Read Akha Yeˬsaˬgeˬlaˇ 35 Bible Online

Yeˬsaˬgeˬlaˇ 35 - Akha bible

Yeˬsaˬgeˬlaˇ 35

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Eˬdoˬ miˇ kʼahˬ-ahˇ dawˬ heu deuˬ ciˬ pi nehˬ-awˬ.

³Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-awˬ. Eˬdoˬ gawˬ jawˬ deuˬ-oˇ, nawˬ-ahˇ ngaˇ muiˇ-eu ma. Nawˬ-ahˇ ngaˇ laˆ cawˆ-awˇ, ciˬ cuˇ ni bi jaˆ ma.

⁴Nawˬ-euˬ meuˬ deuˬ laˆ cawˆ jiˇ-awˇ, nawˇ coꞈ gaˆ ni bi pyeuꞈ-iˇ ma. Ngaˇ Sahˬpaˬ Miˬyehˇ pyeuꞈ-eu gaˇ, kʼoeˇ ngeh nawˇ ya siˬ duˬ tehꞈ-a.

⁵“Nawˇ-aˬ, Iˇsaˬleˬlaˆ miˇ kʼahˬ-ahˇ maˬ tsehˆ leˇ ni muiˇ-awˇ, aˬ yawꞈ-euˬ iˬ baˇ baˬ da neh, aˬ yawꞈ gʼaˇ duˬ aˇ saˬ saˬ-eu kʼehˬ-euˬ kʼaˆ-eu jeˬ keuˆ le-awˇ, aˬ yawꞈ shaˬ zahˬ naꞈ dui dui luꞈ ngeh jawˇ, aˬ yawꞈ-euˬ tsawˇ haˬ deuˬ-ahˇ aˬ cawˬ neh bi sehꞈ ni jahˇ-euˬ meh.

⁶Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ kʼaˇ dehꞈ kʼoeˇ keuˆ ni, shiˇ-eu jeˬ nawˬ-ahˇ oꞈ-awˇ, nawˇ maˬ cehˆ buˬ nya-aˇ. Nawˇ aˬ cawˬ-ahˇ sehꞈ-euˬ iˬ baˇ pi luꞈ-eu loꞈ-ehˇ, shiˇ-eu jeˬ nawˬ-euˬ mehˬ nah caw teh tehꞈ-a.

⁷Eˬdoˬ miˇ kʼahˬ gawˬ jawˬ gawˬ duˇ-ahˇ, ciˬ cuˇ ni gʼeh-eu bawˇ tsahˬ bawˇ dahˇ bi pyeuꞈ-iˇ-awˇ, kʼaˇ iˇ kʼaˇ laˇ tsehˆ-eu deuˬ bi shiˇ ma.

⁸Gawˬ jawˬ-ahˇ shiˇ-euˬ tsawˇ haˬ tiˬ gʼoeˬ bi ga-awˇ, gawˬ duˇ hawˇ-eu deh kʼawꞈ doe ni, guiˇ deuˆ gaˇ shiˇ-euˬ deuˬ ga byah taˬ tehꞈ-a.

⁹Mˬ maˬ maˬ byaˆ zaˇ ziˇ nawˇ bawˇ tsahˬ pyeuꞈ-iˇ ni ngaˇ jahˇ-awˇ, nawˬ-euˬ meuˬ deuˬ laꞈ kʼoeˇ tsawˇ haˬ tiˬ gʼaˬ-iˬ maˬ paˇ jawˇ laˇ-aˇ. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu nawˇ ya siˬ duˬ tehꞈ-a.

¹⁰“Sahˬpaˬ Miˬyehˇ pyeuꞈ-eu ngaˇ, Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ-euˬ Miˬyehˇ pyeuꞈ luꞈ-eu kʼawꞈ, miˇ kʼahˬ kʼoeˇ nyiˬ kʼahˬ hawˇ-eu kʼoeˇ gaˇ kʼaˇ taꞈ-eu miˇ tsaˬ deuˬ, nawˇ yuˇ ma lehˇ ehˇ-eu meh.

¹¹Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ kʼaˇ dehꞈ kʼoeˇ keuˆ ni, ngaˬ-euˬ tsawˇ haˬ deuˬ-ahˇ nawˇ nui ma pehˇ-euˬ aˇ poeˬ, myaˆ naˆ-euˬ aˇ poeˬ hawˇ-eu, bye-euˬ aˇ poeˬ, ngaˇ nawˬ-ahˇ paˇ jahˇ kʼoꞈ nehˬ ma. Nawˬ neh aˬ yawꞈ maꞈ-ahˇ jahˇ nehˬ-euˬ poeˬ, ngaˇ nawˬ-ahˇ kʼehˬ-eu nga lehˇ aˬ yawꞈ maꞈ siˬ nya tehꞈ-a.

¹²Nawˬ-euˬ nui ma laꞈ kʼoeˇ haw teˬ haw nyiˇ dui dui-awˇ, ‘Iˇsaˬleˬlaˆ gawˬ jawˬ deuˬ ciˬ cuˇ saˆ ni jaˆ-awˇ, ngaˇ ya dzoeˬ dzaˬ-eu yaw duˬ baw ngaˇ’ lehˇ ehˇ-euˬ dawˬ kʼoeˇ dawˬ-ahˇ ngaˇ gaˬ-euˬ ngaˇ lehˇ nawˇ ya siˬ tehꞈ-a.

¹³Nawˇ nui ma huiˬ-awˇ kʼahˬ sehˇ jehˆ-eu laꞈ kʼoeˇ, ngaˬ-ahˇ yehˬ bawˬ-ehˇ kʼaˇ ehˇ-euˬ dawˬ ngaˇ gaˬ jiˇ taˬ-euˬ ma.”

¹⁴Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Ngaˇ nawˬ-ahˇ ciˬ cuˇ ni laˆ pyeuꞈ nehˬ ngeh, nawˬ-ahˇ deuˬ leˇ-euˬ gaˇ miˇ tsaˬ dawˬ tawˆ luꞈ laˬ kʼaˬ cehˇ tehꞈ-a.

¹⁵Ngaˬ-euˬ Iˇsaˬleˬlaˆ miˇ kʼahˬ luˬ-iˇ seˇ-iˇ-euˬ gaˇ nawˇ laˬ kʼaˬ cehˇ-euˬ loꞈ-ehˇ, nawˬ-ahˇ ngaˇ jahˇ poˆ nehˬ ma. Siˇyaˆ gawˬ jawˬ deuˬ hawˇ-euˬ, Eˬdoˬ miˇ kʼahˬ kʼahˬ lah ni ciˬ cuˇ ni gʼeh-eu bawˇ tsahˬ bawˇ dahˇ pyeuꞈ-iˇ tehꞈ-a. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ, tsawˇ haˬ yawˬ gʼaˬ na luꞈ ya siˬ duˬ tehꞈ-a.”