Read Akha Yeˬsaˬgeˬlaˇ 46 Bible Online

Yeˬsaˬgeˬlaˇ 46 - Akha bible

Yeˬsaˬgeˬlaˇ 46

¹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nahˇ ma doˆ kʼehˬ paw neh laꞈ kʼoeˇ pu kaˬ-ahˇ uˇ laˇ-eu lahˇ kʼehˬ kʼoeˇ kʼehˬ, gaˇ mˇ-eu aˇ nah kʼoꞈ nah laꞈ kʼoeˇ ya piˬ tehˬ taˬ meh. Ehˇ kʼawꞈ, jawˇ nah hawˇ-eu la shuiꞈ lah-eu bawˬ-iˬ gʼeh-eu aˇ nah-ahˇ ya pah taˬ meh.

²Dzoeˬ dzaˬ-eu sahˬ paˬ zaˬ yo-aˬ, aˬ yawꞈ neh lawˇ laˇ-euˬ miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ-ahˇ piˇ ma deuˬ lawˇ luꞈ ngeh, laꞈ nyiˇ pu kaˬ-ahˇ neh aˇ lawˆ lawˆ ma kʼoeˇ lawˆ-ahˇ uˇ leˇ-awˇ, laꞈ kʼoeˇ pu kaˬ-ahˇ uˇ leˇ-eu lahˇ kʼehˬ laˇ gʼoˆ bahˬ dawˬ peh ya yawꞈ meh. Lahˇ kʼehˬ kʼoeˇ tsahˇ-ahˇ jawˇ-awˇ uˬ duˬ tahˬ gʼaˬ ngeh, aˬ yawꞈ paˇ ya doˆ le meh. Lahˇ kʼehˬ kʼoeˇ uˬ ciꞈ uˬ taw paw keuˆ ni maˬ piˬ tehˬ-ehˇ ya bi jaˆ meh.

³Jawˇ nah ngeh nah hawˇ-eu la shuiꞈ lah-eu bawˬ-iˬ kʼaˇ gʼeh ngeh, tsawˇ haˬ dawˬ tawˆ luꞈ lahˇ kʼehˬ kʼoeˇ-euˬ mehˬ shi awˆ byaˆ-awˇ, Sahˬpaˬ Miˬyehˇ-ahˇ uˬ duˬ ya tahˬ meh.

⁴“Jawˇ nah ngeh nah-ahˇ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ bi lawˇ-eu gʼaˇ duˬ, maˇ byawꞈ maˬ baw-eu yawˇ zaˬ koꞈ mawˇ hawˇ-eu, yawˇ aˬ buˬ tiˬ mawˇ, sahˬ paˬ zaˬ yo gʼaˬ ya yuˇ laꞈ meh.

⁵Yawˇ aˬ buˬ kʼoeˇ mawˇ nehˬ-ehˇ lawˇ caw-eu gʼaˇ duˬ cehˇ meu tiˬ eˇpaˬ hawˇ-eu, yawˇ zaˬ aˬ yawꞈ mawˇ yawꞈ nehˬ-ehˇ lawˇ caw-eu gʼaˇ duˬ, aˬ yawꞈ kʼaˇ lawˇ caw mawꞈ-eu jeˬ yuˇ laꞈ nya meh. Dzaˬ la gʼo cehˇ tiˬ poˆ lawˇ ngeh, saˬ loˬ tsiˇ tiˬ heˬ aˬ yawꞈ ya yuˇ laꞈ meh.

⁶La shuiꞈ lah-eu bawˬ-iˬ gʼeh ngeh, maˇ byawꞈ maˬ baw-eu mawˇ neˇ mawˇ gaw zaˬ tiˬ mawˇ, yawˇ zaˬ koꞈ mawˇ hawˇ-eu, yawˇ aˬ buˬ tiˬ mawˇ aˬ yawꞈ ya lawˇ meh.

⁷Mawˇ neˇ mawˇ gaw aˬ yawꞈ mawˇ yawꞈ lawˇ ngeh maˬ ehˇ, yawˇ aˬ buˬ aˬ yawꞈ mawˇ yawꞈ lawˇ ngeh maˬ ehˇ, cehˇ meu tiˬ eˇpaˬ ya lawˇ caw-awˇ, yawˇ zaˬ lawˇ ngeh, aˬ yawꞈ kʼaˇ lawˇ caw mawꞈ-eu jeˬ lawˇ caw nya meh. Kʼoeˇ loꞈ-ehˇ dzaˬ la gʼo cehˇ kʼaˇ lawˇ ngeh, saˬ loˬ tsiˇ tiˬheˬ ya lawˇ caw meh.

⁸Sahˬpaˬ zaˬ yo kʼoeˇ gʼaˬ, lahˇ kʼehˬ gaˇ ma-ahˇ jaˆ saˬ saˬ-eu aˇ lawˆ lawˆ ma kʼoeˇ tsahˇ-ahˇ neh ya uˇ leˇ-awˇ, aˬ yawꞈ tsahˇ-ahˇ neh paˇ ya gʼoꞈ doˆ le meh.

⁹“Bawˬ-iˬ kʼaˇ gʼeh ngeh, miˇ kʼahˬ zaˬ deuˬ Sahˬpaˬ Miˬyehˇ-ahˇ uˬ duˬ tahˬ laˇ ngeh jawˇ, laꞈ taˆ paw pyawˬ lahˇ kʼehˬ-ahˇ neh uˇ laˇ-euˬ deuˬ laꞈ oˆ paw pyawˬ lahˇ kʼehˬ-ahˇ neh ya gʼoꞈ doˆ le-awˇ, laꞈ oˆ paw pyawˬ lahˇ kʼehˬ-ahˇ neh uˇ laˇ-euˬ deuˬ laꞈ taˆ paw pyawˬ lahˇ kʼehˬ-ahˇ neh ya gʼoꞈ doˆ le meh. Aˬ geu gʼaˬ maˬ kaˬ, yawˬ ha uˇ leˇ-euˬ paw pyawˬ-ahˇ neh maˬ ya gʼoꞈ doˆ le-a. Yawˬ pyawˬ yawˬ-ahˇ neh ya gʼoꞈ doˆ le-eu meh.

¹⁰Sahˬ paˬ zaˬ yo gʼaˬ kʼawꞈ, miˇ kʼahˬ zaˬ deuˬ uˇ leˇ-eu yamˬ-ahˇ ya uˇ leˇ-awˇ, miˇ kʼahˬ zaˬ deuˬ doˆ le ngeh yamˬ-ahˇ ya doˆ le meh.

¹¹Bawˬ-iˬ gʼeh-eu aˇ nah aˇ yamˬ laꞈ kʼoeˇ, dzaˬ la gʼo cehˇ lawˇ ngeh, heu loꞈ-ehˇ ya lawˇ meh. Mawˇ neˇ mawˇ gaw tiˬ mawˇ nehˬ-ehˇ tiˬ eˇpaˬ ya lawˇ-awˇ, yawˇ aˬ buˬ tiˬ mawˇ nehˬ-ehˇ tiˬ eˇpaˬ ya lawˇ meh. Yawˇ zaˬ nehˬ-ehˇ lawˇ ngeh-aˬ, uˬ duˬ tahˬ laˇ-euˬ gʼaˬ kʼaˇ lawˇ mawꞈ-eu jeˬ lawˇ nya meh. Kʼoeˇ loꞈ-ehˇ dzaˬ la gʼo cehˇ kʼaˇ lawˇ ngeh, saˬ loˬ tsiˇ tiˬ heˬ[12]45.24b-ahˇ haw-awˬ* ya lawˇ caw meh.

¹²“Dzoeˬ dzaˬ-eu sahˬ paˬ zaˬ yo gʼaˬ, Sahˬpaˬ Miˬyehˇ-ahˇ nui ma keuˆ-awˇ lawˇ nehˬ mawꞈ ngeh, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ lawˇ-eu maˬ kaˬ, cawˬ cawˬ taꞈ-eu lawˇ-eu jeˬ lawˇ-eu maˬ kaˬ, nahˇ ma doˆ kʼehˬ paw neh laꞈ kʼoeˇ pu kaˬ-ahˇ uˇ leˇ-eu lahˇ kʼehˬ kʼoeˇ kʼehˬ ya pah nehˬ meh. Jawˇ nah-ahˇ kʼaˇ lawˇ-eu loꞈ-ehˇ aˬ yawꞈ ya lawˇ-awˇ, aˬ yawꞈ gʼoꞈ doˆ le gʼaˬ ngeh, lahˇ kʼehˬ paˇ ya piˬ tehˬ taˬ-eu meh.

¹³Sahˬpaˬ Miˬyehˇ ehˇ-eu, “Yawˬ shawˬ na luꞈ, maˇ byawꞈ maˬ baw-eu yawˇ zaˬ tiˬ mawˇ, mawˇ lah-ehˇ dzah puiˆ-awˇ Sahˬpaˬ Miˬyehˇ-ahˇ ya lawˇ meh. Aˬ yawꞈ nah yawꞈ maˬ bi tsehˆ leˇ ni, kʼoeˇ loꞈ-ehˇ ya lawˇ meh.

¹⁴Cehˇ meu koꞈ bymˇ tiˬ bymˇ eˇpaˬ-ahˇ[13]1/6 eˇpaˬ-aˬ, tiˬ ciˇ loˇ ehˇ gʼaˬ ni byah-eu meh.* saˬ loˬ tsiˇ smˬ bymˇ tiˬ bymˇ heˬ[14]1/3 heˬ-aˬ, tiˬ liˆ ehˇ gʼaˬ ni byah-eu meh.* keuˬ-awˇ dzaˬ la gʼo cehˇ lawˇ-eu jeˬ, yawˬ shawˬ na luꞈ ya lawˇ meh. Sahˬpaˬ Miˬyehˇ-ahˇ kʼoeˇ loꞈ-ehˇ lawˇ-eu jeˬ tiˬ jawˇ-iˬ gʼaˬ maˬ ya bi baˬ-iˇ-a.

¹⁵Yawˇ zaˬ, cehˇ meu hawˇ-eu saˬ loˬ tsiˇ heu deuˬ, mˬ maˬ maˬ byaˆ zaˇ ziˇ, Sahˬpaˬ Miˬyehˇ-ahˇ aˬ yawꞈ shawˬ yawꞈ ya lawˇ meh.”

¹⁶Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ dawˬ biꞈ-eu meh. “Dzoeˬ dzaˬ-eu sahˬ paˬ zaˬ yo tiˬ gʼaˬ, yawˬ ha-euˬ miˇ tsaˬ yawˬ ha-eu aˬ li tiˬ gʼaˬ na-ahˇ laꞈ sawˬ biꞈ nehˬ naˇ, miˇ tsaˬ kʼoeˇ aˬ yawꞈ-euˬ aˬ li-euˬ miˇ tsaˬ pyeuꞈ-iˇ-awˇ, sahˬ paˬ-euˬ aˇ jeuˬ aˇ ca-ahˇ taꞈ-eu miˇ tsaˬ pyeuꞈ-eu meh.

¹⁷Ehˇ kʼawꞈ, sahˬ paˬ zaˬ yo kʼoeˇ gʼaˬ aˬ yawꞈ-euˬ gaˇ mˇ-eu tsawˇ haˬ tiˬ gʼaˬ na-ahˇ aˬ yawꞈ-euˬ miˇ tsaˬ biꞈ nehˬ naˇ, buˬ-iˇ law-iˇ-eu aˇ kʼoꞈ[15] keuˆ le ngeh, dzoeˬ dzaˬ-eu sahˬ paˬ zaˬ yo-euˬ miˇ tsaˬ paˇ pyeuꞈ kʼoꞈ-iˇ-eu meh. Miˇ tsaˬ kʼoeˇ aˬ yawꞈ-euˬ pyeuꞈ-awˇ, aˬ yawꞈ hawˇ-eu aˬ yawꞈ-euˬ aˬ li deuˬ tehꞈ-ehˇ geuꞈ tsehˆ tsehˆ nya-eu meh.

¹⁸Dzoeˬ dzaˬ-eu sahˬ paˬ zaˬ yo-aˬ, miˇ kʼahˬ zaˬ deuˬ-euˬ mˇ myawˬ tiˬ jeˬ-iˬ maˬ ya yuˇ geuꞈ-a. Ngaˬ-euˬ tsawˇ haˬ pyeuꞈ-eu miˇ kʼahˬ zaˬ deuˬ-euˬ miˇ tsaˬ maˬ ya kʼaˆ geuꞈ-eu gʼaˇ duˬ, aˬ yawꞈ-euˬ aˬ li deuˬ-ahˇ miˇ tsaˬ biꞈ ngeh, aˬ yawꞈ-euˬ miˇ tsaˬ tehꞈ-ehˇ ya biꞈ meh.”

¹⁹Kʼoeˇ naˇ, laꞈ oˆ paw pyawˬ-ahˇ neh laꞈ kʼoeˇ pu kaˬ-ahˇ uˇ leˇ-eu lahˇ kʼehˬ dawˬ peh, laꞈ taˆ paw pyawˬ-ahˇ mehˬ shiˬ pyawˇ-ehˇ tsoˆ taˬ-euˬ kuˆ lawˆ deuˬ-euˬ gʼoˆ kʼehˬ-ahˇ, tsawˇ haˬ kʼoeˇ gʼaˬ ngaˬ-ahˇ sheuˬ gʼeh nehˬ laꞈ-euˬ meh. Kuˆ lawˆ kʼoeˇ deuˬ-aˬ, piˇ ma deuˬ-euˬ muiˬ-eu shawˇ-eu kuˆ lawˆ deuˬ meh. Kuˆ lawˆ kʼoeˇ deuˬ-euˬ nahˇ ma ga kʼehˬ paw dzeˇ tsahˇ-ahˇ aˬ yawꞈ laꞈ noeˇ toeˬ ceh-eu meh.

²⁰Aˬ yawꞈ ehˇ-eu, “Heu tsahˇ-aˬ, iˬ baˇ shawˇ-eu lawˇ-eu jeˬ hawˇ-eu, dziˇ dzoˆ tsoeˬ-eu lawˇ-eu jeˬ gʼaˇ duˬ, piˇ ma deuˬ shaˬ jiˇ kʼoeˇ gaˇ caꞈ-awˇ, dzaˬ la gʼo cehˇ lawˇ-eu jeˬ-ahˇ kʼoeˇ gaˇ ba jaꞈ-eu meh. Muiˬ-eu shawˇ-eu jeˬ laꞈ nyiˇ pu kaˬ-ahˇ yuˇ nyawˬ gʼeh-awˇ, miˇ kʼahˬ zaˬ deuˬ-ahˇ maˬ bi guˬ leˇ-eu gʼaˇ duˬ, aˬ yawꞈ maꞈ kʼoeˇ gaˇ caꞈ-eu meh.”

²¹Kʼoeˇ naˇ, tsawˇ haˬ kʼoeˇ gʼaˬ ngaˬ-ahˇ laꞈ nyiˇ pu kaˬ-ahˇ sheuˬ doˆ gʼeh-awˇ, laꞈ coeˇ oeˬ coeˇ-ahˇ sheuˬ jawˬ nehˬ laꞈ-euˬ meh. Laꞈ coeˇ aˬ yawꞈ coeˇ yawˬ-ahˇ laꞈ nyiˇ pu kaˬ kaˬ zaˬ tiˬ kaˬ jaˆ-eu ngaˇ paˇ mawˇ-euˬ ma.

²²Laꞈ nyiˇ pu kaˬ-euˬ laꞈ coeˇ oeˬ coeˇ-ahˇ, yaw mahˇ paw tseˇ lmˇ byah-awˇ, yaw jeˇ paw shiꞈ lmˇ nui paˆ byah-eu pu kaˬ kaˬ zaˬ jaˆ-eu meh.

²³Pu kaˬ yawˬ kaˬ na luꞈ-ahˇ kʼaˬ lo gawˬ lahˇ taˬ-awˇ, kaˇ pyawˇ dawˬ peh miˬ dzaˬ tsawˬ bu jahˇ taˬ-euˬ meh.

²⁴“Heu deuˬ-aˬ, miˇ kʼahˬ zaˬ deuˬ neh kʼaˇ hehˇ laꞈ-euˬ lawˇ-eu shehˇ-eu jeˬ-ahˇ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu tsawˇ haˬ deuˬ ya caꞈ-eu jawˇ duˬ meh” lehˇ, tsawˇ haˬ kʼoeˇ gʼaˬ ngaˬ-ahˇ ehˇ-eu meh.