Read Akha Daˬyeˬlaˇ 1 Bible Online

Daˬyeˬlaˇ 1 - Akha bible

Daˬyeˬlaˇ 1

¹DAˬYEˬLAˇ HAWˇ-EU Aˬ YAWꞈ-EUˬ CAWˬ DEUˬ GAˇ KAWˆ Yuˇdaˆ miˇ kʼahˬ-ahˇ Yeˬhawˇyaˬkmˬ sahˬ paˬ geuꞈ-awˇ uˆ lahˇ-euˬ smˇ kʼoꞈ tiˬ kʼoꞈ-ahˇ, Baˬbuˇloˬ sahˬ paˬ Neˬbuˬkaˬneˬzaˬ Yeˬluˇsaˬlehˬ meuˬ-ahˇ guiˇ deuˆ le-awˇ, loꞈ jawˬ taˬ-euˬ meh.

²Sahˬpaˬ Miˬyehˇ neh aˬ yawꞈ-ahˇ sahˬ paˬ Yeˬhawˇyaˬkmˬ-ahˇ bi nyehꞈ mi-awˇ, Uˬ duˬ tahˬ nymˇ nymˇ ma-ahˇ jaˆ-eu pyuˇ shuiˇ myawˬ gahˬ tiˬ paˆ na deuˬ bi yuˇ geuꞈ-euˬ meh. Tsawˇ haˬ tiˬ paˆ na deuˬ-ahˇ nyehꞈ-awˇ, Baˬbuˇloˬ miˇ kʼahˬ-ahˇ jawˇ-eu aˬ yawꞈ-euˬ miˬ yehˇ deuˬ-euˬ uˬ duˬ tahˬ nymˇ-ahˇ nyehꞈ kʼoꞈ gʼeh-awˇ, guiˇ deuˆ za-euˬ pyuˇ shuiˇ myawˬ gahˬ deuˬ, uˬ duˬ tahˬ nymˇ kʼoeˇ deuˬ laꞈ kʼoeˇ jaˆ-eu myawˬ jeˬ hmˬ-eu kuˆ lawˆ deuˬ laꞈ kʼoeˇ bi jaˆ-euˬ meh.

³Iˇsaˬleˬlaˆ miˇ kʼahˬ-ahˇ neh nyehꞈ kʼoꞈ laꞈ-euˬ tsawˇ haˬ deuˬ laꞈ kʼoeˇ, sahˬ paˬ aˇ jeuˬ hawˇ-eu yaw huiˬ yaw mahˇ aˇ jeuˬ zaˬ guˬ heu myaˆ gʼaˬ tseˇ doˆ-eu gʼaˇ duˬ, sahˬ paˬ-euˬ gaˇ mˇ-eu yaw huiˬ yaw mahˇ deuˬ laꞈ kʼoeˇ aˬ cawˬ naˆ maˬ tseˇ huiˬ-eu gʼaˬ pyeuꞈ-eu Aˬshaˇpeˬnaˆ-ahˇ, sahˬ paˬ dawˬ biꞈ-euˬ meh.

⁴Aˬ yawꞈ maꞈ-aˬ, sahˬ paˬ-euˬ hawˇ nymˇ laꞈ kʼoeˇ gaˇ mˇ nya ni, tsawˇ haˬ aˇ gʼehˇ muiˬ-awˇ, zaˬ siˬ nui gahˇ ahˇ-eu uˬ taꞈ, dzaw bym taˬ-euˬ deuˬ ya bi pyeuꞈ-awˇ, kʼaˇ mehˬ nehˬ-eu jeˬ-ahˇ yaw kawˇ-ehˇ gʼoˆ siˬ gʼoˆ shaw nya-eu tsawˇ haˬ ya bi pyeuꞈ-eu meh. Kʼoeˇ uˬ taꞈ, pyawˬ naˬ mawˇ do ehˇ kʼaˇ maˬ za-eu tsawˇ haˬ ya biˬ pyeuꞈ-eu meh. Aˬ yawꞈ maꞈ Baˬbuˇloˬ dawˬ boꞈ nya gui nya laˇ ni, Aˬshaˇpeˬnaˆ ya mehˬ meh lehˇ ehˇ taˬ-euˬ meh.

⁵Sahˬ paˬ-euˬ hawˇ nymˇ laꞈ kʼoeˇ jawˇ-eu tsawˇ haˬ deuˬ dzaˬ-eu dzaˇ hawˇ-eu aˬ gaꞈ dzaˇ uiˇ deuˬ, aˬ yawꞈ nah yawꞈ aˬ yawꞈ maꞈ-ahˇ ya bi dzaˬ ya bi dawˇ meh lehˇ, sahˬ paˬ neh dawˬ biꞈ-euˬ meh. Smˇ kʼoꞈ smˬ myaˇ kʼoeˇ loꞈ-ehˇ dzaw gʼaˬ sawˇ gʼaˬ ngeh jawˇ, sahˬ paˬ-euˬ mehˬ shi aˬ yawꞈ maꞈ ya le-eu meh.

⁶Tseˇ doˆ-euˬ tsawˇ haˬ deuˬ laꞈ kʼoeˇ, Daˬyeˬlaˇ, Haˬnaˬniˇyaˆ, Miˇsheˬlaˇ, Aˬzaˬyiˇ aˬ ha oeˬ gʼaˬ kʼawꞈ ahˇ-eu meh. Aˬ yawꞈ maꞈ oeˬ gʼaˬ luꞈ, Yuˇdaˆ tsawˇ jeuˬ pyeuꞈ-eu meh.

⁷Sahˬ paˬ-euˬ gaˇ mˇ-eu yaw huiˬ yaw mahˇ dawˬ tawˆ luꞈ kʼoeˇ taˆ huiˬ dzehˬ-eu yaw huiˬ yaw mahˇ kʼoeˇ gʼaˬ neh, aˬ yawꞈ maꞈ-euˬ tsawˇ myahˇ Beˬteˬshaˬzaˬ, Shaˬdaˬlaˆ, Meˬshaˆ, Aˬbeˬdaˬneˬgoˬ lehˇ myahˇ paˇ nehˬ-euˬ meh.

⁸Sahˬ paˬ-euˬ hawˇ nymˇ-ahˇ jaˆ-eu dzaˇ hawˇ-eu aˬ gaꞈ dzaˇ uiˇ deuˬ-ahˇ dzaˬ-eu dawˇ-eu laꞈ kʼoeˇ, aˬ yawꞈ-euˬ gʼawˇ mawˇ maˬ muiˬ maˬ shawˇ-ehˇ pyeuꞈ-iˇ ni maˬ jahˇ lehˇ, Daˬyeˬlaˇ noeˬ tsehˆ-euˬ meh.[1] Kʼoeˇ miˇ neh, aˬ yawꞈ-ahˇ gʼawˬ shaˬ gaˬ nehˬ laꞈ-eu laꞈ kʼoeˇ, sahˬ paˬ hawˇ nymˇ-ahˇ dzaˬ-eu dzaˇ deuˬ maˬ dzaˬ ni ya jawˇ-eu gʼaˇ duˬ, Aˬshaˇpeˬnaˆ-ahˇ aˬ yawꞈ shaˇ-euˬ meh.

⁹Aˬshaˇpeˬnaˆ Daˬyeˬlaˇ-ahˇ gʼawˬ shaˬ gaˬ-eu nui ma ahˇ laˇ ni, Miˬyehˇ jahˇ-euˬ meh.

¹⁰Ehˇ kʼawꞈ, Aˬshaˇpeˬnaˆ sahˬ paˬ-ahˇ guˆ-eu miˇ neh, Daˬyeˬlaˇ-ahˇ ehˇ-eu, “Naw maꞈ-ahˇ aˬ joˆ-ehˇ ya bi dzaˬ ya bi dawˇ-eu gaˇ kawˆ sahˬ paˬ neh ehˇ tsehˆ taˬ-euˬ jaˆ-eu meh. Aˬ kaˇ zaˬ guˬ nui deuˬ loꞈ-ehˇ naw maꞈ shiˬ shaˬ maˬ muiˬ ni pyeuꞈ-iˇ naˇ, sahˬ paˬ ngaˬ-ahˇ sehꞈ tehꞈ-a.”

¹¹Kʼoeˇ naˇ, Daˬyeˬlaˇ-aˬ, Aˬshaˇpeˬnaˆ neh aˬ yawꞈ hawˇ-eu aˬ yawꞈ-euˬ cawˬ smˇ gʼaˬ-ahˇ bi haw-euˬ loꞈ-eu tsawˇ haˬ kʼoeˇ gʼaˬ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh.

¹²“Nga maꞈ-ahˇ tseˇ nah lawˬ haw nehˬ laꞈ. Nga maꞈ-ahˇ gʼawˬ paꞈ gʼawˬ nyoeˇ hawˇ-eu iˇ cuꞈ tehꞈ-ehˇ bi dzaˬ bi dawˇ laꞈ.

¹³Kʼoeˇ naˇ, sahˬ paˬ-euˬ hawˇ nymˇ-ahˇ dzaˬ-eu dzaˬ dzaˬ dawˇ dawˇ tehꞈ-ehˇ dzaˬ luꞈ-eu zaˬ guˬ nui deuˬ nehˬ-ehˇ, nga maꞈ-ahˇ ciˬ cehˆ haw-awˇ, nga maꞈ-ahˇ nawˇ aˬ joˆ-ehˇ jahˇ paˬ nga lehˇ jahˇ neh laꞈ-awˬ.”

¹⁴Aˬ yawꞈ maꞈ-ahˇ tseˇ nah keuˆ ni kʼoeˇ loꞈ-ehˇ lawˬ haw-eu gʼaˇ duˬ, aˬ yawꞈ nui ma tsaˬ-euˬ meh.

¹⁵Aˇ nah byah laˇ ngeh jawˇ, sahˬ paˬ-euˬ hawˇ nymˇ-ahˇ dzaˬ-eu dzaˇ deuˬ-ahˇ dzaˬ-euˬ zaˬ guˬ deuˬ naˆ maˬ tseˇ, aˬ yawꞈ maꞈ shiˬ shaˬ muiˬ dzehˬ gaˇ ya mawˇ-euˬ meh.

¹⁶Kʼoeˇ ngeh nah neh naˇ, sahˬ paˬ neh biꞈ-euˬ dzaˇ maˬ dzaˬ ni, gʼawˬ paꞈ gʼawˬ nyoeˇ bi dzaˬ-eu gʼaˇ duˬ, aˬ yawꞈ maꞈ-ahˇ loꞈ-eu kʼoeˇ gʼaˬ nui ma tsaˬ-eu meh.

¹⁷Sahˬ boꞈ hawˇ-eu shaˇ noeˬ-eu tsawˇ gahˇ paw nya-iˇ ni, zaˬ guˬ kʼoeˇ oeˬ gʼaˬ-ahˇ Miˬyehˇ zaˬ siˬ nui gahˇ biꞈ-euˬ meh. Kʼoeˇ uˬ taꞈ, yaw sahˇ laꞈ kʼoeˇ ya siˬ ya mawˇ-euˬ jeˬ hawˇ-eu yuꞈ maˆ maˆ mawˇ-euˬ jeˬ-ahˇ dawˬ tsuiꞈ yuˇ doˆ nya-eu tsawˇ gahˇ, Daˬyeˬlaˇ-ahˇ Miˬyehˇ biꞈ-euˬ meh.

¹⁸Sahˬ paˬ neh biꞈ-euˬ aˇ yamˬ smˇ kʼoꞈ byah laˇ ngeh, zaˬ guˬ dawˬ tawˆ luꞈ-ahˇ sahˬ paˬ Neˬbuˬkaˬneˬzaˬ jawˇ gaˇ Aˬshaˇpeˬnaˆ sheuˬ gʼeh-euˬ meh.

¹⁹Aˬ yawꞈ maꞈ dawˬ tawˆ luꞈ-ahˇ sahˬ paˬ dawˬ ngehˬ cawˬ haw ngeh, Daˬyeˬlaˇ, Haˬnaˬniˇyaˆ, Miˇsheˬlaˇ, Aˬzaˬliˇ aˬ ha oeˬ gʼaˬ, aˬ cawˬ naˆ maˬ tseˇ nya dzehˬ gaˇ ya mawˇ-euˬ meh. Kʼoeˇ ngeh jawˇ aˬ yawꞈ maꞈ sahˬ paˬ-euˬ hawˇ nymˇ laꞈ kʼoeˇ gaˇ mˇ-eu tsawˇ haˬ pyeuꞈ laˇ-euˬ meh.

²⁰Sahˬ paˬ neh kʼaˇ naˇ haˬ-euˬ dawˬ deuˬ hawˇ-eu, zaˬ siˬ tsawˇ gahˇ kʼaˇ pyehˆ tseˇ haw-euˬ yawˬ jeˬ na luꞈ laꞈ kʼoeˇ, miˇ kʼahˬ kʼoeˇ kʼahˬ-ahˇ kʼaˇ jawˇ-eu nyiˇ paˬ shaˆ ma dawˬ tawˆ luꞈ naˆ maˬ tseˇ, aˬ ha oeˬ gʼaˬ tseˇ bymˇ nya dzehˬ gaˇ ya mawˇ-euˬ meh.

²¹Paˇshaˇ sahˬ paˬ Guˇluˆ neh Baˬbuˇloˬ miˇ kʼahˬ-ahˇ deuˆ gʼaˬ ngeh keuˆ ni, sahˬ paˬ-euˬ gaˇ-ahˇ Daˬyeˬlaˇ mˇ mˇ-ehˇ jawˇ-euˬ meh.