Read Akha Yeˬsaˬgeˬlaˇ 2 Bible Online

Yeˬsaˬgeˬlaˇ 2 - Akha bible

Yeˬsaˬgeˬlaˇ 2

¹Aˬ yawꞈ ngaˬ-ahˇ, “Tsawˇ haˬ zaˬ-oˇ, tuˇ-awˬ, Ngaˇ nawˬ-ahˇ dawˬ ngehˬ cawˬ mawꞈ nya” lehˇ ehˇ-eu meh.

²Kʼoeˇ loꞈ-ehˇ dawˬ ngehˬ doˆ laˇ ngeh, Miˬyehˇ-euˬ yaw sahˇ ngaˬ-euˬ laꞈ kʼoeˇ uˇ le-awˇ, ngaˬ-ahˇ gawˬ yawꞈ gʼeu yawꞈ-awˇ, heu loꞈ-ehˇ ehˇ-eu ya gaˬ-euˬ ma.

³“Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ jawˇ gaˇ nawˬ-ahˇ ngaˇ pyehˬ gʼeh-eu lehˇ gʼeh-eu ma. Aˬ yawꞈ maꞈ ngaˬ-ahˇ puiˬ-awˇ byehˇ dzeh yaꞈ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ loꞈ-ehˇ iˬ nah keuˆ ni puiˬ luꞈ-eu meh.

⁴Aˬ yawꞈ maꞈ nui ma gʼahˇ-awˇ, ngaˬ-ahˇ yaw zeu maˬ baw-a. Kʼoeˇ miˇ neh, dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, nawˬ-ahˇ aˬ yawꞈ maꞈ jawˇ gaˇ pyehˬ gʼeh-awˇ, ngaˬ-euˬ dawˬ bi ehˇ gaˬ-iˇ-eu lehˇ gʼeh-eu ma.

⁵Ngaˬ-ahˇ puiˬ luꞈ-eu tsawˇ haˬ kʼoeˇ deuˬ nawˬ-euˬ dawˬ-ahˇ naˇ haˬ-eu maˬ kaˬ, maˬ naˇ haˬ-euˬ maˬ kaˬ, Miˬyehˇ gʼaˇ duˬ ngehˬ dah-eu tiˬ gʼaˬ aˬ yawꞈ maꞈ jawˇ gaˇ oe-euˬ nga lehˇ, aˬ yawꞈ maꞈ siˬ nya tehꞈ-a.

⁶“Ehˇ kʼawꞈ, tsawˇ haˬ zaˬ-oˇ, aˬ yawꞈ maꞈ-ahˇ maˬ ehˇ, aˬ yawꞈ maꞈ-euˬ dawˬ-ahˇ maˬ ehˇ, nawˇ maˬ ya guˆ-a. Aˬ yawꞈ maꞈ nawˬ-ahˇ yaˬ kʼehˇ yaˬ yaˬ-ehˇ ja bu ja doeˇ tehꞈ-a. Nawˇ-aˬ, boeˬ kaˬ laˬ ma yaw kaˬ-ahˇ yaw dehꞈ ya dehꞈ gaˇ duˇ tehꞈ-a. Ehˇ kʼawꞈ, ngaˬ-ahˇ puiˬ-eu tsawˇ haˬ kʼoeˇ deuˬ-ahˇ maˬ kaˬ, aˬ yawꞈ maꞈ-euˬ dawˬ-ahˇ maˬ kaˬ, nawˇ taˬ guˆ.

⁷Aˬ yawꞈ maꞈ naˇ haˬ-eu maˬ kaˬ, maˬ naˇ haˬ-eu maˬ kaˬ, ngaˬ neh bi ngehˬ-euˬ dawˬ nawˇ ya ngehˬ meh. Aˬ yawꞈ maꞈ ngaˬ-ahˇ puiˬ-eu tsawˇ haˬ pyeuꞈ luꞈ gaˇ taˬ ngehˇ.

⁸“Tsawˇ haˬ zaˬ-oˇ, ngaˇ ehˇ gaˇ naˇ haˬ sheˇ. Aˬ yawꞈ maꞈ loꞈ-ehˇ ngaˬ-ahˇ taˬ puiˬ. Nawˬ-euˬ kʼaˬ meh mˇ nga-awˇ, ngaˬ neh kʼaˇ bi dzaˬ-euˬ jeˬ dzaˬ-awˬ.”

⁹Ngaˇ jawˇ gaˇ aˬ laꞈ cawˬ ja leꞈ-eu ya mawˇ-awˇ, aˬ laꞈ kʼoeˇ laꞈ-ahˇ sahˬ boꞈ paˇ yoˆ tiˬ yoˆ tuˆ tehˬ taˬ-euˬ meh.

¹⁰Aˬ laꞈ kʼoeˇ laꞈ sahˬ boꞈ paˇ yoˆ kʼoeˇ puiˇ ka leꞈ ngeh, nyiˬ pyawˬ luꞈ sahˬ boꞈ boꞈ taˬ-eu gaˇ ya mawˇ-euˬ ma. Shaˬ zahˬ naꞈ-awˇ ngoeˇ-eu dawˬ, tsawˇ ngoeˇ ngoeˇ-eu dawˬ hawˇ-eu, noeˬ shaˬ-eu dawˬ deuˬ boꞈ ahˇ taˬ-euˬ meh.