Read Akha Yeˬsaˬgeˬlaˇ 47 Bible Online

Yeˬsaˬgeˬlaˇ 47 - Akha bible

Yeˬsaˬgeˬlaˇ 47

¹Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ, tsawˇ haˬ kʼoeˇ gʼaˬ ngaˬ-ahˇ paˇ sheuˬ kʼoꞈ gʼeh-euˬ meh. Gʼoˆ kʼehˬ-euˬ laꞈ oˆ neh iˇ cuꞈ yoeˇ doˆ le-awˇ, Uˬ duˬ tahˬ nymˇ nymˇ ma mehˬ shiˬ ciˬ pyawˇ taˬ-euˬ nahˇ ma doˆ kʼehˬ paw yoeˇ ka gʼeh-euˬ meh. Uˬ duˬ tahˬ nymˇ nymˇ ma-euˬ laꞈ oˆ pyawˬ-ahˇ, lawˇ duˬ-euˬ laꞈ oˆ paw paˆ-ehˇ yoeˇ ka leꞈ-euˬ meh.

²Kʼoeˇ naˇ, lahˇ kʼehˬ laꞈ taˆ paw kʼehˬ-ahˇ neh, Uˬ duˬ tahˬ nymˇ nymˇ ma-euˬ lahˇ laꞈ nyiˇ, tsawˇ haˬ kʼoeˇ gʼaˬ ngaˬ-ahˇ sheuˬ doˆ gʼeh-awˇ, nahˇ ma doˆ kʼehˬ paw pyawˬ-ahˇ jaˆ-eu lahˇ kʼehˬ-ahˇ sheuˬ jawˬ keuˆ laꞈ-euˬ meh. Lahˇ kʼehˬ kʼoeˇ kehˬ-euˬ laꞈ oˆ paw pyawˬ-ahˇ neh, lawˇ gawˆ gawˆ zaˬ tiˬ gawˆ yoeˇ doˆ le-euˬ meh.

³Tsawˇ haˬ kʼoeˇ gʼaˬ daˇ dza yuˇ-awˇ, lawˇ gawˆ caw caw-ehˇ nahˇ ma doˆ kʼehˬ paw nyiˬ yaˇ ngaˬ tseˇ lmˇ dehˬ ka gʼeh-awˇ, ngaˬ-ahˇ lawˇ gawˆ bi tsehˆ laꞈ ngeh, aˬ kuiˇ kuiˇ nuiꞈ-ahˇ keuˆ ni naꞈ laˇ-eu meh.

⁴Kʼoeˇ naˇ, nyiˬ yaˇ ngaˬ tseˇ lmˇ paˇ dza ka gʼeh-awˇ, tiˬ poˆ paˇ uˇ-iˇ haw ngeh aˬ kuiˇ pawˬ tsuiꞈ-ahˇ keuˆ ni naꞈ laˇ-eu meh. Nyiˬ yaˇ ngaˬ tseˇ lmˇ paˇ dza ka gʼeh ngeh, joꞈ-ahˇ keuˆ ni naꞈ laˇ-eu meh.

⁵Laꞈ oˆ paw nyiˬ yaˇ ngaˬ tseˇ lmˇ paˇ dza ka gʼeh ngeh, iˇ cuꞈ naꞈ dui dui-eu miˇ neh, iˇ diˬ maˬ diˬ naˇ maˬ tsehˆ nya ni jaˆ-eu meh.

⁶“Tsawˇ haˬ zaˬ-oˇ, heu deuˬ dawˬ tawˆ luꞈ yaw muiˬ paˬ-ehˇ juiˇ taˬ-awˬ” lehˇ, tsawˇ haˬ kʼoeˇ gʼaˬ ngaˬ-ahˇ ehˇ-eu meh. Kʼoeˇ naˇ, lawˇ baˬ lawˇ deh-ahˇ, tsawˇ haˬ kʼoeˇ gʼaˬ ngaˬ-ahˇ paˇ sheuˬ kʼoꞈ doˆ nehˬ laꞈ-euˬ meh.

⁷Lawˇ baˬ kʼoeˇ baˬ heu baˬ-ahˇ aˇ bawˇ gʼawˬ mya ni dehꞈ luꞈ gaˇ ngaˇ ya mawˇ-euˬ ma.

⁸Tsawˇ haˬ kʼoeˇ gʼaˬ ngaˬ-ahˇ heu loꞈ-ehˇ ehˇ-eu meh. “Lawˇ baˬ heu gawˆ-aˬ, miˇ kʼahˬ heu kʼahˬ nyiˬ tsehˆ-ehˇ nahˇ ma doˆ kʼehˬ paw yoeˇ ka gʼeh-awˇ, Yawˇdaˬ lawˇ baˬ-ahˇ yoeˇ tsmˇ-iˇ-awˇ, shiˇ-eu iˬ ma laˆ shaˆ-ahˇ yoeˇ ahˇ-eu meh. Shiˇ-eu iˬ ma laˆ shaˆ-ahˇ yoeˇ ahˇ ngeh, kʼoeˇ gaˇ dahˬ-eu saˬ deuꞈ kuiˇ-eu iˇ cuꞈ-ahˇ, saˬ deuꞈ maˬ kuiˇ-eu iˇ cuꞈ iˇ lahˬ ka nehˬ gaˇ duˇ-eu meh.

⁹Iˇ cuꞈ heu gawˆ kʼaˇ yoeˇ ka gʼeh gaˇ, jeˬ zaˬ hawˇ-eu ngaˬ shaˬ yawˬ jeˬ na luꞈ jawˇ kuꞈ-eu meh. Lawˇ baˬ heu gawˆ-aˬ, Shiˇ-eu iˬ ma laˆ shaˆ iˇ cuꞈ-ahˇ yaw shuiꞈ shuiꞈ-ehˇ paˇ bi pyeuꞈ laˇ-awˇ, aˬ yawꞈ kʼaˇ yoeˇ ka gʼeh gaˇ, yawˬ jeˬ na luꞈ-ahˇ yaw dehꞈ bi dehꞈ-eu meh.

¹⁰Eˬgeˬdiˇ lawˇ gawˆ-ahˇ neh Eˬneˬgaˬleˬ lawˇ gawˆ-ahˇ doˆ ni, shiˇ-eu iˬ ma laˆ shaˆ-euˬ lawˇ deh kʼoeˇ tiˬ li, ngaˬ shaˬ poˆ dzaˬ-eu tsawˇ haˬ tiˬ byah ni jawˇ-awˇ, aˬ yawꞈ maꞈ-euˬ za sheu lawꞈ taˬ-awˇ jaˆ tehꞈ-a. Gʼahˇ ceh-euˬ iˬ ma laˆ shaˆ-ahˇ ngaˬ shaˬ aˇ jeuˬ kʼaˇ jawˇ-eu myaˆ ni, kʼoeˇ gaˇ kʼawꞈ jawˇ tehꞈ-a.

¹¹Ehˇ kʼawꞈ, lawˇ deh caw caw-ehˇ jaˆ-eu lah yaˬ deuˬ hawˇ-eu lah deuˬ-ahˇ dahˬ-eu iˇ cuꞈ deuˬ maˬ shawˇ-ehˇ, aˬ myah luꞈ saˬ deuꞈ kuiˇ tehꞈ-a.

¹²Lawˇ baˬ kʼoeˇ gawˆ-euˬ lawˇ deh nyiˬ paw luꞈ, aˇ siˬ dzaˬ nya-eu aˇ bawˇ gʼawˬ mya jeˬ dehꞈ tehꞈ-a. Aˇ bawˇ kʼoeˇ deuˬ aˇ paꞈ tiˬ jawˇ-iˬ maˬ nyoeˬ-iˇ-ehˇ, aˇ siˬ maˬ tsehˆ leˇ ni siˬ tehꞈ-a. Aˇ bawˇ kʼoeˇ deuˬ Uˬ duˬ tahˬ nymˇ nymˇ ma-ahˇ neh yoeˇ doˆ le-euˬ lawˇ baˬ kʼoeˇ gawˆ-euˬ iˇ cuꞈ za luꞈ-eu baˬ da neh, ba la yawˬ siˬ na luꞈ aˇ siˬ yaw shuiꞈ siˬ le tehꞈ-a. Aˬ yawꞈ maꞈ-euˬ aˇ siˬ deuˬ dzaˇ pyeuꞈ-awˇ, aˇ paꞈ deuˬ jaˆ gʼaˬ pyeuꞈ tehꞈ-a.”

¹³Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ tsawˇ jeuˬ tseˇ nyiˬ jeuˬ ya biˇ geuꞈ-eu miˇ kʼahˬ kʼoeˇ kʼahˬ-euˬ miˇ kaˬ-aˬ, heu loꞈ-ehˇ meh. Yoˇsehˆ tsawˇ jeuˬ-ahˇ miˇ tsaˬ nyiˬ tsahˇ oꞈ-eu meh.

¹⁴Miˇ kʼahˬ heu kʼahˬ biꞈ ma lehˇ, naw maꞈ-euˬ aˬ poeˬ aˬ bawˇ deuˬ-ahˇ ngaˇ saˇ jaˇ dzaˬ taˬ-euˬ jaˆ-eu ma. Nymˬ-mˇ, naw maꞈ yaw kaˬ miˇ kʼahˬ heu kʼahˬ biˇ geuꞈ-awˬ.

¹⁵“Laꞈ taˆ paw pyawˬ miˇ kaˬ-aˬ, Gʼahˇ ceh-euˬ iˬ ma laˆ shaˆ-ahˇ neh nahˇ ma doˆ kʼehˬ paw Heˬdaˬloˬ meuˬ, Haˬmaˆ gʼaˬ lahˇ, Zeˬdaˇ meu,

¹⁶Daˬmaˬsehˇ meuˬ hawˇ-eu Haˬmaˆ meuˬ yaw kaˬ-ahˇ jaˆ-eu Beˬloˇdaˬ meuˬ hawˇ-eu Siˇbaˬleˬ meuˬ-euˬ nyiˬ tsehˆ-ehˇ, Hawˇlahˬ miˇ kʼahˬ-euˬ miˇ kaˬ dawˬ peh jaˆ-eu Haˬzeuˬhaˬtiˇkawˇ meuˬ-ahˇ keuˆ ni meh.

¹⁷Laꞈ taˆ paw pyawˬ miˇ kaˬ-aˬ, Gʼahˇ ceh-euˬ iˬ ma laˆ shaˆ-ahˇ neh nahˇ ma doˆ kʼehˬ paw dzeˇ-ehˇ, Daˬmaˬsehˇ meuˬ-euˬ laꞈ taˆ paw miˇ kaˬ-ahˇ jaˆ-eu Haˬzaˇeˇnoˬ meuˬ nyiˬ tsehˆ-ehˇ, kʼoeˇ-euˬ laꞈ taˆ paw paˇ jaˆ-eu Haˬmaˆ meuˬ-ahˇ keuˆ ni meh.

¹⁸“Nahˇ ma doˆ kʼehˬ paw pyawˬ miˇ kaˬ-aˬ, Hawˇlahˬ meuˬ hawˇ-eu Daˬmaˬsehˇ meuˬ yaw kaˬ-ahˇ jaˆ-eu Haˬzaˇeˇnoˬ meuˬ-ahˇ neh, laꞈ oˆ paw pyawˬ-ehˇ Giˇlaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ yaw kaˬ-ahˇ yoeˇ ka-eu Yawˇdaˬ lawˇ baˬ caw caw-ehˇ, Shiˇ-eu iˬ ma laˆ shaˆ dawˬ peh jaˆ-eu Taˬmaˬ meuˬ-ahˇ keuˆ ni meh.

¹⁹“Laꞈ oˆ paw pyawˬ miˇ kaˬ-aˬ, Taˬmaˬ meuˬ-ahˇ neh dahˬ beh-awˇ, Meˬliˇbaˆ Kaˬdeˬshaˇ lawˇ gawˆ deuˬ jaˆ gaˇ neh, Iˇjiˇtuˆ lawˇ baˬ caw caw-ehˇ Gʼahˇ ceh-euˬ iˬ ma laˆ shaˆ-ahˇ keuˆ ni meh.

²⁰“Nahˇ ma ga kʼehˬ paw pyawˬ miˇ kaˬ-aˬ, Gʼahˇ ceh-euˬ iˬ ma laˆ shaˆ pyeuꞈ-awˇ, laꞈ taˆ paw Haˬmaˆ gʼaˬ lahˇ jaˆ gaˇ keuˆ ni meh.

²¹“Miˇ kʼahˬ heu kʼahˬ naw maꞈ Iˇsaˬleˬlaˆ tsawˇ jeuˬ yaw kaˬ biˇ tsaˬ geuꞈ-awˬ.

²²Kʼoeˇ-aˬ, mˬ maˬ maˬ byaˆ zaˇ ziˇ naw maꞈ-ahˇ oꞈ-eu jeˬ biˇ meh. Naw maꞈ miˇ tsaˬ biˇ ngeh, naw maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ deuˬ hawˇ-eu, heu gaˇ dehꞈ le-euˬ tsawˇ haˬ deuˬ-ahˇ kʼawꞈ ya biˇ oꞈ nehˬ meh. Aˬ yawꞈ maꞈ-ahˇ Iˇsaˬleˬlaˆ miˇ kʼahˬ zaˬ lehˇ ya sawˇ-awˇ, shehˆ tsaˬ tsaˬ-eu laꞈ kʼoeˇ miˇ tsaˬ biˇ geuꞈ ngeh, aˬ yawꞈ maꞈ-ahˇ kʼawꞈ ya bi oꞈ leˇ meh.

²³Aˬ cawˬ tsawˇ jeuˬ yawˬ gʼaˬ na luꞈ, aˬ yawꞈ kʼaˇ jawˇ taꞈ-eu Iˇsaˬleˬlaˆ tsawˇ jeuˬ tiˬ jeuˬ-ahˇ oꞈ-eu miˇ tsaˬ laꞈ kʼoeˇ, aˬ yawꞈ gʼaˇ duˬ miˇ tsaˬ jaˆ meh lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”