Read Akha Yeˬsaˬgeˬlaˇ 18 Bible Online

Yeˬsaˬgeˬlaˇ 18 - Akha bible

Yeˬsaˬgeˬlaˇ 18

¹Sahˬpaˬ Miˬyehˇ ngaˬ-ahˇ dawˬ ngehˬ cawˬ le-euˬ meh.

²Aˬ yawꞈ ehˇ-eu, “Iˇsaˬleˬlaˆ miˇ kʼahˬ laꞈ kʼoeˇ tiˬ jawˇ-iˬ maˬ byehˇ ni daˬ luꞈ-eu dawˬ daˬ pyeuꞈ-eu, ‘Aˬ da aˬ gaꞈ siˬ cehˇ dzaˬ-euˬ zaˬ seuˬ kmˬ ya kmˬ-mˇ jeˇ’ lehˇ ehˇ-eu dawˬ daˬ teu aˬ jeˬ-ahˇ ehˇ mawꞈ ta.”

³Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu “Ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, Iˇsaˬleˬlaˆ miˇ kʼahˬ laꞈ kʼoeˇ dawˬ daˬ heu dawˬ naw maꞈ maˬ paˇ ya daˬ haw-aˇ.

⁴Tsawˇ haˬ yawˬ gʼaˬ na luꞈ-eu saꞈ laˇ ngaˬ-euˬ tehꞈ ma. Aˬ da aˬ ma deuˬ-euˬ saꞈ laˇ maˬ ehˇ, zaˬ deuˬ-euˬ saꞈ laˇ maˬ ehˇ, ngaˬ-euˬ tehꞈ ma. Iˬ baˇ mˇ-eu tsawˇ haˬ aˬ yawꞈ gʼaˬ ya shiˇ tehꞈ-a.

⁵“Muiˬ dui dui-eu yaw sui yaw dawˇ tsawˇ haˬ tiˬ gʼaˬ jawˇ-eu ehˇ lawˬ.

⁶Iˇsaˬleˬlaˆ tsawˇ haˬ deuˬ-euˬ tahˬ pahˬ aˬ ma mawˇ kawˇ deuˬ-ahˇ aˬ yawꞈ uˬ duˬ maˬ tahˬ-ehˇ, gawˬ jawˬ gawˬ duˇ doe ni jaˆ-eu uˬ duˬ tahˬ-eu jawˇ duˬ-ahˇ lawˇ-eu dzaˇ aˬ yawꞈ maˬ dzaˬ-eu uˬ taꞈ, aˬ cawˬ-euˬ miˬ zaˬ-ahˇ maˬ bahˬ-ehˇ, ba la mawˇ luꞈ-eu zaˬ miˬ zaˬ nehˬ-ehˇ aˬ yawꞈ maˬ yuꞈ taꞈ-a.

⁷Tsawˇ haˬ tiˬ gʼaˬ-ahˇ-iˬ aˬ yawꞈ maˬ myawꞈ maˬ shuiˇ dzaˬ-ehˇ, tahˇ joe kʼawꞈ maˬ joe dzaˬ-a. Aˬ cawˬ neh aˬ yawꞈ-ahˇ kʼaˇ biꞈ daˇ taˬ-euˬ jeˬ aˬ yawꞈ biꞈ kʼoꞈ nehˬ-eu meh. Mehꞈ-eu shuꞈ-eu deuˬ-ahˇ aˬ yawꞈ bi dzaˬ bi dawˇ-awˇ, dm gʼaˬ dm lmˇ maˬ jaˆ-eu deuˬ-ahˇ dm gʼaˬ dm lmˇ biꞈ-eu meh.

⁸Aˬ yawꞈ pyuˇ paˇ nehˬ-awˇ jiˇ jeuˬ maˬ yuˇ dzaˬ-a. Yaw haiˬ jeˬ maˬ mˇ-ehˇ, dawˬ ja kʼaˇ doˆ laˇ ngeh dawˇ coe ni jahˇ tsehˆ nehˬ-eu meh.

⁹Tsawˇ haˬ kʼoeˇ gʼaˬ-aˬ, ngaˬ-euˬ dawˬ-ahˇ naˇ haˬ geuꞈ-awˇ, ngaˬ-euˬ zahˇ dawˬ kʼoꞈ dawˬ-ahˇ yaw muiˬ paˬ-ehˇ caw teh-eu meh. Aˬ yawꞈ-aˬ, yaw tsaˬ yaw dawˇ tsawˇ haˬ pyeuꞈ-awˇ, aˬ diˇ aˬ maˇ ya dehꞈ tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

¹⁰“Kʼoeˇ naˇ, tsawˇ haˬ kʼoeˇ gʼaˬ aˬ li tiˬ li jawˇ-eu ehˇ-awˬ. Aˬ li kʼoeˇ li-aˬ, tahˇ joe joe, tsawˇ haˬ sehꞈ-awˇ aˬ da gʼaˬ maˬ mˇ haw-euˬ jeˬ mˇ-eu meh.

¹¹Aˬ da gʼaˬ kʼoeˇ loꞈ-ehˇ gʼeh-eu tiˬ jeˬ-iˬ maˬ mˇ haw-aˬ. Ehˇ kʼawꞈ, aˬ li kʼoeˇ gʼaˬ gawˬ jawˬ gawˬ duˇ doe ni jaˆ-eu uˬ duˬ tahˬ-eu jawˇ duˬ-ahˇ lawˇ-euˬ dzaˇ dzaˬ-awˇ, aˬ cawˬ-euˬ miˬ zaˬ-ahˇ bahˬ-euˬ meh.

¹²Shaˬ zaˬ zahˬ zaˬ-ahˇ myawꞈ dzaˬ shuiˇ dzaˬ-awˇ, tahˇ joe kʼawꞈ joe dzaˬ-euˬ meh. Aˬ cawˬ neh biꞈ daˇ laˇ-euˬ mˇ myawˬ aˬ yawꞈ maˬ biꞈ kʼoꞈ nehˬ-a. Lawˇ ciꞈ zaˬ deuˬ uˬ duˬ tahˬ-eu jawˇ duˬ-ahˇ le-awˇ, nui daˆ daˆ laˇ paˬ-ehˇ gʼeh-eu tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu meh.

¹³Aˬ cawˬ-ahˇ pyuˇ paˇ nehˬ-awˇ jiˇ jeuˬ yuˇ dzaˬ-euˬ meh. Aˬ li kʼoeˇ gʼaˬ ya dehꞈ tehꞈ-a loˇ. Maˬ ya dehꞈ-a. Nui daˆ daˆ dui dui laˇ paˬ-ehˇ gʼeh-eu gaˇ heu deuˬ aˬ yawꞈ mˇ-euˬ miˇ neh, ya shiˇ tehꞈ-a. Aˬ yawꞈ ya shiˇ-eu kʼoeˇ aˬ cawˬ maˬ guˬ-a.

¹⁴“Aˬ li kʼoeˇ gʼaˬ aˬ li tiˬ li jawˇ le-euˬ ehˇ-awˬ. Aˬ da gʼaˬ neh mˇ-euˬ iˬ baˇ dawˬ tawˆ luꞈ-ahˇ aˬ li gʼaˬ mawˇ jiˇ-euˬ meh. Ehˇ kʼawꞈ, aˬ da gʼaˬ loꞈ-ehˇ aˬ yawꞈ maˬ dehꞈ-a.

¹⁵Iˇsaˬleˬlaˆ tsawˇ haˬ deuˬ-euˬ tahˬ pahˬ aˬ ma mawˇ kawˇ deuˬ-ahˇ aˬ yawꞈ uˬ duˬ maˬ tahˬ-ehˇ, gawˬ jawˬ gawˬ duˇ doe ni jaˆ-eu uˬ duˬ tahˬ-eu jawˇ duˬ deuˬ-ahˇ lawˇ-euˬ dzaˇ aˬ yawꞈ maˬ dzaˬ-a.

¹⁶Aˬ cawˬ-euˬ miˬ zaˬ-ahˇ aˬ yawꞈ maˬ bahˬ-a. Aˬ cawˬ-ahˇ nawˬ dzaˬ kʼaˆ dzaˬ-awˇ, tahˇ joe joe dzaˬ-eu jeˬ maˬ mˇ-a. Aˬ cawˬ neh kʼaˇ biꞈ daˇ laˇ-euˬ jeˬ aˬ yawꞈ biꞈ kʼoꞈ nehˬ-awˇ, mehꞈ-eu shuꞈ-eu tsawˇ haˬ deuˬ-ahˇ bi dzaˬ bi dawˇ-eu uˬ taꞈ, dm gʼaˬ dm lmˇ maˬ jaˆ-eu deuˬ-ahˇ dm gʼaˬ dm lmˇ biꞈ-eu meh.

¹⁷Yaw haiˬ jeˬ aˬ yawꞈ maˬ mˇ-a. Pyuˇ paˇ nehˬ-awˇ jiˇ jeuˬ maˬ yuˇ dzaˬ-a. Ngaˬ-euˬ zahˇ dawˬ kʼoꞈ dawˬ mehˬ nah aˬ yawꞈ caw teh-awˇ, ngaˬ-euˬ dawˬ naˇ haˬ geuꞈ-eu meh. Aˬ yawꞈ aˬ da-euˬ iˬ baˇ baˬ da neh aˬ yawꞈ maˬ ya shiˇ-ehˇ maˇ maˇ ni ya dehꞈ tehꞈ-a.

¹⁸Aˬ yawꞈ-euˬ aˬ da-aˬ, kʼoeˇ loꞈ-ehˇ maˬ dehꞈ ni, jaˬ myawꞈ mehˇ shuiˇ shuiˇ dzaˬ-awˇ, tahˇ joe joe dzaˬ-euˬ uˬ taꞈ, tsawˇ haˬ yawˬ gʼaˬ na luꞈ-ahˇ yaw haiˬ jeˬ jahˇ nehˬ-euˬ meh. Kʼoeˇ miˇ neh, yawˬ ha neh mˇ-euˬ iˬ baˇ baˬ da neh aˬ yawꞈ ya shiˇ-euˬ meh.

¹⁹“Ehˇ kʼawꞈ, naw maꞈ heu loꞈ-ehˇ ehˇ-eu meh. Aˬ jeˬ miˇ neh aˬ da-euˬ iˬ baˇ baˬ da neh aˬ li gʼaˬ kʼehˬ-eu kʼaˆ-eu jeˬ-ahˇ maˬ ya daˬ ta lehˇ ehˇ-eu meh. Aˬ li gʼaˬ yaw tsaˬ yaw dawˇ jeˬ mˇ-eu meh. Ngaˬ-euˬ zahˇ dawˬ kʼoꞈ dawˬ-ahˇ aˬ yawꞈ yaw muiˬ-ehˇ caw teh-euˬ miˇ neh, aˬ yawꞈ aˬ diˇ aˬ maˇ ya dehꞈ tehꞈ-a.

²⁰Iˬ baˇ mˇ-euˬ tsawˇ haˬ aˬ yawꞈ gʼaˬ ya shiˇ tehꞈ-a. Aˬ da-euˬ iˬ baˇ baˬ da neh, aˬ li gʼaˬ kʼehˬ-eu kʼaˆ-eu jeˬ-ahˇ maˬ ya daˬ-aˇ. Kʼoeˇ loꞈ-ehˇ duˇ ni, aˬ li -euˬ iˬ baˇ baˬ da neh, aˬ da gʼaˬ kʼehˬ-eu kʼaˆ-eu jeˬ-ahˇ maˬ ya daˬ-aˇ. Muiˬ-eu tsawˇ haˬ yaw muiˬ jeˬ mˇ-euˬ baˬ da neh guiˬ lahˬ za-awˇ, haiˬ-eu tsawˇ haˬ yawˬ ha neh mˇ-euˬ yaw haiˬ jeˬ baˬ da neh ya shaˬ tehꞈ-a.

²¹“Haiˬ-eu tsawˇ haˬ tiˬ gʼaˬ iˬ baˇ maˬ mˇ ni byehˇ-awˇ, ngaˬ-euˬ zahˇ dawˬ kʼoꞈ dawˬ mehˬ nah caw teh-eu laꞈ kʼoeˇ, yaw tsaˬ yaw dawˇ jeˬ mˇ naˇ, aˬ yawꞈ maˬ ya shiˇ ni, aˬ diˇ aˬ maˇ ya dehꞈ tehꞈ-a.

²²Aˬ yawꞈ yaw tsaˬ yaw dawˇ jeˬ paˇ mˇ-euˬ baˬ da neh, aˬ yawꞈ-euˬ iˬ baˇ pyehˬ nehˬ-awˇ yaw dehꞈ ya dehꞈ tehꞈ-a.

²³Haiˬ-eu tsawˇ haˬ shiˇ gaˇ ngaˇ laˬ kʼaˬ cehˇ meh lehˇ naw maꞈ noeˬ te loˇ lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu ma. Maˬ ngeuˇ. Aˬ yawꞈ noeˬ poˆ noeˬ paˇ-awˇ yaw dehꞈ ya dehꞈ gaˇ ngaˇ mawˇ mawꞈ-eu ma.

²⁴“Ehˇ kʼawꞈ, yaw tsaˬ yaw dawˇ tsawˇ haˬ tiˬ gʼaˬ yaw muiˬ jeˬ maˬ mˇ ni byehˇ-awˇ, haiˬ-eu tsawˇ haˬ deuˬ kʼaˇ mˇ-eu loꞈ-ehˇ, nuiˬ daˆ daˆ laˇ paˬ-ehˇ gʼeh-eu yaw haiˬ jeˬ mˇ dahˬ beh laˇ ngeh, aˬ yawꞈ yaw dehꞈ ya dehꞈ tehꞈ-a loˇ. Aˬ yawꞈ neh kʼaˇ mˇ dzeuˇ yaꞈ-euˬ yaw muiˬ jeˬ dawˬ tawˆ luꞈ ngehˇ byoˆ nehˬ jiˇma. Aˬ yawꞈ saˇ jaˇ maˬ ziꞈ ni iˬ baˇ mˇ-euˬ baˬ da neh ya shiˇ tehꞈ-a.

²⁵“Sahˬpaˬ Miˬyehˇ gaˇ mˇ-eu maˬ tsaˬ nga lehˇ naw maꞈ ehˇ-eu meh. Iˇsaˬleˬlaˆ tsawˇ haˬ deuˬ-oˇ, ngaˇ ehˇ gaˇ naˇ haˬ sheˇ. Ngaˇ mˇ-eu maˬ tsaˬ nga lehˇ naw maꞈ noeˬ-eu meh. Maˬ tsaˬ-eu-aˬ, naw maꞈ neh mˇ-euˬ gaˇ meh.

²⁶Yaw tsaˬ yaw dawˇ tsawˇ haˬ tiˬ gʼaˬ yaw tsaˬ yaw dawˇ jeˬ maˬ mˇ ni byehˇ-awˇ, yaw haiˬ jeˬ mˇ-awˇ shiˇ naˇ, aˬ yawꞈ neh mˇ-euˬ yaw haiˬ jeˬ baˬ da neh ya shiˇ-eu jeˬ pyeuꞈ-eu meh.

²⁷Haiˬ-eu tsawˇ haˬ tiˬ gʼaˬ iˬ baˇ maˬ mˇ ni byehˇ-awˇ, yaw tsaˬ yaw dawˇ jeˬ mˇ naˇ, aˬ yawꞈ yawˬ haˇ yawˬ ha ka kʼoꞈ-eu meh.

²⁸Aˬ yawꞈ yawˬ ha-euˬ yaw lehˬ noeˬ siˬ-awˇ, iˬ baˇ maˬ mˇ ni byehˇ-euˬ meh. Kʼoeˇ miˇ neh, aˬ yawꞈ maˬ ya shiˇ-ehˇ, yaw dehꞈ ya dehꞈ daˆ leꞈ tehꞈ-a.

²⁹Kʼoeˇ ngeh jawˇ, naw maꞈ Iˇsaˬleˬlaˆ tsawˇ haˬ deuˬ, Sahˬpaˬ Miˬyehˇ neh mˇ-euˬ maˬ tsaˬ nga lehˇ ehˇ-eu meh. Ngaˇ gaˇ mˇ-eu maˬ tsaˬ nga lehˇ naw maꞈ noeˬ-eu maˬ ngeuˇ loˇ. Maˬ tsaˬ-eu-aˬ, naw maꞈ neh mˇ-euˬ gaˇ meh.

³⁰“Nymˬ-mˇ poˆ jawˇ-aˬ, naw maꞈ Iˇsaˬleˬlaˆ tsawˇ haˬ yawˬ gʼaˬ na luꞈ-ahˇ, yawˬ ha neh kʼaˇ mˇ kʼaˇ shaˇ-euˬ gaˇ haw-awˇ yaˇ kʼaˬ daˇ nehˬ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Naw maꞈ-euˬ iˬ baˇ neh naw maꞈ-ahˇ maˬ bi laˆ cawˆ ni, naw maꞈ mˇ luꞈ-eu yaw haiˬ jeˬ byehˇ dzeh jiˇ-awˬ.

³¹Naw maꞈ kʼaˇ mˇ kʼaˇ shaˇ luꞈ-eu yaw haiˬ jeˬ byehˇ dzeh jiˇ-awˇ, nui ma yaw shuiꞈ paˇ-awˬ. Naw maꞈ Iˇsaˬleˬlaˆ tsawˇ haˬ deuˬ aˬ jeˬ miˇ neh shiˇ mawꞈ-eu nya.

³²Tsawˇ haˬ tiˬ gʼaˬ iˬ maˬ bi shiˇ mawꞈ nya. Iˬ baˇ-ahˇ byehˇ dzeh-awˇ yaw dehꞈ dehꞈ-awˬ” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.