Read Akha Yeˬsaˬgeˬlaˇ 6 Bible Online

Yeˬsaˬgeˬlaˇ 6 - Akha bible

Yeˬsaˬgeˬlaˇ 6

¹Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh.

²“Tsawˇ haˬ zaˬ-oˇ, Iˇsaˬleˬlaˆ miˇ kʼahˬ gawˬ jawˬ deuˬ-ahˇ haw-awˇ, ngaˬ-euˬ dawˬ tsaꞈ gaˬ nehˬ-awˬ.

³Sahˬpaˬ Miˬyehˇ-euˬ ehˇ dawˬ naˇ haˬ-awˬ lehˇ, Iˇsaˬleˬlaˆ gawˬ jawˬ deuˬ-ahˇ ehˇ nehˬ-awˬ. Gawˬ jawˬ gawˬ duˇ, lo guˇ gʼaˬ lawˬ deuˬ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ nehˬ gaˇ naˇ haˬ-awˬ lehˇ ehˇ nehˬ-awˬ. Tahˬ pahˬ aˬ ma mawˇ kawˇ-ahˇ uˬ duˬ tahˬ-eu jawˇ duˬ deuˬ-ahˇ bi laˆ cawˆ-eu gʼaˇ duˬ, ngaˇ mi cehˇ bi oe ma.

⁴Lawˇ duˬ deuˬ bi laˆ cawˆ-awˇ, yaw saw jeˬ doꞈ damˬ duˬ bi ngawˬ kʼehꞈ jiˇ tehꞈ-a. Kʼoeˇ gaˇ jawˇ-eu tsawˇ haˬ dawˬ tawˆ luꞈ, aˬ yawꞈ maꞈ-euˬ lawˇ duˬ dawˬ peh bi sehꞈ tehꞈ-a.

⁵Iˇsaˬleˬlaˆ tsawˇ haˬ deuˬ yaw shiˇ-ehˇ bi ga byah ma. Aˬ yawꞈ maꞈ-euˬ shaˬ yoeˬ lawˇ duˬ kʼoeˇ deuˬ-euˬ tiˬ jawˬ byaˆ dzeh-awˇ bi ga ma.

⁶Iˇsaˬleˬlaˆ miˇ kʼahˬ-ahˇ kʼaˇ jaˆ-eu meuˬ deuˬ dawˬ tawˆ luꞈ bi laˆ cawˆ jiˇ ma. Kʼoeˇ ngeh jawˇ, aˬ yawꞈ maꞈ-euˬ lawˇ duˬ deuˬ hawˇ-eu aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ pyaˆ-iˇ shaˆ-iˇ jiˇ-awˇ, yaw saw jeˬ doꞈ damˬ duˬ kʼawꞈ cawˆ-iˇ jiˇ-awˇ, aˬ yawꞈ maꞈ-euˬ kuiˇ zaˇ laꞈ zaˇ dawˬ tawˆ luꞈ piˬ-iˇ byoˆ-iˇ jiˇ tehꞈ-a.

⁷Yawˬ gaˇ na luꞈ tsawˇ haˬ shiˇ-awˇ, maˬ shiˇ-ehˇ kʼaˇ dzeˇ-eu deuˬ, ngaˇ Sahˬpaˬ Miˬyehˇ pyeuꞈ-eu gaˇ kawˆ siˬ duˬ tehꞈ-a.

⁸“Tsawˇ haˬ tiˬ paˆ na deuˬ-ahˇ, maˬ bi sehꞈ ni bi dzeuˇ-iˇ-awˇ, aˬ cawˬ miˇ kʼahˬ laꞈ kʼoeˇ bi jawˇ byaˆ jiˇ ma.

⁹Aˬ cawˬ aˬ yawꞈ maꞈ-ahˇ kʼoeˇ gaˇ nyehꞈ gʼeh-awˇ bi jawˇ tehꞈ-a. Kʼoeˇ gaˇ, aˬ yawꞈ maꞈ ngaˬ-ahˇ noeˬ mawˇ laˇ-awˇ, aˬ yawꞈ maꞈ-euˬ saˇ jaˇ maˬ ziꞈ-eu nui ma ngaˬ-ahˇ byehˇ dzeh-awˇ, ngaˬ-ahˇ naˆ maˬ tseˇ tahˬ pahˬ aˬ ma mawˇ kawˇ deuˬ-ahˇ taˬ huiˬ-euˬ baˬ da neh, ngaˬ neh aˬ yawꞈ maꞈ-ahˇ kʼehˬ-euˬ nya lehˇ siˬ leˇ tehꞈ-a. Kʼoeˇ ngeh jawˇ, aˬ yawꞈ maꞈ neh mˇ dzeuˇ yaꞈ-euˬ yaw haiˬ jeˬ hawˇ-eu yaw cawˆ jeˬ-ahˇ noeˬ doˆ leˇ-awˇ, yawˬ haˇ yawˬ ha nui daˆ daˆ tehꞈ-a.

¹⁰Ngaˇ Sahˬpaˬ Miˬyehˇ aˬ diˇ pyeuꞈ-eu gaˇ kawˆ hawˇ-eu, ngaˬ neh kʼaˇ ehˇ taˬ-euˬ dawˬ deuˬ, ehˇ niˇ gʼa-eu jeˬ ma ngeuˇ-eu gaˇ kawˆ, aˬ yawꞈ maꞈ-ahˇ siˬ duˬ leˇ tehꞈ-a.”

¹¹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nawˬ-euˬ aˬ laꞈ yeuꞈ pyawˆ-awˇ, nawˬ-euˬ aˬ kuiˇ-ahˇ tsawˬ nawˬ nawˬ-awˬ. Iˇsaˬleˬlaˆ tsawˇ haˬ deuˬ neh kʼaˇ mˇ-euˬ nui daˆ daˆ laˇ paˬ-ehˇ gʼeh-eu yaw haiˬ jeˬ gʼaˇ duˬ noeˬ shaˬ-awˇ ngoeˇ-awˬ. Guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ laꞈ kʼoeˇ aˬ yawꞈ maꞈ ya shiˇ meh.

¹²Gaˇ mahˇ kaˬ gaˇ jawˇ-eu deuˬ naˇ gawˇ gawˇ sehꞈ-awˇ, dawˬ peh jawˇ-eu deuˬ guiˇ deuˆ gaˇ bi sehꞈ tehꞈ-a. Dzeuˇ-iˇ-euˬ deuˬ-aˬ, mehꞈ-eu shuꞈ-eu baˬ da neh ya shiˇ tehꞈ-a.

¹³Tahˬ pahˬ aˬ ma mawˇ kawˇ dawˬ peh hawˇ-eu lawˇ duˬ tiˬ jawˬ maˬ ehˇ, gawˬ duˇ yaw goˇ deuˬ-euˬ uˬ du doe ni maˬ ehˇ, gawˬ jawˬ uˬ duˬ yawˬ gaˇ na luꞈ maˬ ehˇ, naˇ shmˇ kʼaˇ muiˬ-eu aˇ bawˇ yawˬ bawˇ na luꞈ maˬ ehˇ, tsuiꞈ kaˆ bawˇ ma kʼaˇ jaˆ-eu uˬ moˆ maˬ ehˇ, aˬ yawꞈ maꞈ neh tahˬ pahˬ aˬ ma mawˇ kawˇ-ahˇ kʼaˇ lawˇ kʼaˇ shehˇ-euˬ jawˇ duˬ doe ni maˬ ehˇ, tsawˇ shiˇ ga byah tehꞈ-a. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ, yawˬ gʼaˬ na luꞈ ya siˬ duˬ tehꞈ-a.

¹⁴Ngaˬ-euˬ aˬ laꞈ cawˬ ja-awˇ, aˬ yawꞈ maꞈ-euˬ miˇ kʼahˬ-ahˇ laˆ cawˆ nehˬ ma. Laꞈ oˆ paw pyawˬ-ahˇ jaˆ-eu kʼaˇ shuiꞈ deh-ahˇ neh, laꞈ taˆ paw Yiˇbaˬlahˬ meuˬ-ahˇ keuˆ ni, Iˇsaˬleˬlaˆ tsawˇ haˬ deuˬ kʼaˇ jawˇ-euˬ jawˇ duˬ tiˬ tsahˇ-iˬ maˬ bi dzeuˇ-iˇ ni bi cawˆ-iˇ jiˇ-awˇ ciˬ cuˇ ni bi pyeuꞈ-iˇ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ, yawˬ gʼaˬ na luꞈ ya siˬ duˬ tehꞈ-a.”