Read Akha Yeˬsaˬgeˬlaˇ 25 Bible Online

Yeˬsaˬgeˬlaˇ 25 - Akha bible

Yeˬsaˬgeˬlaˇ 25

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Aˬmoˬ miˇ kʼahˬ paw ciˬ pyawˬ-awˇ, ngaˬ-euˬ gʼaˇ duˬ ngehˬ dah-awˬ.

³Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ gaˇ naˇ haˬ-awˬ lehˇ, aˬ yawꞈ maꞈ-ahˇ ehˇ nehˬ-awˬ. Ngaˬ-euˬ uˬ duˬ tahˬ nymˇ nymˇ ma jawꞈ-iˇ-euˬ gaˇ maˬ ehˇ, Iˇsaˬleˬlaˆ miˇ kʼahˬ cawˆ-iˇ-awˇ ciˬ cuˇ ni jaˆ gaˇ maˬ ehˇ, Yuˇdaˆ tsawˇ haˬ deuˬ aˬ cawˬ miˇ kʼahˬ-ahˇ bi nyehꞈ byoˆ gʼeh gaˇ maˬ ehˇ, naw maꞈ mawˇ ngeh laˬ kʼaˬ cehˇ-euˬ meh.

⁴Naw maꞈ kʼoeˇ loꞈ-ehˇ laˬ kʼaˬ cehˇ-euˬ miˇ neh, nahˇ ma doˆ kʼehˬ paw jaˆ-eu kʼaˇ shuiꞈ deh yaˇ miˇ kʼahˬ-ahˇ jawˇ-eu tsawˇ jeuˬ deuˬ neh, naw maꞈ-ahˇ guiˇ bi deuˆ gʼaˬ ma. Aˬ yawꞈ maꞈ naw maꞈ-euˬ miˇ kʼahˬ laꞈ kʼoeˇ sehˬ gʼawˆ gʼawˆ-awˇ, jawˇ duˬ dah tehꞈ-a. Naw maꞈ-euˬ aˇ siˬ aˇ lu aˬ yawꞈ maꞈ pyaˆ dzaˬ-awˇ, naw maꞈ-euˬ mawˇ neˇ aˬ coeˇ aˬ yawꞈ maꞈ dawˇ tehꞈ-a.

⁵Laˬ bah meuˬ-ahˇ law taw gaˆ duˬ bi pyeuꞈ-iˇ-awˇ, Aˬmoˬ miˇ kʼahˬ kʼahˬ lah ni yawˇ bo duˬ bi pyeuꞈ-iˇ ma. Ngaˇ Sahˬpaˬ Miˬyehˇ pyeuꞈ-eu naw maꞈ-ahˇ siˬ duˬ leˇ ni, kʼoeˇ loꞈ-ehˇ jahˇ ma.

⁶“Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. Naw maꞈ laˬ kʼaˬ cehˇ-eu miˇ neh, laꞈ kʼawˆ tehˆ tehˆ-ehˇ tsawˬ-euˬ meh. Iˇsaˬleˬlaˆ miˇ kʼahˬ-ahˇ naw maꞈ yehˬ bawˬ-ehˇ naꞈ gʼa nehˬ-euˬ meh.

⁷Naw maꞈ kʼoeˇ loꞈ-ehˇ jahˇ-euˬ miˇ neh, naw maꞈ-ahˇ aˬ cawˬ tsawˇ jeuˬ-euˬ aˬ laꞈ laꞈ kʼoeˇ a nehˬ-awˇ, tahˇ joe bi joe-awˇ, myawˬ gahˬ bi yuˇ geuꞈ jiˇ ma. Tsawˇ jeuˬ byoˆ le-awˇ, miˇ kʼahˬ byoˆ-iˇ ngeh keuˆ ni, naw maꞈ-ahˇ ngaˇ laˆ cawˆ nehˬ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu naw maꞈ ya siˬ duˬ tehꞈ-a.”

⁸Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Yuˇdaˆ miˇ kʼahˬ hawˇ-eu aˬ cawˬ miˇ kʼahˬ deuˬ maˬ beu gaˇ-a lehˇ, Mawˇbaˆ miˇ kʼahˬ ehˇ-eu miˇ neh,

⁹miˇ kʼahˬ kʼoeˇ kʼahˬ-euˬ myaˆ pyawˬ naˇ mehˇ pyeuꞈ-eu Behˬjaˬshiˇmoˇ meuˬ, Baˬlaˇmyoˬ meuˬ, Kiˇlaˬdeˬ meuˬ heu deuˬ ahˇ leˇ-ehˇ, meuˬ heu deuˬ loꞈ-ehˇ miˇ kaˬ caw caw-ehˇ kʼaˇ jaˆ-eu meuˬ deuˬ-ahˇ, guiˇ bi deuˆ le ma.

¹⁰Nahˇ ma doˆ kʼehˬ paw kʼaˇ shuiꞈ deh yaˇ miˇ kʼahˬ-ahˇ jawˇ-eu tsawˇ jeuˬ deuˬ neh, Mawˇbaˆ miˇ kʼahˬ-ahˇ kʼawꞈ, Aˬmoˬ miˇ kʼahˬ loꞈ-ehˇ bi deuˆ gʼaˬ-awˇ, tsawˇ jeuˬ meh-iˇ gaˇ keuˆ ni bi jahˇ nehˬ ma.

¹¹Mawˇbaˆ miˇ kʼahˬ-ahˇ ngaˇ kʼehˬ nehˬ kʼaˆ nehˬ-awˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ, aˬ yawꞈ maꞈ-ahˇ bi siˬ duˬ ma.”

¹²Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Eˬdoˬ miˇ kʼahˬ-aˬ, Yuˇdaˆ miˇ kʼahˬ-ahˇ gʼawˬ shaˬ maˬ gaˬ ni laꞈ poˆ poˆ kʼoꞈ nehˬ-euˬ miˇ neh, iˬ baˇ huiˬ dui dui meh.

¹³Nymˬ-mˇ poˆ jawˇ, Eˬdoˬ miˇ kʼahˬ-ahˇ ngaˇ kʼehˬ-awˇ, tsawˇ haˬ hawˇ-eu jeˬ zaˬ dawˬ tawˆ luꞈ sehꞈ jiˇ ma lehˇ ngaˇ ehˇ-eu ma. Teˬmaˬ meuˬ-ahˇ neh Deˬdaˬ meuˬ-ahˇ keuˆ ni, ciˬ cuˇ ni bi pyeuꞈ-iˇ-awˇ, guiˇ deuˆ-eu laꞈ kʼoeˇ bi shiˇ jiˇ ma.

¹⁴Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ Eˬdoˬ miˇ kʼahˬ-ahˇ laꞈ poˆ poˆ kʼoꞈ nehˬ-awˇ, ngaˇ nui ma pehˇ-eu jeˬ Eˬdoˬ miˇ kʼahˬ-ahˇ siˬ leˇ ngeh keuˆ ni jahˇ nehˬ tehꞈ-a. Ngaˇ laꞈ poˆ poˆ kʼoꞈ nehˬ-euˬ jeˬ aˬ joˆ-ehˇ gʼeh-eu nya lehˇ, aˬ yawꞈ maꞈ-ahˇ siˬ duˬ leˇ tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

¹⁵“Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. Piˇliˇtiˆ tsawˇ haˬ deuˬ-aˬ, aˇ hu ba neh muiˇ luꞈ-eu tsawˇ jeuˬ-ahˇ laꞈ poˆ poˆ kʼoꞈ nehˬ-awˇ, bye dui dui-eu laꞈ kʼoeˇ laˆ cawˆ nehˬ-euˬ meh.

¹⁶Kʼoeˇ miˇ neh, Piˇliˇtiˆ tsawˇ haˬ deuˬ-ahˇ deuˆ byoˆ leꞈ ma lehˇ ngaˇ ehˇ-eu ma. Piˇliˇtiˆ deh ga-ahˇ kʼaˇ dzeˇ yaꞈ-euˬ tsawˇ haˬ yawˬ gʼaˬ na luꞈ-ahˇ, ngaˇ laˆ cawˆ nehˬ ma.

¹⁷Aˬ yawꞈ maꞈ-ahˇ ngaˇ yaw kʼaˆ kʼaˆ-ehˇ kʼehˬ nehˬ-awˇ, nui kʼahˇ tiˬ shiˇ laꞈ poˆ poˆ kʼoꞈ nehˬ ma. Ngaˇ nui ma pehˇ-eu jeˬ aˬ yawꞈ maꞈ-ahˇ siˬ duˬ leˇ tehꞈ-a. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ siˬ duˬ tehꞈ-a.”