Read Akha Yeˬsaˬgeˬlaˇ 21 Bible Online

Yeˬsaˬgeˬlaˇ 21 - Akha bible

Yeˬsaˬgeˬlaˇ 21

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Yeˬluˇsaˬlehˬ meuˬ paw ciˬ pyawˇ-awˇ, aˬ yawꞈ-ahˇ zaw leˇ-eu dawˬ ngehˬ nehˬ-awˬ. Meuˬ-ahˇ jawˇ-eu deuˬ uˬ duˬ tahˬ-eu jawˇ duˬ deuˬ-ahˇ zaw leˇ ni dawˬ mehˬ mehˬ-awˬ. Iˇsaˬleˬlaˆ miˇ kʼahˬ-ahˇ yaw kʼaˆ kʼaˆ-ehˇ ehˇ nehˬ-awˬ.

³Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Naw maꞈ-ahˇ ngaˇ muiˇ-eu ma. Mi cehˇ gʼawˇ doˆ-awˇ, tsawˇ muiˬ tsawˇ doeˇ maˬ tseˇ ni naw maꞈ dawˬ tawˆ luꞈ-ahˇ sehꞈ ma.

⁴Miˇ kʼahˬ laꞈ oˆ coeˇ-ahˇ neh laꞈ taˆ coeˇ-ahˇ doˆ ni, tsawˇ muiˬ tsawˇ doeˇ maˬ tseˇ-ehˇ, dawˬ tawˆ luꞈ-ahˇ mi cehˇ neh sehꞈ jiˇ ma.

⁵Sahˬpaˬ Miˬyehˇ pyeuꞈ-eu ngaˇ mi cehˇ gʼawˇ doˆ-awˇ, tawˆ kʼawˆ laꞈ kʼoeˇ maˬ paˇ soeˬ ahˇ kʼoꞈ ngaˇ lehˇ, yawˬ gʼaˬ na luꞈ ya siˬ duˬ tehꞈ-a.

⁶“Tsawˇ haˬ zaˬ-oˇ, noeˬ shaˬ-awˇ nui ma tsawˬ paˆ iˇ-eu loꞈ-ehˇ mahˇ-awˬ. Tsawˇ haˬ yawˬ gʼaˬ na luꞈ mawˇ nya gaˇ noeˬ shaˬ-awˇ mahˇ mahˇ-ehˇ jawˇ-awˬ.

⁷Aˬ jeˬ miˇ neh teu loꞈ-ehˇ mahˇ te lehˇ aˬ yawꞈ maꞈ nawˬ-ahˇ naˇ haˬ laˇ naˇ, gaˇ kawˆ gaˬ le-eu maˬ muiˬ-eu miˇ neh mahˇ-eu ma lehˇ ehˇ nehˬ-awˬ. Aˇ yamˬ kʼoeˇ keuˆ le ngeh, nui ma ga ka jiˇ-awˇ, aˬ laꞈ laꞈ shiˇ shiˇ jiˇ-eu uˬ taꞈ, nui ma cawˆ dui dui-awˇ pawˬ tsuiꞈ gʼaˬ maˬ ahˇ ni pyeuꞈ-iˇ tehꞈ-a. Aˇ yamˬ kʼoeˇ keuˆ le luꞈ meh. Aˬ diˇ aˬ maˇ keuˆ le meh lehˇ ehˇ nehˬ-awˬ” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh,

⁸Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

⁹“Tsawˇ haˬ zaˬ-oˇ, ngaˬ-euˬ gʼaˇ duˬ ngehˬ dah-awˬ. Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Mi cehˇ, mi cehˇ, siˬ taˆ jeˬ ba taˬ-euˬ mi cehˇ.

¹⁰Naˇ guiˇ guiˇ ni siˬ taˆ taˬ-euˬ, tsawˇ haˬ zaˬ-ahˇ sehꞈ-eu mi cehˇ, Mehˬ paˇ tsoˆ paˇ-euˬ dawˬ hawˇ-eu, diˬ paˇ dzaw paˇ nehˬ-euˬ jeˬ-ahˇ, ngaˬ-euˬ tsawˇ haˬ maˬ naˇ haˬ-ehˇ, nui ma saˇ-eu maˬ paˇ oꞈ meh.

¹¹Mi cehˇ guiˇ nyiˬ ni siˬ taˆ-awˇ, deuˆ-eu lehˇ lehˬ hmˬ taˬ-euˬ ma. Tsawˇ haˬ sehꞈ-eu deuˬ tuˆ tehˬ ni, siˬ taˆ-awˇ lehˬ hmˬ taˬ-euˬ ma.

¹²Tsawˇ haˬ zaˬ-oˇ, guˇ-awˇ ngoeˇ-awˬ. Ngaˬ-euˬ tsawˇ haˬ deuˬ sehꞈ-eu lehˇ, mi cehˇ heu lehˬ hmˬ taˬ-euˬ ma. Iˇsaˬleˬlaˆ sahˬ paˬ deuˬ-ahˇ sehꞈ-eu lehˇ lehˬ hmˬ taˬ-euˬ ma. Ngaˬ-euˬ tsawˇ haˬ kʼoeˇ deuˬ nehˬ-ehˇ, sahˬ paˬ deuˬ bi sehꞈ caw jiˇ ma. Nui ma cawˆ-awˇ kʼahˬ-ahˇ teˇ-awˬ.

¹³Ngaˬ-euˬ tsawˇ haˬ-ahˇ lawˬ haw ma. Aˬ yawꞈ maꞈ nui ma maˬ paˇ naˇ, heu deuˬ dawˬ tawˆ luꞈ bi daˬ ma.

¹⁴“Tsawˇ haˬ zaˬ-oˇ, nymˬ-mˇ poˆ jawˇ-aˬ, ngaˬ-euˬ gʼaˇ duˬ ngehˬ dah-awˬ. Nawˬ-euˬ laꞈ kʼawˆ tehˆ-awˇ, mi cehˇ kʼoeˇ tiˬ poˆ saˇ-iˬ tiˬ poˆ bi deuˆ gʼeh leꞈ-awˬ. Kʼoeˇ-aˬ, tsawˇ haˬ-ahˇ sehꞈ-eu mi cehˇ meh. Guˆ dui dui laˇ paˬ-ehˇ tsawˇ haˬ-ahˇ sehꞈ dui dui-eu mi cehˇ meh.

¹⁵Mi cehˇ kʼoeˇ ngaˬ-euˬ tsawˇ haˬ-ahˇ nui ma bi baˬ-iˇ-awˇ, bi pehˆ toˆ sehꞈ-eu meh. Mˬ myawꞈ myawꞈ-eu loꞈ-ehˇ naˇ guiˇ guiˇ laˇ-awˇ, sehꞈ-eu lehˇ lehˬ hmˬ taˬ-euˬ mi cehˇ kʼoeˇ kahˇ neh, aˬ yawꞈ maꞈ-euˬ meuˬ-ahˇ ngaˇ laˆ guˆ luꞈ-eu ma.

¹⁶Taˆ dui dui-eu mi cehˇ-oˇ, aˇ maˇ paw deuˆ gʼeh-awˇ, aˇ caˇ paw coeˇ gʼeh-awˬ. Mi seuˬ kʼaˇ ciˬ pyawˇ-eu paw deuˆ gʼeh-awˬ.

¹⁷Ngaˇ kʼawꞈ laꞈ kʼawˆ tehˆ-awˇ, ngaˬ-euˬ nui ma pehˇ-eu jeˬ bi byoˆ-iˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁸Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁹“Tsawˇ haˬ zaˬ-oˇ, Baˬbuˇloˬ sahˬ paˬ-euˬ mi cehˇ oe nya-eu gaˇ ma nyiˬ kahˇ tsaˬ tsoˆ taˬ-awˬ. Gaˇ ma nyiˬ kahˇ luꞈ miˇ kʼahˬ aˬ yawꞈ tiˬ kʼahˬ-ahˇ neh dahˇ doˆ laꞈ-awˇ, gaˇ ma dahˇ paˆ-iˇ-euˬ gaˇ tsmˇ-ahˇ gaˇ ma toeˬ mehˬ-eu sahˬ boꞈ boꞈ myahˬ taˬ-awˬ.

²⁰Gaˇ ma tiˬ kahˇ-aˬ, mi cehˇ kʼoeˇ kahˇ-ahˇ, Aˬmo tsawˇ jeuˬ-euˬ Laˬbah meuˬ-ahˇ toeˬ mehˬ-awˇ, yawˬ kahˇ yawˬ-aˬ, Yuˇdaˆ miˇ kʼahˬ hawˇ-eu paˇ tsoˆ muiˬ taˬ-euˬ Yeˬluˇsaˬlehˬ meuˬ-ahˇ bi toeˬ mehˬ-awˬ.

²¹Baˬbuˇloˬ sahˬ paˬ-aˬ, gaˇ ma gaˇ tsmˇ-ahˇ gaˇ ma toeˬ mehˬ-eu sahˬ boꞈ boꞈ myahˬ taˬ-euˬ mehˬ shi yawꞈ-awˇ, gaˇ ma aˬ geu kahˇ iˇ paˬ nga lehˇ, kaˆ myaˬ joˆ poˆ haw, aˬ yawꞈ-euˬ tahˬ pahˬ aˬ ma mawˇ kawˇ deuˬ-ahˇ naˇ haˬ haw, lawˇ-eu gʼaˇ duˬ sehꞈ-euˬ jeˬ zaˬ-euˬ shaˬ tsahˬ-ahˇ haw, lehˇ jahˇ luꞈ meh.

²²Nymˬ-mˇ poˆ jawˇ, aˬ yawꞈ-euˬ aˇ maˇ laꞈ-ahˇ, Yeˬluˇsaˬlehˬ meuˬ-ahˇ iˇ-awˬ lehˇ kʼehˇ-eu kaˆ myaˬ tuˆ tehˬ taˬ-euˬ meh. Kaˆ myaˬ kʼoeˇ aˬ yawꞈ-ahˇ heu loꞈ-ehˇ ehˇ-eu meh. Meuˬ meuˬ lahˇ tahˬ pyaˆ-eu dmˬ ma jahˇ tsoꞈ-awˇ, guiˇ deuˆ-eu dawˬ guˇ-awˇ, meuˬ lahˇ tahˬ pyaˆ-eu dmˬ ma kʼoeˇ meuˬ lahˇ-ahˇ ciˬ tsehꞈ-awˇ, miˇ tsaˬ ciˬ goˇ-awˇ, duˬ kʼahˬ kʼahˬ-awˬ lehˇ ehˇ-eu meh.

²³Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-aˬ, saˇ jaˇ dzaˬ taˬ-euˬ jaˆ-eu miˇ neh, kʼoeˇ loꞈ-ehˇ pyeuꞈ laˇ tehꞈ-a lehˇ maˬ jah-a. Ehˇ kʼawꞈ, gaˇ kawˆ kʼoeˇ aˬ yawꞈ maꞈ neh mˇ dzeuˇ-euˬ iˬ baˇ-ahˇ bi noeˬ doˆ leˇ-awˇ, aˬ yawꞈ maꞈ-ahˇ aˬ cawˬ nyehꞈ tehꞈ-a lehˇ bi siˬ-eu tiˬ jeˬ meh.

²⁴Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Naw maꞈ-euˬ iˬ baˇ bya cehˆ ni doˆ laˇ taˬ-euˬ meh. Naw maꞈ iˬ baˇ aˇ naˆ ni ahˇ-eu tsawˇ haˬ yawˬ gʼaˬ na luꞈ siˬ nya jiˇ meh. Naw maꞈ kʼaˇ mˇ kʼaˇ shaˇ-eu jeˬ laꞈ kʼoeˇ, naw maꞈ-euˬ iˬ baˇ bya cehˆ ni mawˇ laˇ meh. Naw maꞈ kʼoeˇ loꞈ-ehˇ mˇ-euˬ baˬ da neh, muiˇ-eu deuˬ neh bi nyehꞈ byoˆ gʼeh tehꞈ-a.

²⁵“Iˇsaˬleˬlaˆ miˇ kʼahˬ-ahˇ uˆ lahˇ luꞈ-eu maˬ muiˬ maˬ shawˇ-eu tsawˇ haˬ yaw haiˬ gʼaˬ-oˇ, nawˬ-ahˇ aˇ saˬ saˬ-eu poˆ kʼehˬ-eu aˇ nah keuˆ le luꞈ meh.

²⁶Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Nawˬ-euˬ shuiˇ uˬ kʼoˆ hawˇ-eu nawˬ-euˬ uˬ dzahˬ lehˆ dzeh-awˬ. Miˇ kʼahˬ poˆ laˆ paˇ laˇ-euˬ meh. Yaw shaˬ zaˬ-ahˇ uˆ lahˇ-eu baoˬ biꞈ-awˇ, uˆ lahˇ luꞈ-eu tsawˇ haˬ deuˬ yuˇ ka-awˬ.

²⁷Yaw cawˆ tehꞈ meh. Yaw cawˆ tehꞈ meh. Meuˬ heu meuˬ-ahˇ ngaˇ laˆ cawˆ ma. Ehˇ kʼawꞈ, meuˬ heu meuˬ-ahˇ bi laˆ cawˆ-eu lehˇ ngaˬ neh tseˇ doˆ-euˬ gʼaˬ maˬ oe keuˆ kʼoeˇ keuˆ ni, kʼoeˇ loꞈ-ehˇ maˬ jahˇ te siˬ. Kʼoeˇ gʼaˬ-ahˇ meuˬ heu meuˬ biꞈ tsehˆ nehˬ ma.

²⁸“Tsawˇ haˬ zaˬ-oˇ, ngaˬ-euˬ gʼaˇ duˬ ngehˬ dah-awˬ. Iˇsaˬleˬlaˆ tsawˇ jeuˬ-ahˇ ja bu ja doeˇ luꞈ-eu Aˬmoˬ tsawˇ jeuˬ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. ‘Yaw cawˆ jeˬ-euˬ mi cehˇ lehˬ hmˬ taˬ meh. mˬ myawꞈ loꞈ-ehˇ naˇ guiˇ guiˇ ni, sehꞈ-eu gʼaˇ duˬ siˬ taˆ-euˬ meh.’

²⁹Naw maꞈ neh yaw sahˇ laꞈ kʼoeˇ ya mawˇ-euˬ jeˬ maˬ tsaˬ-ehˇ, naw maꞈ neh ngehˬ dah ehˇ dah taˬ-eu jeˬ jaˬ myawꞈ tehꞈ meh. Naw maꞈ-aˬ, maˬ muiˬ-eu haiˬ-eu tsawˇ haˬ pyeuꞈ-awˇ, naw maꞈ-ahˇ aˇ saˬ saˬ-eu poˆ kʼehˬ nehˬ-eu aˇ nah keuˆ le luꞈ meh. Naw maꞈ-euˬ kawˬ lahˇ-ahˇ mi cehˇ keuˆ le luꞈ meh.

³⁰“Tawˆ kʼawˆ-ahˇ mi cehˇ soeˬ ahˇ kʼoꞈ-awˬ. Naw maꞈ-ahˇ beh-euˬ jawˇ duˬ hawˇ-eu naw maꞈ dehꞈ le-euˬ miˇ kʼahˬ-ahˇ naw maꞈ-ahˇ ngaˇ kʼehˬ nehˬ ma.

³¹Ngaˬ-euˬ nui pehˇ naw maꞈ kʼoeˇ taˆ miˬ dzaˬ miˬ lmˇ loꞈ-ehˇ pyehˬ gʼeh leꞈ ngeh, ngaˬ-euˬ nui ma naw maꞈ ya mawˇ duˬ tehꞈ-a. Kʼoeˇ naˇ, yaw cawˆ jeˬ mˇ-eu paw ehˇ kʼaˇ maˬ za-eu aˬ dzawˬ aˇ gah deuˬ-euˬ laꞈ-ahˇ, naw maꞈ bi ahˇ leˇ ma.

³²Miˬ dzaˬ neh laˆ cawˆ nehˬ gaˇ naw maꞈ ya daˬ tehꞈ-a. Naw maꞈ yawˬ ha-euˬ miˇ kʼahˬ laꞈ kʼoeˇ shiˬ ya yoeˇ-awˇ, tsawˇ haˬ tiˬ gʼaˬ-iˬ naw maꞈ-ahˇ maˬ noeˬ mawˇ ni ngehˇ byoˆ jiˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”