Read Akha Yeˬsaˬgeˬlaˇ 48 Bible Online

Yeˬsaˬgeˬlaˇ 48 - Akha bible

Yeˬsaˬgeˬlaˇ 48

¹Heu-aˬ, Iˇsaˬleˬlaˆ tsawˇ jeuˬ deuˬ-euˬ tsawˇ myahˇ meh. Laꞈ taˆ paw pyawˬ-ahˇ, Daˬ tsawˇ jeuˬ gʼaˇ duˬ miˇ tsaˬ tiˬ tsahˇ oꞈ-eu meh. Gʼahˇ ceh-euˬ iˬ ma laˆ shaˆ-ahˇ neh nahˇ ma doˆ kʼehˬ paw dzeˇ-ehˇ, Heˬdaˬloˬ meuˬ, Haˬmaˆ gʼaˬ lahˇ heu deuˬ nyiˬ tsehˆ-ehˇ, Daˬmaˬsehˇ meuˬ hawˇ-eu Haˬmaˆ meuˬ yaw kaˬ-ahˇ jaˆ-eu Haˬzaˇeˇnoˬ meuˬ-ahˇ keuˆ ni meh.

²Daˬ tsawˇ jeuˬ-euˬ miˇ tsaˬ laꞈ oˆ, nahˇ ma doˆ kʼehˬ ga kʼehˬ nyiˬ tsehˆ-ehˇ, miˇ kaˬ taꞈ taꞈ-ehˇ laꞈ oˆ paw pyawˬ-ahˇ jaˆ ka leꞈ-euˬ tsawˇ jeuˬ tiˬ jeuˬ saˇ-iˬ tiˬ jeuˬ-ahˇ oꞈ-eu miˇ tsaˬ deuˬ-aˬ, heu loꞈ-ehˇ meh. Daˬ tsawˇ jeuˬ-euˬ miˇ tsaˬ laꞈ oˆ, Aˬshaˬ tsawˇ jeuˬ-euˬ miˇ tsaˬ jaˆ-eu meh.

³Aˬshaˬ tsawˇ jeuˬ-euˬ miˇ tsaˬ laꞈ oˆ, Naˬtaˬliˇ tsawˇ jeuˬ-euˬ miˇ tsaˬ jaˆ-eu meh.

⁴Naˬtaˬliˇ tsawˇ jeuˬ-euˬ miˇ tsaˬ laꞈ oˆ, Maˬnaˇseˬ tsawˇ jeuˬ-euˬ miˇ tsaˬ jaˆ-eu meh.

⁵Maˬnaˇseˬ tsawˇ jeuˬ-euˬ miˇ tsaˬ laꞈ oˆ, Eˇpaˬleˬ tsawˇ jeuˬ-eu miˇ tsaˬ jaˆ-eu meh.

⁶Eˇpaˬleˬ tsawˇ jeuˬ-euˬ miˇ tsaˬ laꞈ oˆ, Luˇbeˬ tsawˇ jeuˬ-euˬ miˇ tsaˬ jaˆ-eu meh.

⁷Luˇbeˬ tsawˇ jeuˬ-euˬ miˇ tsaˬ laꞈ oˆ, Yuˇdaˆ tsawˇ jeuˬ-euˬ miˇ tsaˬ jaˆ-eu meh.

⁸Yuˇdaˆ tsawˇ jeuˬ-euˬ miˇ tsaˬ nehˬ-ehˇ nahˇ ma doˆ kʼehˬ ga kʼehˬ-ehˇ miˇ kaˬ taꞈ-eu miˇ tsaˬ pehˇ tsahˇ kʼoeˇ tsahˇ ya dehˬ doˆ taˬ meh. Miˇ tsaˬ kʼoeˇ tsahˇ-ahˇ laꞈ taˆ paw pyawˬ-ahˇ neh laꞈ oˆ paw pyawˬ-ahˇ daˇ dza dehˬ ka leꞈ ngeh, koꞈ heˇ nyiˬ yaˇ ngaˬ tseˇ lmˇ ya bi byah-awˇ, yaw mahˇ paw Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ-ahˇ oꞈ-eu miˇ tsaˬ nehˬ-ehˇ tiˬ kawˆ mah ni ya bi tsaˬ-eu meh. Uˬ duˬ tahˬ nymˇ nymˇ ma-ahˇ pehˇ tsahˇ heu tsahˇ laꞈ kʼoeˇ ya bi jaˆ-eu meh.

⁹Miˇ tsaˬ kʼoeˇ tsahˇ-euˬ gʼahˇ ceh nyiˬ paˆ-ehˇ, yaw mahˇ paw koꞈ heˇ nyiˬ yaˇ ngaˬ tseˇ lmˇ hawˇ-eu, yaw jeˇ paw ngaˬ heˇ lmˇ byah-eu miˇ tsaˬ tiˬ tsahˇ, Sahˬpaˬ Miˬyehˇ-ahˇ ya a nehˬ-eu meh.

¹⁰Muiˬ-eu shawˇ-eu miˇ tsaˬ heu tsahˇ laꞈ kʼoeˇ, piˇ ma deuˬ gʼaˇ duˬ pehˇ tsahˇ tiˬ tsahˇ ya taˬ doˆ nehˬ-eu meh. Nahˇ ma doˆ kʼehˬ ga kʼehˬ-ehˇ koꞈ heˇ nyiˬ yaˇ ngaˬ tseˇ lmˇ hawˇ-eu, yaw jeˇ paw nyiˬ heˇ ngaˬ yaˇ lmˇ byah ni ya dehˬ nehˬ meh. Miˇ tsaˬ pehˇ tsahˇ heu tsahˇ-euˬ gʼahˇ ceh nyiˬ paˆ-ehˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma ya bi jaˆ meh.

¹¹Miˇ tsaˬ heu tsahˇ-aˬ, Zaˬdoˆ-euˬ zaˬ deuˬ uˆ deuˬ pyeuꞈ-eu piˇ ma deuˬ gʼaˇ duˬ meh. Iˇsaˬleˬlaˆ tsawˇ jeuˬ gaˇ ma cah bahˬ ngeh, Leˬbiˇ tsawˇ jeuˬ pyeuꞈ-eu piˇ ma nui deuˬ loꞈ-ehˇ aˬ yawꞈ maꞈ gaˇ ma maˬ bahˬ ni saˇ jaˇ ziꞈ-euˬ meh.

¹²Kʼoeˇ miˇ neh, Leˬbiˇ tsawˇ jeuˬ-ahˇ oꞈ-eu miˇ tsaˬ dawˬ peh aˬ yawꞈ maꞈ-ahˇ oꞈ-eu miˇ tsaˬ tiˬ tsahˇ ya bi jaˆ meh. Miˇ tsaˬ kʼoeˇ tsahˇ-aˬ, aˬ cawˬ naˆ maˬ tseˇ muiˬ-eu shawˇ-eu miˇ tsaˬ pehˇ tsahˇ meh.

¹³Piˇ ma deuˬ-euˬ miˇ tsaˬ kʼoeˇ tsahˇ laꞈ oˆ, Leˬbiˇ tsawˇ haˬ deuˬ-ahˇ oꞈ-eu miˇ tsaˬ tiˬ tsahˇ ya bi jaˆ meh. Miˇ tsaˬ kʼoeˇ tsahˇ kʼawꞈ, nahˇ ma doˆ kʼehˬ ga kʼehˬ-ehˇ koꞈ heˇ nyiˬ yaˇ ngaˬ tseˇ lmˇ ya bi byah-awˇ, yaw jeˇ paw nyiˬ heˇ ngaˬ yaˇ lmˇ ya bi byah meh.

¹⁴Sahˬpaˬ Miˬyehˇ-ahˇ a nehˬ taˬ-euˬ miˇ tsaˬ kʼoeˇ tsahˇ-aˬ, miˇ kʼahˬ kʼoeˇ kʼahˬ laꞈ kʼoeˇ aˬ cawˬ taꞈ-ehˇ muiˬ dzehˬ-eu miˇ tsaˬ pyeuꞈ-awˇ, ahˬ-eu maˬ ehˇ, dehˬ paˇ geuꞈ-eu maˬ ehˇ, maˬ ya jahˇ-a. Kʼoeˇ-aˬ, muiˬ dui shawˇ dui dui-awˇ, Sahˬpaˬ Miˬyehˇ-ahˇ oꞈ-eu pehˇ tsahˇ meh.

¹⁵Miˇ tsaˬ kʼoeˇ tsahˇ laꞈ kʼoeˇ yaw mahˇ paw koꞈ heˇ nyiˬ yaˇ ngaˬ tseˇ lmˇ hawˇ-eu yaw jeˇ paw tiˬ heˇ nyiˬ yaˇ ngaˬ tseˇ lmˇ byah-eu pehˇ tsahˇ tiˬ tsahˇ dzeˇ-eu meh. Pehˇ tsahˇ kʼoeˇ muiˬ-eu shawˇ-eu miˇ tsaˬ maˬ ngeuˇ-a. Ehˇ kʼawꞈ tsawˇ haˬ dawˬ tawˆ luꞈ gʼaˇ duˬ pyeuꞈ-eu meh. Aˬ yawꞈ maꞈ kʼoeˇ gaˇ jawˇ-awˇ mˇ dzaˬ kʼawꞈ dawˇ nya-eu meh. Miˇ tsaˬ kʼoeˇ tsahˇ-euˬ gʼahˇ ceh meuˬ ya tsoˆ-eu meh.

¹⁶Meuˬ kʼoeˇ meuˬ-aˬ tiˬ heˇ tiˬ yaˇ nyiˬ tseˇ ngaˬ lmˇ oeˬ bawˬ ya bi byah-eu meh.

¹⁷Meuˬ kʼoeˇ-euˬ gaˇ dzeˇ tiˬ jawˬ, yaw jeˇ paw koꞈ tseˇ nyiꞈ lmˇ nui paˆ byah-eu pu kaˬ ya bi jaˆ-eu meh.

¹⁸Muiˬ-eu shawˇ-eu miˇ tsaˬ pehˇ tsahˇ-euˬ laꞈ oˆ dzaˬ-ahˇ tuˆ ni tsoˆ-euˬ meuˬ kʼoeˇ meuˬ-euˬ miˇ tsaˬ dehˬ doˆ gʼaˬ ngeh, miˇ tsaˬ kʼoeˇ tsahˇ laꞈ kʼoeˇ dzeˇ laˇ-euˬ miˇ tsaˬ-aˬ, nahˇ ma doˆ kʼehˬ paw nyiˬ heˇ ngaˬ yaˇ lmˇ hawˇ-eu, nahˇ ma ga kʼehˬ paw nyiˬ heˇ ngaˬ yaˇ lmˇ meh. Yaw jeˇ paw tiˬ heˇ nyiˬ yaˇ ngaˬ tseˇ lmˇ byah-eu meh. Kʼoeˇ-aˬ, meuˬ kʼoeˇ meuˬ-ahˇ jawˇ-eu tsawˇ haˬ deuˬ mˇ dzaˬ-eu gʼaˇ duˬ meh.

¹⁹Meuˬ kʼoeˇ meuˬ-ahˇ kʼaˇ jawˇ-eu tsawˇ haˬ aˬ geu gʼaˬ maˬ kaˬ, tsawˇ jeuˬ maˬ tseˇ paˆ ni miˇ tsaˬ kʼoeˇ tsahˇ-ahˇ mˇ dzaˬ nya-eu meh.

²⁰Miˇ kʼahˬ-euˬ gʼahˇ ceh nyiˬ paˆ-ehˇ dehˬ doˆ taˬ-euˬ miˇ tsaˬ kʼoeˇ tsahˇ-ahˇ, meuˬ kʼoeˇ meuˬ ahˇ leˇ-ehˇ, pehˇ tsahˇ tsahˇ lah-ehˇ dehˬ haw ngeh, koꞈ heˇ nyiˬ yaˇ ngaˬ tseˇ lmˇ oeˬ bawˬ byah-eu meh.

²¹Muiˬ-eu shawˇ-eu miˇ tsaˬ kʼoeˇ tsahˇ-euˬ kʼoeˇ dzeˇ heu dzeˇ dzehˬ laˇ-euˬ miˇ tsaˬ hawˇ-eu, meuˬ kʼoeˇ meuˬ laꞈ kʼoeˇ jaˆ-eu myawˬ gahˬ deuˬ-aˬ, dzoeˬ dzaˬ-eu sahˬpaˬ zaˬ yo-euˬ mˇ myawˬ meh. Koꞈ heˇ nyiˬ yaˇ ngaˬ tseˇ lmˇ byah-eu miˇ tsaˬ kʼoeˇ tsahˇ-ahˇ neh, nahˇ ma doˆ kʼehˬ paw jaˆ-eu miˇ kaˬ-ahˇ keuˆ ni maˬ ehˇ, nahˇ ma ga kʼehˬ paw Gʼahˇ ceh-euˬ iˬ ma laˆ shaˆ-ahˇ keuˆ ni maˬ ehˇ, dzoeˬ dzaˬ-eu sahˬpaˬ zaˬ yo-euˬ miˇ tsaˬ meh. Uˬ duˬ tahˬ nymˇ nymˇ ma tsoˆ taˬ-euˬ muiˬ-eu shawˇ-eu miˇ tsaˬ kʼoeˇ tsahˇ-aˬ, aˬ yawꞈ-euˬ miˇ tsaˬ gʼahˇ ceh jaˆ-eu meh.

²²Kʼoeˇ miˇ neh, Leˬbiˇ tsawˇ haˬ deuˬ-euˬ myawˬ gahˬ hawˇ-eu meuˬ kʼoeˇ meuˬ-euˬ myawˬ gahˬ deuˬ-aˬ, dzoeˬ dzaˬ-eu sahˬpaˬ zaˬ yo-euˬ miˇ tsaˬ gʼahˇ ceh jaˆ-eu meh. Dzoeˬ dzaˬ-eu sahˬpaˬ zaˬ yo-euˬ miˇ tsaˬ kʼoeˇ-aˬ, Yuˇdaˆ tsawˇ jeuˬ-euˬ miˇ tsaˬ hawˇ-eu Beˬyaˬmiˬ tsawˇ jeuˬ-euˬ miˇ tsaˬ yaw kaˬ-ahˇ jaˆ-eu meh.

²³Muiˬ-eu shawˇ-eu miˇ tsaˬ kʼoeˇ tsahˇ-euˬ laꞈ oˆ paw nahˇ ma doˆ kʼehˬ ga kʼehˬ-ehˇ miˇ kaˬ taꞈ taꞈ-ehˇ jaˆ ka leꞈ-euˬ, Iˇsaˬleˬlaˆ tsawˇ jeuˬ nui deuˬ-ahˇ oꞈ-eu miˇ tsaˬ deuˬ-aˬ, heu loꞈ-ehˇ meh. Miˇ tsaˬ yaw beh tsahˇ-aˬ, Beˬyaˬmiˬ tsawˇ jeuˬ-euˬ miˇ tsaˬ meh.

²⁴Beˬyaˬmiˬ tsawˇ jeuˬ-euˬ miˇ tsaˬ laꞈ oˆ, Suˇmoˬ tsawˇ jeuˬ-euˬ miˇ tsaˬ jaˆ-eu meh.

²⁵Suˇmoˬ tsawˇ jeuˬ-euˬ miˇ tsaˬ laꞈ oˆ, Iˇsaˬleˬlaˆ tsawˇ jeuˬ-euˬ miˇ tsaˬ jaˆ-eu meh.

²⁶Iˇsaˬleˬlaˆ tsawˇ jeuˬ-euˬ miˇ tsaˬ laꞈ oˆ, Zeˬbuˬloˬ tsawˇ jeuˬ-euˬ miˇ tsaˬ jaˆ-eu meh.

²⁷Zeˬbuˬloˬ tsawˇ jeuˬ-euˬ miˇ tsaˬ laꞈ oˆ, Gaˆ tsawˇ jeuˬ-euˬ miˇ tsaˬ jaˆ-eu meh.

²⁸Gaˆ tsawˇ jeuˬ-euˬ miˇ tsaˬ laꞈ oˆ dzaˬ miˇ kaˬ-aˬ, Taˬmaˬ meuˬ-ahˇ neh dahˬ beh-awˇ, Meˬliˇbaˆkaˬdeˬshaˇ lawˇ gawˆ deuˬ jaˆ gaˇ neh, Iˇjiˇtuˆ lawˇ baˬ caw caw-ehˇ, Gʼahˇ ceh-euˬ iˬ ma laˆ shaˆ-ahˇ keuˆ ni meh.

²⁹“Kʼoeˇ loꞈ-ehˇ jahˇ-awˇ, Iˇsaˬleˬlaˆ tsawˇ jeuˬ deuˬ-ahˇ miˇ kʼahˬ kʼoeˇ kʼahˬ ya biˇ nehˬ meh” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

³⁰Yeˬluˇsaˬlehˬ meuˬ-ahˇ neh laꞈ nyiˇ iˇ doˆ-eu gʼoˆ kʼehˬ deuˬ-aˬ, heu loꞈ-ehˇ meh. Laꞈ taˆ paw pyawˬ meuˬ lahˇ-aˬ, tiˬ heˇ tiˬ yaˇ nyiˬ tseˇ ngaˬ lmˇ byah-eu meh.

³¹Kʼoeˇ pyawˬ-ahˇ lahˇ kʼehˬ smˇ kʼehˬ dahˇ-awˇ, Luˇbeˬ lahˇ kʼehˬ, Yuˇdaˆ lahˇ kʼehˬ hawˇ-eu, Leˬbiˇ lahˇ kʼehˬ lehˇ myahˇ nehˬ taˬ-euˬ meh. Meuˬ-euˬ lahˇ kʼehˬ dawˬ tawˆ luꞈ-ahˇ, Iˇsaˬleˬlaˆ tsawˇ jeuˬ deuˬ-euˬ tsawˇ myahˇ biꞈ taˬ-euˬ meh.

³²Nahˇ ma doˆ kʼehˬ paw pyawˬ meuˬ lahˇ tiˬ heˇ tiˬ yaˇ nyiˬ tseˇ ngaˬ lmˇ byah-awˇ, Yoˇsehˆ lahˇ kʼehˬ, Beˬyaˬmiˬ lahˇ kʼehˬ hawˇ-eu, Daˬ lahˇ kʼehˬ lehˇ myahˇ-euˬ lahˇ kʼehˬ smˇ kʼehˬ dahˇ-eu meh.

³³Laꞈ oˆ paw pyawˬ meuˬ lahˇ tiˬ heˇ tiˬ yaˇ nyiˬ tseˇ ngaˬ lmˇ byah-awˇ, Suˇmoˬ lahˇ kʼehˬ, Iˇsaˬleˬlaˆ lahˇ kʼehˬ hawˇ-eu, Zeˬbuˬloˬ lahˇ kʼehˬ lehˇ myahˇ-euˬ lahˇ kʼehˬ smˇ kʼehˬ dahˇ-eu meh.

³⁴Nahˇ ma ga kʼehˬ paw pyawˬ lahˇ kʼehˬ tiˬ heˇ tiˬ yaˇ nyiˬ tseˇ ngaˬ lmˇ byah-awˇ, Gaˆ lahˇ kʼehˬ, Aˬshaˬ lahˇ kʼehˬ hawˇ-eu, Naˬtaˬliˇ lahˇ kʼehˬ lehˇ myahˇ-euˬ lahˇ kʼehˬ smˇ kʼehˬ dahˇ-eu meh.

³⁵Meuˬ meuˬ lahˇ tiˬ jawˬ oeˬ heˇ ngaˬ yaˇ lmˇ byah-eu meh. Aˬ kaˇ naˇ, meuˬ kʼoeˇ meuˬ-euˬ tsawˇ myahˇ-aˬ, “ Sahˬpaˬ Miˬyehˇ heu gaˇ jawˇ meh” lehˇ ya kuˇ paˇ tehꞈ-a.