Read Akha Yeˬsaˬgeˬlaˇ 9 Bible Online

Yeˬsaˬgeˬlaˇ 9 - Akha bible

Yeˬsaˬgeˬlaˇ 9

¹Kʼoeˇ naˇ, Miˬyehˇ heu loꞈ-ehˇ guˇ-eu ngaˇ gaˬ-euˬ ma. “Meuˬ kʼoeˇ meuˬ-ahˇ kʼehˬ nehˬ kʼaˆ nehˬ leˇ-eu lehˇ gʼeh-eu deuˬ heu gaˇ laˇ uiˬ jiˇ-awˬ. Naw maꞈ-euˬ guiˇ deuˆ-eu keu ka deuˬ kʼawꞈ yuˇ laꞈ-awˬ.”

²Ja pyuˬ ni, Uˬ duˬ tahˬ nymˇ nymˇ ma-euˬ laꞈ taˆ paw pyawˬ-ahˇ jaˆ-eu lahˇ kʼehˬ laꞈ nyiˇ kʼehˬ-ahˇ neh, tsawˇ haˬ koꞈ gʼaˬ doˆ le-euˬ meh. Yawˬ gʼaˬ na luꞈ guiˇ deuˆ-eu keu ka baꞈ luꞈ-eu meh. Aˬ yawꞈ maꞈ nehˬ-ehˇ, shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ dm-awˇ, sahˬ boꞈ boꞈ-eu jeˬ yuˇ luꞈ-eu tiˬ gʼaˬ ahˇ-eu meh. Aˬ yawꞈ maꞈ yawˬ gʼaˬ na luꞈ oe-awˇ, guiˬ shuiˇ neh jahˇ taˬ-euˬ lawˇ duˬ dawˬ peh yawꞈ le-euˬ meh.

³Kʼoeˇ naˇ, Jeˬluˇbeˬ[3] kʼoeˇ taˆ jawˇ-eu Iˇsaˬleˬlaˆ Miˬyehˇ-euˬ yaw shehꞈ kʼahˬ sehˇ kʼoeˇ, naˬ leˇ taˬ-euˬ gaˇ neh luˆ laˇ-awˇ, Uˬ duˬ tahˬ nymˇ nymˇ ma -ahˇ uˇ leˇ-eu gʼoˆ kʼehˬ jaˆ gaˇ jiˆ le-euˬ meh. Shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ dm luꞈ-eu gʼaˬ-ahˇ, Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁴“Yeˬluˇsaˬlehˬ meuˬ uˇ doe-awˇ, meuˬ laꞈ kʼoeˇ jawꞈ dui dui-eu jeˬ mˇ-euˬ baˬ da neh, nui ma cawˆ-awˇ noeˬ shaˬ noeˬ zahˬ luꞈ-eu tsawˇ haˬ yawˬ gʼaˬ na luꞈ-euˬ naˇ kʼawˇ-ahˇ, tsaˬ tsoˆ taˬ-iˇ-awˬ.”

⁵Kʼoeˇ naˇ, nui deuˬ-ahˇ Miˬyehˇ heu loꞈ-ehˇ ehˇ nehˬ-eu ngaˇ gaˬ-euˬ ma. “Naw maꞈ aˬ yawꞈ-euˬ mehˬ nah caw teh gʼeh-awˇ, tsawˇ haˬ sehꞈ-iˇ-awˬ. Tiˬ gʼaˬ-iˬ maˬ bi dzeuˇ-iˇ ni sehꞈ-awˬ. Tiˬ gʼaˬ-ahˇ-iˬ gʼawˬ shaˬ taˬ gaˬ nehˬ.

⁶“Tsawˇ mawˬ deuˬ, aˬ li zaˬ guˬ deuˬ, aˬ buˇ zaˬ guˬ deuˬ, aˬ ma deuˬ hawˇ-eu, zaˬ deuˬ dawˬ tawˆ luꞈ-ahˇ sehꞈ jiˇ-awˬ. Ehˇ kʼawꞈ, naˇ kʼawˇ-ahˇ tsaˬ tsoˆ taˬ-euˬ tsawˇ haˬ deuˬ-ahˇ taˬ sehꞈ. Heu gaˇ, ngaˬ-euˬ Uˬ duˬ tahˬ nymˇ nymˇ ma -ahˇ neh aˇ dahˬ beh-awˇ, sehꞈ ka gʼeh-awˬ.” Kʼoeˇ naˇ, Uˬ duˬ tahˬ nymˇ nymˇ ma-ahˇ yawꞈ luꞈ-eu aˬ yuiꞈ aˬ tsu deuˬ-ahˇ neh aˇ dahˬ beh-awˇ, aˬ yawꞈ maꞈ tsawˇ haˬ sehꞈ ka gʼeh-euˬ meh.

⁷Aˬ yawꞈ maꞈ-ahˇ Miˬyehˇ ehˇ nehˬ-eu, “Uˬ duˬ tahˬ nymˇ nymˇ ma-euˬ pu ka tsawˇ haˬ sehꞈ byah gʼeh-eu laꞈ kʼoeˇ, Uˬ duˬ tahˬ nymˇ nymˇ ma-ahˇ laˆ jawꞈ nehˬ-awˬ. Tsawˇ haˬ sehꞈ-eu dawꞈ leˇ-awˬ.” Kʼoeˇ ngeh, aˬ yawꞈ maꞈ meuˬ laꞈ kʼoeˇ jawˇ-eu tsawˇ haˬ deuˬ-ahˇ sehꞈ-eu aˇ dahˬ beh-euˬ meh.

⁸Tsawˇ haˬ sehꞈ dui dui luꞈ ngeh, ngaˇ tiˬ gʼaˬ tehꞈ-ehˇ kʼoeˇ gaˇ jawˇ luꞈ-eu ma. Ngaˇ moꞈ tsahˬ-ehˇ miˇ tsa coˬ lah-awˇ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, aˬ cawˬ miˇ kʼahˬ-ahˇ maˬ bi nyehꞈ byoˆ gʼeh ni, Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ yaꞈ-euˬ tsawˇ haˬ dawˬ tawˆ luꞈ-ahˇ sehꞈ jiˇ paˬ-ehˇ, Yeˬluˇsaˬlehˬ meuˬ-ahˇ nawˇ teuˆ naˆ naˆ-ehˇ nui ma pehˇ te loˇ” lehˇ guˇ-euˬ ma.

⁹Miˬyehˇ ehˇ-eu, “Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-aˬ, guˆ dui dui laˇ paˬ-ehˇ gʼeh-eu iˬ baˇ mˇ-euˬ meh. Miˇ kʼahˬ kʼahˬ lah ni tsawˇ haˬ sehꞈ-eu jeˬ aˬ yawꞈ maꞈ mˇ byah-awˇ, Yeˬluˇsaˬlehˬ meuˬ laꞈ kʼoeˇ yaw haiˬ jeˬ mˇ byah taˬ-euˬ meh. Sahˬpaˬ Miˬyehˇ pyeuꞈ-eu ngaˇ aˬ yawꞈ maꞈ-euˬ miˇ kʼahˬ-ahˇ byehˇ dzeh-awˇ, ngaˇ aˬ yawꞈ maꞈ-ahˇ maˬ mawˇ nya-a lehˇ, aˬ yawꞈ maꞈ ehˇ-eu meh.

¹⁰Kʼoeˇ miˇ neh, aˬ yawꞈ maꞈ-ahˇ ngaˇ gʼawˬ shaˬ maˬ gaˬ nehˬ. Aˬ yawꞈ maꞈ neh aˬ cawˬ-ahˇ jahˇ nehˬ taˬ-euˬ jaˆ-eu loꞈ-ehˇ, aˬ yawꞈ maꞈ-ahˇ ngaˇ jahˇ nehˬ ma.”

¹¹Kʼoeˇ naˇ, shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ dm luꞈ-eu gʼaˬ gʼoꞈ laˇ-awˇ, “Nawˬ neh dawˬ biꞈ-euˬ loꞈ-ehˇ, ngaˇ mˇ gʼaˬ-euˬ ma” lehˇ ehˇ gaˬ laˇ-euˬ meh.