Read Akha Yeˬsaˬgeˬlaˇ 32 Bible Online

Yeˬsaˬgeˬlaˇ 32 - Akha bible

Yeˬsaˬgeˬlaˇ 32

¹Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ-euˬ tseˇ nyiꞈ kʼoꞈ tiˬ kʼoꞈ, ba la tseˇ nyiꞈ siˬ tiˬ siˬ yaw beh nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Iˇjiˇtuˆ sahˬ paˬ-ahˇ shaˇ noeˬ dui dui paˬ-ehˇ gʼeh-eu dawˬ heu deuˬ ehˇ nehˬ-awˬ. “Aˇ laˬ jaˬ shiˇ-ahˇ duˇ ma lehˇ, nawˇ yawˬ haˇ yawˬ ha noeˬ-eu kʼawꞈ, laˆ shaˆ laꞈ kʼoeˇ uˇ-eu laˆ shaˆ byaˆ yahˬ loˆ ni tehꞈ meh. Aˬ kuiˇ neh iˇ neˇ laˆ neˇ-awˇ, lawˇ baˬ-ahˇ nawˇ laˆ jawꞈ-eu meh.

³Sahˬpaˬ Miˬyehˇ pyeuꞈ-eu Miˬyehˇ, kʼoeˇ miˇ neh heu loˇ ehˇ-eu meh. Miˇ kʼahˬ tsawˇ jeuˬ uiˬ le taˬ ngeh, nawˬ-ahˇ ngaˇ za neh dzeh paꞈ-awˇ, lawˇ dzeˇ-ahˇ bi gʼeu doˆ laꞈ ma.

⁴Nawˬ-ahˇ ngaˇ miˇ tsa baꞈ dzeh -awˇ, miˇ tsaˬ kʼoeˇ taˆ kʼaˇ jawˇ luꞈ-eu, jeˬ zaˬ hawˇ-eu aˇ jiˇ dawˬ tawˆ, kuˇ uiˬ-awˇ nawˬ-ahˇ bi dzaˬ ma.

⁵Gawˬ jawˬ gʼaˬ lawˬ yawˬ gaˇ na luꞈ, nawˬ-euˬ shaˬ jiˇ bi ga byah ma.

⁶Gawˬ jawˬ gawˬ duˇ-ahˇ nyiꞈ leˇ-awˇ, lawˇ gawˆ deuˬ yoeˇ byah gaˇ keuˆ ni, nawꞈ-euˬ shiˬ bi yoeˇ doˆ le ma.

⁷Nawˬ-ahˇ ngaˇ laˆ cawˆ nehˬ ngeh nah, mˬ-ahˇ ngaˇ dehˬ kaˬ-eu laꞈ kʼoeˇ, aˬ guiˇ zahˇ tsui ni bi jaˆ ma. Nahˇ ma-ahˇ mˬ dmˇ dehˬ kaˬ-awˇ, ba la tsehˬ-eu bi naˬ leˇ ma.

⁸Mˬ taˆ yaw shehꞈ dawˬ tawˆ luꞈ-ahˇ, ngaˇ dehˬ kaˬ byoˆ jiˇ nehˬ ngeh jawˇ, nawˬ-euˬ miˇ tsaˬ zahˇ le meh lehˇ, Dawˬ tawˆ kʼoeˇ taˆ uˆ lahˇ luꞈ-eu, ngaˇ Sahˬpaˬ Miˬyehˇ ehˇ-eu ma.

⁹“Nawˇ maˬ gaˬ haw-euˬ miˇ kahˬ-ahˇ keuˆ ni, nawˇ luˬ-iˇ seˇ-iˇ-euˬ gaˇ kawˆ ngaˇ bi gaˬ keuˆ-iˇ ngeh, tsawˇ jeuˬ gʼawˬ mya jeuˬ nui ma shaˬ zahˬ ya mˇ tehꞈ-a.

¹⁰Ngaˬ neh nawˬ-ahˇ jahˇ nehˬ-euˬ gaˇ, tsawˇ jeuˬ gʼawˬ mya ni tsawˬ guˆ-iˇ tehꞈ-a. Ngaˬ-euˬ mi cehˇ sheu juiꞈ mehˬ ngeh, sahˬ paˬ deuˬ laˇ baˇ-iˇ tehꞈ-a. Nawˇ coˬ le ngeh nah, aˬ yawꞈ maꞈ dawˬ tawˆ luꞈ yawˬ ha uˬ kʼawˇ deuˬ laˇ gaˇ kʼahˬ lahˇ dui dui tehꞈ-a.”

¹¹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ Iˇjiˇtuˆ sahˬ paˬ-ahˇ heu loꞈ-ehˇ ehˇ-eu meh. “Baˬbuˇloˬ sahˬ paˬ-euˬ mi cehˇ-ahˇ nawˇ ya tahˬ puˬ tehꞈ-a.

¹²Haiˬ dui dui-eu tsawˇ jeuˬ-euˬ yehˇ deuˬ mi cehˇ bi gʼawˇ doˆ-awˇ, nawˬ-euˬ tsawˇ haˬ deuˬ-ahˇ bi sehꞈ ma. “Iˇjiˇtuˆ-euˬ kʼahˬ sehˇ hawˇ-eu, aˬ yawꞈ-euˬ tsawˇ haˬ dawˬ tawˆ luꞈ, aˬ yawꞈ maꞈ laˆ cawˆ jiˇ tehꞈ-a.

¹³Iˇ cuꞈ lawˇ kʼawꞈ deuˬ kʼaˇ jaˆ gaˇ yawꞈ-euˬ jeˬ zaˬ bi shiˇ jiˇ ma. Iˇ cuꞈ iˇ neˇ nawˬ neˇ paˬ-ehˇ, jeˬ zaˬ tsawˇ haˬ maˬ paˇ jawˇ meh.

¹⁴Nawˬ-euˬ iˇ cuꞈ bi gahˇ laˇ-awˇ, iˇ yoeˇ bi di laˇ-eu ma lehˇ, Dawˬ tawˆ kʼoeˇ taˆ uˆ lahˇ luꞈ-eu, ngaˇ Sahˬpaˬ Miˬyehˇ ehˇ-eu ma.

¹⁵Tsawˇ haˬ dawˬ tawˆ luꞈ shiˇ jiˇ-awˇ, yawˬ jeˬ na byoˆ jiˇ-euˬ miˇ neh, Iˇjiˇtuˆ ciˬ cuˇ ni jaˆ ngeh, Ngaˇ Sahˬpaˬ Miˬyehˇ ngeuˇ ngaˇ lehˇ, aˬ yawꞈ maꞈ ya siˬ duˬ tehꞈ-a.

¹⁶“Maˇ jawˆ ni gʼeh-eu dawˬ heu deuˬ-aˬ, tsawˇ ngoeˇ ngoeˇ-eu caˇ dawˬ pyeuꞈ laˇ tehꞈ-a. Iˇjiˇtuˆ miˇ kʼahˬ hawˇ-eu kʼoeˇ gaˇ kʼaˇ jawˇ-eu tsawˇ haˬ dawˬ tawˆ luꞈ gʼaˇ duˬ, miˇ kʼahˬ tsawˇ jeuˬ zaˬ miˬ zaˬ deuˬ caˇ dawˬ heu bymˇ caˇ tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁷Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ luꞈ-eu tseˇ nyiꞈ kʼoꞈ tiꞈ kʼoꞈ, ba la yaw beh siˬ tseˇ ngaˬ nah-ahˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

¹⁸“Tsawˇ haˬ zaˬ-oˇ, Iˇjiˇtuˆ tsawˇ haˬ deuˬ gʼaˇ duˬ tsawˇ ngoeˇ ngoeˇ-awˬ. Baoˬ huiˬ-eu tsawˇ jeuˬ nui deuˬ nehˬ-ehˇ tiˬ kʼawˆ loꞈ-ehˇ, aˬ yawꞈ maꞈ-ahˇ shiˇ-eu miˇ kʼahˬ-ahˇ bi keuˆ-iˇ-awˬ.

¹⁹Aˬ yawꞈ maꞈ-ahˇ heu loꞈ-ehˇ ehˇ nehˬ-awˬ. “Nawˬ-euˬ aˇ gʼehˇ aˬ cawˬ taꞈ-ehˇ, muiˬ dzehˬ ma lehˇ noeˬ luꞈ te loˇ. Shiˇ-eu miˇ kʼahˬ-ahˇ keuˆ-iˇ-awˇ, Miˬyehˇ maˬ baw-eu deuˬ nehˬ-ehˇ, tiˬ kawˆ loꞈ-ehˇ ya ga tehꞈ-a.

²⁰“Iˇjiˇtuˆ tsawˇ haˬ deuˬ-aˬ, guiˇ deuˆ gaˇ bi sehꞈ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ ya coˬ sehꞈ tehꞈ-a. Aˬ yawꞈ maꞈ-ahˇ sehꞈ jiˇ-eu lehˇ lehˬ hmˬ taˬ-euˬ mi cehˇ jaˆ-eu meh.

²¹Nui ma kʼaˬ duˬ ni gʼeh-eu aˬ yuiꞈ aˬ tsu deuˬ hawˇ-eu, Iˇjiˇtuˆ tsawˇ jeuˬ gʼaˇ duˬ guiˇ deuˆ-euˬ deuˬ, Iˇjiˇtuˆ tsawˇ haˬ deuˬ-ahˇ shiˇ-eu miˇ kʼahˬ-ahˇ ha ahˇ tehꞈ-a. ‘Guiˇ deuˆ gaˇ bi deuˆ sehꞈ-euˬ Miˬyehˇ-ahˇ maˬ siˬ nya-eu tsawˇ haˬ deuˬ oe keuˆ-awˇ heu gaˇ ga luꞈ meh’ lehˇ, aˬ yawꞈ maꞈ guˇ-eu meh.

²²“Aˬshuˇliˆ kʼoeˇ gaˇ ga luꞈ meh. Aˬ yawꞈ-euˬ yehˇ deuˬ-euˬ lmˬ bymˇ, aˬ yawꞈ jawˇ-eu tiˬ jawˬ jaˆ luꞈ meh.

²³Aˬ yawꞈ maꞈ dawˬ tawˆ luꞈ guiˇ deuˆ-awˇ shiˇ-euˬ meh. Aˬ yawꞈ maꞈ-euˬ lmˬ bymˇ-aˬ, shiˇ-eu miˇ kʼahˬ laꞈ kʼoeˇ aˬ cawˬ naˆ maˬ tseˇ naꞈ gaˇ jaˆ-eu meh. Aˬ yawꞈ-euˬ yehˇ deuˬ dawˬ tawˆ luꞈ, guiˇ deuˆ gaˇ bi sehꞈ jiˇ-awˇ, aˬ yawꞈ-euˬ lmˬ bymˇ tiˬ jawˬ aˬ yawꞈ maꞈ-euˬ lmˬ bymˇ jaˆ-eu meh. Dehꞈ-eu miˇ kʼahˬ laꞈ kʼoeˇ, aˇ hu aˬ yawꞈ maꞈ-ahˇ guˆ dui dui-euˬ meh.

²⁴“Eˇlamˬ kʼoeˇ gaˇ ga luꞈ meh. Aˬ yawꞈ-euˬ yehˇ deuˬ-euˬ lmˬ bymˇ, aˬ yawꞈ jawˇ-eu tiˬ jawˬ jaˆ luꞈ meh. Aˬ yawꞈ maꞈ dawˬ tawˆ luꞈ guiˇ deuˆ gaˇ bi sehꞈ jiˇ-awˇ, baˆ kʼoˆ mehˬ dzaˬ maˬ yehˬ ni shiˇ-eu miˇ kʼahˬ-ahˇ keuˆ-iˇ-euˬ meh. Dehꞈ ngeh aˬ yawꞈ maꞈ aˬ cawˬ-ahˇ laˆ guˆ-euˬ kʼawꞈ, nymˬ-mˇ yaw shiˇ-ehˇ ga-awˇ, myaˆ pyawˬ naˇ mehˇ maˬ paˇ jaˆ meh.

²⁵Eˇlamˬ miˇ kʼahˬ-aˬ, guiˇ deuˆ gaˇ bi sehꞈ-euˬ deuˬ yaw kaˬ-ahˇ ga-awˇ, aˬ yawꞈ-euˬ yehˇ deuˬ-euˬ lmˬ bymˇ, aˬ yawꞈ-euˬ tiˬ jawˬ jaˆ-eu meh. Aˬ yawꞈ maꞈ dawˬ tawˆ luꞈ baˆ kʼoˆ mehˬ dzaˬ maˬ yehˬ-euˬ tsawˇ haˬ pyeuꞈ-awˇ, guiˇ deuˆ gaˇ bi sehꞈ jiˇ-euˬ meh. Dehꞈ ngeh aˬ yawꞈ maꞈ aˬ cawˬ-ahˇ laˆ guˆ-euˬ kʼawꞈ, nymˬ-mˇ guiˇ deuˆ gaˇ bi sehꞈ-euˬ deuˬ nehˬ-ehˇ tiˬ kawˆ loꞈ-ehˇ yaw shiˇ-ehˇ ga-awˇ, myaˆ pyawˬ naˇ mehˇ maˬ paˇ jaˆ meh.

²⁶“Meˬshehˆ hawˇ-eu Tuˇbaˬlaˇ aˬ nyaꞈ kʼoeˇ gaˇ ga luꞈ meh. Aˬ yawꞈ nyaꞈ-euˬ yehˇ deuˬ-euˬ lmˬ bymˇ, aˬ yawꞈ nyaꞈ-euˬ tiˬ jawˬ jaˆ luꞈ meh. Aˬ yawꞈ maꞈ dawˬ tawˆ luꞈ baˆ kʼoˆ mehˬ dzaˬ maˬ yehˬ-euˬ tsawˇ haˬ meh. Dawˬ tawˆ luꞈ guiˇ deuˆ gaˇ bi sehꞈ jiˇ-euˬ meh. Aˇ hu dehꞈ-eu miˇ kʼahˬ-ahˇ jawˇ ngeh, aˬ cawˬ aˬ yawꞈ maꞈ-ahˇ guˆ-euˬ meh.

²⁷Aˇ hu nui ma kʼaˬ duˬ ni gʼeh-eu aˬ yuiꞈ aˬ tsu deuˬ shiˇ-eu miˇ kʼahˬ-ahˇ iˇ ngeh, mi cehˇ-ahˇ mˬ gʼmˬ bi gʼmˬ-awˇ, gʼawˇ mawˇ-ahˇ dehˬ daˬ duˬ dehˬ kaˬ nehˬ-eu laꞈ kʼoeˇ, guiˇ deuˆ-eu keu ka tiˬ kuꞈ hehˇ-awˇ bi iˇ-euˬ meh. Ehˇ kʼawꞈ, aˬ yawꞈ nyaꞈ-ahˇ duˬ pahˬ nehˬ ngeh kʼoeˇ loꞈ-ehˇ maˬ jahˇ nehˬ-aˬ. Nui ma kʼaˬ duˬ ni gʼeh-eu aˬ yuiꞈ aˬ tsu kʼoeˇ deuˬ-ahˇ, dehꞈ-eu miˇ kʼahˬ-ahˇ jawˇ ngeh aˬ cawˬ guˆ dui dui-euˬ meh.

²⁸“Iˇjiˇtuˆ-aˬ, guiˇ deuˆ gaˇ bi sehꞈ-euˬ baˆ kʼoˆ mehˬ dzaˬ maˬ yehˬ-euˬ tsawˇ haˬ kʼoeˇ deuˬ nehˬ-ehˇ, kʼoeˇ loꞈ-ehˇ yaw shiˇ-ehˇ ya ga tehꞈ-a.

²⁹“Eˬdoˬ-aˬ, aˬ yawꞈ-euˬ sahˬ paˬ sahˬ ma deuˬ nehˬ-ehˇ kʼoeˇ gaˇ ya ga tehꞈ-a. Aˬ yawꞈ maꞈ-aˬ, baoˬ huiˬ-eu yehˇ deuˬ pyeuꞈ-euˬ kʼawꞈ, nymˬ-mˇ guiˇ deuˆ gaˇ bi sehꞈ-euˬ baˆ kʼoˆ mehˬ dzaˬ maˬ yehˬ-euˬ tsawˇ haˬ deuˬ nehˬ-ehˇ, shiˇ-eu miˇ kʼahˬ-ahˇ ya ga-eu meh.

³⁰“Kʼoeˇ taˆ miˇ kʼahˬ paw jawˇ-eu sahˬ paˬ zaˬ yo deuˬ dawˬ tawˆ luꞈ kʼoeˇ gaˇ ga-awˇ, Siˇdoˬ tsawˇ haˬ deuˬ kʼawꞈ kʼoeˇ gaˇ ga-eu meh. Yaw beh aˬ yawꞈ maꞈ-euˬ baoˬ-ahˇ aˬ cawˬ guˆ dui dui-euˬ meh. Ehˇ kʼawꞈ, nymˬ-mˇ myaˆ pyawˬ naˇ mehˇ maˬ jaˆ ni, guiˇ deuˆ gaˇ bi sehꞈ-euˬ deuˬ nehˬ-ehˇ tiˬ kawˆ loꞈ-ehˇ, baˆ kʼoˆ mehˬ dzaˬ maˬ yehˬ ni shiˇ-eu miˇ kʼahˬ-ahˇ ga keuˆ taˬ-euˬ meh. Shiˇ-eu miˇ kʼahˬ-ahˇ iˇ-eu deuˬ-ahˇ oꞈ-eu shaꞈ dawˇ-eu jeˬ, aˬ yawꞈ maꞈ kʼoeˇ taˆ keuˆ le-euˬ meh.

³¹“Kʼaˇ ya mawˇ-euˬ guiˇ deuˆ gaˇ bi sehꞈ jiˇ-euˬ tsawˇ haˬ heu deuˬ-aˬ, Iˇjiˇtuˆ sahˬ paˬ hawˇ-eu aˬ yawꞈ-euˬ guiˇ maꞈ gʼaˇ duˬ, saꞈ gʼawˇ dah kʼaˇ za-eu tiˬ jeˬ pyeuꞈ-eu meh” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

³²“Dehꞈ-eu miˇ kʼahˬ Iˇjiˇtuˆ sahˬ paˬ-ahˇ guˆ ni ngaˇ jahˇ-euˬ ma. Ehˇ kʼawꞈ, aꞈ yawꞈ hawˇ-eu aˬ yawꞈ-euˬ guiˇ maꞈ-aˬ, guiˇ deuˆ gaˇ bi sehꞈ-euˬ baˆ kʼoˆ mehˬ dzaˬ maˬ yehˬ-euˬ tsawˇ haˬ deuˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, yaw shiˇ-ehˇ ya ga tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ taˬ-euˬ meh.