Read Akha Yeˬsaˬgeˬlaˇ 31 Bible Online

Yeˬsaˬgeˬlaˇ 31 - Akha bible

Yeˬsaˬgeˬlaˇ 31

¹Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ-eu tseˇ tiꞈ kʼoꞈ tiˬ kʼoꞈ, ba la smˇ siˬ tiˬ siˬ yaw beh nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Iˇjiˇtuˆ sahˬ paˬ hawˇ-eu aˬ yawꞈ-euˬ tsawˇ haˬ dawˬ tawˆ luꞈ-ahˇ heu loꞈ-ehˇ ehˇ nehˬ-awˬ. Nawˇ aˇ naˆ ni baoˬ huiˬ-eu nga. Nawˬ-ahˇ aˬ geu jeˬ shaˇ cehˆ nmˇ.

³Uˬ pyaˬ uˬ laꞈ aˇ paꞈ sahˇ-awˇ, mˬ dmˇ tuˆ ni goˇ-awˇ muiˬ-eu, Leˬbaˬnoˬ gawˬ jawˬ-ahˇ dehꞈ-eu, shuˬ liˇ aˇ bawˇ-ahˇ nawˇ duˇ meh.

⁴Aˇ bawˇ gʼaˇ duˬ iˇ cuꞈ jaˆ meh. Miˇ tsaˬ dawˬ dah lawˇ baˬ yoeˇ meh. Aˇ bawˇ dehꞈ zaˇ iˇ cuꞈ biꞈ-awˇ, sahˬ kʼaˆ aˇ bawˇ kʼaˇ dehꞈ keuˆ gaˇ, lawˇ gawˆ yoeˇ-awˇ bi aˬ-euˬ meh.

⁵Iˇ cuꞈ za muiˬ-eu baˬ da neh, aˇ bawˇ nui deuˬ maˬ tseˇ goˇ-awˇ, uˬ laꞈ huiˬ dzehˬ mahˇ dzehˬ-eu meh.

⁶Aˬ yawꞈ-euˬ uˬ laꞈ deuˬ kʼoeˇ taˆ, aˇ jiˇ kʼaˇ ngeuˇ-eu bahˬ bahˬ-awˇ, bawˇ tsahˬ jeˬ zaˬ huiˬ huiˬ nyiˇ nyiˇ, aˇ bawˇ uˬ moˆ zaˬ puˬ-eu meh. Miˇ kʼahˬ tsawˇ jeuˬ tsawˇ ca dawˬ tawˆ, aˇ bawˇ naˇ shmˇ awˆ le-eu meh.

⁷Aˇ bawˇ kʼoeˇ haw muiˬ dui dui meh. Uˬ laꞈ mahˇ-awˇ goˇ dui dui meh. Miˇ tsaˬ dawˬ dah lawˇ baˬ yoeˇ gaˇ, duˬ ciˇ toeˬ keuˆ-iˇ taˬ-euˬ meh.

⁸Miˬyehˇ yaˇ kmˇ shuˬ liˇ bawˇ kʼawꞈ, aˬ yawꞈ-ahˇ maˬ ciˬ cehˆ peuˬ-a. Aˬ yawꞈ loꞈ-ehˇ uˬ pyaˬ sahˇ-eu, siˬ guˬ aˇ bawˇ maˬ mawˇ haw-aˬ. Aˬ yawꞈ loꞈ-ehˇ uˬ laꞈ myaˬ-eu tsuiꞈ sehˇ bawˇ-eu maˬ gaˬ haw-aˬ. Miˬyehˇ yaˇ kmˇ dehꞈ-eu aˇ bawˇ, aˬ yawꞈ loꞈ-ehˇ maˬ muiˬ keuˆ-a.

⁹Uˬ laꞈ sahˇ-awˇ aˇ gʼehˇ muiˬ ni, ngaˬ neh jahˇ-awˇ bi muiˬ-euˬ ma. Miˬyehˇ yaˇ kmˇ Eˬdeˬ laꞈ kʼoeˇ, kʼaˇ dehꞈ-eu aˇ bawˇ dawˬ tawˆ luꞈ, aˬ yawꞈ-ahˇ myaˆ naˆ luꞈ-eu meh.

¹⁰“Nymˬ-mˇ poˆ jawˇ-aˬ, mˬ dmˇ-ahˇ tuˆ ni goˇ-eu aˇ bawˇ kʼoeˇ bawˇ-ahˇ aˬ jeˬ keuˆ le-eu gʼeh-eu gaˇ kawˆ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ nawˬ-ahˇ ehˇ nehˬ-eu ma. Aˇ bawˇ kʼoeˇ ngehˬ-ehˇ goˇ laˇ naˇ ngehˬ-ehˇ nui ma huiˬ-eu meh.

¹¹Kʼoeˇ miˇ neh, aˇ bawˇ kʼoeˇ-ahˇ ngaˇ byehˇ dzeh-awˇ, aˬ cawˬ tsawˇ jeuˬ sahˬ paˬ-euˬ laꞈ-ahˇ bi ahˇ leˇ ma. Aˇ bawˇ kʼoeˇ yaw haiˬ miˇ neh, aˬ yawꞈ-ahˇ kʼaˇ oꞈ kʼaˇ geuˇ-eu loꞈ-ehˇ jahˇ nehˬ tehꞈ-a.

¹²Gʼawˬ shaˬ gaˬ-eu maˬ siˬ nya-eu aˬ cawˬ tsawˇ jeuˬ neh tuˇ dzeh-awˇ bi ga yaꞈ tehꞈ-a. Gawˬ jawˬ gʼaˬ lawˬ doe ni aˇ bawˇ kʼoeˇ bawˇ-euˬ uˬ pyaˬ uˬ laꞈ ga tehꞈ-a. Aˬ yawꞈ-euˬ naˇ shmˇ uˬ moˆ kʼaˇ jawˇ-euˬ tsawˇ jeuˬ dawˬ tawˆ luꞈ cehˆ jiˇ tehꞈ-a.

¹³Aˇ jiˇ deuˬ coˬ-iˇ taˬ-euˬ aˇ bawˇ kʼoeˇ taˆ ga dawꞈ le-awˇ, bawˇ tsahˬ jeˬ zaˬ deuˬ uˬ pyaˬ uˬ laꞈ kʼoeˇ taˆ nawˬ nawˬ-ehˇ cah tehꞈ-a.

¹⁴Kʼoeˇ miˇ neh, iˬ nah taꞈ naˇ, iˇ cuꞈ aˇ naˆ ni za muiˬ-eu aˇ bawˇ maˬ kaˬ, aˇ bawˇ kʼoeˇ bawˇ loꞈ-ehˇ mˬ dmˇ-ahˇ tuˆ gaˇ keuˆ ni maˬ paˇ goˇ leˇ nya meh. Dawˬ tawˆ luꞈ tsawˇ haˬ zaˬ loꞈ-ehˇ ya shiˇ-awˇ, shiˇ-eu miˇ kʼahˬ-ahˇ iˇ dzeuˇ-euˬ deuˬ nehˬ-ehˇ ya jawˇ-iˇ tehꞈ-a.”

¹⁵Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˇ bawˇ kʼoeˇ bawˇ shiˇ-eu miˇ kʼahˬ-ahˇ iˇ keuˆ ngeh nah, miˇ tsaˬ dawˬ dah-euˬ iˇ cuꞈ neh bi dahˬ pymˬ-awˇ tsawˇ ngoeˇ bi ngoeˇ nehˬ ma. Lawˇ baˬ gawˆ ma deuˬ-ahˇ ngaˇ gʼeu tehˬ taˬ-awˇ, gawˆ zaˬ deuˬ kʼawꞈ yaw kʼaˆ-ehˇ maˬ yoeˇ ni bi pyeuꞈ-iˇ ma. Aˇ bawˇ kʼoeˇ shiˇ-euˬ miˇ neh, Leˬbaˬnoˬ gawˬ jawˬ kʼoeˇ taˆ zahˇ tsui ni gʼeh-eu jeˬ bi keuˆ le-awˇ, sahˬ kʼaˆ-ahˇ kʼaˇ dehꞈ-eu aˇ bawˇ deuˬ bi nyoeˬ-iˇ ma.

¹⁶Aˬ yawꞈ-ahˇ ngaˇ shiˇ-eu miˇ kʼahˬ-ahˇ bi iˇ ngeh, aˇ bawˇ kʼoeˇ bawˇ coˬ-iˇ-eu teˇ saˇ-ahˇ, miˇ kʼahˬ tsawˇ jeuˬ dawˬ tawˆ luꞈ yaw dzuˬ dzuˬ dui dui tehꞈ-a. Miˇ oˆ kʼahˬ-ahˇ iˇ keuˆ taˬ-euˬ aˇ bawˇ deuˬ pyeuꞈ-eu, Eˬdeˬ yaˇ kmˇ-ahˇ kʼaˇ dehꞈ-eu aˇ bawˇ deuˬ hawˇ-eu, Leˬbaˬnoˬ gawˬ jawˬ-ahˇ kʼaˇ dehꞈ-eu, iˇ cuꞈ dawˇ dehˆ-awˇ muiˬ dui dui-eu aˇ bawˇ dawˬ tawˆ luꞈ, aˇ bawˇ kʼoeˇ bawˇ coˬ le gaˇ laˬ kʼaˬ cehˇ tehꞈ-a.

¹⁷Shiˇ-eu miˇ kʼahˬ-ahˇ iˇ keuˆ dzeuˇ taˬ-euˬ deuˬ jawˇ gaˇ, aˬ yawꞈ maꞈ aˬ yawꞈ nehꞈ-ehˇ tiˬ kawˆ loꞈ-ehˇ iˇ gʼeh tehꞈ-a. Kʼoeˇ naˇ, aˬ yawꞈ-euˬ naˇ shmˇ uˬ moˆ kʼaˇ jawˇ-euˬ deuˬ dawˬ tawˆ luꞈ, miˇ kʼahˬ tsawˇ jeuˬ deuˬ yaw kaˬ-ahˇ jawˇ byoˆ jiˇ tehꞈ-a.

¹⁸“Aˇ bawˇ kʼoeˇ-aˬ, Iˇjiˇtuˆ sahˬ paˬhawˇ-eu aˬ yawꞈ-euˬ tsawˇ haˬ dawˬ tawˆ luꞈ-ahˇ ehˇ mawꞈ-eu meh. Eˬdeˬ yaˇ kmˇ laꞈ kʼoeˇ dehꞈ-eu aˇ bawˇ deuˬ kʼawꞈ, kʼoeˇ naˆ ni maˬ goˇ-ehˇ, kʼoeˇ loꞈ-ehˇ maˬ haw muiˬ-a. Ehˇ kʼawꞈ, Eˬdeˬ yaˇ kmˇ -ahˇ dehꞈ-eu aˇ bawˇ deuˬ loꞈ-ehˇ, shiˇ-eu miˇ kʼahˬ-ahˇ ya iˇ-awˇ, miˬ yehˇ-ahˇ maˬ gʼoe-eu deuˬ hawˇ-eu, guiˇ deuˆ gaˇ shiˇ-euˬ deuˬ nehˬ-ehˇ tiˬ kawˆ loꞈ-ehˇ ya jawˇ-iˇ meh lehˇ ngaˇ ehˇ-eu ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.