Read Akha Yeˬsaˬgeˬlaˇ 28 Bible Online

Yeˬsaˬgeˬlaˇ 28 - Akha bible

Yeˬsaˬgeˬlaˇ 28

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ, Duˇlu meuˬ-ahˇ uˆ lahˇ luꞈ-eu gʼaˬ-ahˇ ehˇ nehˬ-awˬ. “Nui ma huiˬ-eu mahˇ-eu laꞈ kʼoeˇ, ngaˇ miˬ yehˇ ma lehˇ nawˇ ehˇ-awˇ, Iˬ ma laˆ shaˆ gʼahˇ ceh jaˆ-eu, miˬ yehˇ nuiˇ mahˬ nuiˇ-eu ma lehˇ, nawˇ ehˇ taˬ-euˬ dawˬ jaˆ-eu meh. Miˬ yehˇ loꞈ-ehˇ gahˇ ma duˇ kʼawꞈ, miˬ yehˇ maˬ ngeuˇ-a, tsawˇ haˬ meh.

³Daˬyeˬlaˇ[5] naˆ maˬ tseˇ gahˇ-awˇ, nawˬ-euˬ mehˬ shi zaꞈ taˬ-euˬ jeˬ, maˬ paˇ jaˆ ma lehˇ nawˇ noeˬ meh.

⁴Nawˬ-euˬ zaˬ siˬ nui gahˇ baˬ da, nawˇ smˇ muiˬ smˇ baw baw laˇ-awˇ, Shuiˇ cehˇ jiˇ deuˬ pyuˇ cehˇ jiˇ deuˬ, nawˇ gaꞈ byah poˆ byah taˬ-euˬ meh.

⁵Gaꞈ-eu tsawˇ gahˇ byah-eu miˇ neh, jiˇ jeuˬ jeuˬ dui za dui dui-awˇ, Nawˬ-euˬ pyuˇ shuiˇ myawˬ gahˬ kʼoeˇ taˆ, nawˇ nui ma huiˬ laˇ taˬ-eu meh.

⁶Kʼoeˇ baˬ da neh Sahˬpaˬ Miˬyehˇ, nawˬ-ahˇ heu loꞈ-ehˇ ehˇ-eu meh. “Nawˇ miˬ yehˇ loꞈ-ehˇ gahˇ ma lehˇ, yawˬ haˇ yawˬ ha noeˬ huiˬ-eu meh.

⁷Guˆ laˇ paˬ-ehˇ gʼeh-eu tsawˇ jeuˬ, nawˇ jawˇ gaˇ ngaˇ sheuˬ ahˇ leꞈ ma. Aˬ yawꞈ maꞈ mi cehˇ gʼawˇ doˆ-awˇ, nawˬ-euˬ zaˬ siˬ tsawˇ gahˇ hawˇ-eu, haw muiˬ-eu jeˬ laˆ cawˆ jiˇ-awˇ, nawˬ-euˬ kʼahˬ sehˇ laˆ byoˆ tehꞈ-a.

⁸Naꞈ dui dui-eu duˬ kʼahˬ laꞈ kʼoeˇ, aˬ yawˬ maꞈ nawˬ-ahˇ dehˬ ahˇ-awˇ, Iˬ ma laˆ shaˆ gʼahˇ ceh di ga. shaˆ shiˇ ya shiˇ gaˇ keuˆ tehꞈ-a.

⁹Nawˬ-ahˇ sehꞈ-eu deuˬ-euˬ mehˬ shi, miˬ yehˇ ma lehˇ ehˇ te siˬ loˇ. Nawˬ-ahˇ sehꞈ-eu deuˬ-euˬ laꞈ-ahˇ, nawˇ miˬ yehˇ maˬ ngeuˇ-ehˇ, tsawˇ haˬ ngaˇ lehˇ duˬ laˇ tehꞈ-a.

¹⁰Boeˇ miˬ siˬ kʼaˬ deuˬ-euˬ laꞈ-ahˇ baˆ kʼoˆ mehˬ dzaˬ maˬ yehˬ taˬ-euˬ, tsawˇ haˬ loꞈ-ehˇ ya shiˇ meh lehˇ, Dawˬ tawˆ kʼoeˇ taˆ uˆ lahˇ luꞈ-eu, ngaˇ Sahˬpaˬ Miˬyehˇ ehˇ-eu ma.”

¹¹Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh.

¹²“Tsawˇ haˬ zaˬ-oˇ, Duˇlu sahˬ paˬ gʼaˇ duˬ tsawˇ ngoeˇ ngoeˇ-awˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ, aˬ yawꞈ-ahˇ ehˇ nehˬ-awˬ. “Nawˇ yawˬ jeˬ na byah dui dui-awˇ, tiˬ pawꞈ-iˬ ehˇ kʼaˇ maˬ za-a. Aˇ gʼehˇ muiˬ dui dui-eu uˬ taꞈ, zaˬ siˬ tsawˇ gahˇ byah dui dui meh.

¹³Miˬyehˇ yaˇ kmˇ kmˇ muiˬ kmˇ jaˬ, Eˬdeˬ yaˇ kmˇ-ahˇ nawˇ jawˇ-awˇ, Aˇ poeˬ kʼaˆ-eu kʼaˬ lo sehˇ deuˬ, lo neˇ, lo nyoeˇ, lo byaꞈ kʼoeˇ deuˬ nawˇ tiˬ byah ni geuꞈ taˬ-euˬ meh. Nawˬ-ahˇ beh ngeh nah neh daˬ-awˇ, sehˇ kʼoeˇ deuˬ lehˬ hmˬ taˬ-euˬ meh.

¹⁴Jeˬluˇbeˬ nawˬ-ahˇ loꞈ piˇ-awˇ, Miˬyehˇ-euˬ shawˇ-eu gawˬ jawˬ-ahˇ, nawˬ-ahˇ bi jawˇ-euˬ meh. Yaw shehꞈ bya-eu sehˇ deuˬ gʼahˇ ceh, nawˇ cah cah-ehˇ ya jawˇ-euˬ meh.

¹⁵Nawˬ-ahˇ beh ngeh nah neh daˬ-awˇ, iˬ baˇ mˇ dahˬ maˬ beh kʼoeˇ keuˆ, iˬ baˇ taˬ kʼaˇ maˬ za law-a.

¹⁶Jeˬ gaꞈ jeˬ ka gʼeh nya laˇ ngeh, yaw haiˬ hawˇ-eu iˬ baˇ mˇ-awˇ, Miˬyehˇ gawˬ jawˬ yaw shawˇ kʼoeˇ taˆ, nawˬ-ahˇ ngaˬ neh teh dzeh-euˬ ma. Yaw shehꞈ bya-eu sehˇ deuˬ gʼahˇ ceh, Jeˬluˇbeˬ nawˬ-ahˇ teh-euˬ meh.

¹⁷Nawˬ-euˬ seuˆ jeuꞈ aˇ gʼehˇ muiˬ gaˇ, nawˇ nui ma huiˬ dui dui-eu meh. Nawˇ tsawˇ myahˇ doˆ-eu baˬ da neh, nui ma-ahˇ maˬ paˇ noeˬ-euˬ meh. Kʼoeˇ miˇ neh, nawˬ-ahˇ dehˬ coˬ-awˇ, miˇ kʼahˬ sahˬ paˬ deuˬ-euˬ mehˬ shi, haw niˇ gʼa duˬ bi pyeuꞈ-euˬ ma.

¹⁸Jeˬ gaꞈ jeˬ ka gʼeh-eu laꞈ kʼoeˇ, nawˇ yaw haiˬ mˇ myaˬ-euˬ miˇ neh, Nawˬ-euˬ uˬ duˬ tahˬ-eu jawˇ duˬ, jawꞈ dui doeˇ dui dui-iˇ-euˬ meh. Kʼoeˇ miˇ neh meuˬ-ahˇ keuˬ puiˆ-awˇ, miˇ tsa tuˆ ni bi puiˆ-euˬ ma. Nawˬ-ahˇ kʼaˇ haw-eu tsawˇ haˬ deuˬ, lehˇ tsaˇ tehꞈ-ehˇ ya mawˇ-eu meh.

¹⁹Nawˬ-euˬ guiˬ lahˬ kʼoeˇ naˆ tehꞈ meh. Nawˬ-euˬ ziˇ kʼoeˇ gaˇ jiˇ-euˬ meh. Nawˬ-ahˇ kʼaˇ siˬ nya-eu tsawˇ jeuˬ, nawˇ loꞈ-ehˇ pyeuꞈ laˇ gaˇ guˆ meh.

²⁰Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²¹“Tsawˇ haˬ zaˬ-oˇ, Siˇdoˬ meuˬ-ahˇ dawˬ heu deuˬ ciˬ pi nehˬ-awˬ.

²²Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Siˇdoˬ meuˬ-oˇ, nawˬ-ahˇ muiˇ ma. Ngaˬ-euˬ yaw shehꞈ kʼahˬ sehˇ huiˬ-eu, nawˬ-euˬ gʼahˇ ceh pah mehˬ le ma. Nawˬ-ahˇ ngaˇ kehˬ nehˬ kʼaˆ nehˬ-awˇ, ngaˇ muiˬ-eu shawˇ-eu bi mawˇ ngeh, Ngaˇ Sahˬpaˬ Miˬyehˇ ngeuˇ ngaˇ lehˇ, aˬ cawˬ siˬ duˬ mawˇ duˬ tehꞈ-a.

²³Naˇ gawˇ yaw kʼaˆ bi keuˆ le-awˇ, meuˬ meuˬ lah-ehˇ shiˬ bi yoeˇ ma. Yawˬ paw na luꞈ guiˇ deuˆ le-awˇ, nawˬ-euˬ tsawˇ haˬ shiˇ myaˬ tehꞈ-a. Aˇ nah kʼoeˇ nah keuˆ le ngeh jawˇ, ngaˇ Sahˬpaˬ Miˬyehˇ ngeuˇ ngaˇ lehˇ, aˬ cawˬ siˬ nya jiˇ laˇ tehꞈ-a.”

²⁴Sahˬpaˬ Miˬyehˇ ehˇ-eu, “Iˇsaˬleˬlaˆ miˇ kʼahˬ tiˬ jawˬ jawˇ-awˇ, Iˇsaˬleˬlaˆ miˇ kʼahˬ-ahˇ kʼaˇ laˆ bahˬ-eu miˇ kʼahˬ yawˬ kʼahˬ na luꞈ, aˬ gah hawˇ-eu daˇ ceh loꞈ-ehˇ maˬ paˇ laˆ bahˬ nya ni pyeuꞈ-iˇ-eu uˬ taꞈ, ngaˇ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu gaˇ kawˆ, aˬ yawꞈ maꞈ-ahˇ siˬ duˬ leˇ tehꞈ-a.”

²⁵Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Iˇsaˬleˬlaˆ tsawˇ haˬ deuˬ-ahˇ, ngaˬ neh teh byaˆ nehˬ-euˬ miˇ kʼahˬ deuˬ laꞈ kʼoeˇ neh ngaˇ paˇ sheuˬ doˆ kʼoꞈ laꞈ-awˇ, ngaˇ muiˬ-eu shawˇ-eu gaˇ kawˆ tsawˇ jeuˬ dawˬ tawˆ luꞈ ya siˬ duˬ tehꞈ-a. Iˇsaˬleˬlaˆ tsawˇ haˬ deuˬ-aˬ, ngaˬ-euˬ zaˬ kʼaˆ Yaˬkoˆ-ahˇ ngaˬ neh biꞈ taˬ-euˬ miˇ kʼahˬ pyeuꞈ-eu, aˬ yawꞈ maꞈ-euˬ miˇ kʼahˬ laꞈ kʼoeˇ ya jawˇ tehꞈ-a.

²⁶Aˬ yawꞈ maꞈ kʼoeˇ gaˇ, guˆ-eu gaˆ-eu jeˬ-ahˇ kʼahˬ lahˇ kʼaˇ maˬ za ni ya dehꞈ tehꞈ-a. Aˬ yawꞈ maꞈ nymˇ tsoˆ ziꞈ-awˇ, aˬ gaꞈ yaˇ kmˇ mˇ tehꞈ-a. Aˬ yawꞈ maꞈ-ahˇ yehˬ bawˬ sehˇ lu-ehˇ jahˇ-eu, aˬ yawꞈ maꞈ-euˬ dawˬ peh kʼaˇ jawˇ-eu tsawˇ haˬ deuˬ-ahˇ ngaˇ kʼehˬ nehˬ kʼaˆ nehˬ ma. Iˇsaˬleˬlaˆ tsawˇ haˬ deuˬ nui saˇ oꞈ-awˇ ya dehꞈ ya jawˇ tehꞈ-a. Kʼoeˇ ngeh jawˇ, ngaˇ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ngaˇ lehˇ, aˬ yawꞈ maꞈ-ahˇ siˬ duˬ leˇ tehꞈ-a.