Read Akha Yeˬsaˬgeˬlaˇ 26 Bible Online

Yeˬsaˬgeˬlaˇ 26 - Akha bible

Yeˬsaˬgeˬlaˇ 26

¹Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ-euˬ tseˇ tiꞈ kʼoꞈ tiˬ kʼoꞈ, ba la yaw beh siˬ aˇ nah yaw beh nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Duˇlu meuˬ-ahˇ jawˇ-eu tsawˇ haˬ deuˬ laˬ kʼaˬ cehˇ-awˇ, heu loꞈ-ehˇ guˇ luꞈ meh. ‘Yeˬluˇsaˬlehˬ meuˬ pyaˆ-iˇ gʼaˬ meh. Aˬ yawꞈ jeˬ gaꞈ jeˬ ka maˬ paˇ gʼeh nya ehˇ, aˬ dui tehꞈ-ehˇ nui kʼahˇ tiˬ shiˇ ya gaꞈ ya ka-eu ngaˇ’ lehˇ guˇ luꞈ meh.

³“Nymˬ-mˇ poˆ jawˇ-aˬ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Duˇlu meuˬ-oˇ, ngaˇ nawˬ-ahˇ muiˇ-eu ma. Tsawˇ jeuˬ gʼawˬ mya jeuˬ nawˬ-ahˇ guiˇ bi deuˆ le ma. Iˬ ma laˆ shaˆ iˇ luˆ dzeh-eu loꞈ-ehˇ aˬ yawꞈ maꞈ oe tehꞈ-a.

⁴Nawˬ-euˬ meuˬ meuˬ lahˇ aˬ yawꞈ maꞈ laˆ cawˆ-awˇ, loꞈ-eu nymˇ goˇ laˆ coˬ dzeh tehꞈ-a. Kʼoeˇ naˇ, miˇ tsaˬ dawˬ tawˆ luꞈ ngaˇ yaˆ dzeh jiˇ-awˇ, kʼaˬ lo tehꞈ-ehˇ buˇ coeˆ ni bi jaˆ ma.

⁵Meuˬ kʼoeˇ iˬ ma laˆ shaˆ laꞈ kʼoeˇ jaˆ gaˇ, ngaˬ shaˬ poˆ-eu tsawˇ haˬ deuˬ ngaˬ myahˬ sheu lawꞈ duˬ pyeuꞈ tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Miˇ kʼahˬ tsawˇ jeuˬ Duˇlu meuˬ-ahˇ myawˬ gahˬ ceh geuꞈ le tehꞈ-a.

⁶Meuˬ laꞈ kʼoeˇ jawˇ-eu tsawˇ haˬ deuˬ-ahˇ mi cehˇ neh aˬ yawꞈ maꞈ sehꞈ tehꞈ-a. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ Duˇlu meuˬ ya siˬ duˬ tehꞈ-a.”

⁷Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Sahˬ paˬ dawˬ tawˆ kʼoeˇ taˆ huiˬ-eu sahˬ paˬ pyeuꞈ-eu Baˬbuˇloˬ sahˬ paˬ Neˬbuˬkaˬneˬzaˬ-ahˇ ngaˇ sheuˬ leꞈ-awˇ, Duˇlu meuˬ-ahˇ guiˇ bi deuˆ ma. Mahˬ deuˬ, mahˬ laˆ lawˬ deuˬ hawˇ-eu, mahˬ dziˬ-eu yehˇ deuˬ ahˇ-eu guiˇ maꞈ maꞈ ma sheuˬ-awˇ, laꞈ taˆ paw kʼahˬ-ahˇ neh aˬ yawꞈ oe tehꞈ-a.

⁸Iˬ ma laˆ shaˆ-ahˇ yaw kʼaˆ-ehˇ maˬ peh-eu pehˇ tsahˇ tsahˇ ma-ahˇ jawˇ-eu deuˬ-aˬ, guiˇ deuˆ-awˇ bi deuˆ sehꞈ tehꞈ-a. Muiˇ-eu deuˬ kuˬ kaˬ duˬ-awˇ, miˇ tsaˬ ciˬ goˇ-eu laꞈ kʼoeˇ, nawˇ guiˇ deuˆ le gaˇ ciˬ daˬ tehꞈ-a.

⁹Nawˬ-euˬ meuˬ lahˇ-ahˇ, meuˬ lahˇ tahˬ byaˆ-eu dmˬ ma neh aˬ yawꞈ maꞈ tahˬ uˇ leꞈ-awˇ, shmˇ shmˇ kahˬ neh tsoˆ taˬ-euˬ loꞈ-eu nymˇ goˇ-ahˇ aˬ yawꞈ maꞈ laˆ coˬ dzeh tehꞈ-a.

¹⁰Aˬ yawꞈ maꞈ-euˬ mahˬ myaˬ dui dui-eu miˇ neh, mahˬ cehˆ ngeh pyuˬ laˇ-eu kʼaˬ lehˇ nawˬ-ahˇ pymˬ tehˬ tehꞈ-a. Meuˬ lahˇ kʼehˬ-ahˇ neh cawˆ-iˇ taˬ-euˬ meuˬ laꞈ kʼoeˇ laˇ uˇ-eu mahˬ laˆ lawˬ kʼoeˇ deuˬ luiˬ gʼa ngeh, meuˬ lahˇ nyeh laˇ tehꞈ-a.

¹¹Meuˬ laꞈ kʼoeˇ jaˆ-eu gaˇ ma doe ni, mahˬ dziˬ-eu yehˇ deuˬ mahˬ pyehˬ pyehˬ-awˇ, nawˬ-euˬ tsawˇ haˬ-ahˇ mi cehˇ coeˇ sehꞈ tehꞈ-a. Ziꞈ dah ni gʼeh-eu nawˬ-euˬ kʼawˇ zeuˇ zeuˇ ma deuˬ, miˇ tsa coˬ dzeh-awˇ ga tehꞈ-a.

¹²Nawˬ-euˬ pyuˇ shuiˇ myawˬ gahˬ hawˇ-eu nawˇ gaꞈ luꞈ ka luꞈ-eu myawˬ gahˬ deuˬ-ahˇ, muiˇ-eu deuˬ yuˇ geuꞈ tehꞈ-a. Nawˬ-euˬ meuˬ lahˇ-ahˇ aˬ yawꞈ maꞈ gʼeu coˬ-awˇ muiˬ dui dui-eu nawˬ-euˬ nymˇ deuˬ-ahˇ deh pyaˆ tehꞈ-a. Kʼaˬ lo tsaˬ byaˆ deuˬ, daˇ kawˬ deuˬ hawˇ-eu, miˇ tsaˬ deuˬ aˬ yawꞈ maꞈ iˬ ma laˆ shaˆ-ahˇ baꞈ bu tehꞈ-a.

¹³Nawˬ-euˬ caˇ dawˬ ciˬ cuˇ ni bi pyeuꞈ-iˇ-awˇ, nawˬ-euˬ deuˇ-mˬ diˬ-eu teˇ saˇ bi byoˆ-iˇ ma.

¹⁴Ngaˬ shaˬ poˆ-eu deuˬ, ngaˬ myahˬ sheu lawꞈ nya ni, kʼaˬ lo tiˬ siˬ tehꞈ-ehˇ buˇ law ni bi dzeˇ yaꞈ ma. Meuˬ heu tiˬ jawˇ-iˬ maˬ paˇ ya tsoˆ geuꞈ-aˇ lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁵Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ Duˇlu meuˬ-ahˇ heu loꞈ-ehˇ ehˇ-eu meh. “Nawˬ-ahˇ aˬ cawˬ guiˇ deuˆ gʼaˬ ngeh, aˬ cawˬ neh bi deuˆ sehꞈ bi deuˆ naˇ-euˬ tsawˇ haˬ deuˬ mahˇ-eu teˇ saˇ gaˬ-awˇ, iˬ ma laˆ shaˆ lawˇ dzeˇ caw caw-ehˇ kʼaˇ jawˇ-eu deuˬ guˆ dui dui-iˇ tehꞈ-a.

¹⁶Iˬ ma laˆ shaˆ paw kʼaˇ jawˇ-eu sahˬ paˬdawˬ tawˆ luꞈ sahˬ paˬ-euˬ nuiˇ mahˬ-ahˇ byehˇ-awˇ, pehˇ kʼahˬ pehˇ mahˇ hawˇ-eu aˇ boꞈ aˇ yehˆ yehˆ taˬ-euˬ mehˬ tsoeˬ deuˬ lehˆ dzeh-awˇ, yaw dzuˬ dzuˬ dzuˬ-ehˇ miˇ tsa ga nuiˇ tehꞈ-a. Nawˇ guiˬ lahˬ doeˇ gaˇ aˬ yawꞈ maꞈ haw guˆ-awˇ, yaw dzuˬ dzuˬ-eu maˬ naˬ leˇ nya-ehˇ shaˬ tehꞈ-a.

¹⁷Nawˬ-euˬ gʼaˇ duˬ tsawˇ ngoeˇ ngoeˇ nehˬ-eu caˇ dawˬ heu bymˇ aˬ yawꞈ maꞈ caˇ tehꞈ-a. “Tsawˇ myahˇ doˆ dui dui-eu meuˬ-oˇ, nawˇ aˬ joˆ-ehˇ bi laˆ cawˆ teˬ. Iˬ maˬ kʼoeˇ taˆ nawˬ neh dzoeˬ-awˇ, laˆ shaˆ-euˬ baoˬ nawˇ ngeuˇ law meh. Nawˇ hawˇ-eu nawˬ-euˬ tsawˇ haˬ-ahˇ, kʼaˇ jawˇ kʼaˇ deuˬ guˆ lawˬ yaˇ tawˇ.

¹⁸Nawˇ coˬ le-euˬ aˇ nah heu-ahˇ, laˆ shaˆ lawˇ taw miˇ kʼahˬ dawˬ tawˆ, guˆ-awˇ yaw dzuˬ dzuˬ dui dui meh. Nawˇ byaˆ le-euˬ aˇ nah heu-ahˇ, iˇ jaw lahˇ deuˬ guˆ dui dui meh.”

¹⁹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ maˬ jawˇ-ehˇ ciˬ cuˇ ni jaˆ-eu meuˬ meuˬ tsoeˬ loꞈ-ehˇ nawˇ bi pyeuꞈ-iˇ ma. Iˬ ma laˆ shaˆ yaw naꞈ-ahˇ dahˬ-eu iˇ cuꞈ neh nawˬ-ahˇ ngaˇ bi dahˬ pymˬ ma.

²⁰Aˇ hu ziˇ-ahˇ dehꞈ-euˬ tsawˇ haˬ deuˬ nehˬ-ehˇ bi jawˇ-iˇ-eu gʼaˇ duˬ, miˇ oˆ kʼahˬ-ahˇ nawˬ-ahˇ ngaˇ sheuˬ gʼeh ma. Miˇ kʼahˬ kʼoeˇ tsahˇ-ahˇ, shiˇ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ, mˬ maˬ maˬ byaˆ zaˇ ziˇ luˬ-iˇ seˇ-iˇ-eu jeˬ laꞈ kʼoeˇ, nawˬ-ahˇ ngaˇ bi jawˇ ma. Dehꞈ luꞈ-euˬ tsawˇ haˬ deuˬ jawˇ-eu miˇ kʼahˬ-ahˇ nawˇ maˬ paˇ ya jawˇ meh.

²¹Aˬ cawˬ guˆ dui dui-awˇ noeˬ paˇ leˇ paˬ-ehˇ, nawˬ-ahˇ ngaˇ yaw sah sah-ehˇ jahˇ nehˬ ma. Kʼoeˇ-aˬ, nawˬ-euˬ gʼaˇ duˬ aˇ saˬ saˬ-eu jeˬ meh. Aˬ cawˬ nawˬ-ahˇ poˆ kʼawꞈ, maˬ paˇ poˆ mawˇ nya-aˇ” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.