Read Akha Yeˬsaˬgeˬlaˇ 38 Bible Online

Yeˬsaˬgeˬlaˇ 38 - Akha bible

Yeˬsaˬgeˬlaˇ 38

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Maˬgawˇgaˆ miˇ kʼahˬ laꞈ kʼoeˇ jaˆ-eu Meˬshehˆ miˇ kʼahˬ hawˇ-eu, Tuˇbaˬlaˇ miˇ kʼahˬ-ahˇ uˆ lahˇ luꞈ-eu Gawˇgaˆ-ahˇ bi deuˬ leˇ-eu dawˬ ngehˬ-awˬ. Aˬ yawꞈ-ahˇ ngehˬ deuˬ ehˇ deuˬ nehˬ-awˬ.

³Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, aˬ yawꞈ-ahˇ muiˇ-eu ma lehˇ ehˇ nehˬ-awˬ.

⁴Aˬ yawꞈ-ahˇ ngaˇ ngawˬ zeuˆ-awˇ, baˬ ngeuˇ-ahˇ kuˆ seuˬ kʼoˆ tsoˆ-awˇ, aˬ yawꞈ hawˇ-eu aˬ yawꞈ-euˬ guiˇ maꞈ dawˬ tawˆ luꞈ-ahˇ tsahˇ-awˇ cah ma. Mahˬ hawˇ-eu guiˇ deuˆ-eu mehˬ tsoeˬ tiˬ kawˆ loꞈ-ehˇ dm luꞈ-eu yehˇ deuˬ ahˇ-eu aˬ yawꞈ-euˬ guiˇ maꞈ myaˬ dui dui-awˇ, yehˇ yawˬ gʼaˬ na luꞈ dehˬ daˬ duˬ yuˇ-awˇ, mi cehˇ dawꞈ luꞈ-eu meh.

⁵Paˇshaˇ miˇ kʼahˬ, Suˬdaˬ miˇ kʼahˬ hawˇ-eu, Liˆbyaˇ miˇ kʼahˬ-ahˇ jawˇ-eu tsawˇ haˬ deuˬ kʼawꞈ aˬ yawꞈ nehˬ-ehˇ ahˇ-awˇ, dawˬ tawˆ luꞈ dehˬ daˬ duˬ yuˇ-awˇ shmˇ uˬ kʼoˆ kʼoˆ luꞈ-eu meh.

⁶Kʼoeˇ taˆ paw kʼahˬ-ahˇ jaˆ-eu Gawˬmaˬ miˇ kʼahˬ hawˇ-eu Behˬtawˇgaˬmaˬ miˇ kʼahˬ-ahˇ kʼaˇ jawˇ-eu guiˇ deuˆ-eu tsawˇ haˬ dawˬ tawˆ luꞈ aˬ yawꞈ nehˬ-ehˇ ahˇ-eu uˬ taꞈ, miˇ kʼahˬ gʼawˬ mya kʼahˬ-ahˇ jawˇ-eu tsawˇ haˬ gʼawˬ mya ni ahˇ-eu meh.

⁷Lehˬ hmˬ-awˇ aˬ yawꞈ-euˬ guiˇ maꞈ dawˬ tawˆ luꞈ, aˬ yawꞈ neh dawˬ kʼaˇ biꞈ-euˬ loꞈ-ehˇ bi mˇ-eu gʼaˇ duˬ bi laˆ dah jiˇ taˬ-awˬ lehˇ ehˇ nehˬ-awˬ,

⁸Aˇ nah aˇ yamˬ gʼawˬ myahˇ ni dzeuˇ-iˇ gʼaˬ ngeh jawˇ, aˬ cawˬ miˇ kʼahˬ gʼawˬ mya kʼahˬ-ahˇ neh gʼoꞈ uiˬ laˇ-awˇ jawˇ-eu, guiˇ deuˆ laˇ gaˇ maˬ guˆ ni ya dehꞈ ya jawˇ luꞈ-eu miˇ kʼahˬ tiˬ kʼahˬ-ahˇ, nawˬ-ahˇ ngaˇ guiˇ bi deuˆ-iˇ ma. Dzeuˇ laˇ ngeh aˇ yamˬ gʼawˬ myahˇ ni cawˆ-iˇ-awˇ ciˬ cuˇ ni jaˆ-euˬ kʼawꞈ, nymˬ-mˇ tsawˇ haˬ dawˬ tawˆ luꞈ nui saˇ oꞈ-eu laꞈ kʼoeˇ jawˇ luꞈ-eu miˇ kʼahˬ pyeuꞈ-eu Iˇsaˬleˬlaˆ gawˬ jawˬ deuˬ-ahˇ aˬ yawꞈ guiˇ ya deuˆ-iˇ tehꞈ-a.

⁹Aˬ yawꞈ hawˇ-eu aˬ yawꞈ-euˬ guiˇ maꞈ deuˬ nehˬ-ehˇ, tsawˇ jeuˬ gʼawˬ mya jeuˬ gm leˇ-awˇ, jaˬ lehˇ lehˇ ma baw-eu loꞈ-ehˇ miˇ kʼahˬ kʼoeˇ kʼahˬ-ahˇ guiˇ deuˆ uˇ leꞈ ngeh, mˬ dmˇ ciˬ tehˬ nehˬ-euˬ gaˇ duˇ tehꞈ-a.”

¹⁰Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ Gawˇgaˆ-ahˇ heu loꞈ-ehˇ ehˇ-eu meh. “Aˇ nah aˇ yamˬ kʼoeˇ keuˆ le ngeh, yaw haiˬ jeˬ mˇ-eu gʼaˇ duˬ nawˇ shaˇ noeˬ tehꞈ-a.

¹¹Meuˬ meuˬ lahˇ maˬ baw taˆ maˬ tsoˆ-ehˇ, guiˇ deuˆ-eu jeˬ-ahˇ kʼahˬ maˬ lahˇ ni nui saˇ oꞈ-eu laꞈ kʼoeˇ jawˇ luꞈ-eu, nawˬ-ahˇ maˬ gʼaˬ laˇ-eu miˇ kʼahˬ-ahˇ guiˇ deuˆ-eu lehˇ, nawˇ noeˬ tsehˆ tehꞈ-a.

¹²Yaw beh cawˆ-iˇ-euˬ meuˬ deuˬ-ahˇ paˇ jawˇ kʼoꞈ laˇ-euˬ tsawˇ haˬ deuˬ-euˬ pyuˇ shuiˇ myawˬ gahˬ nawˇ ceh geuꞈ tehꞈ-a. Aˬ yawꞈ maꞈ-ahˇ aˬ cawˬ miˇ kʼahˬ doe ni jawˇ jawˇ-ehˇ shaˬ luꞈ gaˇ sheuˬ kʼoꞈ doˆ laꞈ-awˇ, nymˬ-mˇ jeˬ zaˬ cu-awˇ pyuˇ shuiˇ jaˆ-eu laꞈ kʼoeˇ, miˇ kʼahˬ dawˬ tawˆ luꞈ-euˬ gaˇ tsmˇ tsaˬ gaˇ jawˇ luꞈ-eu meh.

¹³Sheˬba miˇ kʼahˬ hawˇ-eu Deˬdaˬ miˇ kʼahˬ-ahˇ jawˇ-eu tsawˇ haˬ deuˬ maˬ ehˇ, Saˬbeˬ miˇ kʼahˬ-ahˇ jaˆ-eu meuˬ deuˬ-ahˇ jawˇ-eu baw gaꞈ deuˬ maˬ ehˇ, nawˬ-ahˇ heu loꞈ-ehˇ naˇ haˬ laˇ tehꞈ-a. ‘Aˬ cawˬ-euˬ pyuˇ shuiˇ myawˬ gahˬ ceh geuꞈ-eu gʼaˇ duˬ, nawˇ guiˇ guiˇ maꞈ laˆ uiˬ-awˇ guiˇ deuˆ te loˇ. Pyuˇ hawˇ-eu shuiˇ deuˬ, jeˬ zaˬ deuˬ hawˇ-eu, myawˬ gahˬ deuˬ ya baꞈ geuꞈ gaˇ noeˬ tmˬ-awˇ kʼoeˇ loꞈ-ehˇ jahˇ te loˇ lehˇ naˇ haˬ laˇ tehꞈ-a’ lehˇ ehˇ-eu meh.”

¹⁴Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ngaˬ-ahˇ kʼehˇ-awˇ, Gawˇgaˆ jawˇ gaˇ heu loꞈ-ehˇ bi ehˇ-iˇ laꞈ-euˬ meh. “Nymˬ-mˇ, ngaˬ-euˬ tsawˇ haˬ deuˬ guˆ kʼaˇ maˬ za-ehˇ, nui saˇ oꞈ-eu laꞈ kʼoeˇ dehꞈ luꞈ-eu nawˬ-ahˇ maˬ mawˇ laˇ nya loˇ.

¹⁵Kʼoeˇ taˆ kʼahˬ-ahˇ gaˇ mahˇ kaˬ-eu nawˬ-euˬ jawˇ duˬ-ahˇ neh nawˇ luˆ le-awˇ, miˇ kʼahˬ gʼawˬ mya kʼahˬ-ahˇ neh oe-euˬ yawˬ gʼaˬ na luꞈ mahˬ dziˬ luꞈ-eu yehˇ deuˬ deh uiˬ-eu laꞈ kʼoeˇ, huiˬ dui myaˬ dui dui-eu guiˇ maꞈ sheuˬ-awˇ guiˇ deuˆ-eu lehˇ nawˇ oe tehꞈ-a.

¹⁶Miˇ kʼahˬ nyiˬ tsehˆ-ehˇ baw gʼeh leꞈ-eu ja lehˇ lehˇ ma loꞈ-ehˇ, ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ guiˇ deuˆ le-eu lehˇ nawˇ oe tehꞈ-a. Aˇ nah aˇ yamˬ kʼoeˇ keuˆ le ngeh, ngaˇ aˬ suˇ gʼaˬ nga lehˇ tsawˇ jeuˬ dawˬ tawˆ luꞈ bi mawˇ duˬ-eu gʼaˇ duˬ maˬ ehˇ, nawˬ-ahˇ zmˬ-awˇ ngaˬ neh mˇ-euˬ jeˬ baˬ da neh, ngaˬ-euˬ muiˬ-eu shawˇ-eu jeˬ bi siˬ bi mawˇ duˬ-eu gʼaˇ duˬ maˬ ehˇ, nawˬ-ahˇ pyehˬ gʼeh-awˇ, ngaˬ-euˬ miˇ kʼahˬ-ahˇ guiˇ bi deuˆ-iˇ ma.

¹⁷Aˇ hu ba neh, Iˇsaˬleˬlaˆ tsawˇ haˬ deuˬ-ahˇ Miˬyehˇ gʼaˇ duˬ bi ngehˬ dah-euˬ ngaˬ-euˬ zaˬ kʼaˆ deuˬ-ahˇ zmˬ-awˇ bi gaˬ doe-iˇ-euˬ gaˇ kawˆ pyeuꞈ-eu, aˬ kaˇ tiˬ nah Iˇsaˬleˬlaˆ miˇ kʼahˬ-ahˇ guiˇ bi deuˆ le-eu gʼaˇ duˬ, ngaˇ tsawˇ haˬ pyehˬ gʼeh leꞈ ma lehˇ ehˇ-euˬ kʼoeˇ-aˬ, nawˬ-ahˇ ehˇ-euˬ jeˬ pyeuꞈ-eu ma” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

¹⁸Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ miˇ kʼahˬ-ahˇ Gawˇgaˆ guiˇ deuˆ ngeh nah, ngaˬ-euˬ nui ma tsawˬ paˆ laˇ tehꞈ-a.

¹⁹Kʼoeˇ ngeh nah, Iˇsaˬleˬlaˆ miˇ kʼahˬ laꞈ kʼoe miˇ luˆ luˆ dui dui tehꞈ-a lehˇ, nui ma daˆ dui dui-eu laꞈ kʼoeˇ ngaˇ ehˇ-eu ma.

²⁰Ngaˬ shaˬ aˇ jiˇ dawˬ tawˆ luꞈ maˬ ehˇ, jeˬ zaˬ yaw huiˬ yaw nyiˇ yawˬ jeˬ na luꞈ maˬ ehˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ zaˬ dawˬ tawˆ luꞈ maˬ ehˇ, ngaˬ-ahˇ guˆ-awˇ yaw dzuˬ dzuˬ tehꞈ-a. Gawˬ jawˬ coˬ le-awˇ, lo guˇ byaˆ-iˇ-eu uˬ taꞈ, meuˬ lahˇ kʼaˇ ngeuˇ-eu coˬ pyaˆ jiˇ tehꞈ-a.

²¹Guˆ-eu gaˆ-eu yawˬ jeˬ na luꞈ kaꞈ dzahˬ-awˇ Gawˇgaˆ-euˬ kʼoeˇ taˆ bi keuˆ le ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Aˬ yawꞈ-euˬ tsawˇ haˬ deuˬ tiˬ gʼaˬ tiˇ gʼaˬ mi cehˇ coeˇ tehꞈ-a.

²²Naˇ gawˇ hawˇ-eu shiˬ doˆ le ni laˆ tahˬ laˆ zaw-eu jeˬ aˬ yawꞈ kʼoeˇ taˆ bi keuˆ le ma. Uˬ yehˇ yehˇ ma hawˇ-eu uˬ yehˇ aˇ siˬ nehˬ-ehˇ, miˬ dzaˬ hawˇ-eu miˬ dzaˇ dzaˇ shuiˇ bi yehˇ keuˬ le-awˇ, aˬ yawꞈ hawˇ-eu aˬ yawꞈ-euˬ guiˇ maꞈ kʼoeˇ taˆ maˬ ehˇ, aˬ yawꞈ jawˇ paw kʼaˇ pyawˬ-eu miˇ kʼahˬ deuˬ kʼoeˇ taˆ maˬ ehˇ, bi yehˇ shehˬ ma.

²³Ngaˇ huiˬ dui mahˇ dui dui-awˇ muiˬ-eu shawˇ-eu gʼaˬ pyeuꞈ-eu gaˇ kawˆ, tsawˇ jeuˬ dawˬ tawˆ luꞈ-ahˇ kʼoeˇ ngeh nah bi siˬ duˬ ma. Ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ-ahˇ siˬ duˬ leˇ tehꞈ-a.”