˆ jiˇ-awˇ, neˇ myawˆ ni bi jawˇ yaꞈ tehꞈ-a.

⁴⁰“Nawˬ-ahˇ kʼaˬ lo bi biˬ-eu gʼaˇ duˬ tsawˇ haˬ aˇ maꞈ tiˬ maꞈ sheuˬ laꞈ-awˇ, tsawˇ haˬ kʼoeˇ deuˬ nawˬ-ahˇ deuˆ tm deuˆ tmˇ jiˇ tehꞈ-a.

⁴¹Aˬ yawꞈ maꞈ nawˬ-euˬ nymˇ-ahˇ miˬ dzaˬ dzah puiˆ dzeh-awˇ, zaˬ miˬ zaˬ deuˬ baˬ maꞈ puˇ jeˬ-ehˇ jawˇ-eu mehˬ shi nawˬ-ahˇ kʼehˬ nehˬ kʼaˆ nehˬ tehꞈ-a. Nawˇ meh maˬ laˇ maˬ paˇ geuꞈ ni maˬ ehˇ, nawˇ mawꞈ leˇ-eu deuˬ-ahˇ nawˇ laꞈ sawˬ maˬ paˇ biꞈ ni maˬ ehˇ, ngaˇ jahˇ ma.

⁴²Kʼoeˇ ngeh jawˇ, ngaˇ nui ma pehˇ-eu taˬ leˇ-awˇ, ciˬ cuˇ ni jawˇ ma. Nui ma naˇ-awˇ myaˆ naˆ-eu jeˬ maˬ paˇ bi ahˇ ma.

⁴³Nawˇ zaˬ guˬ pyeuꞈ ngeh ngaˬ neh nawˬ-ahˇ mˇ nehˬ-euˬ jeˬ nawˇ ngehˇ jiˇ-awˇ, nawˬ neh kʼaˇ mˇ-euˬ yawˬ jeˬ na luꞈ ngaˬ-ahˇ nui ma laˆ pehˇ nehˬ laꞈ-euˬ meh. Kʼoeˇ miˇ neh, kʼoeˇ deuˬ dawˬ tawˆ luꞈ aˇ poeˬ nawˬ-ahˇ ngaˇ paˇ jahˇ kʼoꞈ-euˬ ma. Kʼaˇ jawꞈ kʼaˇ doeˇ-eu jeˬ mˇ-euˬ uˬ taꞈ-ehˇ, aˬ jeˬ miˇ neh ciˇ piˇ piˇ te” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

⁴⁴Sahˬpaˬ Miˬyehˇ ehˇ-eu, “Yeˬluˇsaˬlehˬ-oˇ, aˬ ma-ahˇ duˇ-eu aˬ buˇ lehˇ aˬ cawˬ nawˬ-ahˇ dawˬ daˬ daˬ tehꞈ-a.

⁴⁵Nawˇ-aˬ, maˇ maˇ ni nawˬ ma-euˬ aˬ buˇ meh. Nawˬ ma-aˬ, yawˬ ha-euˬ kʼaˬ dzeˇ zaˬ hawˇ-eu zaˬ deuˬ-ahˇ nui daˆ daˆ-euˬ meh. Nawˇ-aˬ, nawˬ-euˬ mehˇ nmˇ aˬ buˇ deuˬ-ahˇ duˇ-eu meh. Aˬ yawꞈ maꞈ yawˬ ha-euˬ kʼaˬ dzeˇ zaˬ hawˇ-eu zaˬ deuˬ-ahˇ bye-euˬ meh. Nawˬ ha mehˇ nmˇ-euˬ aˬ ma-aˬ, Heˬtaˆ tsawˇ jeuˬ pyeuꞈ-awˇ aˬ da-aˬ Aˬmawˇliˆ tsawˇ jeuˬ meh.

⁴⁶“Nawˬ-euˬ mehˇ nmˇ aˬ buˇ aˬ yuiꞈ yuiꞈ saˬ gʼaˬ-aˬ, kʼoeˇ taˆ paw jawˇ-eu Saˬmaˬliˆ meuˬ pyeuꞈ-awˇ, aˬ yawꞈ-euˬ aˬ buˇ pyeuꞈ-eu pu deuˬ nehˬ-ehˇ jawˇ luꞈ-eu meh. Nawˬ-euˬ aˬ nyiˇ aˬ buˇ gʼaˬ-aˬ, laꞈ oˆ paw jawˇ-eu Sawˇdoˬ meuˬ pyeuꞈ-awˇ, aˬ yawꞈ-euˬ aˬ buˇ pyeuꞈ-eu pu deuˬ nehˬ-ehˇ jawˇ luꞈ-eu meh.

⁴⁷Aˬ yawꞈ maꞈ-euˬ kuiˇ toꞈ-ahˇ nawˇ caw teh-awˇ, aˬ yawꞈ maꞈ loꞈ-ehˇ ya dehꞈ jawꞈ naˇ, nawˇ nui kʼahˇ shiˇ ma loˇ. Kʼoeˇ naˆ tehꞈ maˬ ngeuˇ-a siˬ. Tiˬ kʼehˇ laˇ kʼehˬ laꞈ kʼoeˇ nawˬ neh kʼaˇ mˇ kʼaˇ shaˇ-euˬ yawˬ jeˬ na luꞈ laꞈ kʼoeˇ, aˬ yawꞈ nyaꞈ naˆ maˬ tseˇ nawˇ dehꞈ doeˇ dui dui-euˬ meh.

⁴⁸“Ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, nawˬ-euˬ aˬ nyiˇ Sawˇdoˬ meuˬ hawˇ-eu aˬ yawꞈ-euˬ aˬ buˇ pyeuꞈ-eu pu deuˬ-aˬ, nawˇ hawˇ-eu nawˬ-euˬ aˬ buˇ pyeuꞈ-eu pu deuˬ naˆ ni yaw haiˬ jeˬ maˬ mˇ keuˆ-aˬ lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

⁴⁹Aˬ yawꞈ hawˇ-eu aˬ yawꞈ-euˬ aˬ buˇ deuˬ-aˬ, nui ma huiˬ kʼaˇ za-eu meh. Aˬ jeˬ miˇ neh ehˇ naˇ, aˬ yawꞈ maꞈ dzaˬ dzaˬ dawˇ dawˇ jaˆ loꞈ-awˇ, nui saˇ oꞈ-eu laꞈ kʼoeˇ ya dehꞈ luꞈ meh. Ehˇ kʼawꞈ, shaˬ zaˬ zahˬ zaˬ deuˬ-ahˇ aˬ yawꞈ maꞈ maˬ caw ba nehˬ-a.

⁵⁰Aˬ yawꞈ maꞈ nui ma huiˬ-eu gʼahˇ-eu laꞈ kʼoeˇ, ngaˇ bye-eu gaˇ mˇ-euˬ miˇ neh, aˬ yawꞈ maꞈ-ahˇ ngaˇ laˆ cawˆ nehˬ-euˬ gaˇ kawˆ nawˇ siˬ duˬ luꞈ meh.

⁵¹“Saˬmaˬliˆ meuˬ-aˬ, nawˬ-euˬ tiˬ paˆ naˆ ni kʼawꞈ iˬ baˇ maˬ mˇ-aˬ. Nawˇ-aˬ, aˬ yawꞈ naˆ maˬ tseˇ dehꞈ jawꞈ dui dui-euˬ meh. Nawˬ neh mˇ bahˬ-euˬ jeˬ-ahˇ shaˇ cehˆ haw naˇ, nawˬ-euˬ mehˇ nmˇ aˬ buˇ kʼoeˇ nyiˬ gʼaˬ iˬ baˇ maˬ ahˇ gaˇ duˇ-eu meh.

⁵²Nymˬ-mˇ poˆ jawˇ-aˬ, shaꞈ dawˇ dui dui-eu jeˬ-ahˇ nawˇ ya daˬ tehꞈ-a. Nawˬ-euˬ iˬ baˇ-aˬ, nawˬ-euˬ mehˇ nmˇ aˬ buˇ kʼoeˇ nyiˬ gʼaˬ-euˬ iˬ baˇ myaˆ maˬ tseˇ myaˬ dui dui-eu miˇ neh, aˬ yawꞈ nyaꞈ iˬ baˇ ahˇ gaˇ maˬ duˇ-a. Shaꞈ dawˇ dui dui-eu jeˬ-ahˇ nawˇ daˬ-awˬ. Aˬ jeˬ miˇ neh naˇ, nawˬ-euˬ mehˇ nmˇ kʼoeˇ nyiˬ gʼaˬ-euˬ iˬ baˇ aˬ cawˬ haw byoˆ gaˇ keuˆ ni, nawˬ-euˬ yaw lehˬ aˇ dzehˬ dzeuˇ-euˬ meh.”

⁵³Yeˬluˇsaˬlehˬ meuˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Aˬ yawꞈ nyaꞈ-ahˇ ngaˇ paˇ bi dehꞈ dzaˬ laˇ ma. Sawˇdoˬ meuˬ hawˇ-eu aˬ yawꞈ-euˬ aˬ buˇ pyeuꞈ-eu pu deuˬ maˬ ehˇ, Saˬmaˬliˆ meuˬ hawˇ-eu aˬ yawꞈ-euˬ aˬ buˇ pyeuꞈ-eu pu deuˬ maˬ ehˇ, bi baw bi za le ma. Nawˬ-ahˇ kʼawꞈ ngaˇ bi baw bi za le ma.

⁵⁴Nawˇ yawˬ haˇ yawˬ ha ya shaꞈ dawˇ tehꞈ-a. Nawˇ ya shaꞈ dawˇ-eu jeˬ baˬ da neh, nawˬ-euˬ mehˇ nmˇ aˬ buˇ kʼoeˇ nyiˬ buˇ dehꞈ dzaˬ-eu jeˬ doˆ dzehˬ laˇ tehꞈ-a.

⁵⁵Aˬ yawꞈ nyaꞈ paˇ baw paˇ za le-awˇ, nawˇ hawˇ-eu nawˬ-euˬ aˬ buˇ pyeuꞈ-eu pu deuˬ-ahˇ kʼawꞈ bi dehꞈ dzaˬ laˇ ma.

⁵⁶Nawˇ dehꞈ dzaˬ ngeh, nawˬ-euˬ aˬ nyiˇ Sawˇdoˬ meuˬ-euˬ gaˇ kawˆ maˬ ja nahˇ-euˬ maˬ ngeuˇ loˇ.

⁵⁷Nawˬ neh mˇ-euˬ yaw haiˬ jeˬ bya cehˆ ni maˬ doˆ laˇ mi naˆ-ehˇ, nawˇ kʼoeˇ loꞈ-ehˇ jahˇ gʼeh-euˬ maˬ ngeuˇ loˇ. Nymˬ-mˇ poˆ jawˇ-aˬ, nawˇ hawˇ-eu aˬ yawꞈ tiˬ kawˆ meh. Eˬdoˬ tsawˇ haˬ, Piˇliˇtiˆ tsawˇ haˬ hawˇ-eu, nawˬ-ahˇ bye-eu nawˬ-euˬ dawˬ peh kʼaˇ jawˇ-eu tsawˇ haˬ deuˬ-euˬ ja bu ja doeˇ duˬ meh.

⁵⁸Nawˬ neh dehꞈ cawˆ dehꞈ doeˇ-euˬ aˇ poeˬ nawˇ ya daˬ poˆ tehꞈ-a” lehˇ Sahˬpaˬ Miˬyehˇ ehˇ-eu meh.

⁵⁹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nawˬ neh saˇ jaˇ dzaˬ-euˬ dawˬ-ahˇ nawˇ yehˬ bawˬ-ehˇ gʼeh-awˇ, dawˬ ma saˇ jaˇ-ahˇ puiˬ-euˬ miˇ neh, nawˬ-ahˇ oꞈ-eu geuˇ-eu loꞈ-ehˇ ngaˇ jahˇ nehˬ ma.

⁶⁰Ehˇ kʼawꞈ, nawˇ zaˬ guˬ pyeuꞈ ngeh nawˬ nehˬ-ehˇ ngaˇ dzaˬ-euˬ dawˬ ma saˇ jaˇ-ahˇ ngaˇ taˬ huiˬ-awˇ, mˬ maˬ maˬ byaˆ zaˇ ziˇ ziꞈ-eu dawˬ ma saˇ jaˇ tiˬ hmˬ, nawˬ nehˬ-ehˇ ngaˇ dzaˬ taꞈ ma.

⁶¹Nawˬ-euˬ aˬ yuiꞈ hawˇ-eu aˬ nyiˇ kʼoeˇ nyiˬ gʼaˬ nawˬ-ahˇ ngaˇ biꞈ kʼoꞈ ngeh, nawˬ neh dehꞈ dzeuˇ mˇ dzeuˇ yaꞈ-euˬ jeˬ-ahˇ nawˇ noeˬ mawˇ-awˇ ya shaꞈ dawˇ tehꞈ-a. Ngaˇ nawˬ nehˬ-ehˇ dzaˬ taˬ-eu dawˬ ma saˇ jaˇ laꞈ kʼoeˇ maˬ ehˇ taˬ-euˬ kʼawꞈ, aˬ nyaꞈ nmˇ-ahˇ nawˬ-euˬ aˬ buˇ loꞈ-ehˇ nawˬ-ahˇ biꞈ-eu ma.

⁶²Nawˬ nehˬ-ehˇ ngaˇ dawˬ ma saˇ jaˇ paˇ dzaˬ ziꞈ-awˇ, ngaˇ Sahˬpaˬ Miˬyehˇ pyeuꞈ-eu nawˇ ya siˬ duˬ tehꞈ-a.

⁶³Nawˬ neh kʼaˇ mˇ kʼaˇ shaˇ lehˬ-euˬ jeˬ-ahˇ ngaˇ iˬ baˇ pyehˬ nehˬ ma. Ehˇ kʼawꞈ nawˬ-euˬ yaw lehˬ-ahˇ nawˇ noeˬ mawˇ-awˇ, kʼaˬ meh maˬ mˇ nga peuˬ ni shaꞈ dawˇ dui dui tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.