Read Akha Yeˬsaˬgeˬlaˇ 33 Bible Online

Yeˬsaˬgeˬlaˇ 33 - Akha bible

Yeˬsaˬgeˬlaˇ 33

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, miˇ kʼahˬ tiˬ kʼahˬ kʼoeˇ taˆ ngaˇ guiˇ deuˆ-eu jeˬ bi keuˆ le ngeh, aˬ joˆ-ehˇ pyeuꞈ laˇ-eu gaˇ kawˆ nawˬ-euˬ tsawˇ jeuˬ-ahˇ ehˇ mehˬ nehˬ-awˬ. Miˇ kʼahˬ kʼoeˇ kʼahˬ-ahˇ jawˇ-eu tsawˇ haˬ deuˬ, aˬ yawꞈ maꞈ laꞈ kʼoeˇ tsawˇ haˬ tiˬ gʼaˬ tseˇ doˆ-awˇ, loꞈ piˇ-eu tsawˇ haˬ bi geuꞈ-eu meh.

³Muiˇ-eu tsawˇ haˬ deuˬ laˇ luꞈ gaˇ aˬ yawꞈ ya mawˇ ngeh, tsawˇ haˬ dawˬ tawˆ luꞈ-ahˇ aˬ yawꞈ daˇ heh baw gaˬ nehˬ-eu meh.

⁴Tsawˇ haˬ tiˬ gʼaˬ na daˇ heh teˇ saˇ gaˬ-euˬ kʼawꞈ, maˬ yahˇ ni jawˇ-awˇ, muiˇ-eu deuˬ laˇ-awˇ bi sehꞈ naˇ, aˬ yawꞈ ya shiˇ-euˬ kʼoeˇ aˬ yawꞈ guˬ-eu meh.

⁵Aˬ yawꞈ-euˬ yaw lehˬ baˬ da neh aˬ yawꞈ ya shiˇ-eu meh. Aˬ jeˬ miˇ neh ehˇ naˇ, daˇ heh teˇ saˇ gaˬ-euˬ kʼawꞈ aˬ yawˬ maˬ yahˇ-a. Aˬ yawꞈ yahˇ law nmˇ-aˬ, shiˇ kʼawˇ dzeuˇ tehꞈ-a.

⁶Ehˇ kʼawꞈ, loꞈ piˇ-eu gʼaˬ muiˇ-eu deuˬ laˇ luꞈ-eu mawˇ-euˬ kʼawꞈ, daˇ heh maˬ baw gaˬ nehˬ ni jawˇ-euˬ miˇ neh, muiˇ-eu deuˬ laˇ-awˇ tsawˇ haˬ kʼoeˇ deuˬ tiˬ gʼaˬ na bi sehꞈ naˇ, loꞈ piˇ-eu kʼoeˇ gʼaˬ-ahˇ ngaˇ do yuˇ ma.

⁷“Tsawˇ haˬ zaˬ-oˇ, nymˬ-mˇ ngaˇ nawˬ-ahˇ Iˇsaˬleˬlaˆ miˇ kʼahˬ-ahˇ loꞈ piˇ-eu gʼaˬ bi geuꞈ-eu ma. Ngaˬ-euˬ kʼaˬ meh-ahˇ kʼaˇ doˆ le-euˬ dawˬ deuˬ, aˬ yawꞈ maꞈ-ahˇ nawˇ ya dzawˇ gaˬ nehˬ meh.

⁸Haiˬ-eu tsawˇ haˬ tiˬ gʼaˬ ya shiˇ-eu keuˆ le-eu ngaˇ lehˇ ngaˇ ehˇ ngeh, aˬ yawꞈ maˬ ya shiˇ-eu gʼaˇ duˬ dehꞈ paˇ ni nawˇ maˬ mehˬ maˬ tsoˆ nehˬ-ehˇ, yaw haiˬ jeˬ mˇ-awˇ shiˇ naˇ, nawˬ-ahˇ ngaˇ do yuˇ ma.

⁹Haiˬ-eu tsawˇ haˬ tiˬ gʼaˬ na-ahˇ nawˇ mehˬ paˇ tsoˆ paˇ kʼawꞈ, iˬ baˇ mˇ-eu maˬ byehˇ ni ya shiˇ naˇ, nawˬ-ahˇ ngaˇ shiˇ kʼawˇ bi dzeuˇ ma.”

¹⁰Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ-ahˇ aˬ yawꞈ maꞈ neh ngehˬ-euˬ dawˬ paˇ ehˇ poˆ nehˬ-awˬ. ‘Nga maꞈ neh mˇ-euˬ iˬ baˇ hawˇ-eu yaw lehˬ jeˬ-ahˇ nga maꞈ maˬ paˇ pi coeˇ miˇ-a. Nga maꞈ yaw dehꞈ dehꞈ-eu byoˆ le miˇ-a’ lehˇ aˬ yawꞈ maꞈ ehˇ-euˬ meh.

¹¹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, iˬ baˇ zaˬ tiˬ gʼaˬ shiˇ gaˇ ngaˇ maˬ mawˇ mawꞈ-ehˇ iˬ baˇ mˇ-eu byehˇ dzeh-awˇ dehꞈ daˆ leꞈ gaˇ mawˇ mawꞈ-eu meh lehˇ, aˬ yawꞈ maꞈ-ahˇ ehˇ nehˬ-awˬ. Iˇsaˬleˬlaˆ -oˇ, yaw haiˬ jeˬ mˇ-eu byehˇ-awˬ. Aˬ jeˬ miˇ neh shiˇ mawꞈ-eu nya lehˇ ehˇ nehˬ-awˬ.

¹²“Tsawˇ haˬ zaˬ-oˇ, Iˇsaˬleˬlaˆ tsawˇ haˬ deuˬ-ahˇ nymˬ-mˇ heu loꞈ-ehˇ ehˇ nehˬ-awˬ. Tsawˇ muiˬ tiˬ gʼaˬ iˬ baˇ mˇ laˇ naˇ, aˬ yawꞈ neh mˇ-euˬ yaw muiˬ jeˬ aˬ yawꞈ-ahˇ maˬ paˇ ka kʼoꞈ nya meh. Haiˬ-eu tsawˇ haˬ tiˬ gʼaˬ yaw haiˬ jeˬ maˬ mˇ ni byehˇ naˇ, kʼehˬ-eu kʼaˆ-eu jeˬ-ahˇ maˬ ya daˬ-a. Ehˇ kʼawꞈ, tsawˇ muiˬ tiˬ gʼaˬ iˬ baˇ mˇ dahˬ beh laˇ naˇ, maˇ maˇ ni ya shiˇ tehꞈ-a.

¹³Tsawˇ muiˬ tiˬ gʼaˬ maˬ shiˇ ni ya dehꞈ tehꞈ-a lehˇ, ngaˇ saˇ jaˇ dzaˬ-euˬ ma. Ehˇ kʼawꞈ, aˬ yawꞈ yaw muiˬ jeˬ mˇ byah gʼaˬ-euˬ ma lehˇ noeˬ-awˇ, iˬ baˇ mˇ dahˬ beh laˇ naˇ, aˬ yawꞈ neh mˇ-euˬ yaw muiˬ jeˬ-ahˇ ngaˇ tiˬ pawꞈ-iˬ maˬ paˇ noeˬ keuˆ nehˬ ma. Aˬ yawꞈ neh mˇ-euˬ iˬ baˇ kʼoeˇ baˬ da neh ya shiˇ-eu yaw duˬ baw tehꞈ-a.

¹⁴Haiˬ-eu tsawˇ haˬ ya shiˇ tehꞈ-a lehˇ ngaˇ ehˇ-euˬ ma. Ehˇ kʼawꞈ iˬ baˇ mˇ-eu jeˬ-ahˇ aˬ yawꞈ byehˇ dzeh-awˇ, yaw tsaˬ yaw dawˇ jeˬ hawˇ-eu yaw muiˬ jeˬ mˇ dahˬ beh-eu ehˇ-awˬ.

¹⁵Yaw jeˬ ma jeˬ ehˇ ngeh, aˬ cawˬ neh biꞈ daˇ laˇ-euˬ myawˬ biꞈ kʼoꞈ nehˬ-awˇ, yawˬ ha neh kʼoeˬ-euˬ jeˬ biꞈ kʼoꞈ nehˬ-euˬ ehˇ-awˬ. Iˬ baˇ mˇ-eu jeˬ-ahˇ aˬ yawꞈ kʼoeˇ loꞈ-ehˇ byehˇ-awˇ, yaw dehꞈ bi dehꞈ-eu zahˇ sahˇ kʼoꞈ mehˬ nahˬ paˇ caw teh kʼoꞈ laꞈ naˇ, aˬ yawꞈ maˬ ya shiˇ-ehˇ yaw dehꞈ ya dehꞈ tehꞈ-a.

¹⁶Aˬ yawꞈ neh mˇ-euˬ iˬ baˇ ngaˇ pyehˬ nehˬ-awˇ, yaw tsaˬ yaw dawˇ jeˬ hawˇ-eu yaw muiˬ jeˬ paˇ mˇ poˆ-euˬ baˬ da neh, aˬ yawꞈ ya dehꞈ tehꞈ-a.

¹⁷“Ngaˇ mˇ-eu maˬ tsaˬ nga lehˇ nawˬ-euˬ tsawˇ haˬ deuˬ ehˇ-eu meh. Maˬ ngeuˇ-a. Maˬ tsaˬ-eu-aˬ, aˬ yawꞈ maꞈ-euˬ dehꞈ jeˬ dehꞈ kawˆ kʼoeˇ meh.

¹⁸Yaw tsaˬ yaw dawˇ tsawˇ haˬ tiˬ gʼaˬ yaw muiˬ jeˬ maˬ mˇ ni byehˇ-awˇ, yaw haiˬ jeˬ mˇ dahˬ beh laˇ naˇ, ya shiˇ tehꞈ-a.

¹⁹Haiˬ-eu tsawˇ haˬ tiˬ gʼaˬ iˬ baˇ maˬ mˇ ni byehˇ-awˇ, yaw tsaˬ yaw dawˇ jeˬ hawˇ-eu yaw muiˬ jeˬ mˇ laˇ naˇ, aˬ yawꞈ yawˬ haˇ yawˬ ha ka kʼoꞈ-euˬ meh.

²⁰Ehˇ kʼawꞈ, Iˇsaˬleˬlaˆ-oˇ, ngaˇ mˇ-eu maˬ tsaˬ nga lehˇ naw maꞈ ehˇ-eu meh. Naw maꞈ mˇ gaˇ shaˇ gaˇ haw-awˇ, naw maꞈ-ahˇ ngaˇ yaˇ kʼaˬ daˇ ma.”

²¹Nga maꞈ aˬ cawˬ miˇ kʼahˬ-ahˇ bi nyehꞈ gʼeh-awˇ jawˇ-euˬ tseˇ nyiꞈ kʼoꞈ tiˬ kʼoꞈ, ba la tseˇ siˬ tiˬ siˬ ngaˬ nah-ahˇ, Yeˬluˇsaˬlehˬ meuˬ-ahˇ neh cehˆ dzeuˇ doˆ laꞈ-euˬ tsawˇ haˬ tiˬ gʼaˬ ngaˇ jawˇ gaˇ laˇ-awˇ, meuˬ kʼoeˇ meuˬ aˬ cawˬ laꞈ-ahˇ ahˇ leˇ-euˬ gaˇ kawˆ tsaꞈ gaˬ laˇ-euˬ meh.

²²Tsawˇ haˬ kʼoeˇ gʼaˬ maˬ laˇ keuˆ mi naˆ-ehˇ, uˬ ciˬ uˬ taw paw neh Sahˬpaˬ Miˬyehˇ ngaˬ nehˬ-ehˇ jawˇ luꞈ-eu ngaˇ ya siˬ-euˬ ma. Yawˬ shawˬ yawˬ tsawˇ haˬ kʼoeˇ gʼaˬ laˇ keuˆ ngeh, Sahˬpaˬ Miˬyehˇ ngaˬ-ahˇ dawˬ ngehˬ nya-eu baoˬ paˇ biꞈ kʼoꞈ laꞈ-euˬ meh.

²³Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²⁴“Tsawˇ haˬ zaˬ-oˇ, Iˇsaˬleˬlaˆ miˇ kʼahˬ laꞈ kʼoeˇ jaˆ-eu cawˆ-iˇ-euˬ meuˬ deuˬ laꞈ kʼoeˇ jawˇ-eu tsawˇ haˬ deuˬ heu loꞈ-ehˇ ehˇ luꞈ meh. ‘Aˬbyaˬhaˬ tiˬ gʼaˬ tehꞈ-ahˇ kʼawꞈ, miˇ kʼahˬ heu kʼahˬ kʼahˬ lah ni biꞈ-euˬ-aˬ, aˬ dui heu myaˆ ni paˇ gʼeh-eu-aˬ, miˇ kʼahˬ heu kʼahˬ za tsehˆ-euˬ ngaˇ’ lehˇ ehˇ luꞈ meh.

²⁵“Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ, aˬ yawꞈ maꞈ-ahˇ ehˇ nehˬ-awˬ. ‘Naw maꞈ shiˬ maˬ dzeˇ-iˇ-euˬ shaˬ jiˇ dzaˬ-euˬ meh. Tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ meh. Tsawˇ haˬ sehꞈ-eu meh. Miˇ kʼahˬ heu naw maꞈ-euˬ ma lehˇ aˬ joˆ-ehˇ noeˬ kʼmˬ-eu nya.

²⁶Naw maꞈ yawˬ ha-euˬ mi cehˇ-ahˇ nui ma huiˬ-eu meh. Naw maꞈ-euˬ dehꞈ jeˬ dehꞈ kawˆ nui daˆ daˆ laˇ paˬ-ehˇ gʼeh-eu meh. Yawˬ gʼaˬ na luꞈ aˬ cawˬ-euˬ miˬ sawˇ yo zaˬ nehˬ-ehˇ bahˬ-euˬ meh. Miˇ kʼahˬ heu naw maꞈ-euˬ ma lehˇ aˬ joˆ-ehˇ noeˬ kmˬ-euˬ nya’ lehˇ ehˇ-eu meh lehˇ ehˇ nehˬ-awˬ.

²⁷“Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, aˬ yawꞈ maꞈ-ahˇ kʼaˆ dui dui-eu dawˬ heu loꞈ-ehˇ ngehˬ-eu meh lehˇ ehˇ nehˬ-awˬ. Ngaˇ dehꞈ luꞈ-eu Miˬyehˇ kʼaˇ pyeuꞈ kʼoeˇ keuˆ ni, cawˆ-iˇ-euˬ meuˬ kʼoeˇ deuˬ laꞈ kʼoeˇ jawˇ-eu tsawˇ haˬ deuˬ bi shiˇ ma. Bawˇ tsahˬ deh ga-ahˇ jawˇ-eu tsawˇ haˬ deuˬ bawˇ tsahˬ jeˬ zaˬ neh bi kʼawꞈ sehꞈ dzaˬ tehꞈ-a. Gawˬ jawˬ hawˇ-eu lo kʼahˬ lo guˇ doe ni cehˆ zaꞈ-awˇ jawˇ-eu deuˬ, naˇ gawˇ baˬ da neh ya shiˇ tehꞈ-a.

²⁸Miˇ kʼahˬ heu cawˆ-iˇ-awˇ ciˬ cuˇ ni pyeuꞈ-iˇ ni ngaˇ jahˇ ma. Aˬ yawꞈ maꞈ nui kʼaˬ tsmˬ dui dui-euˬ baoˬ aˇ saˬ ya saˬ tehꞈ-a. Iˇsaˬleˬlaˆ gawˬ jawˬ deuˬ bawˇ tsahˬ tsahˬ ma ma-iˇ-awˇ, tsawˇ haˬ tiˬ gʼaˬ-iˬ maˬ iˇ maˬ laˇ tsehˆ ni byehˇ tehꞈ-a.

²⁹Iˇsaˬleˬlaˆ tsawˇ haˬ deuˬ iˬ baˇ mˇ-euˬ baˬ da neh ngaˇ kʼehˬ nehˬ-awˇ, aˬ yawꞈ maꞈ-euˬ miˇ kʼahˬ cawˆ-iˇ-awˇ ciˬ cuˇ ni bi pyeuꞈ-iˇ ngeh, ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ ya siˬ duˬ tehꞈ-a.”

³⁰Sahˬpaˬ Miˬyehˇ ehˇ-eu, “Tsawˇ haˬ zaˬ-oˇ, nawˬ-euˬ tsawˇ haˬ heu deuˬ meuˬ lahˇ dawˬ peh hawˇ-eu nymˇ gʼoˆ kʼehˬ dawˬ peh kʼaˇ tahˬ dzoeˇ ngeh, nawˬ-euˬ gaˇ kawˆ ja-eu meh. ‘Sahˬpaˬ Miˬyehˇ jawˇ gaˇ neh oe-euˬ dawˬ aˬ joˆ-ehˇ ehˇ-eu nya lehˇ, aˬ dui maꞈ naˇ haˬ leˇ haw kaˇ-euˇ’ lehˇ aˬ yawꞈ maꞈ tiˬ gʼaˬ tiˇ gʼaˬ cawˬ-eu meh.

³¹Kʼoeˇ naˇ, ngaˬ-euˬ tsawˇ haˬ kʼoeˇ deuˬ tiˬ teuˇ uiˬ laˇ-awˇ, nawˇ dawˬ ngehˬ gaˇ naˇ haˬ laˇ-eu meh. Ehˇ kʼawꞈ, nawˬ neh ehˇ-euˬ loꞈ-ehˇ aˬ yawꞈ maꞈ maˬ mˇ-a. Nawˬ-euˬ dawˬ-ahˇ caˇ dawˬ caˇ-eu naˆ ni tehꞈ-ehˇ aˬ yawꞈ maꞈ taˬ huiˬ-awˇ, nui kʼahˇ huiˬ-eu dehꞈ jeˬ dehꞈ kawˆ-ahˇ maˬ byehˇ dzeh-a.

³²Nawˇ-aˬ, aˬ yawꞈ maꞈ mehˬ shi deuˇ-mˬ diˬ-awˇ miˬ daꞈ zaˬ daꞈ caˇ dawˬ caˇ-eu tsawˇ haˬ naˆ ni poeˬ-eu tehꞈ meh. Nawˬ-euˬ dawˬ yawˬ dawˬ na luꞈ-ahˇ aˬ yawꞈ maꞈ naˇ haˬ-eu meh.

³³Ehˇ kʼawꞈ, tiˬ dawˬ-iˬ caw teh-awˇ maˬ mˇ-a. Nawˬ neh kʼaˇ ehˇ taˬ-euˬ jeˬ aˬ diˇ aˬ maˇ ya keuˆ le-eu loꞈ-ehˇ, naw neh kʼaˇ ehˇ taˬ-euˬ jeˬ byah laˇ ngeh nah, Miˬyehˇ gʼaˇ duˬ ngehˬ dah-eu tsawˇ haˬ aˬ yawꞈ maꞈ nehˬ-ehˇ jawˇ law hawˇ ngaˬ lehˇ, aˬ yawꞈ maꞈ-ahˇ siˬ leˇ tehꞈ-a.”