Read Akha Yeˬsaˬgeˬlaˇ 5 Bible Online

Yeˬsaˬgeˬlaˇ 5 - Akha bible

Yeˬsaˬgeˬlaˇ 5

¹Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ zaˬ-oˇ, mi cehˇ yaw taˆ tiˬ kahˇ yuˇ-awˇ, nawˬ-euˬ mehˬ mahˬ hawˇ-eu nawˬ-euˬ uˬ duˬ tsehˇ kahˇ jehˆ dzeh-awˬ.

²Nawˬ-euˬ uˬ duˬ tsehˇ kahˇ smˬ bymˇ saˆ paˆ-awˬ. Meuˬ-ahˇ loꞈ jawˬ-euˬ aˇ yamˬ jiˇ ngeh, tiˬ bymˇ keuˬ dzeh-awˬ. Tiˬ bymˇ-aˬ, meuˬ-euˬ laꞈ nyiˇ nawˇ cah ngeh, mi cehˇ neh byehˆ byehˆ-ehˇ cah-awˬ. Tiˬ bymˇ-aˬ, jaˬ lehˇ laꞈ kʼoeˇ byaˆ gʼeh-awˬ. Kʼoeˇ-euˬ mehˬ nah ngaˬ-euˬ mi cehˇ neh ngaˇ caw teh gʼeh ma.

³Uˬ duˬ tsehˇ kahˇ ui cuiˆ yuˇ doˆ yaꞈ-awˇ, nawˬ-euˬ pehˇ kʼahˬ pehˇ dahˬ-ahˇ nyehꞈ toeˆ taˬ-awˬ.

⁴Kʼoeˇ naˇ, ui cuiˆ paˇ yuˇ doˆ-awˇ, miˬ dzaˬ-ahˇ dawˆ puiˆ-awˬ. Kʼoeˇ gaˇ neh miˬ dzaˬ doꞈ nyehˆ laˇ-awˇ, Iˇsaˬleˬlaˆ miˇ kʼahˬ kʼahˬ lah ni byah-iˇ tehꞈ-a.”

⁵Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu, “Yeˬluˇsaˬlehˬ meuˬ-ahˇ haw sheˇ. Aˬ yawꞈ-ahˇ ngaˇ miˇ tsaˬ-euˬ gʼahˇ ceh bi jaˆ-awˇ, aˬ cawˬ miˇ kʼahˬ deuˬ aˬ yawꞈ-euˬ tiˬ jawˬ bi jaˆ-euˬ ma.

⁶Ehˇ kʼawꞈ, Yeˬluˇsaˬlehˬ ngaˬ-euˬ zahˇ dawˬ kʼoꞈ dawˬ-ahˇ puiˬ-awˇ, aˬ cawˬ tsawˇ jeuˬ naˆ maˬ tseˇ haiˬ-awˇ aˬ yawꞈ-euˬ tiˬ jawˬ jaˆ-eu miˇ kʼahˬ deuˬ naˆ maˬ tseˇ naˬ bawˇ tuˇ-eu gaˇ kawˆ bi siˬ bi mawˇ laꞈ-euˬ meh. Ngaˬ-euˬ zahˇ dawˬ kʼoꞈ dawˬ-ahˇ aˬ yawꞈ byehˇ dzeh-awˇ, ngaˬ-euˬ zahˇ sahˇ kʼoꞈ-ahˇ aˬ yawꞈ maˬ caw teh-a.

⁷Yeˬluˇsaˬlehˬ-oˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ gaˇ nymˬ-mˇ naˇ haˬ-awˬ. Ngaˬ-euˬ zahˇ dawˬ kʼoꞈ dawˬ-ahˇ maˬ naˇ haˬ geuꞈ-ehˇ, ngaˬ-euˬ zahˇ sahˇ kʼoꞈ-ahˇ maˬ caw teh ni byehˇ-eu laꞈ kʼoeˇ nawˬ-euˬ tiˬ jawˬ jaˆ-eu miˇ kʼahˬ deuˬ naˆ maˬ tseˇ, nawˇ ngaˬ-ahˇ laˆ shaˬ nehˬ laꞈ-euˬ meh. Aˬ cawˬ tsawˇ jeuˬ-euˬ zahˇ sahˇ kʼoꞈ-ahˇ nawˇ caw teh-euˬ meh.

⁸Kʼoeˇ miˇ neh, ngaˇ nawˬ-ahˇ muiˇ-eu ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Tsawˇ jeuˬ dawˬ tawˆ luꞈ mehˬ shi, nawˬ-ahˇ ngaˇ yaˇ kʼaˬ daˇ ma.

⁹Ngaˇ bye dui dui-eu jeˬ mˇ-euˬ baˬ da neh, dzeuˇ laˇ ngeh tiˬ jawˇ-iˬ maˬ keuˆ le haw-ehˇ, aˬ kaˇ tiˬ jawˇ-iˬ maˬ paˇ keuˆ le-eu kʼehˬ-eu kʼaˆ-eu jeˬ, Yeˬluˇsaˬlehˬ meuˬ kʼoeˇ taˆ ngaˇ bi keuˆ le ma.

¹⁰Kʼoeˇ loꞈ-ehˇ jahˇ nehˬ ngeh jawˇ, Yeˬluˇsaˬlehˬ meuˬ-ahˇ jawˇ-eu deuˬ, aˬ ma aˬ da deuˬ zaˬ deuˬ-euˬ shaˬ jiˇ ya dzaˬ gaˇ keuˆ-awˇ, zaˬ deuˬ aˬ ma aˬ da-euˬ shaˬ jiˇ ya dzaˬ gaˇ keuˆ tehꞈ-a. Nawˬ-ahˇ ngaˇ kʼehˬ-awˇ, yawˬ paw na luꞈ byaˆ dzeh gʼeh ngeh, yaw dehꞈ-ehˇ aˬ suˇ gʼaˬ dzeuˇ-iˇ nya nmˇ.

¹¹“Kʼoeˇ miˇ neh, ngaˇ dehꞈ luꞈ-eu Miˬyehˇ pyeuꞈ-eu loꞈ-ehˇ, heu-aˬ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ-euˬ dawˬ ma. Ngaˬ-euˬ Uˬ duˬ tahˬ nymˇ nymˇ ma-ahˇ yaw haiˬ jeˬ neh nawˇ laˆ jawꞈ-euˬ miˇ neh, nawˬ neh mˇ-euˬ nuiˇ daˆ daˆ laˇ paˬ-ehˇ gʼeh-eu jeˬ aˇ poeˬ, nawˬ-ahˇ ngaˇ gʼawˬ shaˬ maˬ gaˬ ni deuˆ tsehˆ ma.

¹²Nawˬ-euˬ tsawˇ haˬ smˬ bymˇ tiˬ bymˇ-aˬ, naˇ-eu gawˇ-eu jeˬ hawˇ-eu mehꞈ-eu shuꞈ-eu jeˬ baˬ da neh meuˬ laꞈ kʼoeˇ ya shiˇ tehꞈ-a. Smˬ bymˇ tiˬ bymˇ-aˬ, meuˬ-euˬ laꞈ nyiˇ mi cehˇ neh bi sehꞈ tehꞈ-a. Dzeˇ-eu smˬ bymˇ tiˬ bymˬ-ahˇ jaˬ lehˇ laꞈ kʼoeˇ byaˆ dzeh-awˇ, ngaˬ-euˬ mi cehˇ neh caw teh ma.

¹³Ngaˇ nui kʼahˇ tiˬ shiˇ maˬ ya jahˇ nehˬ gʼaˬ kʼoeˇ keuˆ ni, ngaˬ-euˬ nui pehˇ naw maꞈ ya mawˇ duˬ tehꞈ-a. Kʼoeˇ loꞈ-ehˇ pyeuꞈ laˇ ngeh, naw maꞈ saˇ jaˇ maˬ ziꞈ gaˇ ngaˇ nui ma pehˇ dui dui-awˇ ehˇ luꞈ-eu ngaˇ lehˇ, naw maꞈ ya siˬ duˬ tehꞈ-a.

¹⁴Nawˬ-euˬ tiˬ jawˬ jawˇ-eu tsawˇ jeuˬ deuˬ kʼaˇ iˇ kʼaˇ laˇ tsehˆ ngeh, gaˇ mahˇ kaˬ gaˇ neh gaˇ jaw jaw-awˇ, cah tehꞈ-a.

¹⁵“Nawˬ-ahˇ ngaˇ nui ma pehˇ-awˇ kʼehˬ nehˬ kʼaˆ nehˬ ngeh, nawˬ-euˬ tiˬ jawˬ jawˇ-eu tsawˇ jeuˬ dawˬ tawˆ luꞈ tsawˬ guˆ-iˇ tehꞈ-a. Aˬ yawꞈ maꞈ nawˬ-ahˇ nui daˆ daˆ-awˇ, ja bu ja doeˇ tehꞈ-a.

¹⁶Nawˇ jawˇ gaˇ dzaˬ dzaˬ dawˇ dawˇ sha ahˇ-eu gaˇ ma ngaˇ laˆ tsoeˬ-awˇ, bi mehꞈ bi shuꞈ ma. Naw maꞈ-ahˇ bi laˆ cawˆ-eu gʼaˇ duˬ pyehˬ gʼeh leꞈ-euˬ taˆ dui dui-eu kaˆ myaˬ loꞈ-ehˇ, mehꞈ-eu shuꞈ-eu jeˬ-euˬ shaˬ zahˬ naw maꞈ ya daˬ tehꞈ-a.

¹⁷Nawˬ-euˬ zaˬ deuˬ-ahˇ bi sehꞈ-eu gʼaˇ duˬ, mehꞈ-eu shuꞈ-eu jeˬ hawˇ-eu bawˇ tsahˬ jeˬ zaˬ yaw haiˬ deuˬ-ahˇ ngaˇ pyehˬ gʼeh leꞈ-awˇ, naw maꞈ-ahˇ bi sehꞈ-eu gʼaˇ duˬ, naˇ-eu gawˇ-eu, shaˆ shiˇ hawˇ-eu, guiˇ deuˆ-eu jeˬ bi keuˆ le ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”