Read Akha Yeˬsaˬgeˬlaˇ 44 Bible Online

Yeˬsaˬgeˬlaˇ 44 - Akha bible

Yeˬsaˬgeˬlaˇ 44

¹Kʼoeˇ naˇ, Uˬ duˬ tahˬ nymˇ nymˇ ma-euˬ nahˇ ma doˆ kʼehˬ paw pyawˬ-ahˇ jaˆ-eu laꞈ nyiˇ lahˇ kʼehˬ-ahˇ, tsawˇ haˬ kʼoeˇ gʼaˬ ngaˬ-ahˇ sheuˬ gʼeh nehˬ laꞈ-euˬ meh. Lahˇ kʼehˬ kʼoeˇ kʼehˬ piˬ tehˬ taˬ-awˇ jaˆ-eu meh.

²Sahˬpaˬ Miˬyehˇ ngaˬ-ahˇ ehˇ-eu, “Lahˇ kʼehˬ heu kʼehˬ-ahˇ tiˬ jawˇ-iˬ maˬ pah ni ya piˬ tehˬ taˬ meh. Tsawˇ haˬ zaˬ tiˬ gʼaˬ-iˬ lahˇ kʼehˬ heu kʼehˬ-ahˇ maˬ uˇ laˇ kʼmˬ-a. Aˬ jeˬ miˇ neh ehˇ naˇ, Iˇsaˬleˬlaˆ Miˬyehˇ pyeuꞈ-eu ngaˇ Sahˬpaˬ Miˬyehˇ lahˇ kʼehˬ heu kʼehˬ-ahˇ neh uˇ le-euˬ ma. Kʼoeˇ miˇ neh ya piˬ tehˬ taˬ meh.

³Ehˇ kʼawꞈ, dzoeˬ dzaˬ oꞈ-eu sahˬ paˬ zaˬ yo gʼaˬ-aˬ, ngaˬ-euˬ mehˬ shiˬ muiˬ-eu shawˇ-eu dzaˬ byawˇ dzaˬ leˇ-eu gʼaˇ duˬ, kʼoeˇ gaˇ le nya meh. Gaˇ ma iˇ dzaˬ saˬ-iˇ-euˬ tsahˇ-ahˇ jaˆ-eu kuˆ lawˆ lawˆ ma kʼoeˇ lawˆ-ahˇ neh aˬ yawꞈ ya uˇ leˇ-awˇ, kʼaˇ uˇ leˇ-euˬ gaˇ neh paˇ ya gʼoꞈ doˆ le meh.”

⁴Kʼoeˇ naˇ, laꞈ taˆ paw pyawˬ-ahˇ jaˆ-eu lahˇ kʼehˬ-ahˇ neh, Uˬ duˬ tahˬ nymˇ nymˇ ma mehˬ shi tsawˇ haˬ kʼoeˇ gʼaˬ ngaˬ-ahˇ sheuˬ gʼeh nehˬ laꞈ-euˬ meh. Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ, Sahˬpaˬ Miˬyehˇ-euˬ yaw shehꞈ kʼahˬ sehˇ tiˬ byah ni jaˆ gaˇ ngaˇ mawˇ-awˇ, baˬ ba miˇ tsa tuˆ ni awˆ byaˆ-euˬ ma.

⁵Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, nawˇ kʼaˇ ya gaˬ kʼaˇ ya mawˇ-euˬ jeˬ-ahˇ yaw muiˬ paˬ-ehˇ noeˬ taˬ juiˇ taˬ-awˬ. Uˬ duˬ tahˬ nymˇ nymˇ ma-ahˇ taꞈ leˇ-eu zahˇ sahˇ kʼoꞈ deuˬ, ngaˇ nawˬ-ahˇ ehˇ nehˬ-eu lehˇ gʼeh-eu ma. Aˬ joˆ-ehˇ gʼeh-eu tsawˇ haˬ deuˬ uˇ leˇ kʼmˬ-awˇ, aˬ joˆ-ehˇ gʼeh-eu tsawˇ haˬ deuˬ maˬ uˇ leˇ kʼmˬ-eu gaˇ kawˆ, yaw duˬ duˬ-ehˇ noeˬ taˬ juiˇ taˬ-awˬ.

⁶“Aˬ yawꞈ maꞈ mˇ luꞈ-eu nui daˆ daˆ laˇ paˬ-ehˇ gʼeh-eu jeˬ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ maˬ paˇ oˇ oꞈ coeˇ miˇ-a lehˇ, ngaˬ-ahˇ puiˬ-eu Iˇsaˬleˬlaˆ tsawˇ haˬ kʼoeˇ deuˬ-ahˇ ehˇ nehˬ-awˬ.

⁷Aˬ yawꞈ maꞈ ngaˬ-ahˇ lawˇ nehˬ-euˬ lawˇ dzaˇ pyeuꞈ-eu shaˬ tsuˇ hawˇ-eu shiˬ lawˇ ngeh, ngaˬ-ahˇ yaw zeu maˬ baw-eu baˆ kʼoˆ mehˬ dzaˬ maˬ yehˬ-euˬ aˬ cawˬ tsawˇ jeuˬ deuˬ-ahˇ Uˬ duˬ tahˬ nymˇ nymˇ ma-ahˇ bi uˇ laˇ-eu laꞈ kʼoeˇ, ngaˬ-euˬ Uˬ duˬ tahˬ nymˇ nymˇ ma-ahˇ laˆ jawꞈ-euˬ meh. Ngaˬ-euˬ tsawˇ haˬ kʼoeˇ deuˬ-aˬ, kʼoeˇ loꞈ-ehˇ nui daˆ daˆ laˇ paˬ-ehˇ gʼeh-eu jeˬ mˇ-awˇ, ngaˬ-euˬ dawˬ ma saˇ jaˇ-ahˇ puiˬ-euˬ meh.

⁸Ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ aˬ yawꞈ maꞈ-ahˇ doˇ-eu gaˇ deuˬ-ahˇ aˬ yawꞈ maꞈ maˬ mˇ ni, aˬ cawˬ tsawˇ jeuˬ-ahˇ kʼehˇ doˇ nehˬ-awˇ bi mˇ-euˬ meh.

⁹“Baˆ kʼoˆ mehˬ dzaˬ maˬ yehˬ-euˬ aˬ cawˬ tsawˇ jeuˬ hawˇ-eu, ngaˬ-euˬ ehˇ dawˬ maˬ naˇ haˬ-eu tsawˇ haˬ tiˬ gʼaˬ-iˬ ngaˬ-euˬ Uˬ duˬ tahˬ nymˇ nymˇ ma-ahˇ maˬ ya uˇ laˇ-a. Iˇsaˬleˬlaˆ tsawˇ haˬ deuˬ nehˬ-ehˇ jawˇ luꞈ-eu aˬ cawˬ tsawˇ jeuˬ deuˬ kʼawꞈ, tiˬ gʼaˬ-iˬ maˬ ya uˇ laˇ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

¹⁰Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. Iˇsaˬleˬlaˆ tsawˇ haˬ deuˬ nehˬ-ehˇ tiˬ kawˆ loꞈ-ehˇ, ngaˬ-ahˇ byehˇ-awˇ tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ Leˬbiˇ tsawˇ haˬ kʼoeˇ deuˬ-ahˇ ngaˇ kʼehˬ nehˬ ma.

¹¹Uˬ duˬ tahˬ nymˇ nymˇ ma-euˬ lahˇ kʼehˬ-ahˇ loꞈ-eu gaˇ hawˇ-eu, Uˬ duˬ tahˬ nymˇ nymˇ ma laꞈ kʼoeˇ jaˆ-eu gaˇ deuˬ aˬ yawꞈ maꞈ-ahˇ ngaˇ bi mˇ ma. Miˇ kʼahˬ zaˬ deuˬ miˬ dzaˬ dzah puiˆ-awˇ lawˇ-eu jeˬ lawˇ laˇ ngeh hawˇ-eu, lawˇ-eu shehˇ-eu jeˬ kʼaˇ mˇ laˇ ngeh, aˬ yawꞈ maꞈ jeˬ zaˬ sehꞈ nehˬ-eu gaˇ mˇ nya tehꞈ-a.

¹²Ehˇ kʼawꞈ, tahˬ pahˬ aˬ ma mawˇ kawˇ-ahˇ uˬ duˬ tahˬ gaˇ sheuˬ gʼeh nehˬ-eu laꞈ kʼoeˇ, Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ bahˬ-euˬ miˇ neh, aˬ yawꞈ maꞈ-ahˇ kʼehˬ nehˬ ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ tsehˆ-eu ma.

¹³Aˬ yawꞈ maꞈ-ahˇ ngaˬ-euˬ gaˇ mˇ-eu piˇ ma maˬ bi geuꞈ-eu uˬ taꞈ, muiˬ-eu shawˇ-eu mˇ myawˬ keu ka dawˬ peh maˬ paˇ bi iˇ ma. Muiˬ dui shawˇ dui dui-eu jawˇ duˬ-ahˇ maˬ paˇ bi uˇ leˇ ma. Aˬ yawꞈ maꞈ neh mˇ-euˬ nui daˆ daˆ laˇ paˬ-ehˇ gʼeh-eu jeˬ aˇ poeˬ, kʼoeˇ loꞈ-ehˇ kʼehˬ nehˬ ma.

¹⁴Uˬ duˬ tahˬ nymˇ nymˇ ma laꞈ kʼoeˇ ya luˆ ya laˆ-eu mˇ myawˬ mˇ-eu tsawˇ haˬ bi geuꞈ ma.”

¹⁵Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Ehˇ kʼawꞈ, Iˇsaˬleˬlaˆ tsawˇ haˬ deuˬ ngaˬ-ahˇ byehˇ dzeh ngeh, Leˬbiˇ tsawˇ jeuˬ laꞈ kʼoeˇ Zaˬdoˆ-euˬ zaˬ deuˬ uˆ deuˬ pyeuꞈ-eu piˇ ma deuˬ, ngaˬ-ahˇ saˇ jaˇ ziꞈ-eu laꞈ kʼoeˇ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-euˬ meh. Kʼoeˇ miˇ neh, aˬ yawꞈ maꞈ-ahˇ ngaˇ jawˇ gaˇ bi uˇ laˇ-awˇ, shaˬ tsuˇ hawˇ-eu shiˬ lawˇ-eu gaˇ bi mˇ ma.

¹⁶Aˬ yawꞈ maꞈ-ahˇ tehꞈ-ehˇ ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ bi uˇ laˇ-awˇ, lawˇ duˬ-ahˇ lawˇ-eu shehˇ-eu gaˇ hawˇ-eu, uˬ duˬ tahˬ gaˇ sheuˬ gʼeh-eu gaˇ bi mˇ ma.

¹⁷Uˬ duˬ tahˬ nymˇ nymˇ ma-euˬ laꞈ kʼoeˇ pu kaˬ-ahˇ le-eu gʼoˆ kʼehˬ-ahˇ aˬ yawꞈ maꞈ kʼaˇ uˇ leˇ ngeh, shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ aˬ yawꞈ maꞈ ya dm meh.

¹⁸Aˬ yawꞈ maꞈ kuˬ pyuˇ maˬ ya bi doˆ le-eu gʼaˇ duˬ, shawˇ jehˆ ni gʼeh-eu saˬ paˇ neh zaꞈ taˬ-euˬ uˬ dzahˬ dzahˬ-awˇ, shawˇ jehˆ ni gʼeh-eu saˬ paˇ neh guꞈ taˬ-euˬ laꞈ di ya dm meh. Ehˇ kʼawꞈ, joꞈ paꞈ maˬ ya paꞈ-a.

¹⁹Miˇ kʼahˬ zaˬ deuˬ laˇ-awˇ jawˇ-eu laꞈ nyiˇ pu kaˬ-ahˇ aˬ yawꞈ maꞈ maˬ iˇ doˆ mi naˆ-ehˇ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ ngeh dm-euˬ aˬ yawꞈ maꞈ-euˬ mehˬ tsoeˬ deuˬ-ahˇ, muiˬ-eu shawˇ-eu kuˆ lawˆ deuˬ laꞈ kʼoeˇ ya lehˆ taˬ yaꞈ meh. Muiˬ-eu shawˇ-eu mehˬ tsoeˬ kʼoeˇ baˬ da neh miˇ kʼahˬ zaˬ deuˬ-ahˇ maˬ bi guˬ dzaˬ leˇ-eu gʼaˇ duˬ, kʼoeˇ loꞈ-ehˇ ya dm paˇ meh.

²⁰“Piˇ ma deuˬ-aˬ, uˬ jehˆ maˬ ya jehˆ dzeh-eu uˬ taꞈ, uˬ duˬ tsehˇ kʼahˇ gʼawˬ mahˇ ni maˬ ya taˬ-ehˇ, tsaˬ tsaˬ ni ya bi jaˆ meh.

²¹Laꞈ kʼoeˇ pu kaˬ-ahˇ uˇ leˇ-eu lehˇ gʼeh ngeh, aˬ gaꞈ dzaˇ uiˇ maˬ ya dawˇ-a.

²²Aˬ cawˬ-euˬ miˬ kʼoꞈ-ahˇ maˬ ya sheuˬ-a. Iˇsaˬleˬlaˆ tsawˇ jeuˬ miˬ daꞈ hawˇ-eu, piˇ ma-euˬ miˬ coeˬ miˬ ma-ahˇ tehꞈ-ehˇ ya sheuˬ meh.

²³“Piˇ ma deuˬ-aˬ, miˇ kʼahˬ zaˬ deuˬ-ahˇ muiˬ-eu shawˇ-eu jeˬ hawˇ-eu maˬ muiˬ maˬ shawˇ-eu jeˬ tseˇ paˆ nya ni maˬ ehˇ, zahˇ sahˇ kʼoꞈ-ahˇ tsaˬ ni shawˇ-eu jeˬ hawˇ-eu maˬ shawˇ-eu jeˬ tseˇ paˆ geuꞈ nya ni maˬ ehˇ, ya mehˬ ya tsoˆ nehˬ-eu meh.

²⁴Dawˬ ja kʼaˇ laˆ doˆ ngeh, ngaˬ-euˬ zahˇ dawˬ kʼoꞈ dawˬ-ahˇ tsaˬ ni piˇ ma deuˬ yaˇ kʼaˬ ya daˇ nehˬ meh. Ngaˬ-euˬ zahˇ sahˇ kʼoꞈ-ahˇ tsaˬ ni, uˬ duˬ tahˬ-eu zahˇ sahˇ kʼoꞈ-ahˇ taꞈ-eu bawˬ-iˬ deuˬ aˬ yawꞈ maꞈ ya gʼeh-awˇ, jawˇ nah ngeh nah muiˬ-eu shawˇ-eu aˇ nah pyeuꞈ ni aˬ yawꞈ maꞈ ya jeˬ hmˬ meh.

²⁵“Piˇ ma deuˬ-aˬ, shiˇ taˬ-euˬ tsawˇ haˬ-ahˇ maˬ ya toeˬ ciˆ-a. Toeˬ ciˆ naˇ, maˬ shawˇ-eu tsawˇ haˬ pyeuꞈ-iˇ-eu meh. Ehˇ kʼawꞈ, yawˬ ha-euˬ aˬ ma aˬ da, yawˬ ha-euˬ zaˬ, yawˬ ha-euˬ mehˇ nmˇ hawˇ-eu, smˇ miˇ maˬ iˇ-euˬ yawˬ ha-euˬ dmˇ ma shiˇ taˬ-euˬ gaˇ toeˬ ciˆ nya meh.

²⁶Piˇ ma tiˬ gʼaˬ tsawˇ shiˇ-ahˇ toeˬ ciˆ-awˇ maˬ shawˇ-eu tsawˇ haˬ pyeuꞈ-iˇ-awˇ, aˬ yawꞈ paˇ shawˇ laˇ ngeh, shiꞈ nah paˇ ya jawˇ naˬ-eu meh.

²⁷Kʼoeˇ sahˇ miˇ tsa, Uˬ duˬ tahˬ nymˇ nymˇ ma laꞈ kʼoeˇ gaˇ mˇ nya ni, Uˬ duˬ tahˬ nymˇ nymˇ ma-euˬ laꞈ kʼoeˇ pu kaˬ-ahˇ uˇ leˇ-awˇ, gʼawˇ mawˇ shawˇ-eu lawˇ-eu jeˬ ya lawˇ-eu meh lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

²⁸“Piˇ ma deuˬ-ahˇ oꞈ-eu jeˬ biˇ-aˬ, ngaˇ ma. Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ maꞈ-ahˇ tiˬ jeˬ-iˬ maˬ ya biˇ nehˬ-a. Aˬ yawꞈ maꞈ-euˬ myawˬ gahˬ-aˬ ngaˇ ma.

²⁹Dzaˬ la gʼo cehˇ lawˇ-eu jeˬ, iˬ baˇ shawˇ-eu lawˇ-eu jeˬ hawˇ-eu, dziˇ dzoˆ tsoeˬ-eu lawˇ-eu jeˬ-aˬ, piˇ ma deuˬ-ahˇ oꞈ-eu dzaˇ pyeuꞈ-awˇ, Iˇsaˬleˬlaˆ miˇ kʼahˬ laꞈ kʼoeˇ ngaˬ-ahˇ kʼaˇ damˬ taˬ-eu jeˬ dawˬ tawˆ luꞈ, aˬ yawꞈ maꞈ-ahˇ oꞈ-eu meh.

³⁰Keuˆ beh beh le-euˬ dzaˬ la gʼo cehˇ deuˬ hawˇ-eu, ngaˬ-ahˇ kʼaˇ damˬ laˇ-euˬ yawˬ jeˬ na luꞈ, piˇ ma deuˬ-ahˇ oꞈ-eu meh. Miˇ kʼahˬ zaˬ deuˬ kaˬ muˇ kʼaˇ jahˇ ngeh, jahˇ beh beh-euˬ kaˬ muˇ piˇ ma deuˬ-ahˇ ya damˬ nehˬ meh. Kʼoeˇ loꞈ-ehˇ jahˇ naˇ, aˬ yawꞈ maꞈ-euˬ nymˇ jiˇ kʼoeˇ taˆ ngaˇ guiˬ lahˬ biꞈ ma.

³¹Aˇ jiˇ shaˬ jiˇ, aˬ yawˇ yawꞈ shiˇ-euˬ jeˬ zaˬ shaˬ jiˇ hawˇ-eu, jeˬ zaˬ cawˬ cawˬ laˆ sehꞈ-euˬ shaˬ jiˇ, piˇ ma deuˬ maˬ ya dzaˬ-a.”